1. Saida mak ita bele dehan kona-ba irmaun joven sira?

SE ITA mak irmaun joven ida, Ita bele halo buat oioin atu ajuda kongregasaun. Ita iha forsa no enerjia barak. (Prov 20:29) Ita mak folin-boot ba Ita-nia kongregasaun. Karik Ita hein namanas atu simu knaar nuʼudar atan ba kongregasaun. Karik Ita sente katak ema haree Ita nuʼudar joven deʼit no la prontu atu halaʼo knaar neʼe. Maski Ita mak joven deʼit, maibé Ita bele halo buat oioin atu irmaun-irmán sira tau fiar no hatudu respeitu ba Ita.

2. Iha lisaun neʼe, ita sei aprende kona-ba saida deʼit?

² Iha lisaun neʼe, ita sei aprende kona-ba Liurai David nia moris. Ita mós sei koʼalia kona-ba akontesimentu balu iha Liurai Asa no Jeosafát nia moris. Sira mak liurai iha Judá. Ita sei koʼalia kona-ba susar sira neʼebé mane sira-neʼe hasoru, saida mak sira halo kuandu hasoru susar, no saida mak irmaun joven sira bele aprende husi sira.

3. Oinsá irmaun joven sira bele ajuda ferik-katuas iha kongregasaun?

³ Bainhira David sei joven, nia aprende skill sira neʼebé nia bele uza atu ajuda ema seluk. Klaru katak nia iha relasaun besik ho Jeová. Nia mós hakaʼas an atu sai tokadór diʼak no nia uza talentu neʼe atu ajuda Saul, liurai neʼebé Maromak hili ona. (1 Sam 16:16, 23) Se Ita mak irmaun joven ida, Ita iha skill ruma neʼebé Ita bele uza atu ajuda irmaun-irmán sira ka lae? Irmaun joven barak iha duni skill ruma. Porezemplu, ferik-katuas iha kongregasaun  agradese tebes tanba irmaun joven sira ajuda sira oinsá atu uza tablet no sasán eletróniku atu estuda mesak no tuir reuniaun. Ita bele ajuda ferik-katuas sira tanba Ita hatene didiʼak teknolojia.

4. Hanesan David, irmaun joven sira presiza haburas hahalok saida deʼit? (Haree dezeñu iha livru oin.)

⁴ Iha ninia moris loroloron, David hatudu katak nia bele kaer responsabilidade no ema bele tau fiar ba nia. Porezemplu, bainhira nia sei joven, nia badinas atu tau matan ba ninia aman nia bibi sira. Neʼe mak serbisu neʼebé perigu. David esplika ba Liurai Saul: “Ita-nia atan neʼe sai nuʼudar bibi-atan ba haʼu-nia aman nia bibi sira, no loron ida, leaun ida mai foti bibi-malae ida husi bibi-lubun. No iha tempu seluk, ursu ida mós mai no halo buat neʼebé hanesan. Haʼu duni tuir no oho animál sira-neʼe no salva bibi husi sira-nia ibun.” (1 Sam 17:34, 35) David sente katak nia iha responsabilidade atu tau matan didiʼak bibi sira-neʼe no ho aten-brani nia proteje sira. Irmaun joven sira mós bele banati-tuir David hodi halo knaar sira ho badinas.

5. Tuir Salmo 25:14, importante tebes atu irmaun joven sira halo saida?

⁵ Bainhira David sei joven, nia haburas relasaun besik ho Jeová. Ba David, ninia relasaun diʼak ho Jeová mak importante liu duké ninia aten-brani ka ninia talentu atu toka instrumentu. Jeová mak David nia Maromak no mós ninia Belun diʼak. (Lee Salmo 25:14.) Se Ita mak irmaun joven ida, importante tebes atu hametin Ita-nia relasaun diʼak ho Aman Jeová. Se Ita halo nuneʼe, karik Ita sei simu knaar liután iha kongregasaun.

