1. Oinsá mak Bíblia esplika kona-ba domin neʼebé loos?

 “DOMIN lakan makaʼas hanesan ahi neʼebé lakan makaʼas, ahi husi Jah. Bee neʼebé barak labele hamate domin, no mota sira mós labele lori lakon tiha domin.” b (Kna 8:6, 7) Neʼe mak esplikasaun kapás kona-ba domin neʼebé loos! Liafuan sira-neʼe hatudu katak feen-laʼen sira bele hatudu domin neʼebé loos ba malu.

2. Saida mak kaben-naʼin sira presiza halo atu sira-nia domin la sai malirin?

² Feen-laʼen presiza duni hakaʼas an atu hadomi malu toʼo mate. Hanoin toʼok ezemplu neʼe, ahi ida bele kontinua lakan só deʼit se ema ida kontinua tau ai ba ahi neʼe. Se ema ruma la halo ida-neʼe, ikusmai ahi neʼe sei mate. Nuneʼe mós feen-laʼen nia domin bele kontinua metin nafatin só deʼit se sira hametin sira-nia relasaun. Dala ruma, feen-laʼen bele sente katak sira-nia domin malirin ona, liuliu bainhira sira estrese tanba problema ekonomia, saúde, ka susar atu haboot sira-nia oan. Entaun se Ita mak kaben ona, oinsá Ita bele halo “ahi husi Jah” lakan nafatin iha Ita-nia moris kaben nian? Iha lisaun neʼe, ita sei koʼalia kona-ba dalan tolu atu hametin Ita-nia relasaun kaben nian no moris kontente nuʼudar família. c

3. Oinsá mak relasaun neʼebé metin ho Jeová sei ajuda feen-laʼen atu kontinua hadomi malu? (Eclesiastes 4:12) (Haree mós foto.)

³ Atu halo “ahi husi Jah” lakan nafatin, feen no laʼen  tenke hakaʼas an hametin sira ida-idak nia relasaun diʼak ho Jeová. Oinsá ida-neʼe bele ajuda sira-nia moris kaben nian? Bainhira feen-laʼen hafolin sira-nia relasaun ho Aman iha lalehan, sira sei prontu atu aplika ninia konsellu no neʼe bele ajuda sira atu rezolve no hasees an husi problema neʼebé bele halo sira-nia domin sai malirin. (Lee Eclesiastes 4:12.) Ema espirituál mós hakaʼas an atu banati-tuir Jeová nia hahalok, hanesan laran-diʼak, pasiénsia no prontu atu fó perdua. (Éf 4:32–5:1) Bainhira feen-laʼen halo ida-neʼe, sira-nia domin ba malu sei sai boot liután. Irmán Lena neʼebé kaben ona ba tinan 25 hatete: “Fasil liu atu hadomi no respeitu ema neʼebé espirituál.”

4. Tanbasá Jeová hili José no Maria atu sai Mesias nia inan-aman?

⁴ Hanoin toʼok ezemplu ida husi Bíblia. Bainhira Jeová presiza hili feen-laʼen ida atu sai Mesias nia inan-aman, nia hili José no Maria duké feen-laʼen seluk neʼebé mós mai husi David nia liña jerasaun. Tanbasá? Tanba José no Maria iha relasaun diʼak ho Jeová, no Jeová hatene katak sira sei tau uluk nia iha sira-nia moris. Saida mak feen-laʼen sira bele aprende husi José no Maria?

5. Laʼen sira aprende saida husi José?

⁵ José prontu atu aplika Jeová nia matadalan, no neʼe ajuda nia atu sai laʼen neʼebé diʼak liu. Iha situasaun tolu, Maromak fó matadalan ba nia kona-ba ninia família. Nia halo tuir kedas matadalan ida-idak, maski neʼe katak nia tenke halo mudansa boot. (Mt 1:20, 24; 2:13-15, 19-21) Hodi halo tuir Jeová nia matadalan, José proteje, apoia no tau matan ba Maria. Klaru katak José nia hahalok ajuda Maria hadomi no respeitu liután nia. Laʼen sira, Ita bele banati-tuir José nia hahalok hodi buka Bíblia nia matadalan kona-ba tau matan ba família. d Bainhira Ita aplika matadalan sira-neʼe, Ita hatudu domin ba Ita-nia feen no hametin Ita-nia moris kaben nian, maski neʼe katak Ita presiza halo mudansa ruma. Irmán ida iha rai-Vanuatu neʼebé kaben ona ba tinan 20 liu hatete: “Bainhira haʼu-nia laʼen buka no aplika Jeová nia matadalan, haʼu respeitu nia liután, sente seguru, no haʼu tau fiar tomak ba ninia desizaun sira.”

