1-2. Desizaun importante saida mak ema Judeu iha Babilónia presiza halo? (Ezras 1:2-4)

 LIURAI fó sai ona avizu ida. Nia hatete katak ema Judeu neʼebé sai dadur iha Babilónia maizumenus ba tinan 70 ona, livre atu fila fali ba rai-Izraél. (Lee Ezras 1:2-4.) Jeová deʼit mak bele halo ida-neʼe akontese. Tanbasá ita bele dehan nuneʼe? Tanba baibain ema Babilónia la husik livre dadur sira. (Isa 14:4, 17) Maibé Babilónia foin naksobu, no ukun-naʼin foun ida mak fó-hatene ema Judeu katak sira bele fila ba sira-nia rai. Rezultadu mak ema Judeu ida-idak, liuliu família nia ulun, presiza halo desizaun atu sai husi Babilónia ka hela nafatin iha neʼebá. Tuir loloos, susar atu halo desizaun neʼe. Tanbasá?

² Karik ema Judeu barak idade ona no labele halo viajen dook. No tanba sira barak moris iha Babilónia, sira nunka hela iha fatin seluk. Sira sente katak Izraél mak sira-nia beiʼala nia rai, laʼós sira-nian. Ema Judeu balu sai riku iha Babilónia, tan neʼe karik sira sente susar atu husik sira-nia uma neʼebé diʼak ka sira-nia negósiu no hela fali iha rai neʼebé sira ladún hatene.

3. Bensaun saida mak ema Judeu hetan se sira fila fali ba rai-Izraél?

³ Ema Judeu sira neʼebé laran-metin hatene katak fila fali ba Izraél sei lori bensaun barak liu duké sakrifísiu neʼebé sira sei halo. Bensaun boot liu mak liga ho sira-nia adorasaun. Iha templu ba maromak falsu sira hamutuk 50 iha Babilónia, maibé la iha templu ba Jeová. La iha altár neʼebé ema Izraél bele uza atu hasaʼe sakrifísiu hodi tuir Moisés nia Ukun-Fuan, no la iha arranju kona-ba amlulik sira neʼebé hasaʼe sakrifísiu. Liután neʼe, iha Babilónia, Jeová nia povu mak uitoan liu se kompara ho ema  neʼebé adora maromak falsu, no sira la hafolin Jeová no ninia matadalan sira. Tan neʼe, ema Judeu rihun ba rihun neʼebé hamtaʼuk Jeová hein namanas atu fila fali ba sira-nia rai hodi bele halaʼo fali adorasaun neʼebé loos.

4. Jeová promete atu fó ajuda saida ba ema Judeu neʼebé fila fali ba Izraél?

⁴ Baibain viajen husi Babilónia ba Izraél bele han fulan haat, maibé Jeová promete katak nia sei hasai tiha buat naran deʼit neʼebé hanetik ema Judeu atu fila fali ba Izraél. Isaias hakerek: “Prepara Jeová nia dalan bá! Halo loos estrada boot ba ita-nia Maromak liuhusi rai-fuik maran. . . . Rai neʼebé la tetuk sei halo kabeer, no rai neʼebé tun-saʼe sei sai hanesan rai-tetuk.” (Isa 40:3, 4) Imajina toʼok, iha estrada boot iha rai-fuik, no iha dalan tetuk iha foho nia leet. Klaru katak neʼe mak bensaun ba sira neʼebé halo viajen! Fasil liu ba sira atu laʼo liuhusi dalan boot duké saʼe foho ka laʼo iha foho-leet. No neʼe mós sei lalais liu.

5. Dalan boot simbóliku entre Babilónia no Izraél hanaran saida?

⁵ Ohin loron, estrada boot barak iha naran ka númeru. Dalan boot simbóliku neʼebé Isaias fó sai mós iha naran. Isaias dehan: “Iha neʼebá sei iha estrada boot, sin, dalan ida neʼebé bolu nuʼudar Dalan Santu. Ema neʼebé la moos sei la laʼo iha dalan neʼe.” (Isa 35:8) Oinsá promesa neʼe afeta ema Izraél iha tempu neʼebá? No oinsá promesa neʼe afeta ita ohin loron?

6. Tanbasá dalan neʼe hanaran santu?

⁶ “Dalan Santu” mak naran neʼebé furak tebes! Tanbasá dalan neʼe hanaran santu? Tanba “ema neʼebé la moos”, katak ema Judeu neʼebé halo hahalok la morál, adora estátua, ka halo sala sériu seluk sei labele fila fali ba rai-Izraél. Ema Judeu neʼebé fila fali tenke sai “povu neʼebé santu” ba sira-nia Maromak. (Deut 7:6) Maski nuneʼe, sira neʼebé sai husi Babilónia nafatin presiza halo mudansa atu halo Jeová kontente.

