1. Tanbasá Jeová la kompara ita ho ema seluk?

JEOVÁ lakohi kriasaun hotu no ema hotu hanesan deʼit. Ita hatene ida-neʼe tanba Jeová kria ema, animál no ai-horis oioin. Ita ida-idak mak úniku. Jeová nunka kompara Ita ho ema seluk. Nia bele haree Ita-nia laran. (1 Sam 16:7) Nia mós hatene Ita-nia abilidade, Ita-nia fraku, no dalan neʼebé ema haboot Ita. Nia la husu Ita atu halo buat neʼebé liu fali Ita-nia kbiit. Ita presiza haree ita-nia an hanesan Jeová haree ita. Se ita halo nuneʼe, ita sei iha ‘hanoin neʼebé loos’ no la hanoin katak ita mak ema diʼak liu ka hanoin katak ita mak ema folin-laek.—Rom 12:3.

2. Tanbasá la diʼak atu kompara ita-nia an ho ema seluk?

² Klaru katak ita bele aprende husi ema seluk nia ezemplu diʼak. Karik ita koñese irmaun ka irmán neʼebé matenek atu haklaken. (Ebr 13:7) Ita bele aprende husi sira kona-ba oinsá atu aumenta ita-nia matenek iha serbisu haklaken. (Flp 3:17) Maibé banati-tuir ema nia ezemplu diʼak la hanesan ho kompara Ita-nia an ho sira. Se Ita kompara Ita-nia an ho ema seluk, neʼe bele halo Ita laran-moras, laran-kraik, ka sente folin-laek. Ita mós aprende ona katak kompete malu ho irmaun-irmán sira bele estraga ita-nia relasaun diʼak ho Jeová. Tan neʼe Jeová anima ita, hodi dehan: “Ema ida-idak tenke buka-hatene ninia hahalok rasik, no tuirmai nia sei iha razaun atu haksolok kona-ba ninia an rasik, laʼós hodi kompara nia an ho ema seluk.”—Gal 6:4.

3. Mudansa saida mak Ita halo ona neʼebé lori ksolok mai Ita?

³ Jeová hakarak Ita kontente tanba Ita laʼo ba oin hodi adora nia. Porezemplu, se Ita batizmu ona, Ita bele kontente tanba Ita kumpre ona Ita-nia planu neʼe. Ita rasik  mak foti desizaun atu hetan batizmu. Ita halo ida-neʼe tanba Ita hadomi Maromak. Hanoin toʼok buat hotu neʼebé Ita kumpre ona husi tempu neʼebá toʼo agora. Porezemplu, Ita gosta liután atu lee Bíblia no estuda kleʼan ka lae? Ita halo orasaun ho diʼak liután ka lae? (Sal 141:2) Agora Ita matenek liu atu komesa dada lia kuandu haklaken ka lae? Ita matenek liután atu uza ita-nia ekipamentu sira bainhira haklaken ka lae? Se Ita harii ona umakain, Jeová ajuda ona Ita atu sai laʼen, feen, ka inan-aman neʼebé diʼak liu ka lae? Ita bele kontente tebes ho mudansa neʼebé Ita halo ona.

4. Iha lisaun neʼe, ita sei aprende saida?

⁴ Ita bele ajuda ema seluk atu sente kontente tanba sira laʼo ba oin hodi adora Jeová. Ita mós bele ajuda sira atu la kompara sira-nia an ho ema seluk. Iha lisaun neʼe, ita sei aprende oinsá inan-aman bele ajuda sira-nia oan, oinsá feen-laʼen bele ajuda malu, no oinsá katuas kongregasaun no ema seluk bele ajuda irmaun-irmán sira. Ikusliu, ita sei aprende Bíblia nia prinsípiu balu neʼebé bele ajuda ita atu halo planu tuir ita-nia situasaun no kbiit.

5. Tuir Éfeso 6:4, inan-aman presiza kuidadu atu la halo saida?

⁵ Inan-aman presiza kuidadu atu la kompara sira-nia oan sira ka husu oan sira atu halo buat neʼebé liu fali sira-nia kbiit. Neʼe bele halo oan sira laran-kanek. (Lee Éfeso 6:4.) Irmán Sachiko * hatete: “Haʼu-nia mestre hakarak haʼu hetan valór diʼak liu fali alunu seluk. Amá mós hakarak haʼu atu hetan valór diʼak iha eskola atu nuneʼe haʼu bele fó sasin diʼak ba mestre no mós ba apá neʼebé laʼós Testemuña. Amá hakarak haʼu-nia resposta loos hotu iha ezame. Maibé neʼe todan liu ba haʼu. Maski haʼu gradua tempu kleur ona, maibé dala ruma haʼu nafatin sente katak Jeová la kontente ho haʼu maski haʼu hakaʼas an ona tuir haʼu-nia kbiit.”

