1-2. Sé-sé deʼit mak bele ajuda estudante Bíblia ida atu laʼo ba oin no hetan batizmu?

IRMÁN AMY neʼebé hela iha rai-Fijí hatete: “Haʼu gosta tebes buat neʼebé haʼu aprende husi Bíblia. Haʼu hatene neʼe mak lia-loos. Maibé haʼu halo mudansa, laʼo ba oin no hetan batizmu bainhira haʼu komesa ransu ho irmaun-irmán sira.” Irmán Amy nia esperiénsia hanorin ita katak atu estudante Bíblia ida laʼo ba oin no hetan batizmu, nia presiza hetan ajuda husi irmaun-irmán sira.

² Irmaun-irmán hotu bele ajuda ema foun atu sai parte ba kongregasaun. (Éf 4:16) Irmán pioneiru ida naran Leilani, neʼebé hela iha rai-Vanuatu, hatete: “Ema barak dehan katak atu haboot oan ida, ema hotu iha knua laran presiza ajuda malu. Haʼu hanoin ida-neʼe mós bele aplika bainhira hanorin ema atu sai dixípulu. Ema hotu iha kongregasaun presiza apoia malu atu ajuda ema tama lia-loos.” Atu labarik sira bele sai maduru, inan-aman, família, kolega no mestre sira iha eskola presiza ajuda malu. Sira halo nuneʼe liuhusi anima labarik sira no hanorin sira lisaun importante. Nuneʼe mós ho irmaun-irmán sira, sira bele fó matadalan, anima no hatudu ezemplu diʼak ba estudante Bíblia sira. Ida-neʼe bele ajuda estudante Bíblia sira atu laʼo ba oin no hetan batizmu.​—Prov 15:22.

3. Ita bele aprende saida husi irmán Ana, irmaun Dorin, no irmán Leilani?

³ Tanbasá mestre Bíblia ida kontente bainhira irmaun-irmán iha kongregasaun ajuda ninia estudante? Pioneiru tempu-tomak ida naran Ana husi rai-Moldávia, hatete: “Susar ba ema ida deʼit atu fó ajuda hotu neʼebé estudante Bíblia presiza atu laʼo ba oin.” Pioneiru tempu-tomak seluk  neʼebé serbí iha rai-Moldávia naran Dorin hatete: “Dala barak, irmaun-irmán balu koʼalia buat neʼebé book estudante nia laran. No buat neʼebé sira temi nunka mosu iha haʼu-nia neon.” Irmán Leilani fó sai razaun seluk tan: “Bainhira irmaun-irmán sira hatudu domin ba estudante Bíblia, neʼe ajuda nia atu hatene sé mak Jeová nia povu.”​—João 13:35.

4. Ita sei aprende saida iha lisaun neʼe?

⁴ Maibé karik Ita hanoin: ‘Oinsá haʼu rasik bele ajuda estudante Bíblia ida atu laʼo ba oin maski haʼu laʼós ninia mestre Bíblia?’ Mai ita aprende kona-ba buat neʼebé ita bele halo bainhira ita tuir maluk Kristaun ida nia estuda no bainhira estudante Bíblia neʼe komesa tuir reuniaun. Ita mós sei aprende kona-ba oinsá katuas kongregasaun sira bele ajuda estudante Bíblia sira atu laʼo ba oin no hetan batizmu.

5. Se mestre Bíblia ida konvida Ita atu tuir ninia estuda, Ita-nia knaar mak saida?

⁵ Bainhira estuda Bíblia ho ema, mestre Bíblia mak iha responsabilidade atu ajuda ninia estudante atu komprende kona-ba Bíblia. Se mestre Bíblia ida konvida Ita atu tuir ninia estuda, Ita-nia knaar mak atu apoia nia. (Ecle 4:9, 10) Saida mak Ita bele halo atu ajuda nia?

6. Bainhira Ita akompaña mestre Bíblia, oinsá Ita bele aplika prinsípiu iha Provérbios 20:18?

⁶ Prepara ba estuda Bíblia. Primeiru, husu ba mestre Bíblia atu esplika kona-ba ninia estudante. (Lee Provérbios 20:18.) Ita bele husu pergunta hanesan: “Estudante neʼe mak ema oinsá? Ita estuda informasaun saida ho nia? Ita hakarak estudante aprende saida iha estuda neʼe? Iha buat ruma neʼebé haʼu bele koʼalia ka labele koʼalia ka lae? Oinsá haʼu bele anima estudante neʼe atu laʼo ba oin?” Klaru katak, mestre Bíblia sei la fó sai informasaun privadu kona-ba ninia estudante, maibé informasaun seluk neʼebé nia fó sai bele ajuda Ita. Misionáriu ida naran Joy baibain koʼalia kona-ba buat sira-neʼe hamutuk ho maluk Kristaun neʼebé tuir ninia estuda. Nia hatete: “Hodi halo nuneʼe, neʼe ajuda sira atu hatudu interese ba estudante no hatene oinsá atu ajuda durante estuda Bíblia.”