6. Feen sira bele aprende saida husi Maria?

⁶ Maria iha relasaun diʼak ho Jeová no ninia fiar la depende ba buat neʼebé José halo. Maria hatene didiʼak Eskritura sira. (Lc 1:46) Nia mós uza tempu atu medita. (Lc 2:19, 51) Klaru katak Maria nia relasaun diʼak ho Jeová ajuda nia  sai feen neʼebé diʼak. Ohin loron, feen barak hakaʼas an atu banati-tuir Maria. Porezemplu, irmán ida naran Emiko hatete: “Bainhira haʼu klosan, haʼu iha toman rasik atu halo atividade espirituál. Maibé depois haʼu kaben, haʼu rekoñese katak tanba haʼu-nia laʼen mak halo orasaun ba ami no dirije ami-nia adorasaun, haʼu komesa depende deʼit ba nia atu halo buat sira-neʼe. Ikusmai haʼu rekoñese katak haʼu rasik presiza hametin haʼu-nia relasaun diʼak ho Jeová. Tan neʼe agora haʼu uza tempu atu mesamesak ho Jeová hodi halo orasaun, lee Bíblia, no medita kona-ba Jeová nia hanoin.” (Gal 6:5) Feen sira, bainhira Ita kontinua hametin Ita-nia relasaun diʼak ho Jeová, Ita-nia laʼen sei gaba no hadomi liután Ita.​—Prov 31:30.

7. Feen-laʼen bele aprende saida husi José no Maria kona-ba adora Maromak hamutuk?

⁷ José no Maria mós apoia malu atu hametin sira-nia relasaun diʼak ho Jeová. Sira komprende katak importante tebes atu adora Jeová hamutuk nuʼudar família. (Lc 2:22-24, 41; 4:16) Karik susar atu halo ida-neʼe, liuliu bainhira sira-nia família sai boot liu, maibé sira konsege halo ida-neʼe. Sira hatudu ezemplu kapás ba feen-laʼen sira ohin loron. Hanesan José ho Maria, se Ita iha oan, karik la fasil ba Ita atu tuir reuniaun ka uza tempu atu halo adorasaun família. Karik susar mós atu buka tempu hodi estuda ka halo orasaun hamutuk nuʼudar feen-laʼen. Maski nuneʼe, hanoin-hetan katak bainhira imi adora Jeová hamutuk, imi sei hakbesik liután ba nia no ba malu. Entaun tau uluk adorasaun ba Jeová iha imi-nia moris kaben nian.

8. Kuandu moris kaben nian la kontente, saida mak feen-laʼen bele halo atu hetan benefísiu husi adorasaun família nian?

⁸ Oinsá se Ita-nia moris kaben nian la kontente? Se nuneʼe, karik Ita la gosta atu halo adorasaun família hamutuk. Entaun, diʼak atu hahú hodi aprende hamutuk informasaun badak neʼebé halo imi kontente, no buat neʼebé imi naʼin-rua konkorda atu koʼalia hamutuk. Ida-neʼe bele hametin imi-nia relasaun no mós hakarak atu halo atividade espirituál hamutuk nuʼudar feen-laʼen.

9. Tanbasá feen-laʼen presiza uza tempu hamutuk?

⁹ Feen-laʼen sira bele halo sira-nia domin lakan nafatin hodi uza tempu hamutuk. Bainhira Ita halo nuneʼe, ida-neʼe sei ajuda Ita komprende liután Ita-nia pár nia hanoin no sentimentu. (Gén 2:24) Haree buat neʼebé Lilia no Ruslan deskobre lakleur depois sira kaben, maizumenus tinan 15 liubá. Lilia hatete: “Ami nota katak ami ladún iha tempu hamutuk. Ami okupadu tebes ho serbisu atu manán osan, serbisu uma laran, no tau matan oan. Ami rekoñese katak se ami la uza tempu hamutuk nuʼudar feen-laʼen, ami sei la sente besik ba malu.”

10. Oinsá feen-laʼen sira bele aplika prinsípiu iha Éfeso 5:15, 16?

¹⁰ Saida mak feen-laʼen bele halo atu uza tempu hamutuk? Karik imi presiza halo planu metin atu gasta tempu hamutuk. (Lee Éfeso 5:15, 16.) Irmaun ida iha rai-Nijéria naran Uzondu hatete: “Bainhira halo oráriu ba haʼu-nia atividade sira, haʼu mós inklui tempu neʼebé haʼu sei uza hamutuk ho haʼu-nia feen iha oráriu neʼe no haree ida-neʼe nuʼudar  buat neʼebé importante.” (Flp 1:10) Hanoin toʼok ezemplu husi irmán Anastasia iha rai-Moldávia kona-ba uza tempu ho didiʼak. Nia mak katuas área nia feen. Nia hatete: “Haʼu koko atu halo haʼu-nia atividade pesoál bainhira haʼu-nia laʼen halaʼo knaar seluk. Hodi halo nuneʼe, ami bele iha tempu atu hamutuk nuʼudar feen-laʼen.” Maibé oinsá se susar duni ba Ita atu buka tempu hodi hamutuk ho Ita-nia pár?

