1. Tuir Mateus 24:9, tanbasá ita la hakfodak bainhira ema odi ita?

JEOVÁ kria ita ho abilidade atu hatudu domin ba ema no mós sente domin husi ema seluk. Tan neʼe, bainhira ema odi ita, ita sente laran-kanek no mós karik ita sente taʼuk. Porezemplu, irmán Georgina * neʼebé hela iha Europa, hatete: “Bainhira haʼu tinan 14, haʼu-nia amá odi haʼu tanba haʼu serbí Jeová. Haʼu sente triste loos no mesamesak. Haʼu mós komesa hanoin katak karik haʼu mak ema aat.” Irmaun Danylo hatete: “Bainhira soldadu sira baku haʼu, insulta haʼu, no ameasa haʼu tanba haʼu mak Testemuña, haʼu sente taʼuk no moe.” Bainhira ema odi ita, neʼe halo ita laran-kanek, maibé ita la hakfodak kona-ba neʼe. Jesus fó-hatene nanis katak ema sei odi ita.​—Lee Mateus 24:9.

2-3. Tanbasá ema odi Jesus nia dixípulu sira?

² Tanbasá ema odi Jesus nia dixípulu sira? Tanba hanesan Jesus, ita “laʼós mundu neʼe nian”. (João 15:17-19) Tan neʼe, maski ita respeitu ema nia governu, maibé ita la hola parte iha polítiku, la kontinénsia ba bandeira, ka la kanta inu nasionál. Ita adora Jeová mesak deʼit. Ita apoia Jeová nia direitu atu ukun. Maibé Satanás no ninia “bei-oan sira” kontra Jeová nia direitu atu ukun. (Gén 3:1-5, 15) Ita haklaken katak só Maromak nia Ukun deʼit mak bele hadiʼa problema iha mundu no lakleur tan Ukun neʼe sei halakon ema hotu neʼebé kontra Ukun neʼe. (Dan  2:44; Apok 19:19-21) Neʼe mak liafuan diʼak ba ema neʼebé laran-maus, maibé ema aat sira la kontente atu rona ida-neʼe.​—Sal 37:10, 11.

³ Ema mós odi ita tanba ita moris tuir Maromak nia matadalan sira. Matadalan sira-neʼe la hanesan duni ho mundu nia morál neʼebé aat. Ohin loron, ema barak simu hahalok la morál oioin, hanesan ema iha Sodoma no Gomorra halo no Maromak halakon sira. (Jud 7) Tanba ita halo tuir Bíblia nia matadalan atu la simu hahalok sira-neʼe, ema barak goza ita no dehan katak ita la iha toleránsia.​—1 Ped 4:3, 4.

4. Hahalok saida deʼit mak bele ajuda ita kuandu ema odi ita?

⁴ Saida mak bele ajuda ita atu tahan bainhira ema odi no insulta ita? Ita presiza fiar metin katak Jeová sei ajuda ita. Hanesan eskudu ida, ita-nia fiar bele “hamate rama-oan hotu neʼebé lakan ho ahi husi aat-naʼin”. (Éf 6:16) Maibé fiar deʼit la toʼo. Ita mós presiza domin. Tanbasá? Tanba domin “la sai hirus lalais”. Domin lori todan hotu no tahan buat hotu. (1 Kor 13:4-7, 13) Agora mai ita haree oinsá domin ba Jeová, domin ba maluk Kristaun, no domin ba inimigu sei ajuda ita atu tahan maski ema odi ita.

5. Jesus nia domin ba Jeová ajuda nia atu halo saida?

⁵ Iha kalan antes Jesus nia inimigu atu oho nia, Jesus hatete ba ninia dixípulu sira neʼebé laran-metin: “Haʼu halo tuir daudaun buat neʼebé Aman haruka haʼu atu halo, . . . [tanba] haʼu hadomi Aman.” (João 14:31) Jesus hadomi Jeová, tan neʼe nia bele tahan susar oioin. Domin ba Jeová mós bele ajuda ita iha dalan hanesan neʼe.

