1. Eclesiastes 3:1, 7, hanorin saida mai ita?

EMA balu gosta koʼalia barak maibé ema seluk gosta atu nonook. Hanesan eskritura tema hatete, iha tempu atu koʼalia no tempu atu nonook. (Lee Eclesiastes 3:1, 7.) Dala ruma ita hakarak irmaun ka irmán ida atu koʼalia. Maibé dala ruma ita mós lakohi irmaun ka irmán balu atu koʼalia barak.

2. Sé mak bele fó matadalan kona-ba bainhira no oinsá atu koʼalia?

² Kbiit atu koʼalia mak prezente husi Jeová. (Éx 4:10, 11; Apok 4:11) Liuhusi Bíblia mak Jeová ajuda ita atu komprende oinsá uza prezente neʼe ho didiʼak. Iha lisaun neʼe, ita sei aprende ezemplu balu husi Bíblia neʼebé sei ajuda ita hatene bainhira atu koʼalia no bainhira atu nonook. Ita mós sei aprende oinsá Jeová sente kona-ba ita-nia liafuan. Ulukliu, mai ita aprende bainhira mak ita presiza koʼalia.

3. Tuir Roma 10:14, bainhira mak ita presiza koʼalia?

³ Diʼak atu ita sempre prontu koʼalia kona-ba Jeová no ninia Ukun. (Mt 24:14; lee Roma 10:14.) Hodi halo nuneʼe, ita banati-tuir Jesus. Razaun importante ida tanbasá Jesus mai rai mak atu fó sai lia-loos kona-ba ninia Aman. (João 18:37) Maibé ita presiza hanoin-hetan katak dalan neʼebé ita koʼalia mós importante. Tan neʼe, bainhira ita koʼalia ba ema seluk kona-ba Jeová, ita presiza halo ida-neʼe ho “laran-maus no respeitu kleʼan”, no ita presiza hanoin ema nia sentimentu no fiar. (1 Ped 3:15) Hodi halo nuneʼe, ita sei hanorin sira no bele book sira-nia laran.

4. Tuir Provérbios 9:9, oinsá mak ita-nia liafuan bele ajuda ema seluk?

 ⁴ Katuas sira labele dada an atu koʼalia se sira haree katak irmaun ka irmán ida presiza simu konsellu ruma. Maibé sira presiza buka tempu diʼak atu koʼalia hodi la hamoe irmaun ka irmán neʼe. Sira hakarak hein toʼo ema seluk la iha. Katuas sira presiza hakaʼas an atu koʼalia iha dalan neʼebé respeitu. Maibé sira mós labele dada an atu fahe Bíblia nia prinsípiu neʼebé bele ajuda irmaun-irmán sira atu hatudu hahalok matenek. (Lee Provérbios 9:9.) Tanbasá importante atu koʼalia ho aten-brani bainhira presiza? Hanoin toʼok ezemplu rua neʼebé la hanesan: Mane neʼebé presiza korrije ninia oan-mane sira, no feto neʼebé presiza fó-hatene mane ida neʼebé atu sai liurai katak nia halo ona desizaun sala.

5. Bainhira mak Amlulik Boot Eli dada an atu korrije ninia oan sira ho loloos?

⁵ Amlulik Boot Eli iha oan-mane naʼin-rua no nia hadomi tebes sira. Maibé ninia oan sira-neʼe la hatudu respeitu ba Jeová. Maski sira mak amlulik no serbí iha tenda santu, maibé sira uza sala sira-nia podér. Sira la hatudu respeitu ba sakrifísiu neʼebé hasaʼe ba Jeová, no sira la moe hodi halo sala seksuál. (1 Sam 2:12-17, 22) Tuir Moisés nia Ukun-Fuan, Eli nia oan sira presiza mate, maibé Eli korrije sira iha dalan neʼebé mamar no husik sira kontinua serbí iha tenda santu. (Deut 21:18-21) Jeová sente oinsá ho buat neʼebé Eli halo? Jeová hatete ba Eli: “Tanbasá mak ó hafolin liu ó-nia oan-mane sira duké haʼu?” Jeová deside katak mane aat naʼin-rua neʼe tenke mate.—1 Sam 2:29, 34.

