1. Tanbasá ita hatene katak Jeová hadomi ita ida-idak?

JEOVÁ dada ita ida-idak ba nia. (João 6:44) Hanoin toʼok kona-ba neʼe, Jeová hateke ba ema millaun ba millaun iha mundu tomak, no nia haree katak Ita mak laran-moos no hakarak atu hadomi nia. Tan neʼe Jeová hafolin tebes Ita. (1 Krón 28:9) Jeová koñese Ita, komprende Ita, no hadomi Ita. Neʼe halo Ita sente kmaan tebes.

2. Oinsá Jesus ajuda ita komprende katak Jeová hadomi ninia bibi ida-idak?

² Jeová hadomi tebes Ita, no nia mós hadomi irmaun-irmán sira. Atu ajuda ita komprende ida-neʼe, Jesus kompara Jeová ho bibi-atan ida. Se bibi-atan ida iha bibi-malae 100 no bibi ida lakon, nia sei halo saida? “Nia sei husik bibi 99 iha foho no bá buka ida neʼebé lakon.” Bainhira nia hetan bibi-malae neʼe, nia la hirus ba bibi neʼe tanba halai lakon. Maibé nia sente haksolok. Ita aprende saida? Jeová hafolin ninia bibi ida-idak. Jesus hatete: “Haʼu-nia Aman iha lalehan lakohi kiʼikoan sira-neʼe ida lakon.”—Mt 18:12-14.

3. Iha lisaun neʼe, ita sei aprende saida?

³ Ita lakohi halo irmaun-irmán sira sai laran-kraik. Ita bele halo saida atu la halo irmaun-irmán seluk sidi? No ita bele halo saida se irmaun-irmán ruma hakanek ita-nia laran? Ita sei hetan resposta ba pergunta sira-neʼe iha lisaun neʼe. Maibé ulukliu, mai ita aprende kona-ba “kiʼikoan sira-neʼe” neʼebé temi iha Mateus kapítulu 18.

4. Sé mak “kiʼikoan sira-neʼe”?

⁴ “Kiʼikoan sira-neʼe” mak Jesus nia dixípulu ho idade oioin. Sira hotu mak “hanesan labarik kiʼik” tanba hakarak atu simu hanorin husi Jesus. (Mt 18:3) Maski sira-nia situasaun moris, kultura, hanoin no hahalok la hanesan, maibé sira hotu tau fiar ba Kristu. No Kristu hadomi tebes sira.—Mt 18:6; João 1:12.

5. Jeová sente oinsá bainhira ema ida halo ninia atan sidi ka halo sira laran-kanek?

⁵ Jeová hafolin tebes “kiʼikoan sira-neʼe” hotu. Atu bele komprende Jeová nia sentimentu, hanoin toʼok kona-ba oinsá ita hadomi labarik sira. Labarik sira mak folin-boot. Ita hakarak proteje sira tanba sira ladún iha forsa, esperiénsia, no matenek hanesan ema boot. Tuir loloos, ita la gosta bainhira ema ida lori susar ba ema seluk, liuliu bainhira ema lori susar ba labarik sira. Ida-neʼe halo ita sente hirus. Nuneʼe mós ho Jeová, nia hakarak proteje ita no nia sai hirus bainhira ema ida halo ninia atan sidi ka halo sira laran-kanek.—Isa 63:9; Mc 9:42.

6. Tuir 1 Korinto 1:26-29, ema hanoin oinsá kona-ba Jesus nia dixípulu sira?

⁶ Jesus nia dixípulu sira mak atu hanesan ho “kiʼikoan sira-neʼe” iha dalan seluk tan. Tuir ema barak nia hanoin, ema neʼebé riku, iha naran-boot, no iha podér mak ema neʼebé importante. Maibé baibain ema haree Jesus nia dixípulu sira nuʼudar ema neʼebé la importante no folin-laek. (Lee 1 Korinto 1:26-29.) Maibé Jeová nia hanoin la hanesan neʼe.

7. Jeová hakarak ita atu sente oinsá kona-ba irmaun-irmán sira?

⁷ Jeová hadomi no hafolin ninia atan hotu, maski sira serbí nia ba tinan barak ka foun iha lia-loos. Tan neʼe, ita mós presiza hafolin sira. Ita hakarak “hadomi maluk fiar-naʼin hotu”, laʼós balu deʼit. (1 Ped 2:17) Ita tenke prontu atu halo buat naran deʼit hodi proteje no tau matan sira. Se ita hakanek irmaun ka irmán ida nia laran, ita labele husik deʼit ida-neʼe no hanoin katak nia mak ema neʼebé sensitivu demais no nia presiza haluha deʼit. Tanbasá mak ema balu sai laran-kanek? Karik sira-nia situasaun moris bainhira sira kiʼik mak halo sira sente la iha folin. Irmaun-irmán seluk foun iha lia-loos no seidauk hatene oinsá atu tahan ema nia fraku sira. Iha situasaun hotu, ita presiza hakaʼas an atu hadame malu. Maibé ema neʼebé laran-kanek lalais, presiza rekoñese katak ninia hahalok neʼe la diʼak no presiza hakaʼas an atu hadiʼa. Se nia halo nuneʼe, nia sei haksolok no iha relasaun diʼak ho irmaun-irmán sira.

