1. Jeová hanorin lisaun saida ba Abraão neʼebé fó kmaan?

 LIUHUSI anju ida, Maromak fó-hatene Abraão katak nia sei halakon tiha sidade Sodoma no Gomorra. Susar ba Abraão neʼebé laran-metin atu komprende ida-neʼe. Tan neʼe nia husu: “Ita sei halakon duni ema laran-loos hamutuk ho ema aat ka? . . . Juís ba mundu tomak sei la halo buat neʼebé loos ka?” Jeová ho pasiénsia hanorin lisaun importante ida ba ninia belun: Maromak sei nunka halakon ema laran-loos. Lisaun neʼe mós bele lori benefísiu no kmaan ba ita.—Gén 18:​23-33.

2. Tanbasá ita bele fiar katak Jeová sempre tesi-lia iha dalan neʼebé loos no laran-sadiʼa?

² Tanbasá ita bele fiar katak Jeová sempre tesi-lia iha dalan neʼebé loos no laran-sadiʼa? Tanba ita hatene katak “Jeová haree ema nia laran”. (1 Sam 16:7) Tuir loloos, nia hatene “ema ida-idak nia laran”. (1 Reis 8:39; 1 Krón 28:9) Neʼe mak lia-loos ida neʼebé furak. Jeová mak matenek liu fali ita, tan neʼe dala ruma ita labele komprende ho didiʼak tanbasá Jeová deside kona-ba buat ruma. Apóstolu Paulo mós fó sai katak “ita-nia hanoin la toʼo atu komprende kona-ba [Jeová nia] desizaun”!—Rom 11:33.

3-4. Dala ruma karik ita husu pergunta saida deʼit, no ita sei koʼalia kona-ba saida iha lisaun neʼe? (João 5:​28, 29)

³ Maski nuneʼe, karik ita mós iha pergunta hanesan ho Abraão. Karik ita husu: ‘Iha ka lae esperansa ba ema neʼebé Jeová halakon ona, hanesan sira neʼebé lakon iha Sodoma no Gomorra? Sira balu sei inklui iha “ema neʼebé hatudu hahalok la loos” no sei hetan moris-hiʼas ka lae?’—Após 24:15.

⁴ Mai ita haree saida mak ita komprende ona kona-ba moris-hiʼas. Foin lalais, ita-nia organizasaun fó sai esplikasaun foun kona-ba “moris hiʼas atu hetan moris rohan-laek”  no “moris hiʼas atu hetan tesi-lia”. a (Lee João 5:​28, 29.) Tanba esplikasaun foun neʼe, ita presiza halo mudansa seluk tan kona-ba dalan neʼebé ita komprende eskritura balu. Iha lisaun neʼe no lisaun tuirmai, ita sei koʼalia kona-ba mudansa sira-neʼe. Ulukliu, ita sei aprende kona-ba buat neʼebé ita la hatene no hatene kona-ba oinsá Jeová tesi-lia ho loloos.

SAIDA MAK ITA LA HATENE?

5. Uluk, ita-nia publikasaun sira dehan saida kona-ba sira neʼebé Jeová halakon iha Sodoma no Gomorra?

⁵ Uluk, ita-nia publikasaun sira koʼalia kona-ba saida mak sei akontese ba sira neʼebé Jeová tesi-lia nuʼudar ema neʼebé halo hahalok la loos. No ita dehan katak sira neʼebé Jeová halakon, hanesan sira iha Sodoma no Gomorra, sei la hetan moris-hiʼas. Maibé depois atan laran-metin no matenek halo tiha orasaun no estuda didiʼak kona-ba ida-neʼe, ikusmai rekoñese katak ita labele dehan ho loloos katak ema sira-neʼe sei la hetan moris-hiʼas. Tanbasá?

6. Fó toʼok ezemplu balu kona-ba oinsá Jeová tesi-lia ba ema neʼebé hatudu hahalok la loos, no saida mak Bíblia la hatete?