6. Tuir Roma 5:3-5, Jeová nia atan sira sente oinsá bainhira mundu odi sira?

⁶ Bainhira Jeová nia povu hadomi nia, neʼe ajuda sira atu tahan terus. Bainhira ema Judeu nia tribunál boot haruka apóstolu sira atu la haklaken, domin ba Maromak book sira atu “halo tuir Maromak nuʼudar ukun-naʼin duké halo tuir ema”. (Após 5:29; 1 João 5:3) Ohin loron, irmaun-irmán sira hadomi tebes Jeová no neʼe ajuda sira atu laran-metin maski governu odi ka fó-terus ba sira. Tan neʼe, bainhira ema iha mundu odi ita, ita la sai laran-kraik maibé ita sente kontente.—Após 5:41; lee Roma 5:3-5.

7. Ita sei halo saida bainhira família kontra ita?

⁷ Susar tebes atu tahan bainhira ita-nia família kontra ita. Kuandu ita komesa aprende lia-loos, karik ita-nia família balu hanoin katak ema lohi ita ka ita bulak ona. (Kompara ho Marcos 3:21.) Karik sira trata aat ita. Maibé ita la hakfodak ho ida-neʼe. Jesus hatete: “Ema nia inimigu sei mai husi ninia umakain rasik.” (Mt 10:36) Klaru katak, maski ita-nia família haree ita la diʼak, maibé ita lakohi odi sira. Bainhira ita-nia domin ba Jeová sai boot liután, ita-nia domin ba ema mós aumenta. (Mt 22:37-39) Maski nuneʼe, ita sei nunka para atu halo tuir Bíblia nia ukun-fuan no prinsípiu tan deʼit atu halo ema kontente.

8-9. Saida mak ajuda irmán Georgina atu hamriik metin maski ema kontra nia?

⁸ Irmán Georgina nafatin hamriik metin maski ninia amá kontra makaʼas nia. Nia esplika: “Haʼu no haʼu-nia amá komesa estuda Bíblia ho Testemuña. Maibé fulan neen liutiha bainhira haʼu  hakarak tuir reuniaun, haʼu-nia amá kontra makaʼas haʼu. Ikusmai, haʼu hatene katak nia kontaktu malu ho ema neʼebé kontra lia-loos no nia fó sai ba haʼu lia-bosok neʼebé nia rona husi sira. Nia insulta haʼu, rakut haʼu-nia fuuk, buti haʼu-nia kakorok, no soe hotu haʼu-nia publikasaun. Bainhira haʼu tinan 15, haʼu hetan batizmu. Haʼu-nia amá koko hanetik haʼu atu la serbí Jeová. Nia hatama haʼu ba asrama neʼebé nakonu ho joven sira neʼebé nakar. Joven balu uza droga no halo krime oioin. Susar tebes atu tahan bainhira ita-nia família kontra ita, tanba tuir loloos sira mak tenke hadomi no tau matan ita.”

⁹ Saida mak ajuda irmán Georgina atu tahan? Nia hatete: “Bainhira haʼu-nia amá komesa kontra haʼu, iha tempu neʼebá haʼu foin lee Bíblia tomak. Haʼu fiar katak haʼu hetan ona lia-loos no haʼu sente besik ho Jeová. Haʼu halo orasaun beibeik ba nia, no nia rona haʼu. Bainhira haʼu hela iha asrama, irmán ida konvida haʼu atu vizita nia no ami estuda Bíblia hamutuk. Durante tempu neʼe, irmaun-irmán sira hametin haʼu. Sira haree haʼu hanesan família. Haʼu rasik bele haree katak Jeová mak kbiit boot liu fali ema naran deʼit neʼebé kontra ita.”

10. Ita bele fiar katak Jeová sempre halo saida?

¹⁰ Apóstolu Paulo hakerek katak la iha buat ida mak bele “haketak ita husi Maromak nia domin neʼebé liuhusi ita-nia Naʼi Kristu Jesus”. (Rom 8:38, 39) Maski dala ruma ita hasoru susar, Jeová sempre fó kmaan ba ita no hametin ita. Georgina nia esperiénsia hatudu katak Jeová mós ajuda ita liuhusi irmaun-irmán sira.