8. Ideia saida mak fó influénsia ba Jesus nia dixípulu sira?

⁸ Tanbasá Jesus koʼalia kona-ba “kiʼikoan sira-neʼe”? Ninia dixípulu sira husu pergunta ida: “Sé mak boot liu iha Ukun lalehan nian?” (Mt 18:1) Iha tempu neʼebá, ema Judeu barak hakarak ema haree sira nuʼudar ema importante. Matenek-naʼin ida esplika kona-ba ema Judeu, hodi hatete: “Atu hetan glória no iha naran-boot mak importante tebes iha sira-nia moris.”

9. Jesus nia dixípulu sira presiza halo saida?

⁹ Jesus hatene katak ema Judeu barak koko atu sai diʼak liu fali ema seluk. Tan neʼe, ninia dixípulu sira presiza hakaʼas an atu hadiʼa sira-nia hanoin. Nia hatete ba sira: “Ema neʼebé boot liu iha imi-nia leet  tenke sai kiʼik liu, no ema neʼebé dirije imi tenke serbí imi.” (Lc 22:26) Ita hatudu katak ita mak “kiʼik liu” bainhira ita “haree ema seluk boot liu fali” ita. (Flp 2:3) Bainhira ita haburas hanoin hanesan neʼe, neʼe sei ajuda ita atu la halo ema seluk sidi.

10. Ita presiza halo tuir Paulo nia konsellu saida?

¹⁰ Irmaun-irmán hotu mak boot liu fali ita iha dalan oioin. Bainhira ita tau fokus ba irmaun-irmán sira-nia hahalok diʼak, neʼe ajuda ita atu haree sira boot liu fali ita. Ita presiza halo tuir Paulo nia konsellu ba ema Kristaun iha Korinto: “Sé mak halo imi la hanesan ho ema seluk? Loloos, buat hotu neʼebé imi iha ona, imi simu neʼe husi Maromak, loos ka lae? Se imi simu ida-neʼe husi Maromak, tanbasá mak imi gaba an hanesan imi simu ida-neʼe ho imi-nia kbiit rasik?” (1 Kor 4:7) Ita lakohi dada atensaun ba ita-nia an ka hanoin katak ita mak importante liu fali ema seluk. Se irmaun ida hatoʼo diskursu kapás ka irmán ida matenek atu komesa estuda Bíblia ho ema, sira presiza fó glória hotu ba Jeová.

11. Ita aprende saida husi Jesus nia ai-knanoik kona-ba liurai ida no atan ida?

¹¹ Depois Jesus fó avizu ba ninia dixípulu sira atu la halo ema seluk sidi, nia konta ai-knanoik ida kona-ba liurai ida no atan ida. Liurai neʼe husik ninia atan livre husi debe boot tanba atan neʼe labele selu. Maibé tuirmai atan neʼe lakohi husik livre ninia maluk atan neʼebé debe nia uitoan deʼit. Ikusmai, liurai hatama atan aat neʼe ba komarka. Ita aprende saida? Jesus hatete: “Haʼu-nia Aman iha lalehan mós sei halo buat neʼebé hanesan ba imi se imi la perdua malu husi laran.”—Mt 18:21-35.

12. Se ita lakohi fó perdua, oinsá ida-neʼe hakanek ema seluk?

¹² Atan neʼe nia hahalok lori susar ba nia no mós ba ema seluk. Oinsá? Primeiru, atan neʼe lori susar ba ninia maluk atan tanba “hatama ninia maluk ba komarka” toʼo ninia maluk neʼe bele selu fali debe. Segundu, nia mós lori susar ba atan sira seluk neʼebé haree ninia hahalok neʼe. Bainhira ninia “maluk atan sira seluk haree buat neʼebé akontese, sira laran-susar tebetebes”. Hanesan neʼe mós, ita-nia hahalok bele fó impaktu ba ema seluk. Se ema trata aat ita no ita lakohi perdua nia, saida mak bele akontese? Primeiru, ita hakanek ema neʼe nia laran tanba ita lakohi perdua nia, lakohi koʼalia ho nia no lakohi hatudu domin ba nia. Segundu, ita mós halo irmaun-irmán sira iha kongregasaun sente la diʼak tanba haree katak ita iha problema ho ema neʼe.

