ITA BELE DESIDE RASIK ITA-NIA FUTURU KA LAE? Ema balu fiar katak destinu mak kontrola ema nia moris no ita labele troka ida-neʼe. Bainhira sira la konsege kumpre sira-nia hakarak, sira sei hatete: “Neʼe mak haʼu-nia destinu!”

Ema seluk sente laran-kraik bainhira la iha dalan atu sees husi problema hotu neʼebé akontese iha mundu. Karik sira koko ona atu hadiʼa sira-nia moris, maibé funu, krime, dezastre naturais, no moras estraga beibeik sira-nia planu. Sira hatete: “Moris mak neʼe, simu deʼit.”

Loos duni, Ita-nia situasaun moris nian bele kona duni Ita-nia planu sira. (Eclesiastes 9:11) Maski nuneʼe, kona-ba Ita-nia moris ba nafatin iha futuru, Bíblia dehan katak neʼe depende ba Ita-nia desizaun rasik. Mai ita haree ezemplu balu.

Bainhira povu Izraél besik ona atu tama ba rai neʼebé Maromak promete, Moisés fó sai Jeová nia liafuan ba sira: “Haʼu tau moris no mate, bensaun no malisan iha imi-nia oin; no imi tenke hili moris atu nuneʼe imi bele moris, imi no imi-nia bei-oan sira, hodi hadomi Jeová, imi-nia Maromak, rona ba ninia liafuan no kontinua laran-metin ba nia.”​—Deuteronómio 30:15, 19, 20.

“Haʼu tau moris no mate, bensaun no malisan iha imi-nia oin; no imi tenke hili moris.”​—Deuteronómio 30:19

Loos duni! Maromak salva ema Izraél husi sira-nia moris nuʼudar atan iha rai-Ejitu no fó ba sira oportunidade atu moris livre no kontente iha rai neʼebé nia promete. Maibé ida-neʼe la mosu mesak deʼit. Atu bele goza bensaun sira-neʼe, sira tenke “hili moris”. Oinsá? ‘Hodi hadomi Maromak, rona ba ninia liafuan, no kontinua laran-metin ba nia.’

Nuneʼe mós ohin loron, buat neʼebé Ita hili sei determina Ita-nia futuru. Hodi deside atu hadomi Maromak, tau atensaun ba ninia liafuan, no laran-metin ba nia, neʼe katak Ita hili moris ba nafatin iha mundu paraízu. Maibé hakat sira-neʼe envolve saida?

Domin mak Maromak nia hahalok neʼebé importante liu. Apóstolu João hakerek: “Maromak mak domin.” (1 João 4:8) Tan neʼe bainhira ema husu Jesus kona-ba mandamentu neʼebé boot liu, nia hatete: “Imi tenke hadomi Jeová, imi-nia Maromak, ho imi-nia laran tomak, ho imi-nia moris tomak, no ho imi-nia neon tomak.” (Mateus 22:37) Relasaun diʼak ho Maromak tenke bazeia ba domin, laʼós taʼuk. Se nuneʼe, tanbasá mak ita presiza deside atu hadomi Maromak Jeová?

Jeová nia domin ba ema mak hanesan inan-aman nia domin ba oan. Maski inan-aman la perfeitu, maibé ho domin sira fó matadalan, anima, apoiu, no dixiplina ba oan tanba hakarak oan atu moris kontente no susesu. Entaun inan-aman hakarak saida husi sira-nia oan? Sira hakarak oan atu hadomi sira no hafolin buat neʼebé inan-aman hanorin. Entaun, normál se ita-nia Aman iha lalehan hakarak ita atu hadomi no hafolin buat hotu neʼebé nia halo ona ba ita, loos ka lae?

Iha lian orijinál neʼebé Bíblia uza, baibain liafuan “rona” signifika “halo tuir”. Bainhira inan-aman  dehan ba oan atu “rona ba inan-aman”, sira hakarak oan atu halo tuir, loos ka lae? Rona ba Maromak nia liafuan katak aprende no halo tuir buat neʼebé Maromak hatete. Ita labele rona Maromak nia lian, maibé ita bele lee no aplika ninia liafuan neʼebé temi iha Bíblia.​—1 João 5:3.

Atu hatene tanbasá mak importante atu rona ba Maromak nia liafuan, Jesus hatete: “Ema labele moris deʼit ho paun, maibé ho liafuan hotu neʼebé sai husi Jeová nia ibun.” (Mateus 4:4) Ai-han mak importante ba isin, maibé koñesimentu kona-ba Maromak mak importante liu. Tanbasá? Liurai Salomão esplika: “Matenek bele fó protesaun hanesan osan bele fó protesaun, maibé koñesimentu mak diʼak liu tanba matenek bele salva ninia naʼin nia moris.” (Eclesiastes 7:12) Koñesimentu no matenek husi Maromak bele proteje ita ohin loron no ajuda ita atu halo desizaun matenek neʼebé sei lori moris ba nafatin.

Hanoin fali Jesus nia ilustrasaun neʼebé hatete: “Odamatan kloot no dalan kiʼik tebes mak lori ema ba moris, no ema uitoan deʼit mak hetan dalan neʼe.” (Mateus 7:13, 14) Se ita laʼo iha dalan kiʼik neʼebé sei lori ita ba moris, ita presiza ema atu hatudu dalan ba ita, no ita tenke besik nafatin ho ema neʼe. Tan neʼe, ita mós iha razaun diʼak atu besik nafatin ba Maromak. (Salmo 16:8) Oinsá mak ita bele halo nuneʼe?

Loron-loron, iha buat barak neʼebé ita tenke halo no mós buat seluk tan neʼebé ita hakarak atu halo. Buat sira-neʼe bele halo ita okupadu toʼo la iha tempu atu hanoin kona-ba Maromak nia hakarak. Tan neʼe, Bíblia fó-hanoin ita: “Kontinua haree didiʼak oinsá imi halaʼo imi-nia moris, atu imi la moris nuʼudar ema beik maibé nuʼudar ema matenek. Uza didiʼak imi-nia tempu, tanba loron sira-neʼe mak aat.” (Éfeso 5:15, 16) Se Ita hafolin liu Ita-nia relasaun ho Maromak, neʼe sei ajuda Ita atu nafatin besik ho nia.​—Mateus 6:33.

Maski Ita labele troka Ita-nia pasadu, maibé Ita bele hili futuru neʼebé diʼak ba Ita no Ita-nia família. Bíblia hatudu katak ita-nia Aman iha lalehan, Maromak Jeová, hadomi tebes ita no hakarak ita hatene katak nia interese ho buat neʼebé ita halo. Haree toʼok profeta Miqueias nia liafuan tuirmai:

“Oh ema sira, nia fó-hatene ona ba imi buat neʼebé diʼak. Saida mak Jeová husu ba imi atu halo? Neʼe mak atu imi hatudu hahalok justisa, hafolin hahalok laran-metin, no atu laʼo hamutuk ho imi-nia Maromak ho haraik an!”​—Miqueias 6:8.

Ita sei simu Jeová nia konvite atu laʼo ho nia no hetan bensaun ba nafatin neʼebé nia prepara mai ita ka lae? Ita mak deside!