EMA barak hatene katak uluk, ema Ejitu uza duʼut-papiru atu halo surat-tahan. Ema Gregu no ema Roma mós uza duʼut-papiru atu halo surat-tahan. * Maibé buat neʼebé ema barak la hatene mak uluk ema mós uza duʼut-papiru atu halo ró ka bero.

Maizumenus tinan 2.500 liubá, profeta Isaias hakerek katak ema neʼebé hela “iha área neʼebé besik mota sira iha Etiópia” haruka “ema sira lori lia-menon liuhusi tasi, sira hakur tasi ho ró husi duʼut-papiru”. Profeta Jeremias mós fó sai nanis katak bainhira ema Média-Pérsia ataka Babilónia, sira sei sunu “bero hotu neʼebé halo ho duʼut-papiru” atu nuneʼe ema labele halai sai husi Babilónia.—Isa 18:1, 2; Jer 51:32.

Bíblia mai husi Maromak, tan neʼe ema neʼebé estuda Bíblia la hakfodak bainhira arkeólogu sira deskobre katak iha Bíblia nia tempu, ema uza duʼut-papiru atu halo ró ka bero. (2 Tim 3:16) Saida mak arkeólogu sira deskobre? Sira deskobre katak ema Ejitu halo ró ho duʼut-papiru.

Iha ema Ejitu nia rate, iha dezeñu no buat neʼebé ema bahat neʼebé hatudu oinsá ema halibur duʼut-papiru no halo ró. Mane sira tesi duʼut-papiru nia kain, futu hamutuk, no tuirmai kesi hamutuk fali futun sira-neʼe. Duʼut-papiru nia kain mak triángulu. Tan neʼe, bainhira futu hamutuk, duʼut-papiru nia kain sira metin nafatin. Livru ida (A Companion to Ancient Egypt) kona-ba ema Ejitu nia istória hatete katak ró neʼebé halo husi duʼut-papiru bele naruk toʼo metru 17 no bele iha fatin ba fose 10 ka 12 iha sorin-sorin.

Iha rai-Ejitu, duʼut-papiru moris barak tebes iha área besik Mota Nilo. Fasil atu halo ró no bero ho duʼut-papiru. Maski ikusmai ema uza ai atu halo ró neʼebé boot, maibé peskadór no kasadór sira kontinua halo bero hodi uza duʼut-papiru.

Ba tinan barak, ema nafatin uza ró neʼebé halo husi duʼut-papiru. Hakerek-naʼin husi Grésia naran Plutarku, neʼebé moris durante apóstolu sira-nia tempu, hatete katak ema balu iha tempu neʼebá nafatin uza ró neʼebé halo husi duʼut-papiru.