1. Susar saida mak ema barak hasoru?

 ITA halo ona planu espirituál ida maibé susar atu kumpre ka lae? b Se nuneʼe, Ita la mesak. Porezemplu, Philip hakarak halo orasaun diʼak liután no barak liután, maibé susar ba nia atu fahe tempu. Erika halo planu atu toʼo sedu iha reuniaun atu organiza serbisu haklaken, maibé nia sempre toʼo tarde. Tomáš koko dala balu atu lee Bíblia tomak. Nia hatete: “Haʼu la gosta lee Bíblia. Haʼu koko dala tolu, maibé dala ida-idak haʼu lee toʼo livru Levítico deʼit.”

2. Tanbasá ita labele sai laran-kraik se ita seidauk kumpre ita-nia planu espirituál ida?

² Lalika sai laran-kraik se agora daudaun Ita seidauk kumpre Ita-nia planu ida. Atu kumpre planu neʼebé simples mós Ita presiza tempu no hakaʼas an. Tanba Ita nafatin hakarak atu kumpre Ita-nia planu, neʼe hatudu katak Ita hafolin Ita-nia relasaun diʼak ho Jeová no hakarak fó buat neʼebé diʼak liu hotu ba nia. Jeová hafolin Ita-nia hakaʼas an. Klaru katak Jeová la husu Ita atu halo buat neʼebé liu fali Ita-nia kbiit. (Sal 103:14; Miq 6:8) Entaun bainhira halo planu, diʼak atu hili ida neʼebé Ita bele kumpre tuir Ita-nia situasaun. Maibé oinsá atu kumpre planu neʼe? Mai ita koʼalia kona-ba sujestaun balu.

3. Tanbasá motivasaun mak importante?

³ Importante atu iha motivasaun atu bele kumpre ita-nia planu espirituál. Ema neʼebé iha motivasaun hakarak duni  atu kumpre planu neʼe. Ita bele kompara motivasaun ho anin neʼebé lori ró atu toʼo fatin neʼebé ema hakarak bá. Se anin kontinua huu, ema neʼe bele toʼo fatin neʼebé nia hakarak bá. Se anin huu makaʼas liu, ró sei toʼo lalais liu. Nuneʼe mós, se ita iha motivasaun neʼebé forte, ita bele kumpre ita-nia planu. Irmaun David iha rai-Elsalvadór hatete: “Bainhira ita iha motivasaun, ita sei hakaʼas an makaʼas atu la husik buat ida hanetik ita kumpre ita-nia planu.” Entaun Ita bele halo saida atu motiva Ita-nia an liután?

4. Ita bele halo orasaun atu husu saida? (Filipe 2:13) (Haree mós dezeñu.)

⁴ Halo orasaun atu iha motivasaun neʼebé forte. Jeová bele motiva Ita atu kumpre Ita-nia planu liuhusi ninia espíritu santu. (Lee Filipe 2:13.) Dala ruma ita halo planu ida tanba hatene katak neʼe mak buat neʼebé loos. Maibé karik ita ladún hakarak atu kumpre planu neʼe. Neʼe akontese ba irmán Norina iha rai-Uganda. Nia halo planu atu dirije estudu Bíblia, maibé nia la iha motivasaun atu halo nuneʼe tanba nia sente katak nia laʼós mestra neʼebé matenek. Saida mak ajuda nia? Nia hatete: “Loroloron haʼu husu Jeová atu ajuda haʼu aumenta haʼu-nia hakarak atu dirije estudu Bíblia. Haʼu halo tuir haʼu-nia orasaun no koko aumenta haʼu-nia matenek atu hanorin. Liutiha fulan balu, haʼu nota katak haʼu komesa iha hakarak atu dirije estudu Bíblia. Iha tinan neʼebé hanesan, haʼu hahú estudu Bíblia ho ema naʼin-rua.”

5. Ita bele medita kona-ba saida atu bele aumenta ita-nia motivasaun?

⁵ Medita kona-ba buat neʼebé Jeová halo ona ba Ita. (Sal 143:5) Apóstolu Paulo medita kona-ba oinsá Jeová hatudu laran-diʼak neʼebé boot ba nia, no neʼe motiva nia atu serbisu makaʼas ba Jeová. (1 Kor 15:9, 10; 1 Tim 1:12-14) Nuneʼe mós se Ita medita liután kona-ba buat neʼebé Jeová halo ona ba Ita, neʼe sei motiva liután Ita atu kumpre Ita-nia planu. (Sal 116:12) Hanoin toʼok buat neʼebé ajuda irmán ida iha rai-Onduras atu kumpre ninia planu hodi sai pioneiru regulár. Nia hatete: “Haʼu hanoin kona-ba oinsá Jeová hadomi tebes haʼu. Nia ajuda haʼu sai parte ba ninia povu. Nia tau matan no proteje haʼu. Bainhira haʼu hanoin kona-ba neʼe, haʼu hadomi liután Jeová no neʼe motiva haʼu atu hakaʼas an foti pioneiru.”

