Lakleur tan, kuandu Maromak nia governu iha lalehan ukun ema hotu, mundu sei nakonu ho dame, no ema hotu sei halo serbisu neʼebé lori kontente ba sira. Maromak hili ona Jesus Kristu atu ukun mundu tomak. La hanesan ukun-naʼin sira ohin loron, Jesus sei hanoin ninia povu nia diʼak. Nia sei ukun ho domin, laran-diʼak, laran-sadiʼa no justisa.—Isaias 11:4.

Iha mundu foun ema sei la diskrimina malu kona-ba rasa ka nasaun. Ema hotu sei iha unidade. (Apokalipse 7:9, 10) Ema hotu neʼebé moris iha mundu sei hadomi Maromak no hadomi malu. Sira hotu sei serbisu ho dame atu bele kumpre Maromak nia hakarak husi uluk kedas atu ema bele tau matan ba sira-nia hela-fatin, neʼe mak mundu.—Salmo 115:16.

Kuandu Maromak nia Ukun mak domina mundu tomak, ita-nia Kriadór sei kontrola mundu nia klima no halakon hotu dezastre naturais. (Salmo 24:1, 2) Bainhira Jesus iha rai, nia hatudu ezemplu kona-ba kbiit neʼebé nia hetan husi Maromak hodi halo anin-boot para. (Marcos 4:39, 41) Iha Kristu nia ukun, ema hotu sei la sente taʼuk tan kona-ba dezastre naturais. Maromak nia Ukun mós sei halo animál no ema iha dame no la iha ema ida mak estraga ambiente iha mundu.—Oseias 2:18.

Ema hotu sei iha saúde neʼebé perfeitu. La iha ema ida mak moras, sai ferik-katuas, ka mate. (Isaias 35:5, 6) Ema sei goza moris ho ambiente neʼebé furak no moos, hanesan buat neʼebé ema primeiru hetan. Hanesan iha jardín Eden, iha mundu foun rai sei prodús ai-han neʼebé barak. (Génesis 2:9) Hanesan nasaun Izraél iha tempu uluk, ema hotu neʼebé iha mundu Paraízu sei ‘han sira-nia ai-han toʼo bosu’.—Levítico 26:4, 5.

Iha Maromak nia Ukun okos, ema hotu sei sente dame no sira sei hatudu laran-diʼak no justisa ba malu. La iha tan funu, no ema sei la uza sala sira-nia podér, no ema hotu sei iha buat neʼebé sira presiza. Bíblia promete: “Sira ida-idak sei tuur iha sira-nia uvas-hun okos no iha sira-nia ai-figeira hun okos, no sei la iha ema ida mak halo sira taʼuk.”—Miqueias 4:3, 4.

Família ida-idak sei iha uma rasik no ema seluk sei la hadau husi sira. Serbisu hotu neʼebé ita halo sei lori kontente. Hanesan Bíblia dehan, iha mundu foun ema hotu nia “serbisu makaʼas sei la sai saugati deʼit”.—Isaias 65:21-23.

Bíblia promete: “Mundu tomak sei nakonu ho koñesimentu kona-ba Jeová.” (Isaias 11:9) Ema neʼebé moris iha Maromak nia Ukun okos sei simu edukasaun neʼebé diʼak liu hotu husi sira-nia Kriadór Jeová, no aprende kona-ba buat furak oioin neʼebé nia kria. Sira sei la uza sira-nia matenek atu kria ekipamentu funu nian ka atu halo aat ba ema seluk. (Isaias 2:4) Maibé, sira sei aprende oinsá atu moris ho dame no oinsá bele tau matan ba mundu.—Salmo 37:11.

Maromak halo buat neʼebé diʼak tebes atu prepara mundu hodi nuneʼe ita bele sente kontente iha moris loroloron nian. Ninia hakarak mak atu ema moris ba nafatin iha mundu. (Salmo 37:29; Isaias 45:18) Atu kumpre ninia hakarak neʼe, Maromak “sei halakon mate ba nafatin”. (Isaias 25:8) Bíblia promete katak “mate sei la iha tan, no ema sei la triste tan ka tanis ka sente moras”. (Apokalipse 21:4) Maromak sei fó oportunidade ba ema neʼebé hetan salvasaun kuandu nia halakon tiha mundu aat neʼe no ema neʼebé hetan moris-hiʼas husi mate atu bele moris ba nafatin.—João 5:28, 29; Apóstolu 24:15.

 Ohin loron, ema millaun ba millaun iha mundu tomak prepara daudaun sira-nia an atu moris iha Maromak nia Ukun neʼebé besik loos ona atu toʼo mai. Maski sira la perfeitu, sira hakaʼas an atu sai povu neʼebé Maromak simu atu moris iha mundu foun. Oinsá? Hodi aprende kona-ba Maromak Jeová no Jesus Kristu neʼebé nia haruka mai.—João 17:3.

Buka-hatene liután oinsá Ita bele hetan salvasaun kuandu mundu nia rohan toʼo mai no bele moris iha mundu foun. Husu atu estuda Bíblia gratuitu ho Testemuña ba Jeová ida liuhusi website jw.org/tdt.