1. Jesus nia dixípulu haruka ema barak atu halo saida?

EMA barak husi nasaun oioin no koʼalia língua oioin halo viajen ba Jeruzalein. No buat kmanek ida akontese iha loron neʼe. Derrepente deʼit, ema Judeu balu koʼalia ba sira iha sira-nia língua. Neʼe halo sira hakfodak. Maibé sira hakfodak liután ho buat neʼebé ema Judeu no apóstolu Pedro fó sai. Ema sira-neʼe aprende katak atu bele hetan salvasaun sira presiza tau fiar ba Jesus Kristu. Mensajen neʼe book tebes sira-nia laran. Tan neʼe sira husu: “Ami tenke halo saida?” Pedro hatán: “Imi ida-idak hetan batizmu.”—Após 2:37, 38.

2. Iha lisaun neʼe, ita sei aprende saida? (Haree foto iha livru oin.)

² Buat neʼebé akontese tuirmai mak kapás tebes. Iha loron neʼebá, maizumenus ema naʼin-3.000 hetan batizmu no sai Jesus nia dixípulu. Hahú husi tempu neʼebá, Jesus nia dixípulu sira halo tuir Jesus nia mandamentu atu hanorin ema sai dixípulu no neʼe kontinua toʼo ohin loron. Maibé ohin loron, ema la hetan kedas batizmu kuandu ita haklaken ba sira ba oras balu deʼit. Karik estudante sira presiza fulan balu ka tinan ida ka liu atu bele laʼo ba oin no hetan batizmu. Se agora daudaun Ita estuda Bíblia ho ema ruma, Ita hatene katak Ita presiza hakaʼas an atu ajuda ema ida hodi sai Kristu nia dixípulu. Iha lisaun neʼe, ita sei aprende oinsá ita bele ajuda ita-nia estudante Bíblia hetan batizmu.

3. Tuir Mateus 28:19, 20, estudante presiza halo saida atu bele hetan batizmu?

³ Antes estudante Bíblia ida hetan batizmu, nia presiza aplika Bíblia nia hanorin. (Lee Mateus 28:19, 20.) Bainhira nia halo nuneʼe, nia sei sai hanesan “ema matenek” iha  Jesus nia ai-knanoik neʼebé keʼe kleʼan rai atu harii ninia uma iha fatuk nia leten. (Mt 7:24, 25; Lc 6:47, 48) Oinsá ita bele ajuda estudante ida atu aplika buat neʼebé nia aprende? Mai ita haree sujestaun tolu.

4. Oinsá ita bele ajuda estudante hetan batizmu? (Haree mós kaixa “ Ajuda estudante Bíblia halo planu no kumpre ida-neʼe”.)

⁴ Ajuda estudante Bíblia atu halo planu. Tanbasá? Hanoin toʼok ai-knanoik neʼe. Se Ita halo viajen ba fatin dook, karik Ita deside atu para tuituir dalan iha fatin neʼebé furak. Hodi halo nuneʼe, Ita sei la lakon Ita-nia ksolok tanba hanoin katak fatin neʼebé Ita atu bá mak dook tebes. Nuneʼe mós kuandu Ita-nia estudante halo planu kiʼik oioin no kumpre ida-neʼe, nia sei haree katak nia bele duni kumpre planu atu hetan batizmu. Ita bele uza kaixa iha livru Moris Haksolok ba Nafatin ho títulu “Planu” atu ajuda estudante Bíblia laʼo ba oin. Bainhira Ita remata lisaun ida-idak, koʼalia kona-ba oinsá planu neʼe bele ajuda nia atu aplika buat neʼebé nia aprende. Se Ita hakarak nia kumpre planu seluk, diʼak atu nia hakerek ida-neʼe iha parte ho títulu “Planu seluk”. Uza beibeik kaixa neʼe atu koʼalia hamutuk ho estudante kona-ba planu neʼebé nia bele kumpre iha tempu badak no iha futuru.

5. Tuir Marcos 10:17-22, Jesus haruka mane riku ida atu halo saida no tanbasá?

⁵ Ajuda estudante Bíblia atu halo mudansa boot. (Lee Marcos 10:17-22.) Jesus hatene katak susar ba mane riku ida atu faʼan ninia sasán hotu. (Mc 10:23) Maski nuneʼe, Jesus haruka nia atu halo mudansa boot iha ninia moris. Tanbasá? Tanba Jesus hadomi nia. Dala ruma ita dada an atu anima estudante Bíblia atu aplika buat neʼebé nia aprende tanba ita  sente katak nia seidauk prontu atu halo mudansa. Dala ruma presiza tempu ba ema ida atu hasai hahalok tuan no tau fali hahalok foun. (Kol 3:9, 10) Se Ita la demora atu koʼalia ba estudante Bíblia kona-ba mudansa neʼebé nia presiza halo, neʼe sei ajuda nia atu halo mudansa sedu. Neʼe hatudu katak Ita hadomi nia.—Sal 141:5; Prov 27:17.

