1-2. Depois hetan tiha batizmu, ita-nia moris sei sai oinsá?

 ITA sente kontente bainhira hetan batizmu no sai parte ba Jeová nia família. Neʼe mak priviléjiu atu bele iha relasaun besik ho Jeová. Ita konkorda ho David neʼebé hakerek: “Ksolok ba ema neʼebé Ita [Jeová] hili no lori besik Ita hodi hela iha Ita-nia pátiu sira.”—Sal 65:4.

² Laʼós ema hotu bele iha relasaun neʼebé besik ho Jeová. Hanesan ita aprende ona iha lisaun antes neʼe, Jeová hili atu hakbesik ba sira neʼebé hakarak hakbesik ba nia no sai ninia belun. (Tgo 4:8) Bainhira Ita dedika an ba Jeová no hetan batizmu, Ita hakbesik ba nia iha dalan neʼebé espesiál. Ita bele fiar duni katak depois hetan tiha batizmu, nia sei fakar ba Ita ‘bensaun toʼo Ita la falta tan buat ida’.—Mal 3:10; Jer 17:​7, 8.

3. Ema Kristaun neʼebé dedika an no hetan ona batizmu iha responsabilidade saida? (Eclesiastes 5:​4, 5)

³ Batizmu mak hakat primeiru atu serbí Jeová. Depois hetan tiha batizmu, Ita hakarak hakaʼas an atu moris tuir Ita-nia dedikasaun, maski hasoru tentasaun ka situasaun neʼebé koko Ita-nia fiar. (Lee Eclesiastes 5:​4, 5.) Nuʼudar Jesus nia dixípulu, Ita presiza halo tuir Jesus nia ezemplu no ninia mandamentu ho didiʼak. (Mt 28:​19, 20; 1 Ped 2:21) Lisaun neʼe sei ajuda Ita atu halo nuneʼe.

 “KONTINUA LAʼO TUIR” JESUS MASKI HASORU SUSAR NO TENTASAUN

4. Oinsá mak Jesus nia dixípulu lori “ai-riin terus nian”? (Lucas 9:23)

⁴ Keta hanoin katak depois hetan tiha batizmu, Ita sei la hasoru tan problema. Tuir loloos, Jesus esplika klaru katak ninia dixípulu sira sei lori “ai-riin terus nian”. Sira halo nuneʼe “loroloron”. (Lee Lucas 9:23.) Neʼe katak Jesus nia dixípulu sei hasoru hela deʼit susar ka lae? Laʼós hanesan neʼe. Nia énfaze katak sira laʼós deʼit simu bensaun, maibé sira sei hasoru problema oioin. Karik problema sira-neʼe balu mak susar tebes.—2 Tim 3:12.

5. Bensaun saida mak Jesus promete ba sira neʼebé halo sakrifísiu atu serbí Maromak?

⁵ Karik Ita hasoru ona susar tanba família kontra ka Ita halo sakrifísiu balu atu tau uluk Maromak nia hakarak iha Ita-nia moris. (Mt 6:33) Se nuneʼe, Ita bele fiar katak Jeová haree buat neʼebé Ita halo ba nia. (Ebr 6:10) Karik Ita sente ona katak Jesus nia liafuan tuirmai mak loos: “Ema neʼebé husik ona uma, maun-alin ka feton, inan ka aman, oan, ka toʼos tanba haʼu no tanba liafuan diʼak sei simu uma, maun-alin, feton, inan, oan no toʼos dala atus ida liu fali uluk nian, hamutuk ho terus oioin iha tempu agora, no sei simu moris rohan-laek iha tempu neʼebé atu mai.” (Mc 10:​29, 30) Bensaun neʼebé Ita simu mak boot liu fali sakrifísiu naran deʼit neʼebé Ita halo.—Sal 37:4.

