Desizaun neʼebé Ita presiza halo
Matadalan neʼebé ita halo tuir sei fó impaktu boot ba ita-nia moris. Maromak Jeová hatene ida-neʼe, tan neʼe mak nia hakarak ita atu moris tuir ninia matadalan sira.
Jeová hakarak ita atu moris kontente no dame.
“Haʼu, Jeová, mak imi-nia Maromak, haʼu hanorin imi kona-ba buat neʼebé diʼak liu ba imi, no dirije imi iha dalan neʼebé imi tenke laʼo bá. Haʼu hakarak atu imi halo tuir haʼu-nia mandamentu sira! Se imi halo nuneʼe, imi-nia dame sei sai hanesan mota no imi-nia hahalok loos sei sai hanesan tasi nia laloran.”—Isaias 48:17, 18.
Tanba Maromak mak kria ita, nia hatene dalan neʼebé diʼak liu ba ita atu moris tuir. Nia hakarak ita atu halo tuir ninia matadalan tanba neʼe sei lori diʼak ba ita. Ita la duvida kona-ba rezultadu neʼebé ita sei hetan kuandu ita halo tuir ninia mandamentu sira. Ita sei sempre halo desizaun neʼebé loos no rezultadu mak ita sei moris kontente no dame.
Jeová la husu ita atu halo buat neʼebé liu fali ita-nia kbiit.
“Mandamentu neʼebé haʼu fó sai ba imi ohin mak laʼós buat neʼebé susar liu ba imi, ka dook liu husi imi.”—Deuteronómio 30:11.
Atu moris tuir Maromak nia matadalan sira, karik Ita presiza halo mudansa ba Ita-nia hanoin no hahalok. Maibé Maromak Jeová la husu ita atu halo buat neʼebé liu fali ita-nia kbiit. Nuʼudar Kriadór, nia hatene buat neʼebé ita bele halo no labele halo. Kuandu ita koñese didiʼak Jeová, ita sei komprende katak “ninia ukun-fuan sira la susar liu atu kumpre”.—1 João 5:3.
Jeová promete atu ajuda ema neʼebé deside atu moris tuir ninia matadalan.
“Haʼu, Jeová, ó-nia Maromak, mak kaer ó-nia liman-loos, haʼu dehan ba ó: ‘Keta taʼuk. Haʼu sei ajuda ó.’”—Isaias 41:13.
Ita bele moris tuir Bíblia nia matadalan tanba Maromak sei ajuda ita. Nia bele halo nuneʼe liuhusi ninia Liafuan Bíblia neʼebé fó ita aten-brani no esperansa.
Ema barak iha mundu tomak rekoñese katak sira-nia moris sai diʼak liu kuandu halo tuir Bíblia nia matadalan. Ami anima Ita atu aprende liután kona-ba konsellu diʼak husi Bíblia. Ita bele estuda broxura Moris Haksolok ba Nafatin iha jw.org/tdt ho gratuitu. Broxura neʼe sei esplika kona-ba tópiku tuirmai:
-
Oinsá mak Bíblia bele ajuda Ita?
-
Bíblia fó esperansa kona-ba futuru
-
Ita bele fiar buat neʼebé Bíblia hatete ka lae?
Kuandu Ita buka-hatene Maromak nia Liafuan Bíblia, Ita bele hatene katak informasaun husi Bíblia sei vale toʼo ohin loron, “sempre loos, agora no ba nafatin”. (Salmo 111:8) Halo tuir Bíblia nia matadalan sei lori moris neʼebé diʼak liu ba ita. Maibé Maromak la obriga ita atu halo nuneʼe. (Deuteronómio 30:19, 20; Josué 24:15) Neʼe mak ita rasik nia desizaun.
