1-2. Saida mak ita presiza halo antes hetan batizmu?

 HUSI tinan 2018 toʼo 2022, iha ema naʼin-millaun ida liu mak hetan batizmu nuʼudar Testemuña ba Jeová. Sira barak mak aprende lia-loos “husi kiʼik kedas”, hanesan buat neʼebé Timóteo halo. (2 Tim 3:​14, 15) Balu aprende kona-ba Jeová bainhira sira boot ona, no balu tan bainhira ferik-katuas ona. Tinan balu liubá, feto ida estuda Bíblia ho Testemuña ba Jeová no hetan batizmu kuandu nia tinan 97!

² Se Ita mak estudante Bíblia ida ka boot iha lia-loos, Ita hanoin atu hetan batizmu ka lae? Neʼe mak planu neʼebé diʼak tebes! Maibé antes hetan batizmu, Ita presiza dedika an ba Jeová. Lisaun neʼe sei esplika dedikasaun katak sá, no mós Ita sei haree tanbasá Ita la presiza dada an atu dedika an no hetan batizmu kuandu Ita prontu ona atu halo ida-neʼe.

DEDIKASAUN KATAK SÁ?

3. Fó toʼok ezemplu husi Bíblia kona-ba ema neʼebé dedika ona ba Jeová.

³ Iha Bíblia, dedikasaun signifika ema neʼebé haketak ona atu halo serbisu sagradu ba Maromak. Povu Izraél mak nasaun ida neʼebé dedika ona ba Jeová. Maibé iha ema Izraél balu neʼebé dedika ona ba Jeová iha dalan espesiál. Porezemplu, iha Arão nia turbante nia oin, iha osan-mean belar neʼebé bolu nuʼudar “sinál santu dedikasaun nian”. Osan-mean belar neʼe hatudu katak Maromak hili ona nia atu halaʼo knaar espesiál ida nuʼudar amlulik boot ba nasaun Izraél. (Lev 8:9) Ema Nazireu mós dedika ona ba Jeová iha dalan neʼebé espesiál.  Liafuan “Nazireu” foti husi liafuan Ebraiku nazir neʼebé signifika “ema neʼebé haketak ona”, ka “ema neʼebé dedika ona”. Ema Nazireu tenke halo tuir mandamentu espesiál neʼebé hakerek ona iha Moisés nia Ukun-Fuan.—Núm 6:​2-8.

4. (a) Bainhira Ita dedika an ba Jeová, saida mak sai importante liu iha Ita-nia moris? (b) Liafuan “nega” Ita-nia an katak sá? (Haree mós dezeñu.)

⁴ Bainhira Ita dedika an ba Jeová, Ita hili atu sai Jesus Kristu nia dixípulu no halo tuir Maromak nia hakarak mak buat neʼebé importante liu iha Ita-nia moris. Ema Kristaun nia dedikasaun katak sá? Jesus hatete: “Se ema ruma hakarak tuir haʼu, nia tenke nega ninia an rasik.” (Mt 16:24) Liafuan Gregu neʼebé tradús nuʼudar “nia tenke nega ninia an rasik” bele mós tradús nuʼudar “laʼós moris tan ba ninia an rasik”. Bainhira Ita dedika an ba Jeová, Ita lakohi halo buat neʼebé Jeová la gosta. (2 Kor 5:​14, 15) Neʼe inklui la halo “hahalok sira neʼebé husi isin”, hanesan sala seksuál. (Gal 5:​19-21; 1 Kor 6:18) Matadalan sira-neʼe lori susar ba Ita ka lae? Neʼe sei la lori susar ba Ita se Ita hadomi Jeová no fiar metin katak ninia matadalan sira lori diʼak ba Ita. (Sal 119:97; Isa 48:​17, 18) Irmaun ida naran Nicholas hatete: “Ita bele haree Jeová nia matadalan hanesan lutu besi iha komarka neʼebé hanetik ita atu halo buat neʼebé ita hakarak, ka ita bele kompara ho lutu besi neʼebé proteje ita husi leaun.”

5. (a) Oinsá atu dedika an ba Jeová? (b) Saida mak la hanesan entre dedikasaun no batizmu? (Haree mós dezeñu.)