⁶ Hanoin toʼok kona-ba ezemplu balu husi Bíblia. Iha istória balu kona-ba oinsá Jeová tesi-lia ba ema neʼebé halo hahalok la loos. Porezemplu, Jeová halakon ema aat iha Rai-Nabeen. Nia uza ema Izraél atu halakon ema neʼebé hela iha rai-Kanaan. No nia mós uza anju ida atu halakon Asíria nia tropa naʼin-185.000 iha kalan ida deʼit. (Gén 7:23; Deut 7:​1-3; Isa 37:​36, 37) Iha situasaun sira-neʼe, Bíblia hatete ho klaru ka lae katak Jeová deside ona sira hotu sei mate ba nafatin no la hetan moris-hiʼas? Lae. Tanbasá mak ita bele dehan nuneʼe?

7. Saida mak ita la hatene kona-ba ema neʼebé mate iha Rai-Nabeen ka iha rai-Kanaan? (Haree mós dezeñu.)

⁷ Ita la hatene oinsá Jeová tesi-lia ba ema ida-idak iha grupu sira-neʼe, no ita mós la hatene se sira neʼebé mate ona hetan oportunidade atu aprende kona-ba Jeová no arrepende an ka lae. Kona-ba tempu Rai-Nabeen, Bíblia hatete katak Noé mak “haklaken-naʼin kona-ba justisa”. (2 Ped 2:5) Maibé, Bíblia la dehan katak bainhira Noé harii daudaun ró boot neʼe, nia mós koko atu haklaken ba ema ida-idak iha mundu. Nuneʼe mós, ita la hatene se ema aat sira iha rai-Kanaan hetan oportunidade atu aprende kona-ba Jeová no troka sira-nia hahalok.

8. Saida mak ita la hatene kona-ba ema iha Sodoma no Gomorra?

⁸ Oinsá ho ema neʼebé mate iha Sodoma no Gomorra? Lot neʼebé laran-loos hela iha Sodoma. Maibé ita la hatene se Lot haklaken ba ema hotu iha neʼebá ka lae. Ema Sodoma no Gomorra mak ema aat, maibé karik sira la hatene kona-ba buat neʼebé loos no sala. Hanoin toʼok kona-ba ema-lubun boot neʼebé hakarak estraga Lot nia bainaka. Bíblia hatete katak ema-lubun neʼe inklui mós “labarik toʼo katuas” sira. (Gén 19:4; 2 Ped 2:7) Ita hatene duni ka lae katak Jeová neʼebé laran-sadiʼa deside atu la fó moris-hiʼas ba sira ida? Lae, ita la hatene kona-ba neʼe. Jeová hatete ba Abraão katak ema laran-loos iha sidade neʼe la toʼo naʼin-sanulu. (Gén 18:32) Entaun, Jeová halo buat neʼebé loos hodi halakon sira tanba sira hatudu hahalok la loos. Maibé ita la hatene ho loloos katak sira ida sei  la hetan moris-hiʼas nuʼudar “ema neʼebé hatudu hahalok la loos”.

9. Saida mak ita la hatene kona-ba Salomão?

⁹ Bíblia mós konta kona-ba ema laran-loos neʼebé ikusmai hatudu hahalok la loos. Porezemplu, Liurai Salomão hatene didiʼak Jeová, no Jeová haraik bensaun barak ba nia. Maibé ikusmai nia adora fali maromak falsu sira. Neʼe halo Jeová hirus tebes no nasaun Izraél hasoru susar ba tinan barak tanba Salomão nia sala. Bainhira Salomão mate, Bíblia hatete duni katak ema hakoi nia “hamutuk ho ninia beiʼala sira”, inklui ema laran-metin seluk hanesan Liurai David. (1 Reis 11:​5-9, 43, nota; 2 Reis 23:13) Maibé neʼe katak nia sei hetan moris-hiʼas ka lae? Bíblia la fó sai kona-ba neʼe. Ema balu karik hanoin katak Salomão sei moris hiʼas tanba Bíblia hatete katak “ema neʼebé mate, nia selu ona tusan hotu ba ninia sala”. (Rom 6:7) Maibé neʼe la dehan katak ema hotu neʼebé mate ona sei hetan moris-hiʼas, hanesan neʼe mak sira-nia direitu. Moris-hiʼas mak prezente ida husi Maromak neʼebé domin. Nia fó ida-neʼe ba sira neʼebé nia hakarak atu hetan oportunidade hodi serbí nia ba nafatin. (Job 14:​13, 14; João 6:44) Salomão sei hetan prezente hanesan neʼe ka lae? Ita la hatene, só Jeová mak hatene. Maibé ita hatene katak Jeová sei halo buat neʼebé loos.

