Se ema ruma husu Ita: “Ita hakarak moris ba nafatin ka lae?”, karik Ita sei hatán: “Hakarak.” Maibé karik Ita hanoin neʼe mak mehi deʼit, tanba realidade mak ema hotu sei mate.

Maibé hanoin toʼok pergunta ida tan: “Ita hakarak mate ka lae?” Baibain, ema sei hatán: “Lakohi.” Neʼe hatudu saida? Loloos, maski hasoru terus ka susar oioin, ita-nia hakarak mak atu moris. Neʼe tanba Maromak kria ita ho hakarak atu moris ba nafatin. Bíblia dehan: “Nia tau tempu ba nafatin iha ema nia fuan-laran.”—Eclesiastes (Pengkhotbah) 3:11.

Maibé realidade mak ema la bele moris ba nafatin. Tanbasá mak hanesan neʼe? No saida mak Maromak halo ona atu hadiʼa situasaun neʼe? Bíblia nia resposta sei halo ita sente kmaan, no neʼe mós liga ho razaun tanbasá mak Jesus hetan terus no mate.

Gênesis, livru primeiru husi Bíblia, iha kapítulu 1 toʼo 3 esplika katak Maromak kria Adão no Eva atu sira bele moris ba nafatin. Nia mós fó-hatene oinsá mak sira bele hetan bensaun neʼe. Maibé sira naʼin-rua la halo tuir no lakon moris rohan-laek. Tanba istória neʼe simples, ema barak hanoin katak istória neʼe ema mak inventa deʼit. Maibé tuir loloos, ita bele fiar katak neʼe mak istória neʼebé akontese duni, hanesan ho istória kona-ba Jesus neʼebé hakerek iha Evanjellu.

Entaun, rezultadu mak saida? Bíblia dehan: “Liuhusi ema ida [Adão] mak sala tama iha mundu, no mate tanba sala. Nuneʼe mate habelar ba ema hotu tanba ema hotu sala.” (Roma 5:12) Adão halo sala tanba la halo tuir Maromak. Ikusmai, nia lakon moris rohan-laek no mate. Tan neʼe, ema hotu nuʼudar Adão nia bei-oan, moris mai nuʼudar sala-naʼin. Nuneʼe, ita sai moras, ferik-katuas no mate. Neʼe hanesan moras ida neʼebé hadaʼet husi inan-aman ba sira-nia oan. Maibé, saida mak Maromak halo ona atu hadiʼa situasaun neʼe?

Maromak halo ona arranju ida atu sosa fali buat neʼebé Adão halakon ona, katak moris rohan-laek. Maibé oinsá?

Eskritura iha Roma 6:23 dehan: “Sala nia kolen mak mate.” Neʼe katak konsekuénsia husi Adão nia sala mak mate. Ita mós mate tanba ita sala-naʼin. Neʼe mak situasaun neʼebé ita ema la bele troka, tanba sala neʼe hadaʼet nanis ona husi Adão. Tan neʼe mak ho domin, Maromak haruka ninia Oan Jesus atu lori ita-nia todan. Maibé oinsá Maromak halo ida-neʼe?

Tanba Adão la halo tuir Maromak, ema hotu halo sala no mate. Tan neʼe, presiza fali ema perfeitu ida neʼebé halo tuir Maromak toʼo mate atu bele kasu ita-nia sala. Bíblia dehan: “Liuhusi mane ida deʼit neʼebé lakohi halo tuir, ema hotu sai sala-naʼin, nuneʼe mós liuhusi ema ida deʼit neʼebé halo tuir, Maromak sei haree ema barak nuʼudar ema loos.” (Roma 5:19) Jesus mak ema perfeitu ida neʼebé halo tuir Maromak. Nia tun husi lalehan mai rai, moris nuʼudar ema perfeitu, * no mate tanba ita. Neʼe loke dalan mai ita atu sai ema neʼebé loos iha Maromak nia haree no fó ita esperansa atu bele moris ba nafatin.

Maibé tanbasá mak Jesus tenke mate atu kasu ema nia sala? Maromak neʼebé Boot Liu Hotu bele fó perdua deʼit ba Adão nia bei-oan sira atu sira bele moris ba nafatin, loos ka lae? Loos duni, se Maromak hakarak, nia bele halo hanesan neʼe. Maibé, nia lakohi kontra fali ninia prinsípiu neʼebé dehan: “Sala nia kolen mak mate.” Nia mak Maromak neʼebé kaer metin ba justisa.—Salmo (Mazmur) 37:28.

Se Maromak la hatudu justisa iha situasaun neʼe, karik ema sei duvida katak iha situasaun seluk mós Maromak sei la kaer metin ba justisa. Porezemplu, karik Maromak sei todan ba sorin bainhira nia tesi lia ba ema atu fó kastigu-mate  ka moris ba nafatin. Karik nia mós sei la kumpre ninia promesa. Loos duni, tanba Maromak kaer metin ba justisa, neʼe halo ita fiar katak nia sempre halo buat neʼebé loos.

Liuhusi Jesus nia mate, Maromak loke dalan ba ema atu bele moris ba nafatin iha Paraízu, ka fatin furak iha mundu neʼe. Iha João 3:16, Jesus hatete: “Maromak hadomi tebes mundu toʼo fó nia Oan-Mane mesak, atu nuneʼe ema hotu neʼebé hatudu fiar iha nia sei la lakon maibé hetan moris rohan-laek.” Loos, Jesus mate laʼós deʼit tanba Maromak kaer metin ba justisa, maibé liuliu tanba Nia hadomi tebes ema.

Maibé tanbasá mak Jesus tenke terus? Hanoin toʼok lai kona-ba neʼe: Diabu hasaʼe lia katak ema sei la laran-metin ba Maromak kuandu hasoru tentasaun no susar neʼebé boot. (Jó [Ayub] 2:4, 5) Diabu nia liafuan neʼe rona hanesan loos, tanba nia konsege book ema perfeitu Adão monu ba sala. Maibé tanba Jesus laran-metin toʼo mate iha terus laran, nia hatudu ho momoos katak Adão mós bele laran-metin nafatin ba Maromak, hodi nuneʼe nia hatudu katak Satanás mak bosok-teen. (1 Korinto 15:45) Jesus nia hahalok tahan terus toʼo rohan neʼe mós sai nuʼudar ezemplu furak mai ita atu banati-tuir. (1 Pedro 2:21) Ikusmai, Maromak fó kolen ba ninia Oan Jesus hodi fó ba nia moris rohan-laek iha lalehan.

Tanba Jesus mate, neʼe fó oportunidade mai ita atu bele moris ba nafatin. Ita hakarak ida-neʼe ka lae? Maibé saida mak ita presiza halo atu bele hetan moris rohan-laek? Jesus dehan: “Neʼe mak moris rohan-laek: Katak sira hatene didiʼak Ita, Maromak loos mesak deʼit, no ida neʼebé Ita haruka mai, Jesus Kristu.”—João 17:3.

Ami konvida Ita-Boot atu aprende liután kona-ba Jeová, Maromak neʼebé loos, no mós kona-ba ninia Oan Jesus Kristu. Testemuña ba Jeová iha Ita-nia área sei prontu atu ajuda Ita. Atu hatene liután kona-ba neʼe, favór ida, loke ami-nia sítiu www.pr418.com/tdt.