DURANTE tinan barak, ema Izraél fó osan atu apoia adorasaun loos. Maibé iha Jesus nia tempu, ema Judeu presiza selu impostu oioin no neʼe hatodan sira.

Atu apoia adorasaun iha tenda santu no tuirmai iha templu, tinan-tinan mane Judeu hotu neʼebé boot ona presiza selu siklu 0.5 (drakma rua). Iha Jesus nia tempu, osan neʼe uza atu halaʼo serbisu iha templu neʼebé Herodes harii. Ema Judeu balu husu Pedro kona-ba Jesus nia hanoin kona-ba selu impostu, no Jesus dehan la sala atu selu impostu. Tuir loloos, Jesus haruka Pedro atu bá foti osan besi ida atu selu impostu.—Mt 17:24-27.

Maromak nia povu iha tempu uluk mós presiza fó porsentu sanulu husi sira-nia toʼos ka osan neʼebé sira simu. (Lev 27:30-32; Núm 18:26-28) Ulun-naʼin relijiaun sira obriga ema atu selu porsentu sanulu ba modo hotu, inklui mós porsentu sanulu husi “ortelaun, endru no komiñu”. Jesus la dehan katak sala atu fó porsentu sanulu, maibé nia dehan katak dalan neʼebé eskriba no Farizeu sira aplika lei neʼe mak sala.—Mt 23:23.

Iha tempu neʼebá, ema Judeu mós presiza selu impostu barak ba governu Roma neʼebé ukun sira. Porezemplu, ema sira neʼebé iha propriedade, presiza selu impostu ho osan ka ho sasán. Ema presiza selu porsentu 20 toʼo 25 husi rezultadu neʼebé nia hetan husi ninia rai. Ema Judeu ida-idak mós presiza selu impostu ba governu Roma. Ema Farizeu sira husu pergunta ba Jesus kona-ba impostu neʼe. Jesus hatudu sai ninia hanoin kona-ba selu impostu hodi hatete: “Fó ba César buat neʼebé César nian, no fó ba Maromak buat neʼebé Maromak nian.”—Mt 22:15-22.

Ema mós presiza selu impostu ba sasán neʼebé tama ka sai husi área ida ba área seluk. Ema selu impostu neʼe iha portu sira, ponte sira, dalan, no portaun atu tama ba sidade ka merkadu.

Iha Roma nia ukun okos, ema tenkesér selu impostu oioin no neʼe hatodan sira. Matenek-naʼin kona-ba ema Roma nia istória naran Tácito hatete katak durante Liurai Tibério nia ukun bainhira Jesus iha rai, “ema Síria no ema Judeu husu atu hamenus impostu tanba neʼe hatodan sira”.

Dalan neʼebé ema halibur impostu sira mós hatodan ema. Ema bele sosa direitu atu sai kobradór impostu. Ema neʼebé selu barak liu mak sei sai kobradór impostu no hetan lukru husi impostu neʼebé sira simu. Tuirmai kobradór impostu sei fó serbisu ba ema seluk atu halibur impostu no ema neʼebé halaʼo serbisu neʼe mós hetan lukru hodi aumenta folin ba impostu. Ita bele fiar katak Zaqueu mós fó serbisu ba ema seluk atu halibur impostu. (Lc 19:1, 2) Tan neʼe mak ema odi no la hafolin kobradór impostu sira.