1-2. Testemuña barak hasoru problema saida deʼit?

APÓSTOLU PAULO anima Timóteo no mós ita atu kumpre didiʼak serbisu haklaken. (2 Tim 4:5) Ita hotu hakarak halo tuir Paulo nia konsellu. Maibé dala ruma susar atu halo ida-neʼe. Irmaun-irmán barak presiza duni aten-brani atu bele haklaken. (2 Tim 4:2) Porezemplu, irmaun-irmán balu hela iha rai neʼebé governu hanetik ka bandu ita-nia atividade. Sira nafatin haklaken maski sira hatene katak ema bele hatama sira ba komarka.

² Jeová nia povu hasoru problema oioin neʼebé bele halo sira laran-kraik. Porezemplu, irmaun-irmán barak presiza serbisu ba oras barak atu bele sustenta sira-nia família. Sira hakarak uza tempu barak liután atu haklaken iha findesemana, maibé sira ladún iha forsa atu halo nuneʼe. Irmaun-irmán seluk labele halo buat barak atu serbí Jeová tanba moras todan, sai idade ka labele sai husi uma. Irmaun-irmán seluk sente katak sira la iha folin. Irmán Mary * hatete: “Haʼu presiza luta makaʼas atu kontrola haʼu-nia hanoin negativu no neʼe halo haʼu kole tebes. Tuirmai haʼu fó-sala ba haʼu-nia an tanba uza tempu no enerjia barak liu atu halo ida-neʼe duké haklaken.”

3. Iha lisaun neʼe, ita sei aprende saida?

³ Maski ita ida-idak nia situasaun la hanesan, maibé Jeová bele fó ita kbiit atu tahan ita-nia problema no kontinua serbí nia tuir ita-nia kbiit. Antes ita aprende kona-ba oinsá Jeová bele ajuda ita, mai ita aprende kona-ba oinsá Jeová hametin Paulo no Timóteo atu kumpre didiʼak sira-nia serbisu haklaken maski hasoru problema oioin.

4. Problema saida deʼit mak Paulo hasoru?

⁴ Paulo hasoru problema oioin. Nia presiza kbiit husi Jeová bainhira inimigu baku nia, tuda nia, no hatama nia ba komarka. (2 Kor 11:23-25) Paulo la moe atu fó sai katak dala ruma nia mós luta hasoru hanoin negativu. (Rom 7:18, 19, 24) Nia mós presiza tahan hasoru problema saúde neʼebé hanesan ‘ai-tarak iha isin’ no nia hakarak tebes Maromak atu hasai tiha ida-neʼe.—2 Kor 12:7, 8.

5. Saida mak Paulo kumpre maski hasoru susar?

⁵ Jeová fó kbiit ba Paulo atu kontinua haklaken maski hasoru susar oioin. Hanoin toʼok buat neʼebé Paulo kumpre. Porezemplu, bainhira sai dadur iha uma ida iha Roma, Paulo haklaken ho laran-manas ba ulun-naʼin relijiaun Judeu nian no karik mós haklaken ba autoridade sira. (Após 28:17; Flp 4:21, 22) Nia mós haklaken ba Liurai Roma nia guarda barak, no ba ema neʼebé vizita nia. (Após 28:30, 31; Flp 1:13) Iha tempu neʼebé hanesan, Maromak mós uza Paulo atu hakerek karta sira neʼebé ajuda ema Kristaun iha ninia tempu toʼo ohin loron. Liután neʼe, Paulo nia ezemplu hametin ema Kristaun iha Roma, no rezultadu mak irmaun-irmán sira “sai aten-brani liután atu koʼalia Maromak nia liafuan la ho taʼuk”. (Flp 1:14) Maski dala ruma Paulo labele halo buat barak tuir ninia hakarak, maibé nia aproveita didiʼak ninia situasaun, no “neʼe loke dalan atu habelar liután liafuan diʼak”.—Flp 1:12.