11. Atividade saida mak Áquila no Priscila halo hamutuk?

¹¹ Feen-laʼen sira bele aprende husi Áquila no Priscila neʼebé ema Kristaun barak iha apóstolu sira-nia tempu respeitu. (Rom 16:3, 4) Maski Bíblia la konta buat barak kona-ba sira-nia moris kaben nian, maibé Bíblia fó sai katak sira serbisu, haklaken no ajuda ema seluk hamutuk. (Após 18:2, 3, 24-26) Tuir loloos, kuandu Bíblia temi Áquila no Priscila, sira-nia naran sempre mosu hamutuk.

12. Saida mak feen-laʼen bele halo atu uza tempu hamutuk? (Haree mós foto.)

¹² Oinsá mak feen-laʼen bele banati-tuir Áquila no Priscila? Hanoin kona-ba buat oioin neʼebé Ita no Ita-nia pár presiza halo. Ita bele ka lae halo atividade balu hamutuk nuʼudar feen-laʼen duké halo mesamesak? Porezemplu, Áquila no Priscila haklaken hamutuk. Ita halo planu beibeik atu haklaken hamutuk ka lae? Áquila no Priscila mós serbisu hamutuk. Karik Ita no Ita-nia pár halo serbisu neʼebé la hanesan atu manán osan, maibé imi bele halo serbisu uma-laran nian hamutuk ka lae? (Ecle 4:9) Bainhira imi ajuda malu, imi sei sente hanesan ekipa ida, no imi iha oportunidade atu koʼalia ba malu. Robert no Linda kaben ona ba tinan 50 liu. Robert hatete: “Ami ladún iha tempu atu halimar hamutuk. Maibé bainhira haʼu fase bikan, haʼu-nia feen hamaran bikan, ka bainhira haʼu hamoos duʼut, nia mós sai mai hodi halo serbisu ho haʼu, neʼe halo haʼu kontente tebes. Ami sente besik liután ba malu bainhira halo buat sira-neʼe hamutuk. Ami-nia domin kontinua sai boot liután.”

13. Atu bele sente besik ba malu, feen-laʼen tenke halo saida?

¹³ Maibé hanoin-hetan katak uza deʼit tempu hamutuk sei la halo kedas feen-laʼen sente besik ba malu. Feen ida iha rai-Brazíl hatete: “Ohin loron ita-nia moris mak okupadu tebes, no fasil atu hanoin katak ita uza ona tempu hamutuk tanba hela iha uma ida deʼit. Haʼu nota katak presiza halo buat seluk tan. Haʼu mós presiza fó atensaun ba haʼu-nia laʼen.” Haree toʼok saida mak Bruno no ninia feen Tays halo hodi tau  atensaun ba malu. Nia hatete: “Bainhira ami uza tempu hamutuk, ami tau dook tiha telefone no goza tempu hamutuk.”

14. Se feen-laʼen ladún gosta atu uza tempu hamutuk, sira bele halo saida?

¹⁴ Maibé oinsá se Ita no Ita-nia pár ladún gosta atu uza tempu hamutuk? Karik tanba Ita no Ita-nia pár gosta atu halo buat neʼebé la hanesan, ka Ita la gosta Ita-nia pár nia toman ruma. Hanoin fali ezemplu kona-ba ahi. Ahi neʼe la lakan makaʼas kedas. Neineik-neineik ita tenke kontinua tau tan ai neʼebé boot liu hodi ahi bele lakan makaʼas. Nuneʼe mós diʼak atu hahú uza tempu uitoan-uitoan hamutuk loroloron. Halo buat neʼebé imi naʼin-rua gosta, laʼós buat neʼebé halo imi diskute malu. (Tgo 3:18) Hodi hahú ho buat neʼebé kiʼik, imi bele halo lakan fali imi-nia domin ba malu.