6. Tanbasá ita presiza husu estudante atu fó sai ninia hanoin?

⁶ Importante atu husu estudante nia hanoin kona-ba tópiku ruma. Neʼe sei ajuda Ita hatene buat neʼebé estudante komprende no fiar. Se Ita halo ida-neʼe beibeik, fasil liu ba Ita atu koʼalia ba nia iha futuru kona-ba tópiku neʼebé susar. Iha livru Moris Haksolok ba Nafatin, iha pergunta barak neʼebé ajuda estudante atu fó sai ninia hanoin. Porezemplu, pergunta ida iha lisaun 04 hatete: “Tuir Ita-nia hanoin, Jeová sente oinsá bainhira Ita uza ninia naran?” Pergunta ida iha lisaun 09 hatete: “Ita hakarak halo orasaun kona-ba saida deʼit?” Karik foufoun Ita-nia estudante presiza tempu atu hanoin kona-ba oinsá atu hatán ba pergunta sira-neʼe. Ita bele ajuda nia liuhusi treinu nia atu hanoin kona-ba eskritura no mós dezeñu sira iha livru neʼe.

7. Oinsá ita bele uza ema nia esperiénsia atu ajuda estudante Bíblia?

⁷ Bainhira Ita-nia estudante komprende ona saida mak nia presiza halo, Ita bele konta ema nia esperiénsia ba nia hodi bele anima nia atu aplika ida-neʼe. Porezemplu, se nia la tuir reuniaun beibeik, Ita bele hatudu ba nia vídeo iha lisaun 14 ho títulu Jeová tau matan mai haʼu neʼebé fó sai iha parte “Buka-hatene liután”. Ita bele hetan esperiénsia hanesan neʼe iha parte “Keʼe kleʼan” ka “Buka-hatene liután” iha livru Moris Haksolok ba Nafatin. * Kuidadu atu la kompara Ita-nia estudante ho ema seluk, hodi hatete: “Se nia bele, ó mós bele.” Ajuda nia atu rekoñese rasik katak nia bele halo mudansa. Duké kompara nia ho ema seluk, koʼalia kona-ba buat neʼebé ajuda ema iha esperiénsia neʼe atu aplika Bíblia nia hanorin. Karik Ita bele temi eskritura importante ka buat espesífiku neʼebé ema neʼe halo. Se bele, tau fokus ba oinsá Jeová ajuda ema neʼe.

8. Oinsá ita bele ajuda estudante Bíblia hadomi Jeová?

⁸ Ajuda estudante Bíblia atu hadomi Jeová. Oinsá? Buka oportunidade atu ajuda nia aprende liután kona-ba Jeová nia hahalok sira. Ajuda nia atu haree Jeová nuʼudar Maromak neʼebé apoia ninia atan sira neʼebé hadomi nia no Maromak neʼebé kontente. (1 Tim 1:11; Ebr 11:6) Hatudu ba nia oinsá nia bele hetan benefísiu hodi aplika informasaun, no esplika oinsá ida-neʼe hatudu katak Jeová hadomi nia. (Isa 48:17, 18) Bainhira nia hametin liután ninia domin ba Jeová, neʼe sei book nia atu halo mudansa.—1 João 5:3.

9. Tuir Marcos 10:29, 30, saida mak bele ajuda estudante atu halo sakrifísiu hodi hetan batizmu?

⁹ Atu Ita-nia estudante laʼo ba oin no hetan batizmu, nia presiza halo sakrifísiu oioin. Hanesan mane riku neʼebé temi ohin, karik estudante balu presiza halo sakrifísiu kona-ba osan no sasán. Se sira-nia  serbisu kontra Bíblia nia prinsípiu, karik sira presiza buka serbisu seluk. Estudante balu karik presiza la ransu tan ho sira-nia belun neʼebé la hadomi Jeová. Karik estudante balu nia família husik sira tanba la gosta Testemuña. Jesus rekoñese katak ema balu sente susar atu halo sakrifísiu hanesan neʼe. Maibé Jesus promete katak ema neʼebé sai ninia dixípulu sei hetan bensaun. Jeová sei fó bensaun ba sira hodi iha família espirituál neʼebé hadomi malu. (Lee Marcos 10:29, 30.) Oinsá Ita bele ajuda estudante Bíblia atu hetan benefísiu husi ida-neʼe?

