Tanbasá mak iha siklu odi malu?
Tanbasá mak mundu nakonu ho siklu odi malu? Atu hatene razaun, ita presiza komprende ódiu mak saida, tanbasá mak ema komesa odi, no oinsá mak ódiu bele habelar.
Ódiu mak saida?
Neʼe mak sentimentu neʼebé la gosta tebes, ka hakribi ema ka grupu ruma. Sentimentu neʼe iha ba tempu kleur no kontinua hanoin aat ka rai hirus.
TANBASÁ MAK EMA KOMESA ODI
Ema komesa odi ema seluk ho razaun oioin. Baibain ema hatudu sentimentu odi ba ema hotu iha grupu ida maski laʼós ema hotu husi grupu neʼe mak halo buat neʼebé aat. Karik sira hanoin katak ema hotu husi grupu neʼe mak ema aat no labele hadiʼa sira-nia hahalok. Tuir sira-nia hanoin, grupu neʼe la iha folin, perigu, ka kria problema. Ema neʼebé sente odi ba ema seluk karik hasoru ona violénsia, situasaun la justisa, ka iha ona akontesimentu ruma neʼebé book sira atu iha sentimentu ódiu.
OINSÁ MAK ÓDIU BELE HABELAR
Ema bele komesa odi ema seluk maski sira seidauk hasoru malu. Porezemplu, ema ida bele hanoin tuir deʼit buat neʼebé ninia família ka belun mak koʼalia kona-ba grupu ruma. Tan neʼe, kuandu ema balu iha komunidade mak odi grupu ruma, lakleur deʼit ema barak iha komunidade neʼe mós sei odi grupu neʼe.
Kuandu ita hatene oinsá mak ódiu bele mosu no habelar, ita sei komprende tanbasá ema barak iha mundu tomak odi malu. Maibé atu hapara siklu odi malu, ita presiza buka-hatene Bíblia nia esplikasaun kona-ba hun husi sentimentu ódiu.
BÍBLIA ESPLIKA KONA-BA ÓDIU NIA HUN
LAʼÓS EMA MAK HUN BA ÓDIU. Neʼe hahú bainhira anju ida iha lalehan komesa kontra hasoru Maromak. Anju neʼe mak Diabu Satanás, neʼebé sai nuʼudar “ohodór” bainhira nia komesa kontra. Nia mós kontinua book ema atu odi malu no hakanek malu tanba nia mak “bosok-teen no lia-bosok nia aman”. (João 8:44; 1 João 3:11, 12) Bíblia esplika katak nia laran-aat, hirus-teen, no gosta atu ataka ema.—Job 2:7; Apokalipse 12:9, 12, 17.
FASIL BA EMA SALA-NAʼIN ATU HABURAS ÓDIU. Mane primeiru Adão halo tuir Satanás. Rezultadu mak ema hotu moris mai nuʼudar sala-naʼin. (Roma 5:12) Adão nia oan-mane primeiru Caim odi ninia alin Abel, no oho nia. (1 João 3:12) Klaru katak iha duni ema barak neʼebé hatudu domin no hanoin ema seluk. Maibé tanba ema hotu sala-naʼin, ema barak hanoin an, laran-moras, foti an, no neʼe bele book sira atu haburas sentimentu ódiu.—2 Timóteo 3:1-5.
FASIL ATU ODI MALU KUANDU LA IHA TOLERÁNSIA. Mundu ohin loron promove hahalok la diʼak neʼebé la hanoin malu. Tanba Diabu Satanás ka “aat-naʼin mak domina mundu tomak”, mundu sai nakonu ho hahalok neʼebé la iha toleránsia, diskriminasaun, hatún malu, no violénsia.—1 João 5:19.
Bíblia la esplika deʼit oinsá mak ódiu tama iha mundu, maibé esplika mós solusaun ba problema neʼe.
Karik Ita sei gosta
PERGUNTA KONA-BA BÍBLIA
Maromak mak kria Diabu ka lae?
Satanás mai husi neʼebé? Aprende tanbasá mak Jesus dehan katak Diabu “la kaer metin ba lia-loos”.
PERGUNTA KONA-BA BÍBLIA
Adão no Eva halo sala saida?
Adão no Eva kontra Maromak no hatutan sala ba sira-nia oan no bei-oan hotu.