6. Ema balu hanoin oinsá kona-ba David?

⁶ Susar ida neʼebé David hasoru mak ema hanoin katak nia joven deʼit no la hatene atu kaer responsabilidade. Porezemplu, bainhira David oferese ninia an atu funu hasoru Golias, Liurai Saul koko atu hapara nia, hodi dehan: “Ó labarik deʼit.” (1 Sam 17:31-33) Antes neʼe, David nia maun ida duun katak David la halo didiʼak ninia knaar. (1 Sam 17:26-30) Maski nuneʼe, Jeová nunka hanoin katak David mak joven deʼit no la hatene atu kaer responsabilidade. Jeová koñese didiʼak David. No David bele oho Golias  tanba nia sadere ba ninia Belun Jeová.​—1 Sam 17:45, 48-51.

7. Saida mak Ita bele aprende husi David?

⁷ Saida mak Ita bele aprende husi David? Ita aprende katak Ita presiza hatudu pasiénsia tanba karik ema neʼebé koñese Ita husi kiʼik, presiza tempu atu bele haree katak Ita mak maduru ona. Ita bele fiar katak Jeová la haree ba Ita-nia oin ka ain-aas. Nia koñese didiʼak Ita no hatene Ita-nia abilidade. (1 Sam 16:7) Ita mós aprende katak Ita presiza hametin Ita-nia relasaun diʼak ho Maromak. David halo nuneʼe liuhusi haree didiʼak kriasaun no medita kona-ba buat neʼebé nia aprende kona-ba Jeová liuhusi kriasaun. (Sal 8:3, 4; 139:14; Rom 1:20) Ita mós bele husu Jeová atu fó kbiit mai Ita. Porezemplu, karik Ita-nia kolega eskola ida goza Ita tanba Ita mak Testemuña. Se nuneʼe, halo orasaun ba Jeová hodi husu ninia ajuda atu tahan susar neʼe no aplika matadalan sira neʼebé Ita hetan iha Bíblia, publikasaun sira no vídeo sira. Bainhira Ita haree katak Jeová ajuda Ita atu tahan hasoru susar, Ita-nia fiar sei sai metin liután. No mós bainhira ema seluk haree katak Ita sadere ba Jeová, sira mós sei tau fiar ba Ita.

8-9. Saida mak ajuda David atu hein ho pasiénsia? Saida mak irmaun joven sira bele aprende husi nia?

⁸ Hanoin toʼok kona-ba susar seluk neʼebé David hasoru. Depois Jeová hili David nuʼudar liurai, David presiza hein ba tinan barak atu bele ukun nuʼudar liurai iha Judá. (1 Sam 16:13; 2 Sam 2:3, 4) Saida mak ajuda David atu hein ho pasiénsia? Duké sai laran-kraik tebes, David uza ninia tempu atu halo buat neʼebé nia bele halo. Porezemplu, bainhira David halai husi Liurai Saul no hela iha ema Filístia nia rai, David uza tempu neʼe atu halo funu hasoru ema Izraél sira-nia inimigu. Hodi halo nuneʼe, nia proteje Judá nia fronteira.​—1 Sam 27:1-12.

⁹ Irmaun joven sira bele aprende saida husi Liurai David? Buka oportunidade atu ajuda irmaun-irmán sira. Hanoin toʼok esperiénsia husi irmaun Ricardo. * Maizumenus bainhira nia tinan 10, nia hakarak atu serbí nuʼudar pioneiru regulár. Maibé katuas sira hatete katak nia seidauk prontu. Duké rende an no sai hirus, Ricardo aumenta ninia serbisu haklaken. Nia hatete: “Bainhira haʼu hanoin fali kona-ba tempu neʼe, haʼu komprende katak haʼu presiza sai maduru liután. Haʼu tau fokus atu vizita fali ema hotu neʼebé interese, no mós prepara antes haʼu bá vizita. Haʼu mós hahú estuda Bíblia ho ema. Bainhira haʼu uza tempu liután atu haklaken, haʼu sai fiar an liután.” Agora Ricardo serbí nuʼudar pioneiru regulár no atan ba kongregasaun neʼebé badinas.

