Ema Kristaun balu uza teknolojia atu bele kontaktu malu ho família no maluk Kristaun. Maibé ema Kristaun neʼebé maduru presiza hanoin-hetan konsellu tuirmai neʼe: “Ema neʼebé matenek haree perigu no subar nia an, maibé ema neʼebé la iha esperiénsia la hasees an no hetan susar.”​—Prov 27:12.

Ita komprende katak Jeová hakarak atu proteje ita. Tan neʼe, ita lakohi ransu ho ema sira neʼebé koko atu halakon unidade iha kongregasaun, ema neʼebé kongregasaun hasai ka ema neʼebé habelar hanorin falsu. (Rom 16:17; 1 Kor 5:11; 2 João 10, 11) Ema balu iha kongregasaun karik la halo tuir ukun-fuan iha Bíblia. (2 Tim 2:20, 21) Bainhira ita habelun ho ema ruma, ita presiza hanoin-hetan ida-neʼe. Maibé susar ba ita atu hili didiʼak ita-nia belun bainhira uza aplikasaun atu haruka no simu mensajen.

Ita presiza kuidadu tebes bainhira uza group chat neʼebé iha ema barak. Ema Kristaun balu sai membru ba group chat neʼebé iha ema barak no neʼe lori rezultadu aat. Oinsá irmaun ida ka irmán ida bele koñese ema hotu iha group chat se ema atus ba atus mak iha laran? Klaru katak susar atu koñese sira hotu no hatene se sira iha relasaun diʼak ho Jeová ka lae. Salmo 26:4 hatete: “Haʼu la ransu ho ema sira neʼebé bosok-teen, no haʼu hasees an husi sira neʼebé subar sira-nia hakarak aat.” Eskritura neʼe hatudu katak matenek atu kontaktu malu deʼit ho ema neʼebé ita koñese.

Maski group chat iha ema uitoan deʼit, maibé ema Kristaun presiza hanoin didiʼak kona-ba tempu neʼebé nia uza atu haruka no simu mensajen no hanoin didiʼak ema iha group chat neʼe koʼalia kona-ba saida. Ita lakohi hatán ba mensajen hotu kona-ba tópiku naran deʼit, maski neʼe uza tempu barak ka lae. Paulo fó avizu ba Timóteo kona-ba ema sira neʼebé “konta ema nia vida no mete iha ema seluk nia moris”. (1 Tim 5:13) Se ita la kuidadu ita mós bele halo ida-neʼe liuhusi group chat.

Ema Kristaun neʼebé maduru sei la kritika, la rona ba kritika ka informasaun segredu kona-ba maluk fiar-naʼin seluk. (Sal 15:3; Prov 20:19) No nia mós sei la koʼalia fali ka rona ba informasaun neʼebé la loos ka halo ema sai taʼuk. (Éf 4:25) Ita simu ai-han espirituál barak no mós relatóriu barak neʼebé ita bele fiar husi website jw.org no JW Broadcasting^®.

Ema Kristaun balu uza aplikasaun atu haruka no simu mensajen hodi faʼan, sosa no halo iklan kona-ba produtu ka vaga ruma. Buat sira-neʼe mak negósiu no la iha ligasaun ho ita-nia adorasaun. Ema Kristaun neʼebé hakaʼas an atu la “hadomi osan”, sei la aproveita irmaun-irmán sira iha kongregasaun hodi manán osan.​—Ebr 13:5.

Oinsá se ita uza group chat atu husu osan atu ajuda irmaun-irmán sira neʼebé hasoru dezastre? Ita hadomi irmaun-irmán sira no hatudu interese ba sira. Tan neʼe ita hakarak ajuda no anima sira. (Tgo 2:15, 16) Maibé se ita koko halo nuneʼe liuhusi group chat neʼebé iha ema barak, neʼe bele halo susar ba sukursál no kongregasaun atu halo arranju hodi fó ajuda. (1 Tim 5:3, 4, 9, 10, 16) Ita lakohi halo ema seluk hanoin katak ita iha knaar neʼebé espesiál atu tau matan ba Maromak nia bibi sira.

Ita hakarak ita-nia hahalok lori glória ba Maromak. (1 Kor 10:31) Tan neʼe bainhira ita uza group chat ka internét, hanoin kona-ba perigu sira no mós kuidadu an.