6. Tuir 2 Korinto 12:9, 10, saida mak ajuda Paulo atu kumpre ninia serbisu haklaken?

⁶ Paulo rekoñese katak buat hotu neʼebé nia halo iha Jeová nia serbisu mai husi Jeová nia kbiit, laʼós ninia kbiit. Paulo hatete katak Maromak nia kbiit “sai kompletu kuandu [Paulo] fraku”. (Lee 2 Korinto 12:9, 10.) Liuhusi espíritu santu Jeová fó kbiit ba Paulo atu kumpre didiʼak ninia serbisu haklaken maski ema fó-terus nia, hatama nia ba komarka, no hasoru problema seluk tan.

7. Timóteo hasoru problema saida neʼebé halo susar ba nia atu kumpre serbisu haklaken?

⁷ Paulo nia belun ida naran Timóteo neʼebé joven hela mós sadere ba Maromak nia forsa atu kumpre didiʼak serbisu haklaken. Timóteo hamaluk Paulo iha  ninia viajen nuʼudar misionáriu. Paulo mós haruka Timóteo atu vizita no anima kongregasaun sira. (1 Kor 4:17) Maibé karik Timóteo sente katak ninia matenek la toʼo atu kumpre knaar neʼe. Tan neʼe karik Paulo hatete ba Timóteo: “Keta husik ema ida la respeitu ó tan deʼit ó sei joven.” (1 Tim 4:12) Iha tempu hanesan, Timóteo mós “moras beibeik”, no neʼe hanesan ai-tarak iha ninia isin. (1 Tim 5:23) Maibé Timóteo hatene katak Jeová nia espíritu santu sei fó ba nia kbiit neʼebé nia presiza atu haklaken no ajuda irmaun-irmán sira.—2 Tim 1:7.

8. Oinsá Jeová hametin ninia povu ohin loron?

⁸ Ohin loron Jeová fó ba ninia povu “kbiit neʼebé la hanesan baibain” atu nuneʼe sira bele kontinua serbí nia ho laran-metin. (2 Kor 4:7) Mai ita aprende dalan haat neʼebé Jeová ajuda no hametin ita atu nafatin laran-metin ba nia, neʼe mak orasaun, Bíblia, irmaun-irmán sira, no mós serbisu haklaken.

9. Oinsá orasaun bele ajuda ita?

⁹ Hetan kbiit liuhusi orasaun. Iha Éfeso 6:18, Paulo anima ita atu halo orasaun ba Maromak “iha situasaun hotu”. Jeová sei hatán ita-nia orasaun hodi hametin ita. Irmaun Jonnie neʼebé hela iha rai-Bolívia sente ona oinsá Jeová ajuda nia bainhira nia hasoru problema oioin. Ninia feen no inan-aman sai moras todan iha tempu hanesan. Susar ba nia atu tau matan ba sira naʼin-tolu. Ninia inan mate, no presiza tempu kleur ba ninia feen no aman atu sai diʼak fali. Kona-ba tempu susar neʼe, nia hatete: “Bainhira haʼu hanoin barak tebes, buat neʼebé ajuda haʼu mak halo orasaun espesífiku ba Jeová.” Jeová fó ba irmaun Jonnie kbiit neʼebé nia presiza atu bele tahan. Katuas kongregasaun ida naran Ronald neʼebé hela iha rai-Bolívia rona katak ninia inan hetan moras-kankru. Fulan ida liutiha, ninia inan mate. Saida mak ajuda nia tahan? Nia hatete: “Bainhira haʼu halo orasaun ba Jeová, haʼu fakar sai haʼu-nia sentimentu hotu ba nia. Haʼu hatene katak Jeová komprende liu haʼu duké haʼu-nia an rasik no mós ema seluk.” Dala ruma ita sente laran-taridu demais toʼo la hatene atu halo orasaun kona-ba saida. Maibé Jeová konvida ita atu halo orasaun ba nia maski ita sente susar atu fó sai ita-nia hanoin no mós sentimentu.—Rom 8:26, 27.