10. David halo saida antes foti desizaun importante?

¹⁰ Hanoin kona-ba akontesimentu seluk iha David nia moris. Bainhira David no ninia ema sira halai husi Saul, sira presiza husik sira-nia família atu bá funu. Bainhira sira la iha, inimigu sira mai hadau sira-nia sasán no lori sira-nia família nuʼudar dadur. Karik David bele hanoin katak nia mak asuwaʼin neʼebé iha esperiénsia barak no nia mesak bele halo planu atu salva fali sira-nia família. Duké halo nuneʼe, David buka matadalan husi Jeová. Ho amlulik Abiatar nia ajuda, David husu ba Jeová: “Haʼu  tenke duni tuir grupu naʼok-teen neʼebé mai ataka ka lae?” Jeová hatete ba David katak nia presiza bá no nia sei hetan susesu. (1 Sam 30:7-10) Saida mak Ita bele aprende husi akontesimentu neʼe?

11. Ita bele halo saida antes foti desizaun ruma?

¹¹ Antes Ita halo desizaun, buka matadalan husi ema seluk. Husu Ita-nia inan-aman nia sujestaun. Ita mós bele husu matadalan husi katuas sira neʼebé iha esperiénsia. Jeová tau fiar ba sira, no Ita mós bele tau fiar ba sira. Jeová fó mane sira-neʼe nuʼudar “prezente” ba kongregasaun. (Éf 4:8) Ita sei halo desizaun neʼebé diʼak se Ita banati-tuir sira-nia fiar no rona ba sira-nia matadalan. Agora mai ita haree saida mak ita bele aprende husi Liurai Asa.

12. Asa hatudu hahalok diʼak saida bainhira nia komesa ukun?

¹² Bainhira Liurai Asa sei joven, nia haraik an no aten-brani. Porezemplu, bainhira nia troka ninia apá Abias nuʼudar liurai, nia komesa halakon estátua sira. Nia mós “haruka ema Judá atu buka Jeová, sira-nia beiʼala nia Maromak, no halo tuir Ukun-Fuan no mandamentu sira”. (2 Krón 14:1-7) Bainhira ema Etiópia naran Zerá hamutuk ho soldadu naʼin-millaun ida ataka Judá, Asa hatudu matenek hodi buka ajuda husi Jeová. Nia hatete: “Oh Jeová, Ita-Boot la haree se ema neʼebé Ita ajuda mak forte ka fraku. Oh Jeová, ami-nia Maromak, favór ida ajuda ami, tanba ami sadere ba Ita.” Liafuan sira-neʼe hatudu katak Asa tau fiar tomak ba Jeová nia kbiit atu salva nia no ninia povu. Asa tau fiar ba Jeová no “Jeová halo ema Etiópia lakon funu”.​—2 Krón 14:8-12.

13. Saida mak akontese ba Asa no tanbasá?

¹³ Ita bele fiar katak Liurai Asa sente taʼuk bainhira halo funu hasoru soldadu naʼin-millaun ida. Maibé nia sadere ba Jeová no hetan susesu. Maski nuneʼe, bainhira nia hasoru susar seluk, nia la sadere ba Jeová. Bainhira Liurai Baasa husi Izraél ameasa Asa, Asa buka ajuda husi liurai Síria. No neʼe lori rezultadu aat. Liuhusi profeta Hanani, Jeová hatete ba Liurai Asa: “Ó sadere ba liurai Síria no la sadere ba Jeová, ó-nia  Maromak, tan neʼe liurai Síria nia tropa sira sai livre ona husi ó-nia liman.” Hahú husi tempu neʼebá, ema sempre mai halo funu hasoru Asa. (2 Krón 16:7, 9; 1 Reis 15:32) Ita bele aprende saida?

14. Oinsá Ita bele sadere ba Jeová? Tuir 1 Timóteo 4:12, Ita sei hetan rezultadu saida?

¹⁴ Ita presiza kontinua haraik an no sadere ba Jeová. Bainhira Ita hetan batizmu, Ita hatudu katak Ita tau fiar tomak ba Jeová. No Jeová kontente tebes atu simu Ita nuʼudar ninia família. Agora Ita mós presiza kontinua sadere ba Jeová. Karik fasil atu sadere ba Jeová bainhira halo desizaun importante ruma. Maibé oinsá ho situasaun seluk? Ita presiza tau fiar ba Jeová bainhira halo desizaun hotu, maski neʼe mak desizaun kona-ba atividade halimar nian, serbisu, ka planu ba Ita-nia moris. Keta sadere ba Ita-nia matenek rasik. Maibé buka Bíblia nia matadalan neʼebé kona Ita-nia situasaun, no tuirmai aplika ida-neʼe. (Prov 3:5, 6) Se Ita halo nuneʼe, Ita sei halo Jeová kontente no irmaun-irmán sira sei hatudu respeitu ba Ita.—Lee 1 Timóteo 4:12.