6. Saida mak ita aprende husi Eli?

⁶ Ita aprende lisaun importante ida husi Amlulik Boot Eli. Se ita hatene ita-nia belun ka família ida kontra Maromak nia ukun-fuan, ita tenke koʼalia ba nia hodi fó-hanoin nia kona-ba Jeová nia matadalan sira. Tuirmai ita tenke apoia nia atu buka ajuda neʼebé nia presiza husi katuas sira. (Tgo 5:14) Ita lakohi sai hanesan Eli hodi hafolin ita-nia belun ka família liu fali Jeová. Presiza aten-brani atu korrije ema, maibé ita-nia hakaʼas an bele lori rezultadu diʼak. Haree toʼok buat neʼebé la hanesan entre Eli no feto Izraél ida naran Abigail.

7. Tanbasá Abigail koʼalia ba David?

 ⁷ Abigail mak Nabal nia feen no Nabal mak mane neʼebé riku. Bainhira David no ninia ema sira halai husi Liurai Saul, sira hela hamutuk ho Nabal nia bibi-atan sira ba tempu balu no proteje Nabal nia bibi-lubun husi naʼok-teen sira. Nabal hatudu agradese ka lae? Lae. Bainhira David haruka ninia ema sira atu husu Nabal fó ai-han uitoan no bee ba sira, Nabal sai hirus no hakilar hodi insulta sira. (1 Sam 25:5-8, 10-12, 14) Rezultadu mak David deside atu oho mane hotu iha Nabal nia umakain. (1 Sam 25:13, 22) Oinsá atu hanetik ida-neʼe? Abigail haree katak agora mak tempu atu koʼalia, tan neʼe Abigail ho aten-brani bá hasoru mane naʼin-400 neʼebé hamlaha, hirus tebes no iha armas, atu bele koʼalia ho David.

8. Ita aprende saida husi Abigail nia ezemplu?

⁸ Bainhira Abigail hasoru David, nia koʼalia ho aten-brani no respeitu, no neʼe book David atu halo tuir Abigail nia liafuan. Maski laʼós Abigail mak hamosu problema neʼe, maibé nia husu deskulpa. Abigail hatete katak nia hatene David mak ema diʼak no sei halo buat loos no Abigail sadere ba Jeová atu ajuda nia. (1 Sam 25:24, 26, 28, 33, 34) Hanesan Abigail, ita presiza aten-brani atu koʼalia se ita haree ema ruma halo buat neʼebé bele lori nia ba sala sériu. (Sal 141:5) Ita tenke hatudu respeitu, maibé mós tenke aten-brani. Bainhira ita fó konsellu ba ema ho domin, ita hatudu katak ita mak belun diʼak.—Prov 27:17.

9-10. Katuas sira tenke hanoin-hetan saida bainhira fó konsellu?

⁹ Importante liu ba katuas sira atu koʼalia ho aten-brani ba ema neʼebé komesa laʼo sala dalan iha kongregasaun. (Gal 6:1) Ho  haraik an katuas sira rekoñese katak sira mós la perfeitu no karik loron ida presiza simu konsellu. Maibé katuas sira la husik ida-neʼe hanetik sira atu korrije ema sira neʼebé presiza dixiplina. (2 Tim 4:2; Tito 1:9) Bainhira fó konsellu ba ema ida, katuas sira koko uza kbiit atu koʼalia hodi hanorin iha dalan neʼebé matenek no ho pasiénsia. Sira hadomi irmaun-irmán sira, no domin neʼe book sira atu ajuda irmaun-irmán sira. (Prov 13:24) Maibé buat neʼebé importante liu ba sira mak atu fó glória ba Jeová hodi apoia ninia matadalan sira no proteje kongregasaun.—Após 20:28.

¹⁰ Ita aprende ona kona-ba bainhira atu koʼalia. Maibé, iha mós tempu neʼebé ita presiza atu nonook. Susar saida mak ita hasoru iha situasaun sira-neʼe?