7. Se Ita akompaña mestre Bíblia, tanbasá Ita presiza prepara?

⁷ Bainhira Ita akompaña mestre Bíblia, diʼak atu prepara nanis lisaun neʼebé ita sei estuda hamutuk. (Ezras 7:10) Irmaun Dorin hatete: “Haʼu kontente bainhira ema neʼebé akompaña haʼu prepara nanis. Hodi halo nuneʼe, nia bele ajuda durante estuda.” Estudante bele nota se ninia mestre  Bíblia no irmaun ka irmán neʼebé tuir estuda mak prepara ho didiʼak, no neʼe sai nuʼudar ezemplu diʼak ba estudante neʼe. Maski karik Ita labele prepara didiʼak, maibé Ita bele uza tempu balu atu komprende pontu importante husi lisaun neʼe.

8. Oinsá Ita bele halo orasaun neʼebé book estudante Bíblia nia laran?

⁸ Orasaun mak parte importante husi estuda Bíblia, tan neʼe hanoin nanis kona-ba buat neʼebé Ita sei temi iha orasaun se mestre Bíblia husu Ita atu halo orasaun. Hodi halo nuneʼe, Ita-nia orasaun bele kona estudante Bíblia nia laran. (Sal 141:2) Irmán Hanae neʼebé hela iha rai-Japaun sei hanoin-hetan irmán ida nia orasaun bainhira nia mak estudante ida. Nia hatete: “Haʼu bele nota katak nia iha relasaun diʼak ho Jeová. No haʼu mós hakarak atu iha relasaun diʼak ho Jeová. Haʼu mós bele sente katak nia hadomi haʼu tanba nia temi haʼu-nia naran iha ninia orasaun.”

9. Tuir Tiago 1:19, oinsá Ita bele apoia mestre Bíblia durante estuda?

⁹ Apoia mestre Bíblia durante estuda. Irmán pioneiru tempu-tomak husi rai-Nijéria hatete: “Ema neʼebé tuir ita-nia estuda sei ajuda tebes ita bainhira sira rona didiʼak. Sira bele fó komentáriu, maibé labele koʼalia barak, tanba sira rekoñese katak mestre Bíblia mak iha responsabilidade atu dirije estuda.” Entaun, bainhira no saida mak Ita presiza hatete? (Prov 25:11) Rona didiʼak bainhira mestre Bíblia no estudante koʼalia. (Lee Tiago 1:19.) Hodi halo nuneʼe, Ita sei prontu atu ajuda iha tempu neʼebé loos. Klaru katak Ita tenke tetu ho didiʼak. Porezemplu, Ita lakohi koʼalia barak demais, la korta bainhira mestre Bíblia esplika, ka koʼalia fali tópiku seluk. Maibé se Ita fó komentáriu badak, uza ai-knanoik, ka husu pergunta, Ita bele ajuda mestre Bíblia atu hanorin pontu importante. Se Ita la iha buat ruma neʼebé Ita bele aumenta, karik Ita bele gaba no hatudu interese ba estudante, neʼe sei ajuda nia atu laʼo ba oin.

10. Oinsá Ita-nia esperiénsia bele ajuda estudante?

¹⁰ Fahe Ita-nia esperiénsia. Karik Ita bele konta kona-ba oinsá Ita aprende lia-loos, oinsá Ita manán hasoru susar ida, ka oinsá Ita haree Jeová ajuda Ita iha Ita-nia moris, se neʼe bele ajuda estudante Bíblia. (Sal 78:4, 7) Karik neʼe sei book estudante Bíblia nia laran, hametin ninia fiar ka anima nia atu kontinua laʼo ba oin no hetan batizmu. No karik neʼe sei ajuda nia atu manán hasoru susar sira. (1 Ped 5:9) Irmaun Gabriel neʼebé hela iha rai-Brazíl no serbí nuʼudar pioneiru, hanoin-hetan  saida mak ajuda nia kuandu nia estuda Bíblia. Nia hatete: “Bainhira haʼu rona irmaun sira-nia esperiénsia, haʼu aprende katak Jeová haree susar neʼebé ita hasoru. No se sira bele manán susar sira-neʼe, haʼu mós bele.”

11-12. Tanbasá ita presiza fó benvindu ho laran-diʼak ba estudante Bíblia neʼebé tuir reuniaun?