SAIDA MAK ITA HATENE?

10. Jeová sente oinsá kona-ba halakon ema? (Ezequiel 33:11) (Haree mós dezeñu.)

¹⁰ Lee Ezequiel 33:11. Jeová ho laran-diʼak fó sai kona-ba saida mak nia sente bainhira nia tesi-lia ba ema. Apóstolu Pedro fó sai buat neʼebé hanesan ho profeta Ezequiel nia liafuan hodi hatete: “Jeová . . . lakohi ema ida lakon.” (2 Ped 3:9) Tanba lia-loos furak neʼe, ita hatene katak Jeová la ansi atu halakon ema ba nafatin. Nia mak Maromak neʼebé laran-sadiʼa no nia hatudu laran-sadiʼa bainhira situasaun permite.

11. Sé mak sei la hetan moris-hiʼas, no oinsá mak ita hatene ida-neʼe?

¹¹ Saida mak ita hatene kona-ba ema neʼebé sei la hetan moris-hiʼas? Bíblia temi kona-ba ezemplu balu deʼit. b Jesus hatete katak Judas Iscariotes sei la hetan moris-hiʼas. (Mc 14:21; João 17:12) c Judas hatene katak buat neʼebé nia halo mak kontra duni Jeová no Jesus, maibé nia nafatin halo ida-neʼe. (Mc 3:29) d Jesus mós hatete katak ulun-naʼin relijiaun balu neʼebé kontra nia sei mate no la hetan moris-hiʼas. (Mt 23:33; João 19:11) e No apóstolu Paulo fó avizu katak apóstata sira neʼebé la arrepende an mós sei la hetan moris-hiʼas.—Ebr 6:​4-8; 10:29.

12. Saida mak ita hatene kona-ba Jeová nia laran-sadiʼa? Fó toʼok ezemplu.

¹² Saida mak ita hatene kona-ba Jeová nia laran-sadiʼa? Oinsá mak nia hatudu ona katak nia “lakohi ema ida lakon”? Hanoin toʼok kona-ba oinsá Jeová hatudu laran-sadiʼa bainhira ema halo sala neʼebé sériu. Liurai David halo sala sériu oioin, inklui adultériu no oho ema. Maibé, Jeová hatudu laran-sadiʼa no fó perdua ba David tanba nia arrepende an. (2 Sam 12:​1-13) Liurai Manasés halo hahalok aat  barak durante ninia moris. Maski nuneʼe, Jeová hatudu laran-sadiʼa no fó perdua ba nia tanba nia arrepende an. (2 Krón 33:​9-16) Ezemplu sira-neʼe fó-hanoin ita katak Jeová sei hatudu laran-sadiʼa bainhira nia iha razaun atu halo ida-neʼe. Nia sei fó moris-hiʼas ba ema hanesan neʼe tanba sira rekoñese katak sira halo ona sala neʼebé sériu no arrepende an.

13. (a) Tanbasá Jeová hatudu laran-sadiʼa ba ema Nínive? (b) Saida mak Jesus hatete kona-ba ema Nínive?