6. Saida tan mak bele motiva liután ita?

⁶ Tau fokus ba bensaun neʼebé Ita sei hetan tanba kumpre Ita-nia planu. Hanoin toʼok buat neʼebé ajuda Erika neʼebé temi ohin atu kumpre ninia planu hodi toʼo sedu. Nia hatete: “Haʼu haree katak haʼu lakon buat barak tanba toʼo tarde iha grupu haklaken. Maibé hodi toʼo sedu, haʼu bele uza tempu hamutuk ho irmaun-irmán sira. Haʼu mós bele  rona ba sujestaun diʼak neʼebé bele ajuda haʼu atu kontente iha serbisu haklaken no mós aumenta haʼu-nia matenek.” Erika tau fokus ba benefísiu neʼebé nia sei hetan, no nia kumpre ninia planu. Entaun Ita bele tau fokus ba bensaun saida? Se Ita-nia planu mak atu lee Bíblia ka halo orasaun, hanoin kona-ba oinsá ida-neʼe bele hametin Ita-nia relasaun diʼak ho Jeová. (Sal 145:18, 19) Se Ita-nia planu mak atu haburas hahalok Kristaun, tau fokus ba oinsá ida-neʼe bele ajuda hametin Ita-nia relasaun diʼak ho ema seluk. (Kol 3:14) Diʼak atu halo lista kona-ba benefísiu hotu neʼebé Ita sei hetan se Ita kumpre Ita-nia planu. Haree beibeik Ita-nia lista. Tomáš neʼebé temi ohin hatete: “Baibain haʼu hakaʼas an liután atu kumpre haʼu-nia planu se haʼu haree katak iha razaun diʼak atu halo nuneʼe.”

7. Saida mak ajuda Julio no ninia feen kumpre sira-nia planu?

⁷ Ransu ho sira neʼebé motiva Ita atu kumpre Ita-nia planu. (Prov 13:20) Hanoin kona-ba buat neʼebé ajuda Julio no ninia feen atu kumpre sira-nia planu atu aumenta sira-nia serbisu haklaken. Julio hatete: “Ami habelun ho ema neʼebé apoia ami-nia planu, no ami koʼalia kona-ba ami-nia planu ho sira. Sira barak kumpre ona planu neʼebé hanesan, tan neʼe sira bele fó sujestaun neʼebé diʼak. Sira mós dala ruma husu kona-ba saida mak ami halo daudaun atu kumpre ami-nia planu, no sira anima ami.”

8. Saida mak bele akontese se ita halo buat ruma só deʼit kuandu ita iha motivasaun? (Haree mós dezeñu.)

⁸ Maibé klaru katak dala ruma ita la iha motivasaun atu halo buat ruma. Neʼe katak ita labele kumpre ita-nia planu ka lae? Lae. Porezemplu, anin iha forsa atu lori ró toʼo fatin neʼebé ema hakarak bá, maibé dala ruma anin huu makaʼas, dala ruma neineik no dala ruma anin la iha. Neʼe katak ema neʼe labele toʼo fatin neʼebé nia hakarak bá ka lae? Lae. Ró balu iha mákina no ró seluk iha fose. Ema bele uza buat sira-neʼe atu lori ró. Ita bele kompara ita-nia motivasaun ho anin. Dala ruma ita iha motivasaun makaʼas liu fali tempu seluk no dala ruma ita la iha liu motivasaun. Tan neʼe se ita hakaʼas an atu kumpre ita-nia planu tuir deʼit ita-nia motivasaun, ita sei nunka kumpre ida-neʼe. Maibé hanesan ema neʼebé lori ró buka dalan atu toʼo fatin neʼebé nia hakarak bá, ita mós bele kontinua hakaʼas an atu kumpre ita-nia planu maski ita la iha motivasaun. Klaru katak ita presiza dixiplina an, maibé benefísiu neʼebé ita hetan mak barak liu fali sakrifísiu neʼebé ita halo. Antes koʼalia kona-ba buat neʼebé ita bele halo, mai ita koʼalia uluk kona-ba pergunta neʼebé bele mosu.