15. Tuir 2 Krónikas 18:1-3; 19:2, Jeosafát halo sala saida?

¹⁵ Ita hotu, inklui irmaun joven sira mak la perfeitu, no dala ruma ita hotu halo sala. Maibé keta husik ida-neʼe hanetik Ita atu hakaʼas an hodi serbí Jeová ho Ita-nia kbiit tomak. Hanoin toʼok kona-ba Liurai Jeosafát nia ezemplu. Nia hatudu hahalok diʼak oioin. Bainhira nia joven, “nia adora ninia aman nia Maromak no halo tuir Ninia mandamentu”. Nia mós haruka ulun-naʼin sira atu bá hanorin ema iha Judá nia sidade sira kona-ba Jeová. (2 Krón 17:4, 7) Maibé dala ruma, Jeosafát halo desizaun neʼebé la diʼak. Tan neʼe, Jeosafát simu konsellu husi Jeová nia reprezentante ida. (Lee 2 Krónikas 18:1-3; 19:2.) Ita bele aprende saida?

16. Saida mak Ita bele aprende husi Rajeev?

¹⁶ Bainhira ema fó konsellu mai Ita, simu ida-neʼe no halo tuir. Karik hanesan joven sira seluk, Ita mós sente susar atu tau uluk Jeová iha Ita-nia moris. Maibé keta sai laran-kraik. Hanoin toʼok esperiénsia husi irmaun joven ida  naran Rajeev. Kona-ba ninia tempu joven, nia hatete: “Dala ruma haʼu la hatene atu halo saida. Hanesan ho joven seluk, haʼu gosta tebes desportu no halimar duké tuir reuniaun no bá haklaken.” Saida mak ajuda Rajeev atu halo mudansa? Katuas kongregasaun ida fó konsellu balu ba nia. Rajeev hatete: “Irmaun neʼe ajuda haʼu atu hanoin kona-ba prinsípiu husi 1 Timóteo 4:8.” Ho haraik an Rajeev simu konsellu neʼe. Nia mós hanoin kona-ba saida mak importante liu iha ninia moris. Nia hatete: “Haʼu deside atu tau uluk Jeová iha haʼu-nia moris.” Rezultadu mak saida? Rajeev hatete: “Tinan balu liutiha, haʼu kumpre kritéria atu serbí nuʼudar atan ba kongregasaun.”

17. Irmaun-irmán sira sente oinsá kona-ba irmaun joven sira?

¹⁷ Irmaun-irmán sira hafolin tebes irmaun joven sira neʼebé serbí Jeová hamutuk ho sira. (Sof 3:9) Sira hafolin tebes Ita no Ita-nia serbisu neʼebé Ita halo ho laran-manas.—1 João 2:14.

18. Tuir Provérbios 27:11, Jeová sente oinsá kona-ba irmaun joven sira neʼebé serbí nia?

¹⁸ Se Ita mak irmaun joven ida, keta haluha katak Jeová hadomi no tau fiar ba Ita. Nia fó-hatene nanis katak durante loron ikus sira-neʼe, sei iha mane joven barak neʼebé prontu atu halo Jeová nia serbisu. (Sal 110:1-3) Jeová hatene katak Ita hadomi nia no hakarak atu serbí nia ho Ita-nia kbiit tomak. Tan neʼe, hatudu pasiénsia ba ema seluk no mós ba Ita-nia an rasik. Bainhira Ita halo sala, halo tuir matadalan no dixiplina neʼebé Ita simu. Rekoñese katak neʼe mai husi Jeová. (Ebr 12:6) Kumpre Ita-nia knaar ho badinas. No importante liu mak halo Jeová kontente iha Ita-nia serbisu hotu.​—Lee Provérbios 27:11.