6. Inan-aman bele aprende saida husi Salmo 131:1, 2?

⁶ Inan-aman bele aprende lisaun importante husi Salmo 131:1, 2. (Lee.) Liurai David hatete katak nia “la buka  buat neʼebé boot liu” ka buat neʼebé liu fali ninia kbiit. Tanba nia haraik an, nia kontente ho buat neʼebé nia iha ona no sente dame. Inan-aman bele aprende saida husi David? Inan-aman bele hatudu haraik an hodi la koko atu halo buat neʼebé liu fali sira-nia kbiit no la husu oan sira atu halo buat neʼebé liu fali sira-nia kbiit. Bainhira inan-aman rekoñese oan sira-nia kbiit no limitasaun, no tuirmai ajuda oan sira atu halo planu neʼebé sira bele kumpre, neʼe bele ajuda oan sira atu sente katak sira iha folin. Irmán Marina konta: “Amá nunka kompara haʼu ho haʼu-nia naan naʼin-tolu ka ho labarik seluk. Amá hanorin haʼu katak ema ida-idak iha abilidade neʼebé la hanesan no ita ida-idak folin-boot ba Jeová. Tanba dalan neʼebé amá haboot haʼu, haʼu nunka kompara haʼu-nia an ho ema seluk.”

7-8. Oinsá laʼen bele hatudu respeitu ba ninia feen?

⁷ Laʼen Kristaun tenke hatudu respeitu ba ninia feen. (1 Ped 3:7) Hatudu respeitu inklui tau matan didiʼak. Porezemplu, laʼen neʼebé respeitu ninia feen hafolin tebes ninia feen. Nia la husu ninia feen atu halo buat neʼebé liu fali ninia feen nia kbiit. Nia la kompara ninia feen ho feto seluk. Ninia feen sei sente oinsá se nia kompara ninia feen ho feto seluk? Irmán Rosa nia laʼen laʼós Testemuña no kompara beibeik nia ho feto seluk. Ninia laʼen nia liafuan kroʼat halo nia sente la iha folin no duvida katak ema hadomi nia. Irmán Rosa hatete: “Haʼu presiza hanoin-hetan beibeik katak Jeová hafolin haʼu.” Laʼen Kristaun la halo nuneʼe, nia tenke hatudu respeitu ba ninia feen. Nia hatene katak ida-neʼe bele ajuda nia atu iha relasaun diʼak ho ninia feen no mós ho Jeová. *

⁸ Laʼen neʼebé respeitu ninia feen sei gaba nia, fó-hatene katak nia hadomi no hafolin ninia feen. (Prov 31:28) Irmán Katerina neʼebé temi iha lisaun antes neʼe, ninia laʼen ajuda nia atu sente katak nia iha folin. Kuandu kiʼik, Katerina nia inan hatún nia no kompara nia ho labarik-feto seluk, inklui ninia belun sira. Rezultadu mak Katerina komesa kompara nia an ho ema seluk no nia kontinua halo ida-neʼe maski sai ona Testemuña. Maibé, ninia laʼen neʼebé mós Testemuña, ajuda nia atu hapara toman neʼe no ajuda nia atu iha hanoin neʼebé loos kona-ba ninia an. Irmán Katerina hatete: “Haʼu-nia laʼen hadomi haʼu, gaba buat diʼak neʼebé haʼu halo no halo orasaun ba haʼu. Nia mós fó-hanoin haʼu kona-ba Jeová nia hahalok furak sira no ajuda haʼu atu korrije haʼu-nia hanoin negativu.”

9-10. Oinsá katuas sira ajuda irmán Hanuni atu la kompara ninia an ho ema seluk?

⁹ Oinsá katuas kongregasaun sira bele ajuda ema neʼebé iha toman atu kompara sira-nia an ho ema seluk? Hanoin toʼok irmán Hanuni nia esperiénsia. Uluk kuandu nia kiʼik, nia ladún hetan gaba. Nia konta: “Haʼu mak moedór no sente katak labarik seluk diʼak liu haʼu. Haʼu kompara haʼu-nia an ho ema seluk husi tempu uluk kedas.” Maski tama tiha lia-loos, irmán Hanuni kontinua kompara ninia an ho ema seluk. Tan neʼe, nia la sente katak  nia iha folin iha kongregasaun. Maibé agora nia serbí nuʼudar pioneiru regulár neʼebé kontente. Saida mak ajuda nia atu troka ninia toman?

