Matadalan neʼebé ajuda ita
Bíblia nia matadalan ajuda ona ema millaun ba millaun nia moris iha dalan haat tuirmai neʼe.
1. Moris kaben
Ema iha hanoin la hanesan kona-ba moris kaben nian no saida mak sira presiza halo atu moris kontente nuʼudar feen-laʼen.
BÍBLIA DEHAN: “Laʼen ida-idak tenke hadomi ninia feen hanesan ninia an rasik, no feen mós tenke hatudu respeitu kleʼan ba ninia laʼen.”—Éfeso 5:33.
NEʼE KATAK SÁ: Maromak mak halo arranju kaben nian, tan neʼe nia hatene saida mak feen-laʼen presiza atu moris kontente. (Marcos 10:6-9) Sira bele moris kontente kuandu sira ida-idak la fokus ba buat neʼebé sira bele simu, maibé fokus ba buat neʼebé sira ida-idak bele fó ba sira-nia pár. Laʼen hatudu domin ba ninia feen liuhusi hahalok no dalan neʼebé nia tau matan ba nia feen. No feen hatudu respeitu ba ninia laʼen liuhusi liafuan no hahalok.
BÍBLIA NIA MATADALAN AJUDA ITA: Quang no Thi husi Vietname la kontente ho sira-nia moris kaben. Quang hatudu hahalok la diʼak. Nia dehan: “Haʼu la interese ba Thi nia sentimentu, no haʼu hamoe nia beibeik.” Thi hakarak soe malu. Nia dehan: “Haʼu sente labele tau fiar no respeitu haʼu-nia laʼen.”
Ikusmai, Quang no Thi aprende Bíblia no komesa aplika Éfeso 5:33 iha sira-nia moris. Quang dehan: “Eskritura neʼe ajuda haʼu atu rekoñese katak haʼu presiza hatudu laran-diʼak ba Thi no halo Thi sente katak haʼu hadomi nia no tau matan nia iha dalan fíziku no emosaun. Kuandu haʼu halo ida-neʼe, haʼu mós bele sente ninia domin no respeitu.” Thi mós dehan: “Bainhira haʼu aplika liután Éfeso 5:33 no hatudu respeitu ba haʼu-nia laʼen, nia mós hatudu liután domin mai haʼu, proteje haʼu, no halo haʼu sente dame.”
Atu hetan informasaun liután kona-ba moris kaben nian, lee Matan-moris bá! No. 2 2018 ho títulu “Segredu 12 ba família atu moris kontente” iha jw.org/tdt.
2. Respeitu ema seluk
Ema barak la respeitu ema seluk tanba sira-nia rasa, nasaun, hatais, relijiaun, ka orientasaun seksuál la hanesan.
BÍBLIA DEHAN: “Hatudu respeitu ba ema oioin.”—1 Pedro 2:17.
NEʼE KATAK SÁ: Bíblia la haruka ita atu hakribi ema husi rasa ka nasaun seluk, ka ema neʼebé omoseksuál. Maibé Bíblia enkoraja ita atu hatudu respeitu ba ema hotu, la haree ba sira-nia rasa, nasaun, ka pozisaun sosiál. (Apóstolu 10:34) Maski ita la konkorda ho ema seluk nia fiar ka buat neʼebé sira halo, maibé ita nafatin hatudu respeitu no laran-diʼak ba sira.—Mateus 7:12.
BÍBLIA NIA MATADALAN AJUDA ITA: Daniel rona katak ema Ázia lori perigu ba ninia nasaun. Neʼe halo nia odi sira no insulta sira iha fatin públiku. Nia dehan: “Haʼu hanoin haʼu-nia hahalok neʼe mak atu apoia haʼu-nia nasaun. Haʼu nunka hanoin katak hahalok hanesan neʼe sala.”
Ikusmai Daniel aprende Bíblia. Nia dehan: “Haʼu tenke troka haʼu-nia hanoin. Haʼu tenke haree ema seluk iha dalan neʼebé Maromak haree sira, katak ita hotu mak hanesan deʼit maski nasaun la hanesan.” Agora, Daniel hanoin la hanesan uluk ona kuandu hasoru ema seluk. Nia dehan: “Haʼu la hanoin tan sira mai husi neʼebé. Haʼu hadomi ema hotu no iha belun diʼak husi nasaun oioin.”