10. Tuir Ebreu 4:12, tanbasá lee no medita kona-ba Bíblia mak importante?

¹⁰ Hetan kbiit liuhusi Bíblia. Hanesan Paulo neʼebé lee Eskritura hodi hetan kbiit no kmaan, ita mós bele halo nuneʼe. (Rom 15:4) Bainhira ita lee no medita kona-ba Bíblia, Jeová bele uza ninia espíritu santu atu ajuda ita komprende oinsá ita bele aplika eskritura sira iha ita-nia situasaun. (Lee Ebreu 4:12.) Irmaun Ronald neʼebé temi ohin hatete: “Haʼu agradese tanba haʼu iha toman atu lee Bíblia kalan-kalan. Haʼu medita kona-ba Jeová nia hahalok sira no oinsá nia tau matan ba ninia povu. Neʼe ajuda haʼu atu hetan fali kbiit.”

11. Oinsá Bíblia hametin irmán ida neʼebé triste hela?

¹¹ Bainhira ita medita kona-ba Bíblia, neʼe ajuda ita atu iha hanoin neʼebé loos kona-ba ita-nia situasaun. Hanoin toʼok oinsá Bíblia ajuda feto-faluk ida neʼebé triste hela. Katuas kongregasaun ida hatete ba nia katak nia bele hetan ajuda  hodi lee livru Job. Foufoun bainhira nia lee, nia kritika kedas Job nia hanoin neʼebé sala. Nia hatete: “Job, keta hanoin demais ó-nia problema sira.” Maibé tuirmai nia rekoñese katak nia mós iha hanoin neʼebé atu hanesan ho Job nian. Ida-neʼe ajuda nia atu hadiʼa ninia hanoin no iha kbiit atu tahan laran-triste tanba ninia laʼen mate.

12. Oinsá Jeová hametin ita liuhusi irmaun-irmán sira?

¹² Hetan kbiit liuhusi irmaun-irmán sira. Dalan seluk neʼebé Jeová hametin ita mak liuhusi irmaun-irmán sira. Paulo hakerek katak nia hakarak tebes atu ransu ho irmaun-irmán sira hodi bele “anima no hametin malu”. (Rom 1:11, 12) Irmán Mary neʼebé temi ona ohin, hafolin tebes tempu atu ransu ho irmaun-irmán sira. Nia hatete: “Jeová uza irmaun-irmán sira atu ajuda haʼu maski sira la hatene kona-ba haʼu-nia problema. Sira anima haʼu ka haruka karta mai haʼu, no haʼu presiza duni ida-neʼe. Neʼe ajuda haʼu atu koʼalia ba irmán sira neʼebé mós hasoru situasaun hanesan haʼu-nian no aprende husi sira-nia esperiénsia. No katuas sira sempre ajuda haʼu atu sente katak kongregasaun hafolin haʼu.”

13. Oinsá ita bele hametin malu kuandu tuir reuniaun?

¹³ Reuniaun sira fó oportunidade ba ita atu anima malu. Bainhira ita tuir reuniaun, diʼak atu buka oportunidade atu hametin ema seluk hodi hatete ba sira katak ita hadomi no hafolin sira. Porezemplu, antes reuniaun komesa, katuas ida naran Peter hatete ba irmán neʼebé ninia laʼen laʼós Testemuña: “Haʼu kontente tebes atu haree Ita tuir reuniaun. Ita sempre ajuda Ita-nia oan naʼin-neen atu tuir reuniaun no prepara komentáriu sira.” Irmán neʼe nia matan-been nakonu tanba sente agradese no nia dehan: “Haʼu presiza tebes atu rona ida-neʼe ohin.”

14. Oinsá serbisu haklaken bele ajuda ita?

¹⁴ Hetan kbiit liuhusi serbisu haklaken. Bainhira ita fahe lia-loos husi Bíblia ba ema seluk, ita sente kmaan no iha forsa, maski ema rona ka lae. (Prov 11:25) Irmán Stacy sente rasik oinsá serbisu haklaken hametin nia. Bainhira kongregasaun hasai ninia família ida, nia sente triste tebes no hanoin beibeik: ‘Se karik uluk haʼu halo buat ruma atu ajuda nia, karik kongregasaun sei la hasai nia.’ Nia kontinua hanoin deʼit kona-ba neʼe. Saida mak ajuda nia atu tahan? Serbisu haklaken. Bainhira haklaken, nia tau fokus ba ema seluk neʼebé presiza hetan ajuda. Nia hatete: “Durante tempu susar neʼe, Jeová fó mai haʼu estudante Bíblia ida neʼebé laʼo ba oin lalais. Ida-neʼe anima tebes haʼu. Buat neʼebé ajuda tebes haʼu mak serbisu haklaken.”