11. Tiago uza ai-knanoik saida? Tanbasá mak ai-knanoik neʼe diʼak?

¹¹ Dala ruma susar atu kontrola ita-nia liafuan. Dixípulu Tiago uza ai-knanoik neʼebé kapás atu esplika kona-ba susar neʼe. Nia hatete: “Se ema ida la halo sala ho ninia liafuan, nia mak ema perfeitu, nia bele kontrola ninia isin tomak.” (Tgo 3:2, 3) Liafuan “kontrola” iha versíkulu neʼe refere ba kuda-freun. Ema tau kuda-freun iha kuda nia ulun no ibun. Bainhira ema neʼebé saʼe kuda dada kuda-freun, nia bele dirije ka hapara kuda. Se ema neʼe labele kontrola ona kuda-freun, kuda bele halai arbiru no neʼe bele lori problema ba kuda no mós ba ema neʼebé saʼe kuda. Nuneʼe mós, se ita la kontrola ita-nia liafuan, neʼe bele lori problema barak. Mai ita hanoin kona-ba situasaun balu neʼebé ita presiza kontrola ita-nia liafuan no presiza nonook.

12. Bainhira mak ita presiza kontrola ita-nia liafuan no nonook deʼit?

 ¹² Se irmaun ka irmán ida hatene informasaun ruma neʼebé segredu, Ita sei halo saida? Porezemplu, se Ita hasoru irmaun ka irmán ida neʼebé hela iha rai neʼebé governu bandu serbisu haklaken, Ita sei husu nia atu konta kona-ba serbisu haklaken iha ninia rai ka lae? Klaru katak Ita iha motivu diʼak. Ita hadomi irmaun-irmán sira no hakarak hatene sira-nia situasaun. Ita mós hakarak halo orasaun espesífiku kona-ba sira. Maibé, neʼe mak tempu atu kontrola ita-nia liafuan no nonook deʼit. Se ita obriga ema atu fó sai informasaun segredu, ita la hatudu domin ba ema neʼe no ba irmaun-irmán sira neʼebé iha konfiansa katak ema neʼe sei rai didiʼak segredu sira. Ita hotu lakohi duni atu aumenta susar ba irmaun-irmán sira neʼebé hela iha rai neʼebé governu bandu serbisu haklaken. Nuneʼe mós, irmaun-irmán sira-neʼe sei la fó sai oinsá sira halaʼo serbisu haklaken ka halo atividade Kristaun nian seluk.

13. Tuir Provérbios 11:13, katuas ida tenke halo saida, no tanbasá?

¹³ Importante ba katuas kongregasaun sira atu halo tuir Bíblia nia prinsípiu iha Provérbios 11:13 hodi rai didiʼak informasaun segredu. (Lee.) Dala ruma susar, liuliu se katuas ida kaben ona. Kaben-naʼin sira kontinua hametin sira-nia relasaun liuhusi koʼalia beibeik ba malu kona-ba sira-nia hanoin, sentimentu no neon-susar. Maibé katuas ida komprende katak nia labele fó sai ba ninia feen informasaun privadu kona-ba ema seluk iha kongregasaun. Se nia fó sai segredu, neʼe sei estraga ninia naran diʼak no ema sei la konfia tan nia. Ema sira neʼebé simu responsabilidade iha kongregasaun labele “laran-makerek” ka bosok. (1 Tim 3:8, nota) Neʼe katak sira labele lohi ema seluk ka konta ema nia vida. Se katuas ida hadomi ninia feen, nia sei la hatodan ninia feen ho informasaun neʼebé ninia feen la presiza hatene.

14. Oinsá mak feen bele ajuda ninia laʼen atu kontinua iha naran diʼak?

¹⁴ Feen bele ajuda ninia laʼen atu kontinua iha naran diʼak hodi la obriga ninia laʼen atu koʼalia kona-ba informasaun neʼebé segredu. Bainhira feen halo tuir konsellu neʼe, nia sei apoia ninia laʼen no mós hatudu respeitu ba ema sira neʼebé fó sai informasaun segredu ba ninia laʼen. No importante liu mak nia halo Jeová kontente tanba nia haburas dame no unidade iha kongregasaun laran.—Rom 14:19.