11. Oinsá domin neʼebé Jesus temi iha João 15:12, 13 ajuda dixípulu sira? Fó toʼok ezemplu.

¹¹ Iha kalan antes Jesus mate, nia fó-hanoin ninia dixípulu sira atu hadomi malu. (Lee João 15:12, 13.) Nia hatene katak domin neʼebé la hanoin an deʼit bele ajuda sira atu iha unidade no tahan bainhira ema odi sira. Hanoin toʼok ezemplu husi kongregasaun iha Tesalónika. Hahú husi tempu neʼebé kongregasaun neʼe harii, ema kontra irmaun-irmán sira. Maibé irmaun-irmán sira hatudu ezemplu diʼak kona-ba laran-metin no domin. (1 Tes 1:3, 6, 7) Paulo  anima sira atu kontinua hadomi malu liután. (1 Tes 4:9, 10) Domin sei book sira atu fó kmaan ba ema neʼebé laran-triste no apoia ema neʼebé fraku. (1 Tes 5:14) Ita hatene katak sira halo tuir Paulo nia konsellu neʼe tanba tinan ida liutiha bainhira Paulo hakerek ninia karta segundu ba sira, nia dehan: “Imi ida-idak nia domin ba malu aumenta ba beibeik.” (2 Tes 1:3-5) Sira-nia domin ajuda sira atu tahan bainhira sira hasoru susar no ema kontra sira.

12. Durante funu, oinsá irmaun-irmán iha nasaun ida hatudu domin ba malu?

¹² Hanoin toʼok esperiénsia husi irmaun Danylo no ninia feen. Bainhira funu akontese iha sira-nia nasaun no afeta mós sira-nia sidade, sira kontinua tuir reuniaun, hakaʼas an atu haklaken, no mós fahe hahán neʼebé sira iha ba irmaun-irmán sira. Loron ida, soldadu sira ho kilat bá irmaun Danylo nia uma. Irmaun Danylo hatete: “Sira obriga haʼu atu nega haʼu-nia fiar. Bainhira haʼu lakohi, sira baku haʼu no sira tiru besik haʼu-nia ulun. Antes sira bá, sira ameasa katak sira sei mai fali no estraga haʼu-nia feen. Irmaun sira lori ami lalais atu saʼe komboiu atu bá sidade seluk. Ami sei nunka haluha domin neʼebé irmaun sira-neʼe hatudu mai ami. Bainhira ami toʼo iha neʼebá, irmaun-irmán sira fó ami ai-han no ajuda haʼu atu hetan serbisu no uma. Tan neʼe, ami bele simu irmaun-irmán seluk neʼebé halai husi funu.” Esperiénsia neʼe hatudu katak domin Kristaun bele ajuda ita atu tahan bainhira ema odi ita.

13. Oinsá espíritu santu ajuda ita tahan bainhira ema odi ita?

¹³ Jesus haruka ninia dixípulu sira atu hadomi sira-nia inimigu. (Mt 5:44, 45) Neʼe fasil ka lae? Lae. Maibé Maromak nia espíritu santu bele ajuda ita atu hadomi ita-nia inimigu. Hahalok sira neʼebé mai husi espíritu santu inklui domin, pasiénsia, laran-diʼak, laran-maus no kontrola an. (Gal 5:22, 23) Hahalok sira-neʼe ajuda ita atu tahan bainhira ema odi ita. Ema barak para atu kontra ita tanba sira-nia laʼen, feen, oan, ka viziñu neʼebé Testemuña hatudu hahalok sira-neʼe. Ema  barak neʼebé kontra ita mak agora ita-nia irmaun-irmán sira. Tan neʼe, se ita sente susar atu hadomi ema neʼebé odi ita tanba ita serbí Jeová, diʼak atu halo orasaun hodi husu espíritu santu. (Lc 11:13) No fiar metin katak Maromak nia dalan sempre lori buat diʼak.​—Prov 3:5-7.

14-15. Oinsá mak Roma 12:17-21 ajuda irmán Yasmeen atu hatudu domin ba ninia laʼen?

¹⁴ Hanoin toʼok esperiénsia husi irmán Yasmeen neʼebé hela iha Médiu Oriente. Bainhira nia sai Testemuña, ninia laʼen hanoin katak ema lohi ona nia, no ninia laʼen koko atu hapara nia atu la serbí tan Jeová. Ninia laʼen insulta nia no anima família, ulun-naʼin relijiaun, no mós matan-dook atu ameasa no duun nia katak nia sobu ninia família. Ninia laʼen mós hakilar irmaun-irmán sira durante reuniaun. Irmán Yasmeen tanis beibeik tanba ninia laʼen trata aat nia.

