IMAJINA TOʼOK: Ita laʼo daudauk iha muzeu laran neʼebé nakonu ho sasán antigu sira. Ita haree sasán barak mak tohik, malahuk no parte balu lakon. Maski nuneʼe, Ita haree katak iha sasán antigu ida neʼebé kompletu hela. Tuirmai Ita husu ba ema neʼebé tau matan ba muzeu: “Ida-neʼe foun liu fali sira seluk ka?” Ema neʼe hatán: “Lae, ida-neʼe mós tuan. No ema seidauk hadiʼa ka pinta fali.” Ita husu tan: “Sasán neʼe rai iha fatin neʼebé seguru ka?” Ema neʼe hatán: “Lae. Sasán neʼe sempre kona udan no anin, no ema aat barak mós koko atu estraga ida-neʼe.” Karik ikusmai Ita hanoin: ‘Entaun, neʼe halo husi saida?’

Bíblia mós hanesan ho sasán antigu neʼe, Bíblia mak livru neʼebé tuan tebes. Maski iha mós livru antigu sira seluk, maibé livru sira-neʼe sai tohik, malahuk no parte balu lakon. Livru antigu balu nia esplikasaun kona-ba siénsia kontra malu ho siénsia modernu. No livru antigu sira seluk nia matadalan kona-ba médiku perigu tebetebes. No livru antigu balu la kompletu tanba sira-nia parte balu lakon ka ema estraga tiha.

Bíblia la hanesan duni ho livru antigu sira seluk. Maski Bíblia hakerek maizumenus tinan 3.500 liubá, maibé Bíblia nafatin dura toʼo ohin loron. Durante tinan atus ba atus, ema bandu, koko halakon, sunu no koʼalia aat Bíblia, maibé Bíblia nia liafuan tahan ba nafatin. Bíblia fó sai nanis kona-ba buat oioin neʼebé bele ajuda ita ohin loron. Se kompara ho livru antigu sira seluk, Bíblia nia informasaun nafatin bele ajuda ema.​—Haree kaixa “Bíblia nia informasaun tuan ona ka lae?”

Karik Ita hanoin: ‘Bíblia nia matadalan bele ajuda ita ka lae?’ Atu hatán ba pergunta neʼe, ulukliu husu toʼok Ita-nia an: ‘Ohin loron, problema saida deʼit mak ema hasoru? Ida-neʼebé mak aat liu hotu?’ Karik Ita hanoin kona-ba funu, poluisaun, krime ka korrupsaun. Tuirmai ita sei haree Bíblia nia matadalan balu. Bainhira Ita lee matadalan sira-neʼe, husu toʼok Ita-nia an: ‘Se ema aplika matadalan sira-neʼe iha sira-nia moris, mundu neʼe sei sai oinsá?’

HADOMI DAME

“Kontente ba sira neʼebé buka dame, tanba ema sei bolu sira Maromak nia oan.” (Mateus 5:9) “Hakaʼas imi-nia an atu nuneʼe, se bele karik, imi bele moris iha dame ho ema hotu.”​—Roma 12:18.

LARAN-SADIʼA, FÓ PERDUA

“Kontente ba sira neʼebé hatudu laran-sadiʼa, tanba sira sei hetan laran-sadiʼa.” (Mateus 5:7) “Kontinua hatudu pasiénsia ba malu no fó perdua ba malu ho laran tomak maski ema halo buat ruma hasoru imi. Nuʼudar Jeová * fó perdua ba imi ho laran tomak, imi mós tenke halo nuneʼe.”​—Koloso 3:13.

RASA OIOIN MORIS HO UNIDADE

“Husi ema ida deʼit mak [Maromak] halo nasaun hotu atu hela iha rai tomak.” (Apóstolu 17:26) “Maromak la todan ba sorin, maibé iha nasaun hotu, Maromak simu ema hotu neʼebé taʼuk ba nia no halo buat loos.”​—Apóstolu 10:34, 35.

TAU MATAN BA MUNDU

“Maromak Jeová lori mane neʼe no tau nia iha jardín Eden hodi tau matan ba jardín neʼe.” (Gênesis [Kejadian] 2:15) Maromak sei “halakon sira neʼebé estraga rai”.​—Apokalipse 11:18.