¹³ Ita mós hatene kona-ba Jeová nia laran-sadiʼa ba ema Nínive. Maromak hatete ba Jonas: “Haʼu haree ona sira-nia hahalok aat.” Maibé kuandu sira arrepende sira-nia sala, Jeová fó perdua ba sira. Ninia laran-sadiʼa boot liu fali Jonas nia laran-sadiʼa. Jonas hirus, no Maromak presiza fó-hanoin nia katak ema Nínive “la hatene saida mak loos no saida mak sala”. (Jonas 1:​1, 2; 3:10; 4:​9-11) Tuirmai, Jesus uza ezemplu neʼe atu hanorin kona-ba Jeová nia justisa no laran-sadiʼa. Jesus hatete katak ema Nínive neʼebé arrepende an “sei hamriik” iha “tempu tesi-lia nian”.—Mt 12:41.

14. Ema Nínive neʼebé simu “moris hiʼas atu hetan tesi-lia” sei hetan oportunidade saida?

¹⁴ Ema Nínive “sei hamriik” iha “tempu tesi-lia nian” katak sá? Jesus hanorin kona-ba “moris hiʼas atu hetan tesi-lia” iha futuru. (João 5:29) Jesus refere ba ninia Ukun ba Tinan Rihun Ida, no durante tempu neʼe “ema neʼebé hatudu hahalok loos no mós ema neʼebé hatudu hahalok la loos” sei hetan moris-hiʼas. (Após 24:15) Ema neʼebé hatudu hahalok la loos, sei “moris hiʼas atu hetan tesi-lia”. Neʼe katak depois ema sira-neʼe hetan tiha moris-hiʼas, Jeová no Jesus sei haree didiʼak ba sira-nia hahalok no oinsá sira halo tuir buat neʼebé sira aprende. Se ema Nínive neʼebé hetan moris-hiʼas lakohi simu adorasaun loos, Jeová sei la husik sira atu kontinua moris. (Isa 65:20) Maibé sira neʼebé hili atu adora Jeová ho laran-metin sei hetan oportunidade atu moris ba nafatin!—Dan 12:2.

15. (a) Tanbasá ita labele dehan katak ema sira neʼebé mate iha Sodoma no Gomorra sei la hetan moris-hiʼas? (b) Oinsá mak ita komprende liafuan neʼebé hakerek iha Judas 7? (Haree kaixa “ Judas nia liafuan katak sá?”)

¹⁵ Bainhira Jesus koʼalia kona-ba ema  Sodoma no Gomorra, nia hatete katak iha “Loron Tesi-Lia nian”, ema Sodoma no Gomorra nia kastigu sei kmaan liu fali ema iha Jesus nia tempu neʼebé lakohi simu Jesus no ninia hanorin. (Mt 10:​14, 15; 11:​23, 24; Lc 10:12) Neʼe katak sá? Karik ita hanoin katak Jesus nia liafuan sira-neʼe mak komparasaun atu hatudu katak ema iha ninia tempu mak aat tebes. Maibé tuir loloos lae. Tanbasá? Hanoin-hetan, bainhira Jesus hatete katak ema Nínive sei hamriik iha tempu tesi-lia nian, ninia liafuan signifika katak sira sei moris hiʼas duni. Nuneʼe mós, bainhira Jesus hatete katak ema Sodoma no Gomorra sei hetan tesi-lia iha “Loron Tesi-Lia nian”, karik sira balu mós sei hetan duni moris-hiʼas. “Loron Tesi-Lia nian” no “tempu tesi-lia nian” refere ba akontesimentu neʼebé hanesan. Hanesan ema iha Nínive, ema iha Sodoma no Gomorra mós halo buat neʼebé aat. Maibé ema Nínive hetan oportunidade atu arrepende an. Hanoin-hetan, Jesus hatete katak ema neʼebé “moris hiʼas atu hetan tesi-lia” mak ema neʼebé “halo hahalok aat”. (João 5:29) Tan neʼe, karik ema balu neʼebé iha Sodoma no Gomorra iha esperansa atu moris hiʼas, no karik ita sei hetan oportunidade atu hanorin sira kona-ba Jeová no Jesus Kristu.