7. Mudansa saida mak ema Judeu balu presiza halo? Fó toʼok ezemplu ida.

⁷ Hanesan ita aprende ona, ema Judeu barak moris iha Babilónia, no sira barak sai toman ho buat neʼebé ema Babilónia halo no hanoin. Tinan barak depois ema Judeu grupu primeiru fila fali ba Izraél, Ezras rona katak sira balu kaben ho feto husi nasaun seluk. (Éx 34:15, 16; Ezr 9:1, 2) Liutiha tempu balu, Governadór Neemias mós hakfodak bainhira hatene katak labarik sira neʼebé moris iha Izraél la aprende ema Judeu nia língua. (Deut 6:6, 7; Neem 13:23, 24) Klaru katak sira labele hadomi no adora Jeová se sira la komprende língua Ebraiku, língua neʼebé ema uza atu hakerek Maromak nia Liafuan. (Ezr 10:3, 44) Ema Judeu sira-neʼe presiza duni halo mudansa boot, no fasil liu ba sira atu halo nuneʼe iha Izraél, fatin neʼebé sira komesa harii fali adorasaun loos.​—Neem 8:8, 9.

8. Tanbasá ita interese atu aprende buat neʼebé akontese iha tempu uluk? (Haree dezeñu iha livru oin.)

⁸ Karik ema balu hanoin: ‘Neʼe furak tebes, maibé buat neʼebé akontese ba ema Judeu iha tempu neʼebá bele afeta ita ohin loron ka lae?’ Sin, bele duni, tanba buat neʼebé ita halo daudaun mak hanesan laʼo iha “Dalan Santu”. Maski ita iha esperansa atu bá lalehan ka ita mak  “bibi-malae seluk”, ita presiza kontinua laʼo iha “Dalan Santu”. Neʼe sei ajuda ita atu adora Jeová agora no mós iha futuru bainhira ita hetan bensaun iha Maromak nia Ukun okos. b (João 10:16) Hahú husi tinan 1919 EC, mane, feto, no labarik millaun ba millaun husik ona Babilónia Boot, katak relijiaun falsu iha mundu tomak, no komesa laʼo iha dalan simbóliku neʼe. Karik Ita mós laʼo daudaun iha dalan neʼe. Ema komesa laʼo iha dalan neʼe maizumenus tinan 100 liubá, maibé loloos ema seluk komesa prepara dalan neʼe tinan barak antes neʼe.

9. Oinsá mak Isaias 57:14 fó sai nanis kona-ba prepara “Dalan Santu”?

⁹ Iha tempu uluk, Jeová hasai tiha buat neʼebé hanetik ema Judeu sira-nia dalan kuandu sira sai husi Babilónia. (Lee Isaias 57:14.) Oinsá ho “Dalan Santu” iha tempu modernu? Durante tinan atus ba atus antes tinan 1919, Jeová uza mane sira neʼebé hamtaʼuk Maromak atu prepara ka hamoos dalan hodi sai husi Babilónia Boot. (Kompara ho Isaias 40:3.) Sira hakaʼas an halo buat oioin hodi halo fasil ba ema laran-moos sira atu husik relijiaun falsu no tama ba paraízu espirituál, hodi adora Jeová hamutuk ho ninia povu. Serbisu neʼe envolve saida? Hanoin toʼok buat balu neʼebé sira halo ona atu prepara dalan neʼe.

10-11. Oinsá mak print no tradús Bíblia ajuda atu habelar koñesimentu husi Bíblia? (Haree mós dezeñu.)

¹⁰ Print. Maizumenus toʼo tinan 1450, ema kopia Bíblia ho liman deʼit. Maibé neʼe han tempu barak no iha kópia Bíblia uitoan deʼit no karun tebes. Maibé bainhira ema inventa mákina atu print, fasil liu atu prodús Bíblia no fahe ba ema.

¹¹ Tradús. Durante tinan atus ba atus, Bíblia iha deʼit iha língua Latín, no ema neʼebé hetan edukasaun boot deʼit mak bele komprende. Maibé kuandu ema inventa ona mákina print, ema oioin neʼebé hamtaʼuk Maromak hakaʼas an atu tradús Bíblia ba língua neʼebé ema baibain koʼalia. Agora ema neʼebé lee Bíblia bele kompara ulun-naʼin relijiaun sira-nia hanorin ho Bíblia nia hanorin.

12-13. Fó toʼok ezemplu kona-ba oinsá estudante Bíblia komesa hatudu sai relijiaun falsu nia hanorin neʼebé sala.

¹² Publikasaun neʼebé ajuda ema komprende Bíblia. Ema sira neʼebé uluk estuda didiʼak Bíblia aprende buat barak husi Maromak nia Liafuan. Maibé ulun-naʼin relijiaun sira sai hirus tebes bainhira estudante Bíblia sira-neʼe komesa fó-hatene ema seluk buat neʼebé sira aprende. Porezemplu, maizumenus hahú husi tinan 1835, ema laran-moos barak komesa halo panfletu neʼebé hatudu sai relijiaun falsu nia hanorin neʼebé sala.