ODI HAHALOK KAAN-TEEN NO HAHALOK LA MORÁL

“Hasees an husi hahalok kaan-teen oioin, tanba maski ema ida hetan rikusoin barak, ninia moris la mai husi buat neʼebé nia iha.” (Lucas 12:15) “Iha imi-nia leet keta temi hahalok sala-foʼer, hahalok la moos hotu, ka hahalok kaan-teen, tanba ida-neʼe la loos ba ema santu sira.”​—Éfeso 5:3.

LARAN-MOOS, SERBISU BADINAS

“Ami hakarak atu hatudu laran-moos iha buat hotu.” (Ebreu 13:18) “Ema neʼebé naʼok labele naʼok tan, maibé nia tenke halo serbisu ho badinas.”​—Éfeso 4:28.

IMPORTANTE ATU AJUDA EMA SELUK

“Fó laran-manas ba sira neʼebé laran-tun, apoia sira neʼebé fraku, hatudu pasiénsia ba ema hotu.” (1 Tesalónika 5:14) “Tau matan ba oan-kiak sira no feto-faluk sira iha sira-nia susar.”​—Tiago 1:27.

Bíblia la esplika deʼit kona-ba buat neʼebé ita tenke halo, maibé mós hanorin ita oinsá atu hafolin matadalan sira-neʼe no oinsá atu aplika iha ita-nia moris. Se ohin loron, ema barak aplika matadalan sira iha leten, neʼe bele hadiʼa problema sira neʼebé ema hasoru, loos ka lae? Loos duni. Entaun, Bíblia nia matadalan bele ajuda duni ita. Se nuneʼe, oinsá mak Bíblia nia hanorin bele ajuda Ita loron-loron?

Mane matenek ida hatete: “Liuhusi ema nia hahalok loos mak nia hatudu sai ninia matenek.” (Mateus 11:19) Ita mós hanoin hanesan neʼe ka lae? Ita bele hatene matadalan ida mak matenek ka lae, se Ita aplika ida-neʼe no neʼe lori rezultadu neʼebé diʼak. Karik Ita hanoin: ‘Se Bíblia bele ajuda haʼu ohin loron, neʼe katak aplika Bíblia nia matadalan sei lori rezultadu diʼak, loos ka lae? Entaun, oinsá mak Bíblia bele ajuda haʼu atu hasoru problema oioin?’ Hanoin toʼok kona-ba ezemplu tuirmai.

Uluk, Delfina * iha moris neʼebé kapás no kontente. Maibé derrepente deʼit, nia hasoru problema oioin. Ninia oan-feto joven mate, ninia moris kaben naksobu, no nia mós iha problema ekonomia. Delfina hatete: “Haʼu la hatene atu halo saida loos, oan la iha, laʼen la iha, no uma mós la iha. Haʼu sente la iha folin, la iha forsa no la iha tan objetivu ba haʼu-nia moris.”

Delfina haree rasik katak liafuan sira tuirmai neʼe mak loos: “Ami-nia moris mak toʼo tinan 70, ka se ema ida iha forsa, ninia tinan bele toʼo 80. Maibé tinan sira-neʼe nakonu ho susar no triste; neʼe sei liu lalais deʼit, no ami la iha tan.”​—Salmo (Mazmur) 90:10.

Durante ninia tempu susar, Delfina hetan ajuda husi Bíblia nia matadalan. No dalan neʼebé Bíblia troka ninia moris mak furak tebes. Iha informasaun tuirmai, ita bele haree ezemplu husi ema balu neʼebé hetan ona ajuda husi Bíblia hodi aplika Bíblia nia matadalan. Ba ema sira-neʼe, Bíblia mak atu hanesan ho sasán antigu ida neʼebé temi ona iha pájina 4. Bíblia la hanesan duni ho livru antigu sira seluk, Bíblia nia informasaun bele ajuda nafatin ema. Neʼe bele akontese tanba Bíblia mak Maromak nia Liafuan.​—1 Tesalónika 2:13.

Karik Ita mós rekoñese katak moris mak badak deʼit no nakonu ho susar oioin. Se nuneʼe, iha neʼebé mak Ita bele hetan kmaan, apoia no matadalan bainhira hasoru problema oioin?

Mai ita haree pontu tolu oinsá Bíblia bele ajuda Ita-nia moris. Bíblia bele hanorin Ita oinsá atu

1. hadook an husi problema sira.

2. rezolve problema sira.

3. tahan hasoru problema sira neʼebé Ita la bele rezolve.

Informasaun sira tuirmai sei koʼalia kona-ba pontu tolu neʼe.