⁵ Oinsá atu dedika an ba Jeová? Ita promete ba nia liuhusi orasaun katak Ita sei adora deʼit nia no tau uluk ninia hakarak iha Ita-nia moris. Ita promete  ba Jeová katak Ita sei kontinua hadomi nia ‘ho Ita-nia laran tomak, ho Ita-nia moris tomak, ho Ita-nia neon tomak no ho Ita-nia kbiit tomak’. (Mc 12:30) Kuandu Ita dedika an ba Jeová, neʼe entre Ita ho Jeová deʼit. Maibé kuandu Ita hetan batizmu, neʼe iha ema barak nia oin no hatudu ba sira katak Ita dedika an ona ba Jeová. Ita-nia dedikasaun mak juramentu neʼebé sériu. Jeová hakarak Ita atu moris tuir Ita-nia dedikasaun, no Ita mós hakarak kumpre juramentu neʼe.—Ecle 5:​4, 5.

TANBASÁ ITA DEDIKA AN BA JEOVÁ?

6. Saida mak motiva ita atu dedika an ba Jeová?

⁶ Razaun importante liu atu dedika an ba Jeová mak tanba Ita hadomi nia. Ita-nia domin laʼós deʼit bazeia ba sentimentu, maibé bazeia ba “koñesimentu neʼebé loos” no “kbiit atu komprende buat espirituál”, neʼe katak buat neʼebé Ita aprende ona kona-ba Jeová neʼebé halo Ita-nia domin ba nia sai boot liután. (Kol 1:9) Bainhira Ita estuda Bíblia, neʼe hametin Ita-nia fiar katak (1) Jeová iha duni, (2) Bíblia mak ninia Liafuan, no (3) nia uza ninia organizasaun atu kumpre ninia hakarak.

7. Saida mak ita presiza halo antes ita dedika an ba Jeová?

⁷ Ema neʼebé atu dedika an ba Jeová presiza hatene hanorin báziku sira iha Bíblia no moris tuir buat neʼebé sira aprende. Sira hakaʼas an atu koʼalia ba ema seluk kona-ba buat neʼebé sira aprende ona. (Mt 28:​19, 20) Sira-nia domin ba Jeová sai buras liután, no sira  hakarak tebes atu adora nia mesak deʼit. Ita rasik halo ida-neʼe ka lae? Ita dedika an no hetan batizmu laʼós atu halo mestre Bíblia ka inan-aman kontente, ka hakarak halo tuir Ita-nia kolega sira, maibé tanba Ita hadomi Jeová ho laran tomak.

8. Oinsá mak sentimentu agradese ajuda Ita atu foti desizaun hodi dedika an ba Jeová? (Salmo 116:​12-14)

⁸ Bainhira Ita hanoin kona-ba buat hotu neʼebé Jeová halo ona mai Ita, neʼe book Ita atu hatudu agradese hodi dedika an ba nia. (Lee Salmo 116:​12-14.) Bíblia hatete katak Jeová mak ida neʼebé fó “prezente diʼak ida-idak no prezente hotu neʼebé perfeitu”. (Tgo 1:17) Prezente neʼebé folin-boot liu hotu mak ninia Oan-Mane Jesus nia sakrifísiu. Hanoin toʼok, Jesus nia sakrifísiu loke dalan ba Ita atu iha relasaun neʼebé besik ho Jeová. No Jeová mós fó ona mai Ita oportunidade atu moris ba nafatin. (1 João 4:​9, 10, 19) Dedika Ita-nia an ba Jeová mak dalan neʼebé diʼak liu atu hatudu agradese ba domin boot no bensaun seluk neʼebé Ita simu. (Deut 16:17; 2 Kor 5:15) Iha livru Moris Haksolok ba Nafatin lisaun 46, pontu 4 esplika kona-ba oinsá ita bele hatudu agradese, neʼebé inklui mós vídeo ba minutu tolu ho títulu Fó Ita-nia prezente ba Maromak.

ITA PRONTU ATU DEDIKA AN NO HETAN BATIZMU?

