Hanesan Jesus fó sai nanis ona, ohin loron ema haklaken daudaun liafuan diʼak kona-ba Maromak nia Ukun iha mundu tomak. (Mateus 24:14) Livru Daniel hatete katak Ukun neʼe mak Maromak nia governu. Kapítulu 2 husi livru neʼe fó sai profesia kona-ba ukun boot sira neʼebé sei ukun tuituir malu, hahú husi Babilónia antigu toʼo ita-nia tempu. Versíkulu 44 hatete:

“Maromak iha lalehan sei harii ukun ida neʼebé sei nunka lakon. No ukun neʼe sei la entrega ba povu sira seluk. Ukun neʼe sei harahun no halakon liurai sira-neʼe hotu nia ukun, no ukun neʼe mesak mak sei hamriik ba nafatin.”

Profesia neʼe no profesia seluk iha Bíblia fó sai katak Maromak nia Ukun sei troka ema nia ukun hotu no ema sei moris ho dame no hakmatek iha mundu. Moris iha Maromak nia Ukun okos mak oinsá? Mai ita haree promesa sira neʼebé lakleur tan sei sai loos.

• LA IHA TAN FUNU

  Salmo 46:9: “[Maromak] sei hapara funu sira iha mundu tomak. Nia halo tohar rama no harahun diman; nia sunu kuda-karreta funu nian.”

  Imajina toʼok, rikusoin no matenek hotu neʼebé agora daudaun ema uza atu halo armas no oho malu sei troka fali ho buat neʼebé lori benefísiu ba ema! Só Maromak nia Ukun deʼit mak bele kumpre promesa neʼe.

• LA IHA TAN MORAS

  Isaias 33:24: “La iha ema ida iha rai mak sei dehan: ‘Haʼu moras.’”

  Hanoin toʼok bainhira ema iha mundu neʼe la terus tan tanba moras fuan, kankru, malária ka moras seluk. Ema la presiza tan ospitál no ai-moruk. Ema iha saúde neʼebé perfeitu. Neʼe mak sei akontese iha futuru iha mundu.

• LA IHA TAN HAMLAHA

  Salmo 72:16: “Sei iha ai-han barak iha rai; foho-tutun sira sei nakonu ho ai-han.”

  Mundu sei prodús ai-han barak tebes neʼebé toʼo ba ema hotu. Ema sei la hamlaha tan ka malnutrisaun.

• LA IHA TAN TRISTE NO MATE

  Apokalipse 21:4: “[Maromak] sei hamaran sira-nia matan-been hotu husi sira-nia matan, mate sei la iha tan, no ema sei la triste tan ka tanis ka sente moras. Buat sira neʼebé uluk nian lakon tiha ona.”

   Neʼe katak ema sei moris ho perfeitu ba nafatin iha mundu! Neʼe mak promesa husi ita-nia Kriadór, Maromak Jeová.

Karik ita sente katak promesa sira-neʼe sei nunka akontese. Maski ema barak hakarak atu moris hanesan buat neʼebé Bíblia promete ona, maibé sira sente susar atu komprende ideia kona-ba moris ba nafatin. Ita la hakfodak ho ida-neʼe, tanba la iha ema ida mak iha esperiénsia ona kona-ba moris ba nafatin no bele konta mai ita.

Ema sai atan ba sala no mate, ema mós moris susar no terus ba tinan barak tebes. Tan neʼe, ema barak haree buat sira-neʼe nuʼudar buat neʼebé normál. Maibé neʼe la hanesan duni ho ita-nia Kriadór Maromak Jeová nia hakarak.

Atu hametin ita-nia fiar ba promesa sira-neʼe, Maromak hatete: “Haʼu-nia liafuan sei la fila fali ba haʼu se neʼe seidauk fó rezultadu, maibé haʼu-nia liafuan sei sai loos duni tuir haʼu-nia hakarak, no liafuan neʼe sei hetan duni susesu hodi kumpre buat neʼebé haʼu hatete ona.”​—Isaias 55:11.

Bíblia bolu Jeová nuʼudar Maromak neʼebé “nunka bosok”. (Tito 1:2) Tanba Maromak rasik mak promete buat furak sira kona-ba futuru, diʼak ba ita atu hanoin: Ema bele moris ba nafatin iha mundu neʼebé Maromak promete ona ka lae? Saida mak ita tenke halo atu bele hetan benefísiu husi Maromak nia promesa? Informasaun iha pájina tuirmai sei hatán ba pergunta sira-neʼe.