Dala ruma Ita hanoin kona-ba Ita no Ita-nia família nia futuru ka lae? Ita sei moris ho diʼak ka sai kiak? Ita sei kaben ka lae? Ita sei moris ba tempu naruk ka badak deʼit? Ema barak hanoin kona-ba pergunta sira-neʼe durante tinan atus ba atus.

Ohin loron matenek-naʼin sira estuda kona-ba akontesimentu sira iha rai barak atu bele siʼik futuru. Buat balu neʼebé sira siʼik sai loos duni, maibé balu lae. Porezemplu, iha tinan 1912, mane ida naran Guglielmo Marconi neʼebé inventa mákina telegrama hatete: “Funu sei la iha tan tanba teknolojia laʼo ba oin.” No iha tinan 1962, ema-boot ida husi kompañia Decca Records lakohi serbisu hamutuk ho banda The Beatles, tanba nia hanoin katak banda múzika neʼebé toka viola sei la susesu.

Ema barak mós buka-hatene kona-ba futuru hodi uza espiritizmu. Ema balu husu matadalan husi astrólogu sira, ka siʼikdór kona-ba fitun. Baibain jornál no revista sira sempre fó sai oróskopu. Ema seluk tan husu siʼikdór sira atu siʼik futuru hodi uza karta tarot, númeru sira ka lee ema nia liman.

Iha tempu antigu, ema neʼebé hakarak hatene kona-ba futuru bá vizita orákulu ka siʼikdór neʼebé bolu sira-nia an nuʼudar maromak nia reprezentante. Porezemplu, Liurai Creso husi rai-Lídia haruka prezente folin-boot ba orákulu iha Delfos, rai-Grésia no husu kona-ba saida mak sei akontese se nia bá funu hasoru Liurai Ciro husi rai-Pérsia. Orákulu neʼe hatete katak Creso sei halakon “ukun boot ida” se nia bá funu., Creso fiar katak nia sei manán, entaun nia bá funu hasoru Ciro, maibé ukun boot ida neʼebé lakon mak Creso nia ukun rasik!

Orákulu neʼe nia informasaun mak jerál tebes. Maski Creso ka Ciro mak manán, ninia liafuan haree hanesan loos nafatin. Creso lakon buat hotu tan deʼit informasaun neʼebé la loos. Oinsá ho ema ohin loron neʼebé koko atu buka-hatene kona-ba futuru, sira hetan susesu ka lae?