¹⁵ Iha Reuniaun-Fatin, irmaun-irmán sira fó kmaan no hametin irmán Yasmeen. Katuas sira anima nia atu aplika Roma 12:17-21. (Lee.) Nia hatete: “Neʼe susar duni. Maibé haʼu husu Jeová atu ajuda haʼu no haʼu hakaʼas an atu aplika buat neʼebé Bíblia hatete. Bainhira haʼu-nia laʼen ho hirus lekar rai iha dapur, haʼu hamoos ida-neʼe. Bainhira nia insulta haʼu, haʼu hatán ho laran-diʼak. No bainhira nia moras, haʼu tau matan ba nia.”

16-17. Ita aprende saida husi irmán Yasmeen?

¹⁶ Irmán Yasmeen hetan rezultadu diʼak tanba hatudu domin ba ninia laʼen. Nia hatete: “Haʼu-nia laʼen komesa tau fiar liután mai haʼu tanba nia hatene katak haʼu sempre koʼalia buat neʼebé loos. Nia komesa hatudu respeitu mai haʼu bainhira ami koʼalia kona-ba relijiaun, no nia konkorda atu haburas dame iha uma. Agora nia anima haʼu atu tuir reuniaun. Ami-nia moris família sai diʼak liu, no ami moris ho dame. Haʼu espera katak haʼu-nia laʼen sei loke ninia laran atu simu lia-loos no serbí Jeová.”

¹⁷ Irmán Yasmeen nia esperiénsia hatudu katak “domin lori todan hotu, . . . tau esperansa ba buat hotu, no tahan buat hotu”. (1 Kor 13:4, 7) Se ita mós hatudu domin ba ema, karik neʼe sei book sira atu la odi tan ita. No neʼe halo Jeová kontente. Maibé se ema kontinua odi ita, ita bele nafatin sente kontente. Oinsá?

18. Tanbasá ita haksolok bainhira ema odi ita?

¹⁸ Jesus hatete: “Ksolok ba imi kuandu ema odi imi.” (Lc 6:22) Ita la gosta se ema odi ita tanba ita-nia fiar. Entaun, tanbasá ita haksolok bainhira ema odi ita? Hanoin kona-ba razaun tolu. Primeiru, se ita tahan, Maromak sei kontente ho ita. (1 Ped 4:13, 14) Segundu, ita-nia fiar sei sai metin liután no folin-boot liu. (1 Ped 1:7) No terseiru, ita sei simu moris rohan-laek.​—Rom 2:6, 7.

19. Tanbasá apóstolu sira kontente bainhira ema baku sira?

¹⁹ Lakleur depois Jesus moris-hiʼas, apóstolu sira sente rasik ksolok neʼebé Jesus fó sai ona. Maski ema baku sira ho xikote no haruka sira atu para haklaken, maibé sira nafatin haksolok. Tanbasá? “Tanba sira iha priviléjiu atu hetan moe tanba Jesus nia naran.” (Após 5:40-42, nota) Sira-nia domin ba sira-nia Naʼi Jesus mak boot liu fali sira-nia taʼuk ba inimigu. Sira hatudu domin hodi “la para” atu haklaken liafuan diʼak. Ohin loron, irmaun-irmán barak kontinua serbí Jeová ho laran-metin maski hasoru susar. Sira hatene katak Jeová sei nunka haluha sira-nia serbisu no mós sira-nia domin ba ninia naran.​—Ebr 6:10.

20. Iha lisaun tuirmai, ita sei aprende saida?

²⁰ Mundu sei odi ita toʼo sistema aat neʼe remata. (João 15:19) Maibé ita lalika taʼuk. Iha lisaun tuirmai, ita sei haree oinsá Jeová sei hametin no proteje ema sira neʼebé laran-metin ba nia. (2 Tes 3:3) Tan neʼe, mai ita kontinua hadomi Jeová, ita-nia irmaun-irmán sira, no mós ita-nia inimigu. Bainhira ita halo nuneʼe, ita sei nafatin iha unidade, iha fiar neʼebé metin, lori glória ba Jeová, no mós hatudu katak domin mak kbiit boot liu fali odi.