15. Tanbasá respeitu mak importante atu feen-laʼen nia domin lakan nafatin?

¹⁵ Respeitu mak importante iha moris kaben nian. Neʼe hanesan oksijéniu neʼebé ajuda ahi lakan makaʼas liután. Se la iha oksijéniu, ahi sei mate lalais. Nuneʼe mós se la iha respeitu, feen-laʼen sira-nia domin sei sai malirin lalais. Maibé, feen-laʼen neʼebé buka atu hatudu respeitu ba malu sei hakaʼas an atu halo sira-nia domin lakan nafatin. Maski nuneʼe, hanoin-hetan katak laʼós Ita mak sente katak Ita hatudu ona respeitu, maibé buat importante mak Ita-nia pár sente katak Ita respeitu nia. Penny no Aret kaben ona durante tinan 25 liu. Penny hatete: “Tanba ami respeitu malu, ami-nia uma-laran nakonu ho domin. Ami sente livre atu fó sai ami-nia hanoin tanba ami hatene katak ami hafolin malu.” Entaun, Ita presiza halo saida atu Ita-nia pár sente katak Ita respeitu nia? Hanoin toʼok kona-ba Abraão no Sara nia ezemplu.

16. Laʼen bele aprende saida husi Abraão nia ezemplu? (1 Pedro 3:7) (Haree mós foto.)

¹⁶ Abraão hatudu respeitu ba Sara. Nia rona Sara nia opiniaun no respeitu ninia sentimentu. Loron ida, Sara estrese tebes, no nia fakar sai ninia sentimentu ba Abraão, no mós duun nia. Abraão mós sai hirus fali ka lae? Lae. Nia hatene katak Sara sempre hakruʼuk no apoia nia. Abraão rona ba Sara no koko atu rezolve situasaun neʼe. (Gén 16:5, 6) Ita bele aprende saida? Maski laʼen sira iha podér atu halo desizaun ba família, maibé sira hatudu domin hodi rona sira-nia feen nia opiniaun antes halo desizaun, liuliu se desizaun neʼe afeta sira-nia feen. (1 Kor 11:3; 13:4, 5) Karik dala ruma, Ita-nia feen sente estrese no fakar sai ninia sentimentu. Ita sei hafolin ninia sentimentu  hodi rona didiʼak ka lae? (Lee 1 Pedro 3:7.) Angela no Dmitry kaben ona besik tinan 30. Angela esplika kona-ba oinsá ninia laʼen hatudu respeitu ba nia: “Dmitry sempre prontu atu rona mai haʼu bainhira haʼu hirus ka bainhira haʼu hakarak koʼalia buat ruma. Nia hatudu pasiénsia mai haʼu, maski haʼu fó sai haʼu-nia hanoin ho hirus.”

17. Feen bele aprende saida husi Sara nia ezemplu? (1 Pedro 3:5, 6)

¹⁷ Sara respeitu Abraão hodi apoia Abraão nia desizaun. (Gén 12:5) Loron ida, Abraão deside atu hatudu laran-luak ba bainaka neʼebé mai derrepente. Abraão husu Sara atu para halo buat neʼebé nia halo daudaun no bá prepara paun barak. (Gén 18:6) Sara halo tuir kedas no apoia Abraão nia desizaun. Feen sira bele banati-tuir Sara hodi apoia sira-nia laʼen nia desizaun. Feen sira, bainhira imi halo nuneʼe, imi sei hametin imi-nia relasaun kaben nian. (Lee 1 Pedro 3:5, 6.) Dmitry neʼebé temi iha parágrafu antes neʼe, esplika oinsá ninia feen hatudu respeitu ba nia. Nia hatete: “Haʼu hafolin tebes Angela nia hakaʼas an atu apoia haʼu-nia desizaun, maski nia la konkorda ho haʼu-nia opiniaun. Se buat hotu la laʼo diʼak, nia la kritika haʼu.” Fasil duni atu hadomi ema neʼebé respeitu Ita, loos ka lae?

18. Feen-laʼen sira hetan benefísiu saida hodi hakaʼas an atu halo sira-nia domin lakan nafatin?

¹⁸ Ohin loron, Satanás hakarak feen-laʼen Kristaun sira atu la hadomi malu tan. Nia hatene katak se feen-laʼen la hadomi malu, karik sira sei hadook an husi Jeová. Maibé domin neʼebé loos sei nunka lakon! Ami hein katak imi-nia domin ba malu nuʼudar feen-laʼen mak hanesan domin neʼebé temi iha Salomão nia Knananuk. Hakaʼas an atu tau uluk imi-nia relasaun diʼak ho Jeová iha imi-nia moris kaben nian, uza tempu hamutuk, no respeitu Ita-nia pár nia sentimentu no ninia presiza. Se Ita halo nuneʼe, Ita-nia moris kaben nian sei fó glória ba Jeová, Hun ba domin neʼebé loos, no Ita-nia domin sei lakan nafatin hanesan ahi neʼebé sempre aumenta ai.