13. Ita bele aprende saida husi irmán Crystal?

¹³ Bainhira ita fó perdua ba irmaun-irmán sira, neʼe lori benefísiu ba ita-nia an no mós ema seluk. Haree toʼok irmán pioneiru ida naran Crystal nia esperiénsia. * Irmán ida iha kongregasaun hakanek ninia laran. Irmán Crystal hatete: “Dala ruma ninia liafuan sira hanesan tudik neʼebé sona haʼu-nia laran. Haʼu lakohi atu haklaken ho nia. Haʼu komesa lakon haʼu-nia laran-manas no ksolok atu haklaken.” Irmán Crystal sente katak nia iha razaun neʼebé loos atu sai hirus. Maibé nia la rai hirus ka la tau fokus deʼit ba ninia sentimentu. Nia aplika Bíblia nia matadalan kona-ba fó perdua ho laran. * Nia halo tuir matadalan neʼe. Nia hatete:  “Agora haʼu rekoñese katak ita hotu hakaʼas an atu tau hahalok foun no Jeová prontu atu fó perdua ba ita loroloron. Haʼu sente kmaan tebes no bele sente haksolok fali.”

14. Tuir Mateus 18:21, 22, susar ba apóstolu Pedro atu halo saida? Ita aprende saida husi Jesus nia liafuan?

¹⁴ Ita hatene katak ita presiza fó perdua ba ema seluk, maibé dala ruma susar atu halo nuneʼe. Apóstolu Pedro mós dala ruma sente hanesan neʼe. (Lee Mateus 18:21, 22.) Saida mak Ita bele halo? Primeiru, medita kona-ba oinsá Jeová fó perdua ba Ita. (Mt 18:32, 33) Ita la merese atu hetan perdua husi Jeová, maibé nia prontu atu perdua ita. (Sal 103:8-10) Ita mós “iha obrigasaun atu hadomi malu”. Nuʼudar ema Kristaun, ita tenkesér fó perdua ba irmaun-irmán sira. (1 João 4:11) Segundu, medita kona-ba rezultadu neʼebé ita hetan se ita fó perdua. Karik ita bele ajuda ema neʼebé halo sala hasoru ita, hametin unidade iha kongregasaun, proteje ita-nia relasaun diʼak ho Jeová, no sente kmaan. (2 Kor 2:7; Kol 3:14) Ikusliu, halo orasaun ba Jeová. Keta husik Satanás estraga Ita-nia relasaun diʼak ho irmaun-irmán sira. (Éf 4:26, 27) Ita presiza Jeová nia ajuda atu la monu ba Satanás nia lasu.

15. Tuir Koloso 3:13, ita bele halo saida se irmaun ka irmán hakanek ita-nia laran?

¹⁵ Oinsá se irmaun ka irmán ida nia hahalok hakanek Ita-nia laran? Ita bele halo saida? Hakaʼas an atu kontinua haburas dame. Halo orasaun ba Jeová. Husu Jeová atu haraik bensaun ba ema neʼebé hakanek Ita-nia laran no ajuda Ita atu tau fokus ba ema neʼe nia hahalok diʼak neʼebé Jeová mós gosta. (Lc 6:28) Se Ita labele haluha deʼit buat neʼebé irmaun ka irmán  neʼe halo, hanoin kona-ba dalan diʼak oinsá atu koʼalia ba nia. Diʼak atu sempre hanoin katak nia hakanek Ita-nia laran la ho neon. (Mt 5:23, 24; 1 Kor 13:7) Bainhira Ita koʼalia ho nia, diʼak atu hanoin pozitivu kona-ba nia. Oinsá se nia lakohi hadame malu? Bíblia dehan, “kontinua hatudu pasiénsia ba” nia. Keta rende an. (Lee Koloso 3:13.) Importante liu mak keta rai hirus tanba neʼe bele estraga Ita-nia relasaun diʼak ho Jeová. Keta husik buat ida halo Ita sidi. Hodi halo nuneʼe, Ita hatudu ba Jeová katak Ita hadomi nia liu fali buat hotu.—Sal 119:165.

16. Ita ida-idak iha responsabilidade saida?

¹⁶ Ita agradese tanba ita bele serbí Jeová hamutuk ho irmaun-irmán sira nuʼudar “bibi-lubun ida” neʼebé “bibi-atan ida” mak tau matan. (João 10:16) Livru Organizasaun neʼebé halo Jeová nia hakarak, pájina 165, hatete: “Ita hetan ona benefísiu husi unidade neʼe, no Ita iha responsabilidade atu mantein unidade neʼe.” Tan neʼe, Ita presiza “sai toman atu haree irmaun-irmán sira hanesan Jeová haree sira”. Ita hotu mak folin-boot ba Jeová. Ita mós hafolin irmaun-irmán sira ka lae? Jeová haree no hafolin buat hotu neʼebé Ita halo atu ajuda irmaun-irmán sira no tau matan ba sira.—Mt 10:42.

17. Ita hakaʼas an atu halo saida?

¹⁷ Ita hadomi maluk Kristaun sira. Tan neʼe, ‘hakaʼas an atu la tau fatuk sidi nian iha ita-nia maun-alin nia oin ka tau buat ruma neʼebé halo nia monu’. (Rom 14:13) Ita haree irmaun-irmán sira boot liu fali ita, no ita hakarak fó perdua ba sira husi laran. Mai ita hakaʼas an atu la sidi tanba ema seluk nia hahalok. Duké halo nuneʼe, mai ita “buka atu halo buat neʼebé haburas dame no buat neʼebé hametin malu”.—Rom 14:19.