9. Sala ka lae atu hakaʼas an kumpre ita-nia planu maski ita la iha motivasaun? Esplika toʼok.

 ⁹ Jeová hakarak ita atu serbí nia ho kontente no ho hakarak rasik. (Sal 100:2; 2 Kor 9:7) Entaun ita presiza ka lae hakaʼas an nafatin atu kumpre ita-nia planu espirituál maski ita la iha motivasaun atu halo ida-neʼe? Hanoin toʼok kona-ba apóstolu Paulo nia ezemplu. Nia hatete: “Haʼu kontrola haʼu-nia isin no ukun haʼu-nia an hanesan atan.” (1 Kor 9:25-27) Paulo dixiplina an atu halo buat neʼebé loos iha tempu neʼebé nia la iha motivasaun atu halo nuneʼe. Jeová kontente ho buat neʼebé Paulo halo ka lae? Kontente duni! No Jeová haraik bensaun ba Paulo nia hakaʼas an.​—2 Tim 4:7, 8.

10. Ita hetan benefísiu saida bainhira hakaʼas an atu kumpre ita-nia planu maski ita la iha motivasaun?

¹⁰ Nuneʼe mós Jeová kontente atu haree ita hakaʼas an kumpre ita-nia planu maski ita la iha motivasaun. Nia kontente tanba nia hatene katak maski ita ladún gosta buat neʼebé ita halo, maibé ita halo ida-neʼe tanba domin ba nia. Jeová mós sei haraik bensaun ba ita-nia hakaʼas an hanesan nia haraik bensaun ba Paulo. (Sal 126:5) Bainhira ita sente katak Jeová haraik bensaun ba ita, neʼe sei motiva liután ita atu kumpre ita-nia planu. Irmán Lucyna husi rai-Polónia hatete: “Dala ruma, haʼu lakohi atu bá haklaken, liuliu kuandu haʼu kole. Maibé ksolok neʼebé haʼu sente depois haklaken mak hanesan prezente furak ida.” Agora mai ita haree saida mak ita bele halo bainhira ita la iha motivasaun.

11. Oinsá Jeová bele ajuda ita atu kontrola an?

¹¹ Halo orasaun atu bele kontrola an. Kontrola an mak kbiit atu kontrola ita-nia sentimentu no hahalok. Baibain neʼe fó ideia katak kontrola ita-nia an atu la halo buat neʼebé aat. Maibé ita mós presiza kontrola an atu halo buat neʼebé diʼak, liuliu se neʼe mak susar ka ita la iha motivasaun atu halo ida-neʼe. Hanoin-hetan, kontrola an mak parte ba hahalok neʼebé mai husi espíritu santu, tan neʼe husu Jeová atu fó ninia espíritu santu mai Ita atu ajuda Ita haburas hahalok importante neʼe. (Lc 11:13; Gal 5:22, 23) David neʼebé temi ohin esplika oinsá orasaun ajuda nia. Nia hakarak atu estuda mesak beibeik. Nia hatete: “Haʼu husu Jeová atu ajuda haʼu haburas hahalok kontrola an. Ho Jeová nia ajuda, haʼu konsege hahú toman diʼak atu estuda no halo neʼe beibeik.”

12. Oinsá prinsípiu iha Eclesiastes 11:4 liga ho planu espirituál?

¹² Keta hein toʼo situasaun neʼebé perfeitu. Iha mundu neʼe, ita sei nunka hetan situasaun neʼebé perfeitu. Se ita hein ba ida-neʼe, ita sei nunka kumpre ita-nia planu. (Lee Eclesiastes 11:4.) Irmaun ida naran Dayniel hatete: “La iha situasaun ida neʼebé perfeitu. Tan neʼe ita labele hein, ita presiza hahú atu halo buat ruma.” Irmaun Paul husi rai-Uganda temi razaun seluk kona-ba tanbasá ita labele demora. Nia hatete: “Bainhira ita hahú halo buat ruma maski situasaun susar, neʼe fó oportunidade ba Jeová atu haraik bensaun ba ita.”​—Mal 3:10.

13. Tanbasá diʼak atu hahú ho planu neʼebé kiʼik?

¹³ Hahú ho planu kiʼik. Karik Ita la iha motivasaun tanba Ita sente susar atu kumpre Ita-nia planu. Se nuneʼe, Ita bele ka lae fahe Ita-nia planu ba parte kiʼik-kiʼik? Se Ita-nia planu mak atu haburas hahalok diʼak ida, Ita bele hahú hodi hatudu hahalok neʼe iha dalan neʼebé kiʼik. Se Ita-nia planu mak atu lee Bíblia tomak, Ita bele hahú hodi lee ba tempu badak deʼit. Tomáš neʼebé temi ohin sente susar  atu kumpre ninia planu atu lee Bíblia iha tinan ida nia laran. Nia hatete: “Haʼu rekoñese katak haʼu halo oráriu neʼebé susar liu ba haʼu atu kumpre. Entaun haʼu deside atu koko fali, no agora haʼu planu atu lee deʼit versíkulu balu loroloron no medita kona-ba neʼe. Rezultadu mak haʼu komesa gosta atu lee Bíblia.” Bainhira Tomáš sente kontente liután atu lee, nia komesa lee Bíblia ba tempu kleur liután. No ikusmai, nia konsege lee Bíblia tomak. c