6. Depois hetan tiha batizmu, tanbasá Ita presiza nafatin luta hasoru “hakarak isin nian”?

⁶ Depois hetan tiha batizmu, Ita presiza nafatin luta hasoru “hakarak isin nian”. (1 João 2:16) Neʼe tanba Ita mak ema sala-naʼin. Karik dala ruma Ita sente hanesan ho apóstolu Paulo. Nia hakerek: “Iha haʼu-nia laran, haʼu haksolok duni ho Maromak nia ukun-fuan, maibé haʼu haree ukun-fuan seluk iha haʼu-nia isin neʼebé halo funu kontra ukun-fuan iha haʼu-nia neon, no ida-neʼe lori haʼu sai atan ba sala nia ukun-fuan neʼebé iha haʼu-nia isin.” (Rom 7:​22, 23) Karik Ita sente laran-kraik tanba presiza kontinua luta hasoru Ita-nia hakarak neʼebé sala. Maski nuneʼe, hodi hanoin kona-ba promesa neʼebé Ita halo ba Jeová kuandu Ita dedika an ba nia, neʼe sei hametin Ita atu luta hasoru tentasaun. Ita-nia dedikasaun sei ajuda Ita kuandu Ita hasoru tentasaun. Oinsá?

7. Oinsá mak dedikasaun ba Jeová ajuda Ita atu laran-metin nafatin?

⁷ Bainhira Ita dedika an ba Jeová, Ita nega Ita-nia an rasik. Neʼe katak Ita hili atu la halo tuir Ita-nia hakarak no planu neʼebé halo Jeová la kontente. (Mt 16:24) Entaun bainhira Ita hasoru tentasaun, Ita la presiza gasta tempu barak atu hanoin kona-ba saida mak Ita sei halo. Ita deside nanis ona saida mak Ita sei halo, neʼe mak atu laran-metin nafatin ba Jeová. Ita sei nafatin hakaʼas an atu halo Jeová kontente. Ita sei banati-tuir Job. Maski nia hasoru situasaun neʼebé susar tebes, nia hatete: “Haʼu sei nunka husik haʼu-nia laran-metin!”—Job 27:5.

8. Oinsá mak hodi hanoin fali orasaun kona-ba Ita-nia dedikasaun ajuda Ita tahan hasoru tentasaun?

⁸ Hodi hanoin fali orasaun kona-ba Ita-nia dedikasaun ba Jeová, neʼe sei ajuda Ita tahan hasoru tentasaun naran deʼit. Porezemplu, Ita sei hatudu sentimentu romántiku ba ema seluk nia kaben ka lae? Lae duni! Ita promete ona ba Jeová katak Ita sei nunka halo hanesan neʼe. Ita sei proteje Ita-nia an husi problema oioin tanba la husik sentimentu sala mosu no sai abut iha Ita-nia laran. Ita sei sees husi  “ema laran-aat sira-nia dalan”.—Prov 4:​14, 15.

9. Oinsá mak hodi hanoin fali orasaun kona-ba Ita-nia dedikasaun ajuda Ita atu tau uluk Jeová iha Ita-nia moris?

⁹ Oinsá se ema ruma oferese serbisu neʼebé hanetik Ita atu tuir reuniaun beibeik? Ita hatene saida mak Ita presiza halo. Antes ema oferese serbisu ba Ita, Ita deside nanis ona atu la simu serbisu neʼebé bele hanetik Ita atu tuir reuniaun. Entaun, Ita lakohi atu buka razaun oioin hodi hanoin katak Ita bele simu serbisu neʼe no nafatin tau uluk Jeová iha Ita-nia moris. Hanoin kleʼan kona-ba Jesus nia ezemplu bele ajuda Ita. Nia deside metin atu halo ninia Aman kontente. Hanesan Jesus, Ita hakarak deside metin atu la simu kedas buat naran deʼit neʼebé halo Maromak la kontente.—Mt 4:10; João 8:29.

10. Depois hetan tiha batizmu, oinsá Jeová ajuda Ita atu “kontinua laʼo tuir” Jesus?

¹⁰ Bainhira Ita hasoru susar no tentasaun, neʼe fó oportunidade mai Ita atu hatudu katak Ita deside metin ona atu “kontinua laʼo tuir” Jesus. No Ita bele fiar katak Jeová sei ajuda Ita. Bíblia hatete: “Maromak mak laran-metin, no nia sei nunka husik imi atu hetan tentasaun neʼebé liu fali imi-nia kbiit, maibé kuandu imi hasoru tentasaun ruma, nia mós sei hatudu dalan ba imi atu sai, atu nuneʼe imi bele tahan.”—1 Kor 10:13.

OINSÁ ATU KONTINUA LAʼO TUIR JESUS?

