Kuandu ita-nia belun hetan susar tanba kondisaun mentál, neʼe halo ita estrese. Maibé ita bele hatudu katak ita hanoin sira hodi ajuda sira atu bele tahan hasoru problema ho saúde mentál. Oinsá?

“Ema hotu tenke lalais atu rona.”​—TIAGO 1:19.

Dalan diʼak ida atu ajuda Ita-nia belun mak hodi rona kuandu nia hakarak koʼalia. Keta hanoin katak Ita tenke hatán ba ninia liafuan hotu. Rona didiʼak no koko atu komprende ninia sentimentu. Keta kritika ka tesi-lia. Hanoin-hetan, karik nia koʼalia buat ruma arbiru no tuirmai arrepende fali.​—Job 6:2, 3.

“Koʼalia hodi fó kmaan.”​—1 TESALÓNIKA 5:14.

Karik Ita-nia belun hanoin barak, ka sente katak nia la iha folin. Hodi halo nia fiar katak Ita hanoin nia, Ita bele fó kmaan no anima nia maski Ita ladún hatene atu koʼalia saida.

“Belun neʼebé loos hatudu domin iha tempu hotu.”​—PROVÉRBIOS 17:17.

 Halo buat simples atu ajuda nia. Duké siʼik deʼit saida mak Ita bele halo atu ajuda, diʼak atu husu saida mak nia hakarak Ita atu halo. Se susar ba nia atu esplika buat neʼebé nia presiza, koko fó sujestaun ruma neʼebé Ita bele halo hamutuk ho nia, hanesan laʼo halimar. Ka Ita bele oferese ajuda atu kompras, hamoos, ka serbisu seluk.​—Galásia 6:2.

“Hatudu pasiénsia.”​—1 TESALÓNIKA 5:14.

Karik Ita-nia belun laʼós sempre prontu atu koʼalia. Halo nia fiar katak Ita kontente atu rona bainhira nia hakarak atu koʼalia. Tanba ninia moras, karik nia koʼalia ka halo buat ruma neʼebé hakanek Ita. Karik nia kansela ninia planu ho Ita, ka ninia sentimentu tun-saʼe. Hatudu pasiénsia no komprende ninia situasaun nuʼudar Ita fó apoiu neʼebé nia presiza.​—Provérbios 18:24.

“Haʼu hatudu duni katak haʼu mak belun ida atu nia bele tau fiar. Maski haʼu la iha solusaun ba ninia problema, pelumenus haʼu rona ba buat neʼebé nia hakarak koʼalia. Dala ruma nia presiza deʼit atu ema ruma rona ba nia hodi nia bele sente kmaan.”​—Farrah, a neʼebé ninia belun hasoru problema kona-ba han, laran-taridu, no depresaun.

“Haʼu iha belun ida neʼebé laran-diʼak no iha hanoin pozitivu. Nia konvida haʼu ba ninia uma atu han hahán neʼebé gostu. Ninia domin halo fasil ba haʼu atu fó sai haʼu-nia sentimentu. Neʼe anima tebes haʼu!”​—Ha-eun, neʼebé iha depresaun.

“Importante tebes atu hatudu pasiénsia. Bainhira haʼu-nia feen halo buat ruma neʼebé halo haʼu triste, haʼu fó-hanoin ba haʼu-nia an katak neʼe tanba ninia moras. Neʼe ajuda haʼu atu la sai hirus no komprende ninia sentimentu.”​—Jacob, neʼebé ninia feen iha depresaun.

“Haʼu-nia feen fó kmaan no apoia tebes haʼu. Bainhira haʼu sente laran-taridu, nia nunka obriga haʼu atu halo buat ruma neʼebé haʼu la gosta. Tan neʼe, dala ruma nia labele halo buat neʼebé loloos nia hakarak halo. Ninia sakrifísiu no laran-luak mak furak tebes.”​—Enrico, neʼebé hasoru problema kona-ba laran-taridu.