Atu hetan informasaun liután, lee Matan-moris bá! No. 3 2020 ho títulu “Oinsá atu halakon diskriminasaun?” iha jw.org/tdt.
3. Osan
Ema barak hakaʼas an atu sai riku hodi bele moris kontente no iha futuru neʼebé diʼak.
Bíblia dehan: “Matenek bele fó protesaun hanesan osan bele fó protesaun, maibé koñesimentu mak diʼak liu tanba matenek bele salva ninia naʼin nia moris.”—Eclesiastes 7:12.
NEʼE KATAK SÁ: Ita presiza osan, maibé osan labele fó garantia mai ita atu moris kontente ka iha futuru neʼebé diʼak. (Provérbios 18:11; 23:4, 5) Neʼe depende ba oinsá ita aplika Maromak nia matenek neʼebé fó sai iha Bíblia.—1 Timóteo 6:17-19.
BÍBLIA NIA MATADALAN AJUDA ITA: Mane ida iha Indonézia naran Cardo hakaʼas an buka rikusoin. Nia dehan: “Haʼu iha buat hotu neʼebé ema seluk buka. Haʼu bele halo viajen, sosa sasán neʼebé karun, karreta no uma.” Maibé buat hotu neʼe la dura. Cardo dehan: “Ema lohi haʼu. Osan neʼebé haʼu serbisu makaʼas atu hetan durante tinan barak lakon derrepente deʼit. Haʼu uza moris tomak atu buka rikusoin, maibé ikusmai haʼu sente mamuk, la iha folin, no buat hotu mak saugati deʼit.”
Cardo hahú aplika Bíblia nia matadalan kona-ba osan. Nia la fokus tan atu buka rikusoin, maibé nia halaʼo moris simples. Nia dehan: “Rikusoin neʼebé loos no ba nafatin mak rikusoin espirituál. Haʼu bele toba-dukur iha kalan, no sente kontente tebetebes.”
Atu buka-hatene liután oinsá Bíblia nia haree kona-ba osan, lee informasaun “Edukasaun no osan bele fó garantia ba futuru ka lae?” iha Livru Haklaken No. 3 2021 iha jw.org/tdt.
4. Hahalok seksuál
Ema iha opiniaun oioin kona-ba hahalok seksuál neʼebé sira bele simu ka la simu.
BÍBLIA DEHAN: “Hasees an husi sala seksuál. Imi ida-idak tenke hatene oinsá atu kontrola imi-nia isin rasik hodi bele santu nafatin no iha dignidade, atu la kaan hahalok seksuál neʼebé labele kontrola hanesan ema husi nasaun sira neʼebé la hatene Maromak.”—1 Tesalónika 4:3-5.
NEʼE KATAK SÁ: Bíblia fó sai limite kona-ba hahalok seksuál. Tuir Bíblia, liafuan “sala seksuál” refere ba adultériu, prostituisaun ka faʼan an, relasaun seksuál entre ema neʼebé laʼós feen-laʼen, omoseksuál, no mós relasaun seksuál ho animál. (1 Korinto 6:9, 10) Relasaun seksuál mak prezente neʼebé Maromak fó só deʼit ba mane no feto neʼebé kaben ona.—Provérbios 5:18, 19.
BÍBLIA NIA MATADALAN AJUDA ITA: Feto ida iha Austrália naran Kylie dehan: “Bainhira haʼu sei klosan, haʼu hanoin katak se haʼu halo relasaun seksuál ho ema ruma, haʼu bele sente domin no seguru. Maibé tuir loloos, ida-neʼe la akontese. Haʼu sente deʼit triste no la seguru.”
Ikusmai, Kylie aprende no aplika buat neʼebé Bíblia hanorin. Nia dehan: “Haʼu komprende katak Maromak nia matadalan ajuda ita atu la monu ba susar. Agora haʼu sente seguru no domin tanba moris tuir Jeová nia hakarak. Aplika Bíblia nia matadalan sira salva haʼu no ajuda haʼu sees husi problema oioin!”
Atu hetan informasaun liután, lee “Saida mak Bíblia hatete kona-ba mane no feto neʼebé hela hamutuk maski la kaben?” iha jw.org/tdt.
Ita-nia Kriadór ajuda ita hatene saida mak loos no sala. Maski dala ruma la fasil atu halo tuir ninia matadalan, maibé ita-nia hakaʼas an sei lori kontente ba nafatin.
