Haʼu moris iha data 22 Dezembru 1929 iha Noville, neʼe mak aldeia kiʼik ida neʼebé iha toʼos sia besik Bastogne, iha rai-Béljika. Bainhira haʼu kiʼik, haʼu sente kontente tebes hamutuk ho haʼu-nia inan-aman iha toʼos. Haʼu-nia alin Raymond no haʼu loroloron hois karau nia susubeen no ajuda iha toʼos bainhira tempu koʼa nian. Iha ami-nia aldeia, ema hotu serbisu hamutuk atu ajuda malu.

Haʼu-nia aman Emile no inan Alice, mak ema Katólika. Domingu-domingu sira tuir misa. Maibé maizumenus iha tinan 1939, pioneiru ida husi rai-Inglaterra mai iha ami-nia aldeia no fó ba apá revista Consolation (agora bolu nuʼudar Matan-moris bá!). Apá rekoñese kedas katak revista neʼe fó sai buat neʼebé loos no nia hahú lee Bíblia. Bainhira nia para tuir misa, ami-nia viziñu neʼebé uluk diʼak komesa kontra ami. Sira obriga apá atu nafatin tuir relijiaun Katólika. No sira haksesuk malu makaʼas ho nia kona-ba neʼe.

Haʼu triste tebes tanba sira trata aat apá, no neʼe book haʼu atu harohan ba Maromak atu bele ajuda apá. Neʼe mak orasaun neʼebé haʼu temi ona ohin. Haʼu kontente tebes bainhira ami-nia viziñu la kontra tan ami. Haʼu komesa fiar katak Jeová mak “Maromak neʼebé rona ba orasaun”.

Iha data 10 Maiu 1940, tropa Nazi husi Alemaña komesa ataka rai-Béljika. Tan neʼe, ema barak halai sai husi nasaun neʼe. Ami-nia família halai ba rai-Fransa nia parte súl. Kuandu ami halai, dala ruma ami iha área  neʼebé tropa Alemaña no Fransa halo funu hasoru malu.

Bainhira ami fila fali ba ami-nia hela-fatin, ami haree katak ema naʼok ona ami-nia sasán hotu. Ami-nia asu Bobbie deʼit mak sei iha. Situasaun sira-neʼe halo haʼu hanoin: ‘Tanbasá mak akontese funu no susar barak?’

Durante tempu neʼe, ami hetan anima husi irmaun pioneiru ida naran Emile Schrantz, nia mak katuas kongregasaun neʼebé mai vizita ami beibeik. Nia esplika husi Bíblia tanbasá terus akontese, no hatán haʼu-nia pergunta balu kona-ba moris. Haʼu komesa haburas haʼu-nia relasaun besik ho Jeová, no fiar metin katak nia mak Maromak neʼebé domin.

Maski funu seidauk remata, ami-nia família bele hasoru malu no komunika beibeik ho irmaun-irmán sira. Iha fulan-Agostu 1943, irmaun José-Nicolas Minet vizita ami-nia hela-fatin no hatoʼo diskursu ida. Nia husu: “Sé mak hakarak hetan batizmu?” Apá hiʼit liman, no haʼu mós hiʼit liman. Ami hetan batizmu iha mota kiʼik ida besik ami-nia toʼos.

Iha fulan-Dezembru 1944, durante Funu Mundiál Segundu, tropa Alemaña halo ataka ikus iha Europa oeste neʼebé mak ema bolu nuʼudar Batalha das Ardenas. Ami hela besik fatin neʼebé ema tiru malu, no ami presiza subar iha kuartu ida iha uma okos maizumenus ba fulan ida. Loron ida, kuandu haʼu sai ba liʼur atu fó-han ami-nia animál, bomba ida rabenta iha ami-nia toʼos no estraga buat barak. Soldadu Amérika ida neʼebé besik hakilar: “Toba ba rai!” Haʼu halai no bá toba besik nia, no nia tau ninia kapasete iha haʼu-nia ulun atu proteje haʼu.

Depois funu remata, ami koko atu sempre vizita kongregasaun iha Liège, maizumenus dook kilómetru 90 iha parte norte. Ikusmai, ami mós harii grupu kiʼik ida iha Bastogne. Haʼu komesa serbisu iha fatin neʼebé tau matan ba taxa, no haʼu iha oportunidade atu tama universidade hodi aprende kona-ba lei. Tuirmai haʼu serbisu iha notariadu. Iha tinan 1951, ami organiza asembleia ida iha Bastogne. Maizumenus ema naʼin-100 mak asiste, inklui irmán pioneiru ida neʼebé laran-manas naran Elly Reuter. Nia saʼe bisikleta dook kilómetru 50 atu bele tuir asembleia. Lakleur ami laran-monu ba malu no troka-prenda. Elly foin mak simu konvite atu tuir Eskola Gilead iha Estadus Unidus. Entaun,  nia hakerek karta ba sede-jerál atu esplika tanbasá nia labele simu konvite neʼe. Irmaun Knorr neʼebé mak dirije Jeová nia povu iha tempu neʼebá, ho laran-diʼak fó resposta katak karik loron ida nia bele tuir eskola ho ninia katuas-oan. Ami kaben iha fulan-Fevereiru 1953.