10. Ita bele aprende saida husi irmaun Manuel?

¹⁰ Habelun ho estudante Bíblia. Importante atu hatudu ba Ita-nia estudante katak Ita hadomi nia. Tanbasá? Hanoin toʼok kona-ba irmaun Manuel neʼebé hela iha rai-Méxiku. Nia esplika kona-ba oinsá ninia mestre Bíblia ajuda nia bainhira nia estuda Bíblia. Nia hatete: “Antes estuda Bíblia, haʼu-nia mestre sempre husu haʼu-nia situasaun. Nia ajuda haʼu atu sente kalma no fó oportunidade ba haʼu atu koʼalia kona-ba buat naran deʼit. Haʼu sente katak nia hadomi tebes haʼu.”

11. Ita-nia estudante bele hetan benefísiu saida hodi ransu ho ita?

¹¹ Jesus uza tempu atu ransu ho ninia dixípulu sira, Ita mós presiza halo nuneʼe ho Ita-nia estudante. (João 3:22) Se Ita-nia estudante laʼo ba oin, karik Ita bele konvida nia mai Ita-nia uma atu hemu kafé, han hamutuk ka haree broadcasting. Karik nia sei kontente se Ita konvida nia durante tempu neʼebé ninia belun no família selebra loron-boot sira no nia sente mesamesak. Irmaun Kazibwe neʼebé hela iha rai-Uganda hatete: “Haʼu aprende kona-ba Jeová durante estuda Bíblia ho haʼu-nia mestre, maibé haʼu aprende buat barak liu kona-ba Jeová bainhira ransu ho haʼu-nia mestre. Haʼu haree oinsá Jeová hadomi tebes ninia povu no oinsá sira  kontente. No haʼu mós hakarak sente hanesan neʼe.”

12. Tanbasá ita presiza konvida irmaun-irmán oioin atu akompaña ita?

¹² Konvida irmaun-irmán oioin atu akompaña ita estuda Bíblia. Dala ruma, ita sente fasil liu atu halaʼo estuda Bíblia mesak ka lori haklaken-naʼin neʼebé hanesan. Maski nuneʼe, ita-nia estudante Bíblia sei hetan benefísiu se ita konvida haklaken-naʼin oioin atu akompaña ita. Irmaun Dmitrii neʼebé hela iha rai-Moldávia konta kona-ba tempu neʼebé nia estuda hela, hodi dehan: “Haklaken-naʼin ida-idak neʼebé akompaña haʼu-nia mestre atu estuda ho haʼu, esplika informasaun iha dalan oioin. Neʼe ajuda haʼu atu komprende informasaun neʼe iha dalan seluk. Haʼu mós la sente taʼuk kuandu tuir reuniaun ba dala primeiru tanba haʼu hasoru ona irmaun-irmán barak.”

13. Tanbasá ita presiza ajuda estudante atu tuir reuniaun?

¹³ Ajuda estudante Bíblia atu tuir reuniaun. Tanbasá? Tanba Jeová haruka ninia atan sira atu halibur hamutuk. Neʼe mak parte ba ita-nia adorasaun. (Ebr 10:24, 25) No mós irmaun-irmán sira mak ita-nia família espirituál. Bainhira ita tuir reuniaun hamutuk ho sira, neʼe hanesan ita han hamutuk ho ita-nia família. Bainhira Ita ajuda estudante Bíblia tuir reuniaun, Ita ajuda nia atu halo hakat importante atu hetan batizmu. Maibé karik susar ba nia atu komesa tuir reuniaun. Oinsá Ita bele uza livru Moris Haksolok ba Nafatin atu ajuda nia manán susar sira neʼebé hanetik nia atu tuir reuniaun?

