1. Bensaun saida mak ita hetan tanba sai parte ba Jeová nia organizasaun?

 ITA hetan bensaun oioin tanba sai parte ba Jeová nia organizasaun durante loron ikus sira neʼebé susar. Maski mundu nia situasaun sai aat ba beibeik, Jeová ajuda ita liuhusi irmaun-irmán sira neʼebé iha unidade. (Sal 133:1) Nia ajuda ita atu iha moris família nian neʼebé kontente. (Éf 5:33–6:1) No nia fó ita matenek neʼebé ita presiza atu bele tahan hasoru sentimentu laran-kraik no iha kontente neʼebé loos.

2. Saida mak ita presiza halo, no tanbasá?

² Ita presiza hakaʼas an atu kontinua serbí Jeová ho laran-metin. Tanbasá? Tanba karik dala ruma ema nia liafuan no hahalok hakanek ita-nia laran. Karik ita sente laran-kraik tanba ita-nia fraku, liuliu se ita repete beibeik sala neʼebé hanesan. Ita presiza kontinua serbí Jeová (1) kuandu ita-nia maluk fiar-naʼin hakanek ita-nia laran, (2) kuandu hasoru problema iha moris kaben nian, no (3) kuandu ita sente laran-kraik tanba ita-nia fraku. Iha lisaun neʼe, ita sei aprende kona-ba tópiku sira-neʼe. Ita mós sei aprende husi fiar-naʼin sira iha Bíblia neʼebé laran-metin.

KUANDU MALUK FIAR-NAʼIN HAKANEK ITA

3. Jeová nia povu hasoru dezafiu ka susar saida?

³ Dezafiu. Maluk fiar-naʼin balu iha hahalok neʼebé halo ita estrese. Karik sira balu halo buat ruma neʼebé halo ita laran-kraik ka trata aat ita. Katuas kongregasaun mós bele halo sala. Situasaun hanesan neʼe bele halo ema balu hanoin  katak neʼe laʼós Maromak nia organizasaun. Duké kontinua adora Maromak “ho unidade” hamutuk irmaun-irmán sira, sira para atu ransu ho ema neʼebé hakanek sira-nia laran ka para atu tuir reuniaun. (Sof 3:9) Desizaun neʼe matenek ka lae? Mai ita haree saida mak ita bele aprende husi fiar-naʼin ida neʼebé hasoru problema neʼebé atu hanesan.

4. Paulo hasoru dezafiu saida deʼit?

⁴ Ezemplu husi Bíblia. Apóstolu Paulo hatene katak irmaun-irmán sira la perfeitu. Porezemplu, ema balu iha kongregasaun la fiar katak nia sai ona dixípulu ida. (Após 9:26) Ema balu mós koʼalia aat kona-ba nia atu hafoʼer ninia naran. (2 Kor 10:10) Tuirmai, Paulo haree irmaun ida neʼebé iha responsabilidade halo desizaun sala neʼebé karik halo ema balu sidi. (Gal 2:​11, 12) No Paulo nia belun ida naran Marcos hakanek ninia laran. (Após 15:​37, 38) Karik situasaun sira-neʼe bele hanetik Paulo atu la ransu tan ho irmaun-irmán sira. Maibé nia nafatin iha hanoin pozitivu kona-ba irmaun-irmán sira no kontinua serbí Jeová ho laran-metin. Saida mak ajuda Paulo?

5. Saida mak ajuda Paulo atu fó perdua no nafatin hakbesik ba irmaun-irmán sira? (Koloso 3:​13, 14) (Haree mós dezeñu.)

⁵ Paulo hadomi irmaun-irmán sira. Ninia domin book nia atu fokus ba sira-nia hahalok diʼak duké sira-nia fraku. Tanba Paulo hadomi ema, neʼe mós ajuda nia atu fó perdua ba sira, hanesan hakerek iha Koloso 3:​13, 14. (Lee.) Hanoin toʼok oinsá Paulo fó perdua ba Marcos. Maski Marcos husik hela Paulo durante ninia viajen primeiru nuʼudar misionáriu, Paulo la rai hirus nafatin. Tuirmai bainhira Paulo hakerek karta ba kongregasaun iha Koloso, nia gaba Marcos nuʼudar ninia maluk serbisu-naʼin “neʼebé fó kmaan” ba nia. (Kol 4:​10, 11) Bainhira Paulo iha komarka iha Roma, nia husu atu Marcos mai ajuda nia. (2 Tim 4:11) Klaru katak Paulo fó perdua no nafatin hakbesik ba irmaun-irmán sira. Saida mak ita bele aprende husi Paulo?