Iha tinan neʼebé hanesan, Elly no haʼu tuir reuniaun boot neʼebé halaʼo iha Estádiu Yankee, Novaiorke. Iha neʼebá, haʼu hasoru irmaun ida neʼebé oferese serbisu diʼak mai haʼu, no konvida haʼu atu muda ba Estadus Unidus. Depois halo tiha orasaun ba Jeová kona-ba neʼe, Elly no haʼu deside atu la simu serbisu neʼe, no fila fali ba Béljika atu apoia grupu kiʼik iha Bastogne neʼebé iha haklaken-naʼin maizumenus naʼin-10. Tinan tuirmai, ami hetan bensaun tanba iha oan-mane ida naran Serge. Triste mak fulan-hitu liutiha Serge moras no mate. Ami hatoʼo ami-nia laran-susar ba Jeová iha orasaun, no ami hetan forsa hodi tau fiar ba esperansa moris-hiʼas.

Iha fulan-Outubru 1961, haʼu hetan serbisu part-time neʼebé bele fó oportunidade mai haʼu atu serbí nuʼudar pioneiru. Iha loron neʼebé hanesan, haʼu simu telefone husi irmaun neʼebé tau matan ba sukursál iha Béljika. Nia husu haʼu se haʼu bele komesa serbí nuʼudar katuas área. Haʼu husu: “Ami bele serbí uluk nuʼudar pioneiru, depois mak simu knaar neʼe ka lae?” Irmaun neʼe dehan bele. Depois serbí tiha nuʼudar pioneiru ba fulan-ualu, ami komesa serbí nuʼudar katuas área iha fulan-Setembru 1962.

Serbí tiha nuʼudar katuas área ba tinan rua, ami hetan konvite atu serbí iha Betel iha Bruxelas. Ami komesa halaʼo knaar neʼe iha fulan-Outubru 1964. Knaar foun neʼe lori bensaun barak mai ami. Lakleur depois irmaun Knorr vizita ami-nia Betel iha tinan 1965, haʼu hakfodak tanba haʼu simu knaar atu tau matan ba sukursál. Tuirmai, Elly no haʼu hetan konvite atu tuir Eskola Gilead ba klase 41. Irmaun Knorr nia liafuan neʼebé nia hatete iha tinan 13 liubá sai loos duni! Depois gradua tiha, ami fila fali ba Betel iha Béljika.

Ba tinan barak, haʼu iha oportunidade furak atu uza haʼu-nia koñesimentu kona-ba lei atu defende Jeová nia povu nia liberdade atu halaʼo adorasaun iha Europa no rai sira seluk. (Flp 1:7) Rezultadu mak haʼu bele hasoru ema-boot sira maizumenus husi rai 55 neʼebé hanetik ka bandu ita-nia adorasaun. Baibain haʼu fó koñese haʼu-nia an nuʼudar “Maromak nia serbisu-naʼin”, duké fó sai haʼu-nia koñesimentu kona-ba lei. Haʼu sempre buka matadalan husi Jeová liuhusi orasaun tanba hatene katak “liurai ida [ka  juís ida] nia laran mak hanesan bee iha Jeová nia liman. Nia halo ida-neʼe suli ba fatin neʼebé Nia hakarak.”—Prov 21:1.

Haʼu nafatin hanoin-hetan tempu neʼebé haʼu koʼalia ho membru ida husi Parlamentu Europeu. Haʼu husu dala barak atu bele koʼalia ho nia, no ikusmai nia konkorda atu hasoru haʼu. Nia hatete: “Haʼu fó Ita minutu lima deʼit.” Haʼu hakruʼuk no halo orasaun. Mane neʼe komesa hanoin barak, no husu haʼu halo saida. Haʼu hiʼit haʼu-nia ulun no hatete: “Haʼu hatoʼo obrigadu ba Maromak, tanba Ita mak Maromak nia atan ida.” Nia husu: “Tanbasá ó dehan nuneʼe?” Haʼu hatudu ba nia Roma 13:4. Nia mak ema Protestante, no eskritura neʼe dada tebes ninia atensaun. Saida mak akontese tuirmai? Nia fó ba haʼu minutu 30, no enkontru neʼe laʼo diʼak tebes. Nia mós hatete katak nia respeitu tebes serbisu neʼebé Testemuña ba Jeová halo.

Ba tinan barak, Jeová nia povu luta makaʼas iha Europa iha dalan legál kona-ba neutrál, direitu atu haboot oan, selu taxa, no buat seluk tan. Haʼu haree ho matan rasik oinsá Jeová ajuda ami atu hetan susesu no manán kazu barak. Testemuña ba Jeová manán ona kazu 140 liu iha Tribunál Europeu ba Direitus Umanus!

