HAPARA SIKLU ODI MALU
3 | Hasai ódiu husi Ita-nia hanoin
Bíblia hanorin:
“Troka imi-nia an hodi hafoun imi-nia hanoin, atu nuneʼe imi bele hatene loloos kona-ba Maromak nia hakarak neʼebé diʼak no perfeitu no halo Maromak kontente.”—ROMA 12:2.
Neʼe katak sá:
Jeová interese ba ita-nia hanoin. (Jeremias 17:10) Ita presiza hasees an husi hahalok no liafuan ódiu, maibé neʼe deʼit la toʼo. Hahalok no liafuan mai husi ita-nia neon no laran. Tan neʼe, ita presiza hasai tiha ódiu husi ita-nia hanoin no sentimentu. Hodi halo nuneʼe mak ita bele “hafoun” ita-nia an no hapara siklu odi malu.
Saida mak Ita bele halo:
Hanoin didiʼak saida mak Ita sente kona-ba ema seluk, liuliu ema husi rasa ka nasaun seluk. Husu Ita-nia an: ‘Haʼu sente oinsá kona-ba sira? Haʼu sente hanesan neʼe tanba haʼu-nia esperiénsia rasik no haʼu koñese didiʼak sira ka lae? Ka tanba ema seluk koʼalia aat kona-ba sira?’ Hadook an husi média sosiál, filme ka buat seluk neʼebé bele haburas sentimentu odi no violénsia.
Maromak nia Liafuan bele ajuda ita atu hasai tiha ódiu husi ita-nia hanoin no sentimentu
La fasil atu hatene didiʼak ita-nia hanoin no sentimentu. Maibé Maromak nia Liafuan bele ajuda ita atu ‘hatene ita-nia hanoin no hakarak iha laran’. (Ebreu 4:12) Tan neʼe kontinua aprende Bíblia. Kompara Bíblia nia hanorin ho Ita rasik nia hanoin no hakaʼas an atu hanoin tuir Bíblia nia hanorin. Maski ita-nia sentimentu odi mak metin duni iha ita-nia neon no laran, Maromak nia Liafuan bele ajuda ita atu halakon ida-neʼe.—2 Korinto 10:4, 5.
Karik Ita sei gosta
BÍBLIA TROKA EMA NIA MORIS
“Haʼu laʼós tan ema siʼak-teen”
Saida mak book Sébastien Kayira atu la halo tan violénsia no abuza ninia feen?