6-7. Saida mak ajuda ita atu kontinua hatudu domin ba irmaun-irmán sira maski sira la perfeitu? (1 João 4:7)

⁶ Lisaun. Jeová hakarak ita atu kontinua hatudu domin ba irmaun-irmán sira. (Lee 1 João 4:7.) Se ema ruma la hatudu hahalok Kristaun, diʼak atu hanoin  pozitivu katak nia hakanek ita-nia laran la ho neon no hakaʼas an ona atu halo tuir Bíblia nia prinsípiu . (Prov 12:18) Maromak hadomi ninia atan sira neʼebé laran-metin maski sira la perfeitu. Maski ita halo sala, Jeová kontinua hakarak sai ita-nia belun no la rai hirus. (Sal 103:9) Importante tebes ba ita atu banati-tuir ita-nia Aman neʼebé prontu atu fó perdua!—Éf 4:32–5:1.

⁷ Hanoin-hetan, nuʼudar mundu nia rohan besik daudaun, ita presiza kontinua iha relasaun diʼak ho irmaun-irmán sira. Ita hatene katak ema sei fó-terus makaʼas liután ba ita. Karik ema sei hatama ita ba komarka tanba ita-nia fiar. Iha situasaun hanesan neʼe, ita presiza tebes irmaun-irmán sira. (Prov 17:17) Hanoin toʼok buat neʼebé akontese ba katuas kongregasaun ida iha rai-España naran José. a Nia ho irmaun seluk tama komarka tanba lakohi tama militár. Nia hatete: “Iha komarka, fasil deʼit atu sai estrese ho ita-nia maluk tanba ita sempre hamutuk ho sira. Ami tenke pasiénsia no fó perdua ba malu ho laran. Neʼe ajuda ami atu kontinua iha unidade no proteje malu husi prizioneiru neʼebé la serbí Jeová. Loron ida, haʼu-nia liman tohar no presiza uza jesu. Tan neʼe haʼu labele halo buat barak mesak. Irmaun ida fase haʼu-nia roupa no ajuda haʼu iha dalan seluk tan. Haʼu rasik sente domin neʼebé loos iha situasaun neʼe.” Neʼe mak razaun neʼebé diʼak atu ita rezolve ita-nia problema ho ema seluk agora!

KUANDU HASORU PROBLEMA IHA MORIS KABEN NIAN

8. Dezafiu saida mak feen-laʼen sira hasoru?

⁸ Dezafiu. Kaben-naʼin hotu sei hasoru susar. Bíblia koʼalia ho klaru katak ema neʼebé kaben sei hasoru “susar iha sira-nia moris”. (1 Kor 7:28) Tanbasá? Tanba feen no laʼen mak la perfeitu, iha hahalok neʼebé la hanesan, no gosta ka la gosta buat neʼebé la hanesan. Karik laʼen no feen mai husi kultura no situasaun moris neʼebé la hanesan. Karik depois kaben tiha, feen ka laʼen foin nota kona-ba ninia pár nia hahalok neʼebé antes neʼe nia la hatene. Buat sira-neʼe bele hamosu problema iha moris kaben nian. Duké rekoñese sira ida-idak nia fraku no rezolve problema hamutuk, sira fó-sala ba malu. Karik kaben-naʼin balu hanoin katak solusaun diʼak mak atu haketak malu ka soe-malu. Maibé neʼe sei rezolve sira-nia problema ka lae? b Mai ita aprende kona-ba fiar-naʼin ida tan neʼebé kontinua serbí Jeová maski hasoru susar iha moris kaben nian.

9. Abigail hasoru dezafiu saida?

⁹ Ezemplu husi Bíblia. Abigail kaben ho Nabal neʼebé Bíblia temi nuʼudar mane neʼebé siʼak-teen no iha hahalok aat. (1 Sam 25:3) Klaru katak susar tebes ba Abigail atu moris hamutuk ho mane hanesan neʼe. Abigail buka dalan atu hakotu ninia moris kaben nian ka lae? Loloos Abigail iha oportunidade bainhira David, ida neʼebé sei sai liurai, mai atu oho ninia laʼen neʼebé uluk insulta David no ninia ema sira. (1 Sam 25:​9-13) Abigail bele deʼit halai no husik David atu oho Nabal. Maibé Abigail la halo nuneʼe, nia husu David atu la oho Nabal. (1 Sam 25:​23-27) Saida mak motiva Abigail?