Tuirmai haʼu serbisu hamutuk ho irmaun Philip Brumley husi sede-jerál no irmaun Valter Farneti husi Itália. Ami hakarak ajuda irmaun-irmán sira iha rai-Kuba atu bele iha liberdade hodi adora Jeová tanba governu hanetik ita-nia atividade iha neʼebá. Haʼu hakerek karta ba embaixada Kuba iha rai-Béljika, no tuirmai bá hasoru ema-boot ida neʼebé tau matan ba ami-nia kazu. Durante ami-nia enkontru primeiru, susar atu rezolve hanoin sala neʼebé book governu bandu ita-nia serbisu iha neʼebá.

Depois halo tiha orasaun ba Jeová atu husu ajuda, ami husu lisensa atu haruka Bíblia 5.000 ba rai-Kuba. No sira fó lisensa. Ikusmai, Bíblia mós toʼo ho seguru no ami bele fahe ba irmaun-irmán sira. Ami bele haree duni katak Jeová haraik bensaun ba ami-nia hakaʼas an. Tuirmai, ami husu lisensa atu haruka tan Bíblia 27.500, no sira mós fó lisensa. Hodi ajuda irmaun-irmán sira iha rai-Kuba atu bele hetan Bíblia, neʼe lori ksolok boot mai haʼu.

Haʼu vizita rai-Kuba dala barak atu ajuda ho kazu legál kona-ba ita-nia serbisu. Durante halaʼo knaar neʼe, haʼu mós bele iha relasaun diʼak ho ema-boot barak iha governu.

Iha tinan 1994, ema naʼin-1.000.000 liu mak mate kuandu ema koko halakon ema hotu husi suku Tutsi, iha rai-Ruanda. Triste mak irmaun-irmán balu mós mate. Lakleur deʼit, irmaun balu simu knaar atu fó ajuda umanitária ba irmaun-irmán sira iha neʼebá.

Bainhira ami-nia grupu toʼo iha sidade kapitál Kigali, ami haree eskritóriu tradusaun nia parede sira iha kuak barak tanba kartús musan. Ami rona istória triste kona-ba oinsá ema oho irmaun-irmán barak ho katana. Maibé ami mós rona istória kona-ba oinsá irmaun-irmán sira apoia malu. Porezemplu, ami hasoru irmaun ida husi suku Tutsi neʼebé subar iha rai-kuak ba loron 28, no família Testemuña husi suku Hutu mak proteje nia. Durante halaʼo reuniaun iha Kigali, ami fó kmaan ba irmaun-irmán naʼin-900 liu iha dalan espirituál.

Tuirmai ami liu fronteira hodi bá Zaire (agora mak Repúblika Demokrátika Kongu) atu buka Testemuña barak husi Ruanda neʼebé halai ba kampu refujiadu besik sidade Goma. Ami labele hetan sira, tan neʼe ami halo orasaun husu Jeová ajuda ami atu bele hetan sira. Lakleur, ami haree ema ida laʼo besik ami, no ami husu se nia koñese Testemuña ba Jeová sira ka lae. Nia hatán: “Sin, haʼu mak Testemuña ida. Haʼu sei lori Ita ba komisaun neʼebé tau matan ba dezastre.” Depois halo tiha enkontru hodi bele fó anima ba komisaun neʼebé tau matan ba dezastre, ami bá hasoru refujiadu maizumenus naʼin-1.600 atu bele fó kmaan ba sira no anima sira hodi uza Bíblia. Ami mós lee ba sira karta husi Grupu Administradór. Neʼe kona tebes irmaun-irmán sira-nia laran bainhira sira rona liafuan: “Ami sempre temi imi iha ami-nia orasaun. Ami hatene katak Jeová sei nunka husik hela imi.” Grupu Administradór nia liafuan sira-neʼe sai loos duni. Ohin loron, iha Ruanda iha Testemuña naʼin-30.000 liu!

Depois kaben tiha maizumenus ba tinan 58, haʼu-nia feen doben Elly mate iha tinan 2011. Jeová fó kmaan mai haʼu nuʼudar haʼu fó sai haʼu-nia laran-triste ba nia iha orasaun. Haʼu mós hetan kmaan liuhusi haklaken liafuan diʼak ba ema seluk.

Maski agora haʼu tinan 90 liu, haʼu nafatin haklaken semana-semana. Haʼu nafatin kontente tanba ajuda iha Departamentu Legál iha sukursál Béljika atu bele fahe haʼu-nia esperiénsia ho ema seluk, no anima joven sira neʼebé serbí iha Betel.

Maizumenus tinan 84 liubá, haʼu hatoʼo haʼu-nia orasaun primeiru ba Jeová. Neʼe mak tempu furak iha haʼu-nia moris kuandu haʼu komesa iha relasaun besik ho Jeová. Haʼu agradese tebes tanba durante haʼu-nia moris tomak Jeová rona ba haʼu-nia orasaun.—Sal 66:19. a