¹¹ Atu estudante Bíblia bele laʼo ba oin no hetan batizmu, nia presiza tuir beibeik reuniaun no hetan benefísiu husi reuniaun sira. (Ebr 10:24, 25) Baibain mestre Bíblia mak konvida estudante Bíblia atu tuir reuniaun ba dala primeiru. Bainhira nia tuir reuniaun, ita hotu bele anima nia atu kontinua tuir reuniaun. Oinsá ita bele halo nuneʼe?

¹² Fó benvindu ho laran-diʼak. (Rom 15:7) Se Ita fó benvindu ba estudante Bíblia ho laran-diʼak, neʼe sei book nia atu kontinua tuir reuniaun. Hasé nia no fó koñese nia ba ema seluk, maibé kuidadu atu la hamoe nia. Koʼalia ho nia tanba karik ninia mestre seidauk toʼo iha Reuniaun-Fatin ka okupadu ho knaar sira. Rona didiʼak no hatudu interese ba estudante neʼe. Neʼe sei lori rezultadu saida? Hanoin toʼok, irmaun Dmitrii nia esperiénsia. Nia hetan batizmu tinan balu liubá, no agora serbí nuʼudar atan ba kongregasaun. Kona-ba ninia reuniaun primeiru, nia hatete: “Irmaun ida haree haʼu hein iha Reuniaun-Fatin nia liʼur ho laran-taridu, no nia ho laran-diʼak hamaluk haʼu tama ba laran. Ema barak hasé haʼu, no neʼe kona loos haʼu-nia laran. Haʼu gosta loos, no haʼu hakarak tuir reuniaun loroloron. Neʼe esperiénsia foun mai haʼu.”

13. Oinsá Ita-nia hahalok bele ajuda estudante?

¹³ Hatudu ezemplu diʼak. Ita-nia hahalok bele ajuda estudante Bíblia atu fiar katak nia hetan ona lia-loos. (Mt 5:16) Irmaun Vitalii, neʼebé serbí nuʼudar pioneiru iha rai-Moldávia hatete: “Haʼu haree oinsá irmaun-irmán sira halaʼo sira-nia moris, sira-nia dalan atu hanoin no mós sira-nia hahalok. Neʼe halo haʼu fiar katak Testemuña ba Jeová mak relijiaun neʼebé loos.”

14. Oinsá Ita-nia ezemplu bele ajuda estudante?

¹⁴ Antes estudante ida bele hetan batizmu, nia presiza aplika buat neʼebé nia aprende. Dala ruma, neʼe la fasil. Maibé bainhira estudante nota oinsá Bíblia nia prinsípiu ajuda Ita, karik neʼe sei book nia atu banati-tuir Ita. (1 Kor 11:1) Hanoin toʼok irmán Hanae nia esperiénsia. Nia hatete: “Irmaun-irmán sira aplika ona buat neʼebé haʼu aprende. Husi sira-nia ezemplu, haʼu aprende oinsá atu anima ema,  fó perdua ba ema no atu hatudu domin. Sira sempre koʼalia buat diʼak kona-ba ema seluk. No haʼu hakarak banati-tuir sira.”

15. Tuir Provérbios 27:17, tanbasá Ita presiza habelun ho estudante neʼebé kontinua tuir reuniaun?

¹⁵ Habelun ho estudante Bíblia. Bainhira estudante Bíblia kontinua tuir reuniaun, Ita mós presiza kontinua hatudu interese ba nia. (Flp 2:4) Ita bele hakaʼas an atu koñese nia liután. Ita bele gaba nia tanba mudansa neʼebé nia halo. Ita mós bele husu kona-ba ninia estuda, ninia família, no mós ninia serbisu. Maibé kuidadu atu la husu pergunta neʼebé bele hamoe nia. Hodi halo buat sira-neʼe, Ita bele sai besik ba malu liután. Bainhira Ita habelun ho estudante Bíblia, Ita ajuda nia atu laʼo ba oin no hetan batizmu. (Lee Provérbios 27:17.) Irmán Hanae agora serbí nuʼudar pioneiru regulár. Kona-ba bainhira nia komesa tuir reuniaun, nia hatete: “Bainhira haʼu habelun ho ema oioin iha kongregasaun, neʼe halo haʼu laran-manas atu tuir reuniaun. No haʼu tuir reuniaun maski haʼu sente kole. Haʼu gosta haʼu-nia belun foun sira, no neʼe ajuda haʼu atu la ransu tan ho ema sira neʼebé la adora Jeová. Haʼu hakarak atu hakbesik liután ba Jeová no mós ba irmaun-irmán sira. Tan neʼe, haʼu deside atu hetan batizmu.”