11. Saida mak dalan diʼak atu kontinua laʼo tuir Jesus? (Haree mós foto.)

¹¹ Jesus serbí Jeová ho laran tomak no nafatin hakbesik ba Jeová liuhusi orasaun. (Lc 6:12) Tuir loloos, dalan diʼak ida atu kontinua laʼo tuir Jesus depois  hetan tiha batizmu mak hodi haburas toman atu halo atividade espirituál oioin neʼebé bele ajuda Ita hakbesik liután ba Jeová. Bíblia hatete: “Hanesan ita laʼo ba oin ona, mai ita kontinua laʼo ba oin iha dalan neʼebé hanesan.” (Flp 3:16) Dala ruma Ita rona kona-ba irmaun-irmán sira neʼebé deside atu aumenta sira-nia serbisu ba Jeová. Karik sira tuir Eskola ba Haklaken-Naʼin Tempu-Tomak ka muda ba fatin neʼebé presiza liután haklaken-naʼin. Se Ita bele halo planu hanesan neʼe, neʼe mak planu neʼebé diʼak tebes. Jeová nia povu hakarak tebes atu aumenta liután sira-nia serbisu ba nia. (Após 16:9) Maibé oinsá se agora daudaun Ita labele halo nuneʼe? Keta hanoin katak Ita mak folin-laek se kompara ho sira neʼebé bele halo ida-neʼe. Importante mak Ita kontinua tahan iha halai-taru ba moris. (Mt 10:22) Keta haluha katak Jeová kontente bainhira Ita serbí nia tuir Ita-nia kbiit no situasaun. Neʼe mak dalan importante ida atu Ita bele kontinua laʼo tuir Jesus depois hetan tiha batizmu.—Sal 26:1.

12-13. Saida mak Ita bele halo se Ita-nia laran-manas komesa sai menus? (1 Korinto 9:​16, 17) (Haree mós kaixa “ Kontinua iha halai-taru”.)

¹² Oinsá se Ita sente katak Ita-nia orasaun la ho laran, ka Ita la sente kontente iha serbisu haklaken hanesan uluk? Oinsá se agora Ita la gosta lee Bíblia? Se Ita sente hanesan neʼe depois hetan tiha batizmu, keta hanoin katak Ita lakon Jeová nia espíritu. Ita la perfeitu no Ita-nia sentimentu bele tun-saʼe. Se Ita-nia laran-manas komesa sai menus, hanoin kona-ba apóstolu Paulo nia ezemplu. Maski nia koko atu banati-tuir Jesus, nia hatene katak dala ruma nia sente la  iha motivasaun atu halo buat neʼebé nia presiza halo. (Lee 1 Korinto 9:​16, 17.) Nia hatete: “Se haʼu fó sai liafuan diʼak ho laran-todan, haʼu halo nafatin serbisu neʼe tanba Naʼi fó ona mai haʼu.” Paulo deside ona atu kumpre ninia serbisu ba Maromak maski ninia laran-manas sai menus ba tempu balu.

¹³ Nuneʼe mós ho Ita, keta husik Ita-nia sentimentu neʼebé la perfeitu kona Ita-nia desizaun. Deside metin atu halo buat neʼebé loos maski Ita lakohi atu halo ida-neʼe. Se Ita kontinua halo buat neʼebé loos, ikusmai Ita-nia sentimentu mós sei sai diʼak. No hodi kontinua halaʼo estuda mesak, halo orasaun, tuir reuniaun, no haklaken sei ajuda Ita atu kontinua laʼo tuir Jesus depois hetan tiha batizmu. Irmaun-irmán sira sei hetan laran-manas bainhira haree ita tahan hodi kontinua halo buat neʼebé diʼak.—1 Tes 5:11.

“KONTINUA KOKO . . . KONTINUA HAREE DIDIʼAK”

14. Ita presiza ezamina beibeik kona-ba saida, no tanbasá? (2 Korinto 13:5)

¹⁴ Depois hetan tiha batizmu, importante mós atu kontinua ezamina beibeik Ita-nia an. (Lee 2 Korinto 13:5.) Dala ruma diʼak atu ezamina se Ita nafatin iha toman atu halo orasaun loroloron, lee no estuda Bíblia mesak, tuir reuniaun, no haklaken ka lae. Diʼak atu buka dalan atu sente kontente no hetan benefísiu liután husi atividade sira-neʼe. Porezemplu, husu ba Ita-nia an: ‘Haʼu bele esplika Bíblia nia hanorin báziku ba ema seluk ka lae? Saida mak haʼu bele halo atu sente kontente liután iha serbisu haklaken? Haʼu halo orasaun neʼebé espesífiku no haʼu-nia orasaun hatudu katak haʼu sadere tomak ba Jeová ka lae? Haʼu tuir beibeik reuniaun ka lae? Oinsá mak haʼu bele fokus no hola parte liután bainhira tuir reuniaun?’