14. Oinsá ita bele anima estudante atu tuir reuniaun?

¹⁴ Uza lisaun 10 husi livru Moris Haksolok ba Nafatin atu anima Ita-nia estudante tuir reuniaun. Antes livru neʼe fó sai, haklaken-naʼin balu neʼebé iha esperiénsia hetan knaar atu koko uza lisaun neʼe bainhira estuda ho sira-nia estudante. Sira hatete katak lisaun neʼe ajuda sira-nia estudante atu tuir reuniaun. Klaru katak ita la presiza hein toʼo estuda lisaun 10 mak konvida estudante Bíblia atu tuir reuniaun sira. Konvida kedas nia atu tuir reuniaun no kontinua konvida nia beibeik. Estudante ida-idak hasoru susar neʼebé la hanesan. Tan neʼe, tau fokus ba estudante nia presiza, no haree oinsá Ita bele ajuda nia. Keta sai laran-kraik se nia la tuir kedas reuniaun. Hatudu pasiénsia no kontinua konvida nia.

15. Karik estudante Bíblia sente taʼuk kona-ba saida?

¹⁵ Uluk Ita sente taʼuk atu sai Testemuña ba Jeová ka lae? Karik Ita sente katak Ita sei nunka bele haklaken husi uma ba uma. Ka karik Ita taʼuk família ka belun sira kontra Ita. Se nuneʼe, karik Ita bele komprende Ita-nia estudante nia sentimentu. Jesus rekoñese katak ema balu sei sente taʼuk. Maibé nia anima ninia dixípulu atu la husik sentimentu taʼuk hanetik sira atu serbí Jeová. (Mt 10:16, 17, 27, 28) Oinsá Jesus ajuda ninia dixípulu atu manán sentimentu taʼuk? Oinsá Ita bele banati-tuir nia?

16. Oinsá ita bele treinu ita-nia estudante atu fó sai ninia fiar?

¹⁶ Neineik-neineik treinu estudante Bíblia atu fó sai ninia fiar ba ema seluk. Karik Jesus nia dixípulu sente laran-taridu bainhira nia haruka sira atu bá haklaken. Maibé Jesus ajuda sira hodi  fó-hatene kona-ba sira bele haklaken ba sé no mensajen saida mak sira presiza fó sai. (Mt 10:5-7) Oinsá Ita bele banati-tuir Jesus? Ajuda Ita-nia estudante atu buka-hatene nia bele haklaken ba sé. Porezemplu, husu nia se nia koñese ema ruma neʼebé bele hetan benefísiu hodi aprende lia-loos espesífiku husi Bíblia. Tuirmai ajuda nia prepara no hatudu ba nia dalan simples atu fahe lia-loos. Se bele, treinu hamutuk ho nia hodi uza parte ho títulu “Ema balu dehan” no “Karik ema sei husu” iha livru Moris Haksolok ba Nafatin. Bainhira Ita treinu Ita-nia estudante, tau fokus atu ajuda nia uza Bíblia hodi fó resposta neʼebé simples no respeitu.

17. Oinsá ita bele uza Mateus 10:19, 20, 29-31 atu ajuda estudante Bíblia tau fiar ba Jeová?

¹⁷ Ajuda estudante Bíblia atu tau fiar ba Jeová. Jesus hatete ba ninia dixípulu katak Jeová sei ajuda sira tanba Jeová hadomi sira. (Lee Mateus 10:19, 20, 29-31.) Fó-hanoin Ita-nia estudante katak Jeová mós sei ajuda nia. Ita bele ajuda nia atu sadere ba Jeová liuhusi halo orasaun kona-ba ninia planu sira hamutuk ho nia. Irmaun Franciszek iha rai-Polónia konta kona-ba tempu neʼebé nia estuda Bíblia, hodi dehan: “Haʼu-nia mestre Bíblia temi beibeik haʼu-nia planu sira iha ninia orasaun. Bainhira haʼu haree oinsá Jeová hatán ba haʼu-nia mestre nia orasaun, haʼu mós komesa halo orasaun. Haʼu sente Jeová ajuda haʼu bainhira haʼu presiza husu lisensa ba patraun atu bele tuir reuniaun sira no reuniaun boot.”

18. Jeová sente oinsá kona-ba serbisu neʼebé mestre Bíblia sira halo?

¹⁸ Jeová hadomi tebes ita-nia estudante Bíblia. Jeová hatene mestre Bíblia sira serbisu makaʼas atu ajuda ema hakbesik ba Jeová no nia hadomi mestre Bíblia sira-neʼe. (Isa 52:7) Se agora daudaun, Ita la estuda Bíblia ho ema ruma, Ita nafatin bele ajuda estudante Bíblia atu laʼo ba oin no hetan batizmu liuhusi akompaña maluk Kristaun sira seluk atu estuda Bíblia ho ema.