14. Saida mak bele akontese no halo susar ba ita atu kumpre ita-nia planu?

¹⁴ Maski karik ita iha motivasaun no dixiplina an, maibé karik buat ruma mosu no halo susar ba ita atu kumpre ita-nia planu. Porezemplu, “situasaun neʼebé mosu derrepente” bele hadau ita-nia tempu. (Ecle 9:11) Karik ita hasoru susar neʼebé halo ita sente laran-kraik no lakon forsa. (Prov. 24:10) Tanba la perfeitu, karik ita halo sala no neʼe halo susar ba ita atu kumpre ita-nia planu. (Rom 7:23) Ka karik ita sente kole ona. (Mt 26:43) Saida mak bele ajuda ita atu manán buat neʼebé hanetik ita?

15. Se buat ruma halo susar ba ita atu kumpre ita-nia planu, neʼe katak ita falla ka lae? Esplika toʼok. (Salmo 145:14)

¹⁵ Hanoin-hetan se buat ruma hanetik Ita, neʼe la dehan katak Ita falla. Bíblia hatete katak karik ita sei hasoru problema beibeik. Maibé Bíblia mós fó sai ho klaru katak ita bele hamriik fali, liuliu se Jeová ajuda ita. (Lee Salmo 145:14.) Irmaun Philip neʼebé temi ohin hatete: “Duké tau fokus ba tempu neʼebé haʼu la kumpre haʼu-nia planu, haʼu tau fokus ba tempu neʼebé haʼu komesa fali atu hakaʼas an kumpre haʼu-nia planu.” David neʼebé temi ohin hatete: “Bainhira buat ruma hapara  haʼu atu kumpre haʼu-nia planu, haʼu koko atu la haree ida-neʼe nuʼudar buat neʼebé hanetik haʼu, maibé nuʼudar oportunidade atu hatudu ba Jeová katak haʼu hadomi tebes nia.” Sin, hodi kontinua hakaʼas an maski susar, Ita hatudu ba Jeová katak Ita hakarak halo nia kontente. Jeová sei kontente tebes bainhira haree Ita kontinua hakaʼas an atu kumpre Ita-nia planu!

16. Saida mak ita bele aprende se buat ruma hanetik ita atu kumpre ita-nia planu?

¹⁶ Se buat ruma hanetik Ita kumpre Ita-nia planu, koko atu aprende husi ida-neʼe. Hanoin kona-ba buat neʼebé akontese, no husu Ita-nia an: ‘Saida mak haʼu bele halo atu ida-neʼe la akontese fali?’ (Prov 27:12) Maibé se susar duni atu kumpre Ita-nia planu, karik neʼe hatudu katak planu neʼe mak liu fali Ita-nia kbiit. Se nuneʼe, analiza fali Ita-nia planu atu haree se neʼe diʼak nafatin ba Ita ka lae. d Jeová sei la hanoin katak Ita falla bainhira Ita la kumpre planu neʼebé Ita la iha kbiit atu halo.​—2 Kor 8:12.

17. Tanbasá ita presiza hanoin-hetan buat neʼebé ita kumpre ona?

¹⁷ Hanoin-hetan buat neʼebé Ita kumpre ona. Bíblia hatete katak “Maromak nunka hatudu hahalok aat hodi haluha imi-nia serbisu”. (Ebr 6:10) Entaun ita mós labele haluha buat neʼebé Ita kumpre ona, hanesan haburas relasaun diʼak ho Jeová, haklaken kona-ba nia ka hetan batizmu. Hanesan Ita laʼo ba oin ona no kumpre ona Ita-nia planu uluk nian, Ita mós bele kontinua hakaʼas an atu kumpre Ita-nia planu agora nian.​—Flp 3:16.

18. Ita presiza hanoin-hetan atu halo saida nuʼudar ita hakaʼas an kumpre ita-nia planu? (Haree mós dezeñu.)

¹⁸ Ho Jeová nia ajuda, Ita bele duni kumpre Ita-nia planu, hanesan ema neʼebé lori ró toʼo fatin neʼebé nia hakarak bá. Maibé hanoin-hetan katak baibain ema neʼebé lori ró mós kontente ho buat furak oioin durante ninia viajen. Nuneʼe mós bainhira Ita kontinua hakaʼas an atu kumpre Ita-nia planu espirituál, keta haluha atu haree oinsá Jeová ajuda no haraik bensaun ba Ita. (2 Kor 4:7) Se Ita la rende an, Ita sei hetan bensaun barak liután.​—Gal. 6:9.