¹⁰ Hanuni hatete katak katuas sira ho laran-diʼak ajuda nia. Sira fó sai katak nia mak folin-boot iha kongregasaun no gaba nia tanba ninia ezemplu diʼak. Irmán Hanuni dehan: “Dala balu katuas sira husu haʼu atu anima irmán balu neʼebé presiza ajuda. Knaar neʼe ajuda haʼu atu sente katak kongregasaun presiza haʼu. Haʼu hanoin-hetan katuas sira fó obrigadu ba haʼu tanba haʼu anima irmán joven sira. Tuirmai sira lee 1 Tesalónika 1:2, 3 ba haʼu. Neʼe book tebes haʼu-nia laran. Tanba katuas sira-neʼe nia ajuda, agora haʼu sente katak haʼu mak parte ba Jeová nia organizasaun.”

11. Hanesan Isaias 57:15 temi, oinsá ita bele ajuda ema neʼebé “hetan terus”?

¹¹ Lee Isaias 57:15. Jeová hafolin tebes irmaun-irmán sira neʼebé “hetan terus”. Ita hotu bele anima sira hodi hatudu interese ba sira. Jeová hakarak ita atu hatudu sai ninia domin ba sira. (Prov 19:17) Ita mós bele ajuda irmaun-irmán sira liuhusi hatudu haraik an no la gaba an. Ita lakohi dada atensaun ba ita-nia an tanba neʼe bele book ema seluk atu sente laran-moras. Duké halo nuneʼe, ita uza ita-nia abilidade no koñesimentu atu anima malu.—1 Ped 4:10, 11.

12. Tanbasá ema baibain gosta atu hakbesik ba Jesus? (Haree dezeñu iha livru oin.)

¹² Atu bele hatudu laran-diʼak ba ema seluk, ita bele aprende husi Jesus neʼebé hatudu laran-diʼak ba ninia dixípulu sira. Nia mak ema neʼebé importante liu hotu. Maski nuneʼe, nia “laran-maus no haraik an”. (Mt 11:28-30) Nia la gaba an kona-ba ninia matenek no ninia koñesimentu neʼebé barak. Nia hanorin hodi uza liafuan neʼebé simples no ai-knanoik neʼebé fasil ba ema atu komprende no book sira-nia laran. (Lc 10:21) Jesus la hanesan ho ulun-naʼin relijiaun sira neʼebé foti an. Jesus nunka halo ema sente katak Maromak la hafolin sira. (João 6:37) Duké halo nuneʼe, nia hatudu respeitu ba ema baibain.

13. Oinsá Jesus hatudu laran-diʼak no domin ba ninia dixípulu sira?

¹³ Jesus hatudu domin no laran-diʼak ba ninia dixípulu. Nia hatene katak sira-nia abilidade no situasaun moris la hanesan. Tan neʼe, serbisu neʼebé sira ida-idak bele kumpre mak la hanesan, no buat neʼebé sira kumpre iha serbisu haklaken mós la hanesan. Maski nuneʼe, Jesus hafolin sira ida-idak nia hakaʼas an atu halo serbisu ho laran tomak. Jesus hatudu sai ninia sentimentu neʼe liuhusi ai-knanoik kona-ba osan talentu. Iha ai-knanoik neʼe, naʼi fó serbisu ba atan ida-idak “tuir sira ida-idak nia kbiit”. Iha atan rua neʼebé badinas. Atan ida manán osan talentu barak liu fali atan ida seluk. Maski nuneʼe, naʼi gaba sira naʼin-rua ho liafuan neʼebé hanesan, hodi dehan: “Diʼak tebes! Ó atan diʼak no laran-metin.”—Mt 25:14-23.

14. Oinsá ita bele banati-tuir Jesus?

¹⁴ Jesus sempre hatudu laran-diʼak no domin ba ita. Nia hatene katak ita-nia abilidade no situasaun moris mak la hanesan, no nia kontente bainhira ita halo buat neʼebé ita bele halo tuir ita-nia kbiit. Ita presiza banati-tuir Jesus. Ita lakohi halo maluk fiar-naʼin ida sente folin-laek ka sente moe tanba nia labele halo buat barak hanesan ema seluk. Duké halo nuneʼe, ita presiza buka oportunidade atu  gaba irmaun-irmán sira tanba hakaʼas an atu serbí Jeová.

15-16. Oinsá irmán Midori hetan benefísiu tanba halo planu neʼebé nia bele kumpre?