16. Atu deside kona-ba Jeová sei fó moris-hiʼas ba sé, nia buka-hatene kona-ba saida? (Jeremias 17:10)

¹⁶ Lee Jeremias 17:10. Eskritura neʼe ajuda ita hatene kona-ba dalan neʼebé Jeová tesi-lia: Nia sempre ‘buka-hatene ema nia laran no haree didiʼak ema nia hanoin’. Bainhira Jeová fó moris-hiʼas ba ema iha futuru, nia sei ‘fó kolen ba sira ida-idak tuir sira-nia hahalok’. Jeová nia desizaun sira kona-ba tesi-lia mak metin, maibé nia mós sei hatudu laran-sadiʼa bainhira situasaun permite. Tan neʼe, se Bíblia la fó sai ho klaru, ita labele dehan katak ema neʼe sei la hetan moris-hiʼas!

“JUÍS BA MUNDU TOMAK” SEI “HALO BUAT NEʼEBÉ LOOS”

17. Saida mak esperansa ba ema mate?

¹⁷ Husi tempu neʼebé Adão, Eva, no Satanás hahú kontra Maromak Jeová, ema millaun ba millaun mak mate. Mate mak “inimigu” neʼebé aat tebes! (1 Kor 15:26)  Saida mak esperansa ba ema mate? Ema naʼin-144.000 husi Kristu nia dixípulu neʼebé laran-metin sei hetan moris-hiʼas ba lalehan atu moris ba nafatin. (Apok 14:1) Ema barak neʼebé laran-metin no hadomi Jeová sei inklui iha “ema neʼebé hatudu hahalok loos” no sei hetan moris-hiʼas iha rai. Se sira kontinua hatudu laran-metin durante Kristu nia Ukun ba Tinan Rihun Ida no mós durante koko ba dala ikus, sira bele moris ba nafatin. (Dan 12:13; Ebr 12:1) No durante Kristu nia Ukun ba Tinan Rihun Ida, “ema neʼebé hatudu hahalok la loos”, inklui sira neʼebé seidauk serbí Jeová ka “hatudu hahalok aat”, sei hetan oportunidade atu troka sira-nia hahalok no serbí Jeová. (Lc 23:​42, 43) Maibé ema balu uluk hatudu hahalok neʼebé aat tebes, no hili atu kontra Jeová no ninia hakarak, tan neʼe nia deside atu la fó moris-hiʼas ba sira.—Lc 12:​4, 5.

18-19. (a) Tanbasá ita bele fiar metin kona-ba Jeová nia tesi-lia ba sira neʼebé mate ona? (Isaias 55:​8, 9) (b) Iha lisaun tuirmai, ita sei koʼalia kona-ba saida?

¹⁸ Ita bele fiar metin katak bainhira Jeová tesi-lia ba ema, nia sempre halo desizaun neʼebé loos! Abraão komprende ho didiʼak katak Jeová mak “Juís ba mundu tomak” neʼebé perfeitu, matenek, no laran-sadiʼa. Jeová treinu ona ninia Oan-Mane no fó knaar ba nia atu tesi-lia ba ema. (João 5:22) Jeová no Jesus bele haree ema hotu nia laran. (Mt 9:4) Iha situasaun hotu, sira sei “halo buat neʼebé loos”!

¹⁹ Mai ita deside metin atu tau fiar ba Jeová no ninia desizaun sira. Ita rekoñese katak ita labele tesi-lia ba ema, maibé Jeová bele! (Lee Isaias 55:​8, 9.) Tan neʼe mak ita tau fiar ba Jeová no ninia Oan-Mane atu tesi-lia. No ita mós hatene katak ita-nia Liurai Jesus banati-tuir Jeová nia justisa no laran-sadiʼa ho perfeitu. (Isa 11:​3, 4) Oinsá mak Jeová sei tesi-lia ba ema durante terus boot? Saida mak ita la hatene? No saida mak ita hatene? Iha lisaun tuirmai, ita sei hatán ba pergunta sira-neʼe.