9. Tanbasá ita la presiza kompara ita-nia an ho ema seluk kona-ba dedikasaun?

⁹ Karik Ita sente katak Ita seidauk prontu atu dedika an no hetan batizmu. Karik Ita presiza halo mudansa balu iha Ita-nia moris atu bele moris tuir Jeová nia matadalan, ka karik Ita presiza tan tempu atu hametin Ita-nia fiar. (Kol 2:​6, 7) Estudante Bíblia ida-idak laʼo ba oin iha dalan neʼebé la hanesan, no laʼós joven hotu mak prontu atu dedika an no hetan batizmu ho idade neʼebé hanesan. Tan neʼe labele kompara Ita-nia an ho ema seluk, maibé koko buka-hatene mudansa saida mak Ita presiza halo no tuirmai halo buat neʼebé Ita bele tuir Ita-nia kbiit.—Gal 6:​4, 5.

10. Ita bele halo saida se Ita rekoñese katak Ita seidauk prontu atu dedika an no hetan batizmu? (Haree mós kaixa “ Ba sira neʼebé sai boot iha lia-loos”.)

¹⁰ Se Ita rekoñese katak Ita seidauk prontu atu dedika an ba Jeová, diʼak atu kontinua halo planu hodi bele kumpre ida-neʼe. Halo orasaun hodi husu Jeová atu ajuda Ita halo mudansa neʼebé Ita presiza halo. (Flp 2:13; 3:16) Ita bele fiar katak nia sei rona no hatán ba Ita-nia orasaun.—1 João 5:14.

TANBASÁ EMA BALU DADA AN?

11. Oinsá Jeová sei ajuda ita atu laran-metin nafatin ba nia?

¹¹ Ema balu dada an atu dedika an no hetan batizmu maski sira prontu ona. Karik sira hanoin: ‘Oinsá se ikusmai haʼu halo sala neʼebé sériu no kongregasaun hasai haʼu?’ Se Ita sente hanesan neʼe, fiar bá katak Jeová sei fó buat hotu neʼebé Ita presiza atu “moris ho loloos iha Jeová nia oin hodi halo nia kontente iha buat hotu”. (Kol 1:10) Nia sei ajuda Ita atu halo buat neʼebé loos. Nia ajuda ona ema barak atu halo nuneʼe. (1 Kor 10:13) Neʼe mak razaun ida tanbasá ema uitoan deʼit mak hasai husi kongregasaun. Jeová ajuda ninia povu atu laran-metin nafatin.

12. Oinsá atu la monu ba sala neʼebé sériu?

 ¹² Ema hotu la perfeitu no hetan koko atu halo buat neʼebé sala. (Tgo 1:14) Maski nuneʼe, Ita presiza deside saida mak Ita sei halo bainhira hasoru tentasaun. Tuir loloos, Ita rasik bele kontrola saida mak Ita sei halo iha Ita-nia moris. Ema balu hanoin katak ita labele kontrola ita-nia sentimentu no hahalok, maibé neʼe la loos. Ita bele aprende atu kontrola Ita-nia hakarak neʼebé sala. Maski Ita hasoru tentasaun, Ita bele hili atu la halo buat neʼebé sala. Atu ajuda Ita halo nuneʼe, Ita presiza halo orasaun loroloron. Kontinua iha toman atu estuda Bíblia mesak, tuir reuniaun sira, no koʼalia ba ema seluk kona-ba Ita-nia fiar. Hodi halo beibeik buat sira-neʼe, bele ajuda Ita atu moris tuir Ita-nia dedikasaun. No labele haluha katak Jeová sei ajuda Ita atu halo ida-neʼe.—Gal 5:16.

13. José hatudu ezemplu diʼak saida mai ita?

¹³ Fasil liu atu moris tuir Ita-nia dedikasaun se Ita deside nanis saida mak Ita sei halo bainhira hasoru tentasaun. Bíblia fó sai kona-ba ema oioin neʼebé halo nuneʼe, maski sira la perfeitu. Porezemplu, Potifar nia feen tenta beibeik José atu toba ho nia. Maibé José hatene ona saida mak nia sei halo iha situasaun neʼe. Bíblia konta katak “José lakohi”, no nia hatete: “Oinsá mak haʼu bele halo hahalok aat tebes neʼe no halo sala hasoru Maromak?” (Gén 39:​8-10) Klaru katak José deside nanis saida mak nia sei halo antes feto neʼe tenta nia. Neʼe halo fasil ba José atu halo buat neʼebé loos kuandu hasoru tentasaun.