16. Ita bele halo saida tan atu ajuda estudante sente katak nia mak parte ba kongregasaun?

¹⁶ Bainhira estudante Bíblia kontinua laʼo ba oin no halo mudansa, ajuda nia atu sente katak nia mak parte ba kongregasaun. Ita bele halo nuneʼe liuhusi hatudu laran-luak. (Ebr 13:2) Irmaun Denis neʼebé hela iha rai-Moldávia esplika kona-ba tempu neʼebé nia estuda Bíblia: “Dala barak irmaun-irmán sira konvida haʼu no haʼu-nia feen atu ransu ho sira. Sira konta kona-ba oinsá Jeová ajuda ona sira no neʼe anima tebes ami. Ida-neʼe ajuda ami atu hatene katak ami hakarak atu serbí Jeová no neʼe sei halo ami-nia moris kontente.” Bainhira estudante Bíblia sai haklaken-naʼin, Ita bele konvida nia atu haklaken hamutuk ho Ita. Irmaun Diego husi rai-Brazíl hatete: “Irmaun barak konvida haʼu atu haklaken hamutuk. Neʼe mak dalan diʼak atu bele koñese malu ho sira. Haʼu aprende buat barak husi sira, no haʼu sente besik liután ba Jeová no Jesus.”

17. Oinsá katuas sira bele ajuda estudante Bíblia?

¹⁷ Gasta tempu ho estudante Bíblia. Bainhira katuas sira hatudu domin no laran-diʼak ba estudante sira, neʼe bele ajuda sira atu laʼo ba oin no hetan batizmu. Se Ita mak katuas ida, Ita bele koʼalia beibeik ho estudante Bíblia kuandu  sira tuir reuniaun ka lae? Se Ita hanoin-hetan sira-nia naran, liuliu bainhira sira fó komentáriu, neʼe bele halo sira sente katak Ita hatudu interese ba sira. Ita bele buka tempu atu tuir sira-nia estuda ka lae? Tuir loloos, Ita-nia hahalok bele book estudante sira-nia laran. Irmán Jackie neʼebé serbí nuʼudar pioneiru iha rai-Nijéria, hatete: “Estudante barak hakfodak kuandu hatene katak irmaun neʼebé akompaña haʼu atu estuda mak katuas kongregasaun. Estudante Bíblia ida hatete: ‘Ami-nia amu nunka halo hanesan neʼe. Nia vizita ema riku sira tanba deʼit sira selu nia.’” Estudante neʼe agora tuir reuniaun.

18. Oinsá katuas sira bele kumpre sira-nia responsabilidade hanesan temi iha Apóstolu 20:28?

¹⁸ Fó treinu no anima mestre Bíblia. Se Ita mak katuas ida, Ita iha responsabilidade importante atu ajuda irmaun-irmán sira atu haklaken ho matenek, no mós ajuda sira atu estuda Bíblia ho ema. (Lee Apóstolu 20:28.) Se irmaun ka irmán ida moe atu dirije estuda Bíblia bainhira Ita akompaña nia, Ita bele oferese atu dirije estuda neʼe. Irmán Jackie hatete: “Dala barak katuas sira husu kona-ba haʼu-nia estudante Bíblia. Bainhira haʼu hasoru susar atu dirije estuda Bíblia, katuas sira oferese atu ajuda.” Katuas sira bele halo buat barak atu anima mestre sira atu la rende an. (1 Tes 5:11) Irmán Jackie hatutan: “Haʼu gosta bainhira katuas sira anima haʼu no fó sai katak sira hafolin haʼu-nia serbisu. Sira-nia liafuan halo haʼu sente fresku hanesan hemu bee malirin iha loron neʼebé manas. Bainhira sira gaba haʼu, neʼe halo haʼu sai fiar an no sai kontente liután atu estuda Bíblia ho ema.”​—Prov 25:25.

19. Tanbasá ita hotu bele sente kontente?

¹⁹ Maski agora daudaun Ita rasik la iha estudante Bíblia, maibé Ita bele nafatin ajuda ema seluk atu laʼo ba oin no hetan batizmu. Durante estuda Bíblia ho ema, Ita labele koʼalia barak, maibé Ita bele apoia mestre Bíblia ho Ita-nia komentáriu badak neʼebé prepara didiʼak ona. Ita bele habelun ho estudante Bíblia sira bainhira sira tuir reuniaun no Ita bele sai ezemplu diʼak ba sira. Katuas sira bele anima estudante Bíblia sira liuhusi gasta tempu ho sira, no bele anima mestre Bíblia sira liuhusi fó treinu no gaba sira. Ita sente kontente tebes kuandu Ita hatene katak Ita bele ajuda ema atu hadomi no serbí Jeová, maski Ita halo buat uitoan deʼit.