¹³ Iha tempu neʼebá, ema ida naran Henry Grew neʼebé hamtaʼuk ba Maromak fó sai panfletu ida neʼebé esplika kona-ba ema mate nia kondisaun. Panfletu neʼe esplika katak moris neʼebé labele mate mak prezente husi Maromak, laʼós buat neʼebé ita iha husi moris-mai, hanesan igreja barak hanorin. Iha tinan 1837, George Storrs hetan kópia ida husi panfletu neʼe bainhira nia saʼe komboiu. Nia lee ida-neʼe no fiar katak nia hetan ona lia-loos importante. Nia deside atu fahe buat neʼebé nia aprende ona ba ema  seluk. Iha tinan 1842, nia hatoʼo diskursu oioin kona-ba “Ema aat iha klamar neʼebé labele mate ka lae?” Buat neʼebé George Storrs hakerek fó influénsia pozitivu ba mane joven ida naran Charles Taze Russell.

14. Benefísiu saida mak irmaun Russell no ninia kolega sira hetan husi serbisu atu prepara dalan espirituál neʼebé halaʼo antes sira-nia tempu? (Haree mós dezeñu.)

¹⁴ Benefísiu saida mak irmaun Russell no ninia kolega sira hetan husi serbisu atu prepara dalan espirituál neʼebé halo antes sira-nia tempu? Bainhira sira estuda Bíblia, sira bele halo riset hodi uza disionáriu kona-ba Bíblia, referénsia sira, no tradusaun oioin husi Bíblia. Buat hotu neʼe prepara ona antes sira-nia tempu. Sira mós hetan benefísiu husi riset kona-ba Bíblia neʼebé mane sira hanesan Henry Grew, George Storrs, no seluk tan halo ona. Irmaun Russell no ninia kolega sira mós kontribui atu prepara dalan liuhusi prodús livru no panfletu oioin neʼebé esplika tópiku husi Bíblia.

15. Buat importante saida mak akontese iha tinan 1919?

¹⁵ Iha tinan 1919, Babilónia Boot la kontrola tan Maromak nia povu. Iha tinan neʼe, “atan laran-metin no matenek” komesa halo serbisu atu nuneʼe ema laran-loos sira bele hahú laʼo iha “Dalan Santu”. (Mt 24:45-47) Serbisu neʼebé ema seluk halo iha tempu uluk atu prepara dalan neʼe, ajuda ema neʼebé komesa laʼo iha dalan neʼe atu aprende kona-ba Jeová no ninia hakarak. (Prov 4:18) Sira mós bele moris tuir Maromak nia matadalan sira. Jeová la husu ninia povu atu halo mudansa hotu dala ida deʼit. Maibé, nia hamoos sira neineik-neineik. (Haree kaixa “ Jeová hamoos ninia povu neineik-neineik”.) Ita sei kontente tebes iha futuru bainhira ita bele halo kontente ita-nia Maromak iha buat hotu!​—Kol 1:10.

16. Hahú husi tinan 1919, Jeová nia organizasaun halo saida deʼit atu halo manutensaun ba “Dalan Santu”? (Isaias 48:17; 60:17)

¹⁶ Estrada ida-idak presiza manutensaun beibeik. Hahú husi tinan 1919, serbisu manutensaun ba “Dalan Santu” kontinua nafatin atu nuneʼe ema barak tan bele husik Babilónia Boot. Atan laran-metin komesa kedas halo serbisu no iha tinan 1921, sira fó sai livru neʼebé ajuda ema foun atu aprende kona-ba lia-loos husi Bíblia. Publikasaun neʼe nia títulu mak Maromak nia Arpa (The Harp of God), no ikusmai livru neʼe print kópia millaun neen iha língua 36, no ema barak hetan lia-loos husi livru neʼe. Foin lalais ita simu publikasaun kapás atu uza bainhira estuda Bíblia ho ema, neʼe mak livru Moris Haksolok ba Nafatin. Iha loron ikus sira-neʼe, Jeová uza ninia organizasaun atu kontinua fó matadalan husi Maromak nia Liafuan hodi ajuda ita hotu nafatin laʼo iha “Dalan Santu”.​—Lee Isaias 48:17; 60:17.

17-18. “Dalan Santu” lori ita bá neʼebé?

¹⁷ Bainhira ema ida komesa estuda Bíblia, nia komesa laʼo iha “Dalan Santu”. Ema balu laʼo iha dalan neʼe ba tempu uitoan no tuirmai sai husi dalan neʼe. Ema seluk tan deside metin atu kontinua laʼo iha dalan neʼe toʼo sira kumpre sira-nia objetivu. Saida mak sira-nia objetivu?

¹⁸ Ba ema sira neʼebé iha esperansa atu bá lalehan, “Dalan Santu” lori sira ba “Maromak nia paraízu” iha lalehan. (Apok 2:7) Ba sira neʼebé iha esperansa atu moris iha rai, dalan boot neʼe lori sira atu sai ema perfeitu iha tinan 1.000 nia rohan. Se agora daudaun, Ita laʼo iha dalan boot neʼe, keta hateke fali ba kotuk. Keta sai husi dalan neʼe toʼo Ita tama ba mundu foun! Ami ho laran-kontente hakarak dehan ba imi “viajen diʼak”.