14. Oinsá mak ita bele aprende atu la monu ba tentasaun?

¹⁴ Oinsá mak Ita bele banati-tuir José no la monu ba tentasaun? Ita bele deside agora saida mak Ita sei halo bainhira hasoru tentasaun. Aprende atu dehan kedas “lae” bainhira hetan tentasaun atu halo buat neʼebé Jeová odi, no la hanoin beibeik kona-ba tentasaun neʼe. (Sal 97:10; 119:165) Hodi halo nuneʼe, Ita sei la monu ba sala kuandu hetan tentasaun. Ita sei hatene nanis saida mak Ita sei halo.

15. Oinsá mak ita bele hatudu katak ita ‘buka Jeová ho laran’? (Ebreu 11:6)

 ¹⁵ Karik Ita hatene katak Ita hetan ona lia-loos no hakarak serbí Jeová ho laran tomak, maibé iha buat ruma neʼebé nafatin hanetik Ita atu dedika an no hetan batizmu. Ita bele banati-tuir Liurai David nia ezemplu. Ita bele harohan ba Jeová: “Oh Maromak, buka-hatene didiʼak haʼu bá no hatene haʼu-nia laran. Haree didiʼak haʼu bá, no hatene haʼu-nia neon-susar. Haree toʼok se iha hanoin aat ruma iha haʼu-nia laran, no dirije haʼu iha dalan rohan-laek nian.” (Sal 139:​23, 24) Jeová haraik bensaun ba sira neʼebé “buka nia ho laran”. Ita bele hatudu katak Ita halo nuneʼe hodi hakaʼas an atu dedika Ita-nia an no hetan batizmu.—Lee Ebreu 11:6.

KONTINUA HAKBESIK BA JEOVÁ

16-17. Oinsá mak Jeová dada sira neʼebé sai boot iha lia-loos atu hakbesik ba nia? (João 6:44)

¹⁶ Jesus hatete katak Jeová mak dada ninia dixípulu sira. (Lee João 6:44.) Hanoin toʼok oinsá mak neʼe furak tebes no oinsá neʼe afeta Ita. Jeová haree buat diʼak husi ema ida-idak neʼebé nia dada atu hakbesik ba nia. Nia haree ema ida-idak nuʼudar ninia “povu neʼebé espesiál”, ka “rikusoin neʼebé nia hafolin tebes”. (Deut 7:6; nota) Neʼe mak dalan neʼebé Jeová haree Ita.

¹⁷ Karik Ita mak joven ida neʼebé sai boot iha lia-loos. Karik Ita sente katak Ita serbí Jeová tan deʼit Ita-nia inan-aman, laʼós tanba Jeová mak dada Ita. Maski nuneʼe, Bíblia hatete: ‘Hakbesik ba Maromak, no nia sei hakbesik ba Ita.’ (Tgo 4:8; 1 Krón 28:9) Bainhira Ita iha inisiativu atu hakbesik ba Jeová, nia mós sei hakbesik ba Ita. Jeová haree ba Ita ida-idak neʼebé sai parte ba ninia povu. No nia dada ema ida-idak, inklui ema neʼebé sai boot iha lia-loos. Bainhira ema sira-neʼe iha inisiativu atu hakbesik ba Jeová, nia mós sei hakbesik ba sira, hanesan temi iha Tiago 4:8.—Kompara ho 2 Tesalónika 2:13.

18. Iha lisaun tuirmai, ita sei aprende kona-ba saida? (Salmo 40:8)

¹⁸ Bainhira Ita dedika an ba Jeová no hetan batizmu, Ita banati-tuir Jesus. Nia prontu atu fó ninia moris hodi halo tuir ninia Aman nia hakarak. (Lee Salmo 40:8; Ebr 10:7) Iha lisaun tuirmai, ita sei aprende kona-ba saida mak sei ajuda ita atu kontinua serbí Jeová ho laran-metin depois hetan tiha batizmu.