15. Jeová sente oinsá kona-ba Job nia belun naʼin-tolu, no tanbasá?

¹⁵ Ita bele aprende buat barak husi livru Job kona-ba oinsá no bainhira atu koʼalia. Bainhira Job hasoru tiha susar oioin, mane naʼin-haat mai atu fó kmaan no fó konsellu ba nia. Mane sira-neʼe nonook deʼit ba tempu kleur. Maibé ikusmai mane naʼin-tolu fó sai liafuan neʼebé hatudu katak sira la uza tempu neʼe atu hanoin kona-ba oinsá ajuda Job. Mane naʼin-tolu neʼe mak Elifaz, Bildad no Zofar. Sira hanoin deʼit kona-ba oinsá sira bele hatudu katak Job halo ona sala. Sira fó sai informasaun loos balu, maibé buat barak liu neʼebé sira fó sai kona-ba Job no Jeová mak la loos no la hatudu laran-diʼak. Sira duun katak Job mak ema aat. (Job 32:1-3) Jeová halo saida kona-ba neʼe? Jeová sai hirus makaʼas hasoru mane naʼin-tolu neʼe. Nia bolu sira  beik no haruka sira atu husu Job harohan ba sira.—Job 42:7-9.

16. Saida mak ita bele aprende husi Elifaz, Bildad no Zofar nia ezemplu aat?

¹⁶ Ita aprende lisaun balu husi Elifaz, Bildad no Zofar nia ezemplu aat. Primeiru, ita labele tesi-lia ba irmaun-irmán sira. (Mt 7:1-5) Maibé ita tenke rona didiʼak ba sira antes koʼalia. Hodi halo nuneʼe, ita bele komprende sira-nia situasaun. (1 Ped 3:8) Segundu, bainhira ita koʼalia, ita tenke koʼalia ho laran-diʼak no koʼalia buat loos. (Éf 4:25) No terseiru, Jeová interese tebes ba buat neʼebé ita koʼalia ba malu.

17. Ita bele aprende saida husi Eliú nia ezemplu?

¹⁷ Mane ida tan neʼebé vizita Job mak Eliú. Nia mai husi Abraão nia família. Nia rona ba Job no mós mane naʼin-tolu seluk. Nia rona didiʼak ba sira-nia liafuan, tan neʼe mak nia bele fó konsellu neʼebé klaru ho laran-diʼak atu ajuda Job hadiʼa ninia hanoin. (Job 33:1, 6, 17) Buat neʼebé importante liu ba Eliú mak atu fó glória ba Jeová, laʼós ba ninia an rasik ka ba ema seluk. (Job 32:21, 22; 37:23, 24) Ita aprende husi Eliú nia ezemplu katak iha tempu atu nonook no rona. (Tgo 1:19) Ita mós aprende katak bainhira ita fó konsellu, buat neʼebé importante liu mak atu fó glória ba Jeová, laʼós ba ita-nia an rasik.

18. Oinsá mak ita hatudu katak ita hafolin ita-nia kbiit atu koʼalia?

¹⁸ Ita bele hatudu katak ita hafolin kbiit atu koʼalia liuhusi halo tuir Bíblia nia konsellu kona-ba bainhira no oinsá atu koʼalia. Liurai Salomão hatete: “Liafuan neʼebé koʼalia iha tempu neʼebé loos mak hanesan masán osan-mean iha bikan osan-mutin nia laran.” (Prov 25:11) Se ita rona didiʼak ba ema seluk no hanoin uluk antes koʼalia, ita-nia liafuan bele sai hanesan masán osan-mean neʼebé folin-boot no furak. Maski ita koʼalia barak ka lae, ita sei hametin ema seluk no halo Jeová kontente. (Prov 23:15; Éf 4:29) Neʼe mak dalan diʼak liu hotu atu hatudu agradese ba prezente neʼebé Maromak fó mai ita.