15. Saida mak Ita bele aprende husi irmán Mary?

¹⁵ Ema balu sente katak sira labele halo buat barak iha serbisu haklaken tanba sira-nia situasaun. Se ita mós sente nuneʼe, hanoin-hetan katak Jeová kontente bainhira ita halo buat neʼebé ita bele halo tuir ita-nia kbiit. Hanoin toʼok kona-ba irmán Mary neʼebé temi ona ohin. Bainhira nia muda ba fatin neʼebé ema koʼalia língua seluk, nia sente katak nia labele halo buat barak. Nia hatete: “Ba tempu balu, buat neʼebé haʼu bele halo mak fó komentáriu neʼebé simples, lee eskritura ida, ka fó panfletu bainhira haklaken.” Neʼe halo nia sente katak nia ladún iha matenek se kompara ho ema neʼebé  koʼalia língua neʼe ho moos. Maski nuneʼe, nia hadiʼa ninia hanoin no rekoñese katak Jeová bele uza nia maski nia labele koʼalia língua neʼe ho moos. Nia hatete: “Lia-loos mak simples, no lia-loos bele troka ema nia moris.”

16. Oinsá ema neʼebé labele sai husi uma hetan kbiit?

¹⁶ Jeová haree no hafolin ita-nia hakarak atu haklaken maski ita labele sai husi uma tanba moras ka idade ona. Nia bele loke dalan ba ita atu haklaken ba ema neʼebé tau matan ba ita, doutór ka enfermeira sira. Ita sei sai laran-kraik, se ita kompara buat neʼebé ita halo agora ho buat neʼebé ita halo iha tempu pasadu. Maibé se ita komprende oinsá Jeová ajuda ita agora, ita sei hetan kbiit atu tahan susar naran deʼit ho ksolok.

17. Tuir Eclesiastes 11:6, tanbasá ita presiza kontinua haklaken maski la hetan kedas rezultadu?

¹⁷ Ita la hatene fini lia-loos nian ida-neʼebé mak sei iha abut no moris. (Lee Eclesiastes 11:6.) Porezemplu, irmán Barbara, neʼebé tinan 80 haklaken beibeik liuhusi telefone no karta. Nia haruka Livru Haklaken 1 Abríl 2014 ho títulu “Saida mak Maromak halo ona ba Ita?” hamutuk ho ninia karta ida. No nia la hatene katak ema neʼebé ikusmai simu karta neʼe mak feen-laʼen neʼebé kongregasaun hasai. Feen-laʼen neʼe lee revista neʼe dala barak. Laʼen neʼe sente katak, neʼe hanesan Jeová koʼalia ba sira. Feen-laʼen neʼe komesa tuir fali reuniaun no ikusmai sira sai fali Testemuña ba Jeová maski kongregasaun hasai sira tinan 27 liubá. Irmán Barbara hetan anima hodi haree rezultadu diʼak husi karta ida neʼebé nia hakerek.

18. Ita presiza halo saida atu hetan kbiit husi Maromak?

¹⁸ Jeová fó ita oportunidade barak atu simu kbiit husi nia. Bainhira ita aproveita dalan haat neʼebé nia fó mai ita hanesan orasaun, Bíblia, irmaun-irmán sira, no serbisu haklaken, ita hatudu katak ita fiar Jeová bele ajuda ita no nia hakarak atu ajuda ita. Mai ita sempre sadere ba ita-nia Aman iha lalehan neʼebé gosta “atu hatudu ninia kbiit hodi salva ninia atan sira neʼebé laran-metin ba nia”.—2 Krón 16:9.