10. Saida mak karik motiva Abigail atu proteje ninia moris kaben nian?

 ¹⁰ Abigail hadomi Jeová no respeitu Jeová nia matadalan kona-ba moris kaben nian. Karik nia hatene kona-ba buat neʼebé Maromak koʼalia ba Adão no Eva bainhira Maromak hahú arranju kaben nian. (Gén 2:24) Abigail hatene katak Jeová haree moris kaben nian mak sagradu. Nia hakarak halo Jeová kontente, no neʼe motiva nia atu halo buat naran deʼit atu salva ninia umakain, inklui ninia laʼen. Nia halo lalais buat ruma atu hanetik David hodi labele oho Nabal. Nia mós prontu atu husu deskulpa maski laʼós ninia sala. Klaru katak Jeová hadomi Abigail neʼebé aten-brani no la hanoin an deʼit. Saida mak feen no laʼen bele aprende husi Abigail nia ezemplu?

11. (a) Saida mak Jeová hakarak husi feen no laʼen? (Éfeso 5:33) (b) Saida mak Ita aprende husi Carmen nia ezemplu? (Haree mós dezeñu.)

¹¹ Lisaun. Jeová hakarak feen no laʼen atu kontinua moris hamutuk maski sira naʼin-rua sente susar atu hela hamutuk ho dame. Jeová kontente tebes bainhira feen no laʼen apoia malu atu rezolve problema no hatudu domin neʼebé la hanoin an deʼit no respeitu. (Lee Éfeso 5:33.) Hanoin toʼok kona-ba Carmen nia ezemplu. Depois kaben tiha ba tinan neen, Carmen komesa estuda Bíblia ho Testemuña ba Jeová no tuirmai hetan batizmu. Carmen hatete: “Haʼu-nia laʼen la kontente ho haʼu-nia desizaun. Nia sai laran-moras ba Jeová. Nia insulta haʼu no ameasa atu soe haʼu.” Maski nuneʼe, Carmen laran-metin nafatin ba ninia laʼen. Ba tinan 50, nia hakaʼas an atu hadomi no respeitu ninia laʼen. Nia hatete: “Nuʼudar tempu liu daudaun, haʼu komesa komprende haʼu-nia laʼen nia sentimentu no aprende atu koʼalia ba nia ho respeitu. Tanba hatene katak moris kaben nian mak sagradu ba Jeová, haʼu halo buat hotu neʼebé haʼu bele atu proteje haʼu-nia moris kaben nian. Haʼu nunka koko atu husik haʼu-nia laʼen tanba haʼu hadomi Jeová.” c Bainhira problema mosu iha Ita-nia moris kaben nian, Ita bele fiar katak Jeová sei apoia no ajuda Ita atu kontinua laran-metin.

LARAN-KRAIK TANBA ITA-NIA FRAKU

12. Dezafiu saida mak ita hasoru se ita halo sala neʼebé sériu?

¹² Dezafiu. Kuandu ita halo sala neʼebé sériu, karik ita sente laran-kraik tebes no  hakarak rende an deʼit. Bíblia hatete katak ita-nia sala bele halo ita “laran-triste no neon-susar”. (Sal 51:17) Irmaun ida naran Roberto hakaʼas an ba tinan barak atu kumpre kritéria, no ikusmai sai atan ba kongregasaun. Maibé nia halo sala neʼebé sériu no nia rekoñese katak nia la laran-metin ona ba Jeová. Nia hatete: “Haʼu-nia konxiénsia fó-sala makaʼas ba haʼu. Haʼu sente laran-triste tebes, tanis, no haʼu halo orasaun ba Jeová. Haʼu hanoin katak Maromak lakohi tan atu rona ba haʼu-nia orasaun tanba haʼu hakanek ninia laran.” Se ita halo sala neʼebé sériu, karik ita hanoin katak Jeová husik ona ita no ita la iha tan razaun atu serbí nia. (Sal 38:4) Se Ita mak sente hanesan neʼe, hanoin toʼok kona-ba fiar-naʼin ida neʼebé kontinua serbí Jeová maski halo sala neʼebé sériu.

