Jeová hakarak ema neʼebé kaben atu sente kontente no iha relasaun diʼak ba nafatin. (Mt 19:4-6) Se Ita hakarak kaben, oinsá mak Ita bele hetan pár neʼebé diʼak? Ita-nia Kriadór Jeová hatene buat neʼebé Ita presiza atu nuneʼe Ita bele iha moris kaben nian neʼebé kontente. Tan neʼe, se Ita aplika ninia prinsípiu sira, Ita sei hetan rezultadu neʼebé diʼak liu. Hanoin toʼok prinsípiu balu neʼebé nia fó ba ita.

Ulukliu, ita presiza rekoñese katak “laran mak makerek liu fali buat hotu-hotu no perigozu”. (Jer 17:9) Bainhira ema naʼin-rua neʼebé hakarak kaben hasoru malu no komesa namora, sira-nia sentimentu ba malu bele sai makaʼas loos, no neʼe bele halo susar atu foti desizaun neʼebé matenek. Se ema deside atu kaben tan deʼit sira-nia sentimentu ba malu, karik ikusmai sira sei sai laran-kanek. (Prov 28:26) Tan neʼe, la diʼak atu sira naʼin-rua hatudu sentimentu makaʼas ba malu bainhira foin namora ka halo promesa antes koñese malu ho didiʼak.

Provérbios 22:3 hatete: “Ema neʼebé matenek haree perigu no subar nia an, maibé ema neʼebé la iha esperiénsia la hasees an no hetan susar.” Tanbasá website ka aplikasaun sira atu buka pár mak perigu? Ema balu hasoru ema foun online, komesa namora no triste mak ikusmai sira rekoñese katak ema neʼebé sira namora lohi sira no aproveita sira. No mós ema neʼebé iha motivu la diʼak kria akun falsu atu naʼok osan husi ema neʼebé la iha esperiénsia. Dala ruma, ema neʼebé kria akun falsu sira-neʼe dehan katak sira mak Testemuña.

Hanoin toʼok kona-ba perigu ida tan. Website ka aplikasaun balu uza programa komputadór atu halibur ita-nia informasaun no uza ita-nia informasaun hodi buka ema neʼebé programa neʼe hanoin diʼak ba ita. Maibé la iha evidénsia neʼebé hatudu katak programa sira-neʼe hetan susesu. La matenek atu tau fiar ba programa komputadór neʼebé ema mak halo hodi foti desizaun kona-ba buat neʼebé importante hanesan buka pár. Ita nunka bele tau fiar tomak ba programa komputadór hanesan ita tau fiar ba Bíblia nia prinsípiu.—Prov 1:7; 3:5-7.

 Prinsípiu iha Provérbios 14:15 hatete: “Ema neʼebé la iha esperiénsia tau fiar ba liafuan hotu, maibé ema neʼebé matenek hanoin didiʼak kona-ba ninia hakat ida-idak.” Ita presiza koñese didiʼak ema ida antes deside se nia bele sai Ita-nia kaben. Maibé se Ita uza website ka aplikasaun atu buka pár, susar ba Ita atu koñese malu ho didiʼak. Maski Ita bele haree ema neʼe nia profil no uza tempu barak atu chat malu, maibé tuir loloos Ita labele koñese ema neʼe ho didiʼak. Ema balu hanoin sira hetan ona sira-nia fuan sorin, maibé hakfodak bainhira hasoru ema neʼe oin ba oin.

Ema ida neʼebé hakerek Salmo hatete: “Haʼu la ransu ho ema sira neʼebé bosok-teen, no haʼu hasees an husi sira neʼebé subar sira-nia hakarak aat.” (Sal 26:4) Ema barak hanoin katak la sala atu tau informasaun falsu iha sira-nia profil, atu nuneʼe ema barak gosta sira. Karik sira subar sira-nia hahalok aat ka karik ita labele nota sira-nia hahalok aat bainhira sira chat ho ita. Ema balu dehan katak sira mak Testemuña, maibé sira hetan ona batizmu ka lae? Sira iha relasaun diʼak ho Jeová ka lae? Irmaun-irmán iha sira-nia kongregasaun tau fiar ba sira ka lae? Ka sira hatudu ezemplu la diʼak no laʼós ransu neʼebé diʼak ba ita? (1 Kor 15:33; 2 Tim 2:20, 21) Tuir Bíblia nia prinsípiu, sira livre atu kaben ka lae? Ita presiza duni hetan resposta ba pergunta sira-neʼe, maibé susar atu hetan resposta se Ita la koʼalia ho Testemuña neʼebé koñese didiʼak ema neʼe. (Prov 15:22) No klaru katak ema neʼebé adora Jeová sei nunka hanoin atu kaben ho ema neʼebé laʼós Testemuña.—2 Kor 6:14; 1 Kor 7:39.

Website ka aplikasaun atu buka pár iha perigu oioin, tan neʼe iha dalan diʼak liu atu buka no koñese ema ida neʼebé ikusmai bele sai Ita-nia kaben. Oinsá mak Ita bele hasoru ema neʼebé bele sai Ita-nia pár neʼebé diʼak? Bainhira situasaun permite atu halibur hamutuk iha reuniaun sira, reuniaun boot no halo atividade seluk, ita bele koñese irmaun-irmán sira oin ba oin.

Bainhira ita labele halibur hamutuk, hanesan durante pandemia COVID-19, ita tuir reuniaun online no iha oportunidade atu koñese Testemuña sira neʼebé klosan. Ita bele haree oinsá sira hola parte iha reuniaun no fó sai sira-nia fiar bainhira fó komentáriu. (1 Tim 6:11, 12) Ita mós bele koʼalia ba malu depois reuniaun hodi uza breakout room iha Zoom. Kuandu Ita ransu malu online ho Testemuña oioin nuʼudar grupu, Ita bele haree dalan neʼebé nia trata ema seluk. Hodi halo nuneʼe, Ita bele haree nia mak ema oinsá. (1 Ped 3:4) Bainhira Ita koñese malu liután, Ita bele hatene se Ita iha planu neʼebé hanesan ho ema neʼe no se nia mak diʼak atu sai Ita-nia kaben ka lae.

Bainhira irmaun-irmán sira neʼebé klosan halo tuir Bíblia nia prinsípiu kuandu buka pár, sira bele haree rasik oinsá liafuan iha Provérbios mak loos: “Ema neʼebé hetan feen [ka laʼen] neʼebé diʼak, nia hetan ona buat diʼak, no nia simu Jeová nia laran-diʼak.”—Prov 18:22.