Paulo hakerek: “Liuhusi ukun-fuan, haʼu mate ona tuir ukun-fuan, atu nuneʼe haʼu bele moris ba Maromak.”—Gal 2:19.

Paulo nia liafuan liga ho buat neʼebé nia hanorin ba ema iha kongregasaun Galásia. Ema Kristaun balu hetan influénsia husi mestre falsu sira. Sira hanorin katak atu bele hetan salvasaun, ema presiza halo tuir Moisés nia Ukun-Fuan, inklui ukun-fuan kona-ba sirkunsizaun. Maibé Paulo hatene katak Maromak la haruka tan ninia atan sira atu hetan sirkunsizaun. Nia esplika iha dalan neʼebé lójiku no hatudu katak mestre falsu sira-nia hanorin mak sala. Nia mós hametin irmaun-irmán sira-nia fiar kona-ba Jesus nia sakrifísiu.—Gal 2:4; 5:2.

Bíblia esplika ho klaru katak bainhira ema ida mate, nia la hatene buat ida ka la sente buat ida. (Ecle 9:5) Bainhira Paulo hatete katak “haʼu mate ona tuir ukun-fuan”, neʼe katak nia la presiza halo tuir tan Moisés nia Ukun-Fuan. Maibé Paulo iha konfiansa katak tanba nia fiar ba Jesus nia sakrifísiu, nia komesa ona “moris ba Maromak”.

Paulo nia situasaun troka “liuhusi ukun-fuan”. Oinsá? Kontestu husi eskritura hatudu katak Paulo foin esplika katak “Maromak haree ema ida nuʼudar ema laran-loos, laʼós tanba halo tuir ukun-fuan, maibé tanba deʼit fiar Jesus Kristu”. (Gal 2:16) Tuir loloos, Moisés nia Ukun-Fuan kumpre buat ida neʼebé importante tebes. Paulo esplika ba ema Kristaun iha Galásia: “[Maromak] fó Ukun-Fuan atu hatudu sai sala neʼebé ema halo, toʼo bei-oan mosu mai, bei-oan neʼebé simu ona promesa neʼe.” (Gal 3:19) Moisés nia Ukun-Fuan hatudu katak ema neʼebé sala-naʼin labele halo tuir Ukun-Fuan ho perfeitu no sira presiza sakrifísiu ida neʼebé perfeitu. Moisés nia Ukun-Fuan ajuda ema hatene katak Jesus mak “bei-oan”. Bainhira ema ida hatudu fiar ba Jesus Kristu, Maromak bele haree nia nuʼudar ema laran-loos. (Gal 3:24) Maromak haree Paulo nuʼudar ema laran-loos tanba liuhusi Ukun-Fuan, Paulo simu no tau fiar ba Jesus. Tan neʼe Paulo “mate tuir ukun-fuan” no nia komesa “moris ba Maromak”. Nia laʼós tan atan ba Ukun-Fuan, maibé atan ba Maromak.

Paulo fó sai buat neʼebé hanesan liuhusi ninia karta ba ema Kristaun iha Roma. Nia hakerek: “Haʼu-nia maun-alin sira, imi livre ona husi Ukun-Fuan liuhusi Kristu nia isin . . . ita sai livre ona husi Ukun-Fuan neʼe, tanba Ukun-Fuan la hanetik tan ita.” (Rom 7:4, 6) Eskritura neʼe no mós Galásia 2:19 hatudu katak Paulo la koʼalia kona-ba mate nuʼudar sala-naʼin. Maibé nia koʼalia kona-ba sai livre. Ukun-Fuan la hanetik tan nia no ema Kristaun seluk neʼebé hanesan nia. Sira sai livre liuhusi tau fiar ba Kristu nia sakrifísiu.