15-16. Saida mak Ita aprende husi irmaun ida nia esperiénsia kona-ba tahan hasoru tentasaun?

¹⁵ Importante atu ezamina Ita-nia an hodi hatene kona-ba Ita-nia fraku sira. Irmaun ida naran Robert fó sai esperiénsia ida neʼebé liga ho pontu neʼe: “Bainhira haʼu tinan maizumenus 20, haʼu halo serbisu part-time. Loron ida depois serbisu, feto ida iha serbisu-fatin konvida haʼu atu ba ninia uma. Nia hatete katak ema seluk la iha uma no ami rua bele goza tempu hamutuk. Foufoun susar atu la simu ninia konvite, maibé ikusmai haʼu hatete ba nia ‘lae’ no esplika tanbasá.” Robert la monu ba tentasaun, no neʼe mak buat neʼebé diʼak tebes. Maibé bainhira nia hanoin  fali kona-ba situasaun neʼe, nia rekoñese katak loloos nia bele responde kedas iha tempu neʼebá. Nia hatete: “Haʼu la hatán kedas ho fiar neʼebé metin ka haʼu la hatán lalais hanesan buat neʼebé José halo ba Potifar nia feen. (Gén 39:​7-9) Loloos, haʼu hakfodak katak susar ba haʼu atu la simu feto neʼe. Situasaun neʼe ajuda haʼu atu rekoñese katak haʼu presiza hametin liután haʼu-nia relasaun ho Jeová.”

¹⁶ Ita mós bele hetan benefísiu hodi ezamina Ita-nia an hanesan buat neʼebé Robert halo. Kuandu Ita konsege tahan hasoru tentasaun ruma, husu ba Ita-nia an: ‘Haʼu hein ba tempu kleur atu hatete “lae” ba situasaun neʼe ka lae?’ Se Ita rekoñese katak Ita presiza halo mudansa, keta laran-kraik. Ita bele sente kontente tanba agora Ita hatene kona-ba Ita-nia fraku sira. Hatoʼo ida-neʼe iha Ita-nia orasaun, no hametin Ita-nia hakarak atu moris tuir Jeová nia matadalan.—Sal 139:​23, 24.

17. Oinsá mak Robert nia laran-metin kona Jeová nia naran?

¹⁷ Ita bele aprende buat seluk tan husi Robert nia esperiénsia. Nia hatete: “Kuandu haʼu dehan lae ba feto neʼe, nia hatán: ‘Sorte ó hatán lae!’ Haʼu husu ba nia tanbasá nia koʼalia hanesan neʼe. Feto neʼe esplika katak ninia belun ida neʼebé uluk Testemuña ida hatete katak Testemuña hotu halaʼo moris ho oin rua, no se sira hetan oportunidade, sira sei lalais atu monu ba sala. Entaun feto neʼe hatete ba ninia belun katak nia mós sei koko haʼu atu haree se haʼu monu ba lasu neʼe ka lae. Haʼu kontente tebes tanba haʼu bele fó hahiʼi ba Jeová nia naran.”

18. Depois hetan tiha batizmu, Ita sei hakaʼas an atu halo saida? (Haree mós kaixa “ Série neʼebé bele ajuda Ita”.)

¹⁸ Bainhira Ita dedika an ba Jeová no hetan batizmu, Ita hatudu katak Ita hakarak halo santu ninia naran maski hasoru situasaun naran deʼit. No Ita bele fiar katak Jeová hatene susar neʼebé Ita hasoru no oinsá Ita tahan hasoru tentasaun sira. Nia sei haraik bensaun tanba Ita hakaʼas an atu laran-metin nafatin. Fiar bá katak liuhusi ninia espíritu santu, nia sei fó Ita kbiit atu halo ida-neʼe. (Lc 11:​11-13) Ho Jeová nia ajuda, Ita bele kontinua laʼo tuir Jesus depois hetan tiha batizmu.