¹⁵ Bainhira ita iha planu espirituál, ita-nia moris sei iha objetivu. Maibé importante atu halo planu neʼebé tuir ita-nia abilidade no situasaun. Ita la presiza halo planu espirituál neʼebé hanesan ho ema seluk nian. Se ita halo nuneʼe, ita sei la sai laran-kraik tanba labele kumpre ita-nia planu. (Lc 14:28) Hanoin toʼok irmán Midori neʼebé serbí nuʼudar pioneiru.

¹⁶ Irmán Midori nia apá neʼebé laʼós Testemuña, hamoe nia bainhira kiʼik hodi kompara nia ho ninia maun-alin sira no mós ninia kolega eskola. Irmán Midori hatete: “Haʼu sente la iha folin.” Maibé bainhira nia sai boot, nia komesa sente fiar an. Nia hatete: “Haʼu lee Bíblia loroloron atu nuneʼe haʼu bele sente dame iha laran no bele sente katak Jeová hadomi haʼu.” Liután neʼe, nia halo planu neʼebé nia bele kumpre, no halo orasaun espesífiku atu Jeová bele ajuda nia kumpre ninia planu. Rezultadu mak nia kontente tanba nia laʼo ba oin.

17. Oinsá ita bele ‘kontinua hafoun ita-nia dalan atu hanoin’? Neʼe sei lori rezultadu saida?

¹⁷ Presiza tempu atu halakon sentimentu no hanoin negativu. Tan neʼe Jeová anima ita: “Imi tenke kontinua hafoun imi-nia dalan atu hanoin.” (Éf 4:23, 24) Atu halo nuneʼe, ita presiza halo orasaun, estuda Bíblia, no medita kona-ba neʼe. Kontinua halo buat sira-neʼe, no husu Jeová atu fó ita kbiit. Espíritu santu sei ajuda ita atu manán ita-nia toman atu kompara ita-nia an ho ema seluk.  Jeová mós sei ajuda ita atu rekoñese se ita laran-moras ka foti an, no ajuda ita atu halo mudansa.

18. Oinsá ita bele hetan kmaan husi liafuan iha 2 Krónikas 6:29, 30?

¹⁸ Lee 2 Krónikas 6:29, 30. Jeová hatene ita-nia laran. Nia mós hatene katak ita luta hasoru influénsia aat husi mundu no ita rasik nia fraku. Bainhira Jeová haree ita luta makaʼas kontra buat sira-neʼe, nia hadomi ita liután.

19. Jeová uza ezemplu saida atu hatudu sai ninia sentimentu ba ita?

¹⁹ Jeová uza ezemplu kona-ba inan no oan nia relasaun atu hatudu kona-ba ninia sentimentu ba ita. (Isa 49:15) Hanoin toʼok ezemplu husi inan ida naran Rachel. Nia hakerek: “Haʼu-nia oan-feto Stephanie moris sedu. Kuandu nia foin moris, ninia isin kiʼik no fraku. Maibé doutór fó lisensa ba haʼu atu koʼus nia loroloron durante fulan ida kuandu ami iha ospitál. Durante tempu neʼe, haʼu-nia oan no haʼu sai besik loos. Agora nia tinan neen no isin kiʼik liu fali labarik seluk neʼebé tinan hanesan nia. Maibé haʼu hadomi tebes nia tanba nia luta makaʼas atu kontinua moris, no nia lori ksolok boot ba haʼu-nia moris.” Ita hetan kmaan tanba hatene katak Jeová hadomi ita iha dalan neʼebé hanesan kuandu ita hakaʼas an atu serbí nia ho laran tomak.

20. Tanbasá Jeová nia atan sira bele haksolok?

²⁰ Tanba Ita serbí Jeová, Ita mak espesiál no folin-boot iha Jeová nia organizasaun. Jeová dada Ita ba nia, laʼós tanba Ita diʼak liu fali ema seluk. Nia dada Ita tanba nia haree Ita-nia laran, haree katak Ita haraik an, no prontu atu aprende no halo mudansa. (Sal 25:9) Ita bele fiar katak Jeová kontente bainhira Ita hakaʼas an atu serbí nia ho laran tomak. Bainhira Ita tahan no laran-metin, neʼe hatudu katak Ita iha “laran neʼebé diʼak”. (Lc 8:15) Tan neʼe, kontinua serbí Jeová ho Ita-nia kbiit tomak. Hodi halo nuneʼe, Ita iha razaun atu haksolok kona-ba Ita-nia “an rasik”.