13. Apóstolu Pedro halo sala sériu saida, no tanbasá?

¹³ Ezemplu husi Bíblia. Iha kalan antes Jesus mate, apóstolu Pedro halo sala kiʼik balu no neʼe book nia atu halo sala neʼebé sériu tebes. Primeiru, Pedro koʼalia ho fiar an katak nia sei laran-metin nafatin maski apóstolu sira seluk husik hela Jesus. (Mc 14:​27-29) Tuirmai, iha jardín Getsémani, Pedro la matan-moris. (Mc 14:​32, 37-41) Depois neʼe, kuandu ema-lubun mai atu kaer Jesus, Pedro halai no husik hela Jesus. (Mc 14:50) Tanba sala kiʼik sira-neʼe, ikusmai, Pedro nega Jesus ba dala tolu no jura katak nia la hatene Jesus. (Mc 14:​66-71) Pedro halo saida kuandu nia rekoñese katak nia halo ona sala neʼebé sériu? Nia sente triste tebes no komesa tanis, karik nia hanoin nia mak ema neʼebé aat tebes. (Mc 14:72) Imajina toʼok Pedro nia sentimentu kuandu ema oho tiha ninia belun Jesus. Karik Pedro sente folin-laek tebes!

14. Saida mak ajuda Pedro atu kontinua serbí Jeová? (Haree dezeñu.)

¹⁴ Pedro konsege kontinua serbí Jeová tanba razaun oioin. Nia la haketak an husi ema seluk, nia hakbesik ba irmaun-irmán sira no hetan kmaan husi sira. (Lc 24:33) No kuandu Jesus moris hiʼas, nia mosu ba Pedro, karik nia hakarak atu anima Pedro. (Lc 24:34; 1 Kor 15:5) Duké hirus Pedro, Jesus hatete katak Pedro sei simu responsabilidade neʼebé boot. (João 21:​15-17) Pedro hatene katak nia halo ona sala neʼebé sériu, maibé nia hakaʼas an atu kontinua halo buat neʼebé loos. Tanbasá? Tanba nia fiar katak ninia  Naʼi Jesus nafatin hadomi nia. No irmaun-irmán sira mós kontinua apoia nia. Saida mak ita bele aprende husi Pedro nia ezemplu?

15. Jeová hakarak ita fiar metin kona-ba saida? (Salmo 86:5; Roma 8:​38, 39) (Haree mós foto.)

¹⁵ Lisaun. Jeová hakarak ita atu fiar metin katak nia hadomi no fó perdua ba ita. (Lee Salmo 86:5; Roma 8:​38, 39.) Bainhira ita halo sala, baibain ita fó-sala ba ita-nia an, no neʼe mak buat neʼebé normál. Maski nuneʼe, ita labele hanoin katak Jeová la hadomi tan ita no la perdua ita. Maibé ita presiza buka kedas ajuda. Roberto neʼebé temi ona ohin, hatete: “Haʼu monu ba sala tanba haʼu sadere ba haʼu-nia kbiit rasik atu tahan hasoru tentasaun.” Nia rekoñese katak nia presiza koʼalia ba katuas sira. Nia hatete: “Bainhira haʼu koʼalia ba katuas sira, haʼu sente kedas Jeová nia domin liuhusi sira. Haʼu bele sente katak katuas sira mós hadomi haʼu. Sira ajuda haʼu atu fiar katak Jeová la husik hela haʼu.” Ita mós bele fiar katak Jeová hadomi tebes ita no fó perdua ba ita se ita arrepende an, buka ajuda, no hakaʼas an atu la repete sala neʼebé hanesan. (1 João 1:​8, 9) Se ita fiar metin kona-ba ida-neʼe, ita sei la para atu serbí Jeová maski ita halo ona sala.

16. Tanbasá Ita deside metin atu kontinua serbí Jeová?

¹⁶ Jeová hafolin ita-nia hakaʼas an atu serbí nia durante loron ikus sira neʼebé susar. Ho Jeová nia ajuda, ita bele kontinua serbí nia maski hasoru situasaun neʼebé halo ita laran-kraik. Ita bele haburas domin ba irmaun-irmán sira no fó perdua ba sira se sira hakanek ita-nia laran. Ita bele hatudu katak ita hadomi tebes Jeová no respeitu ninia arranju hodi halo buat naran deʼit atu rezolve problema neʼebé mosu iha moris kaben nian. Se ita halo sala, ita bele buka Jeová nia ajuda, simu ninia domin no perdua, no kontinua serbí nia. Fiar bá katak ita sei simu bensaun barak se ita ‘la rende an atu halo buat neʼebé diʼak’.—Gal 6:9.