EMA

Bíblia hatete: ‘Maromak kria rai laʼós saugati deʼit, maibé nia kria rai atu ema bele hela bá.’—ISAIAS 45:18.

PLANETA MUNDU

Bíblia hatete: “Jerasaun ida lakon, no jerasaun ida mosu, maibé mundu iha ba nafatin.”—ECLESIASTES 1:4.

NEʼE KATAK SÁ: Tuir Bíblia, mundu neʼe sei nunka lakon no ema sei nafatin hela iha mundu. Entaun, liafuan “mundu nia rohan” katak sá?

HANOIN TOʼOK: Bíblia kompara mundu nia rohan hanesan buat neʼebé akontese iha Noé nia tempu. Iha tempu neʼebá, mundu “nakonu ho violénsia”. (Génesis 6:13) Maibé, Noé mak ema laran-loos. Tan neʼe Maromak salva Noé ho ninia família, no halakon ema aat hodi halo udan tun no rai-nabeen. Kona-ba buat neʼebé akontese iha tempu neʼebá, Bíblia dehan: “Mundu iha tempu neʼebá lakon bainhira rai-nabeen taka mundu tomak.” (2 Pedro 3:6) Neʼe mak mundu nia rohan. Maromak halakon saida? Laʼós planeta mundu, maibé ema aat iha mundu neʼe. Tan neʼe, bainhira Bíblia koʼalia kona-ba mundu nia rohan, neʼe la refere ba halakon planeta mundu neʼe, maibé halakon ema aat no sira-nia sistema aat hotu.

PROBLEMA NO EMA AAT

Bíblia hatete: “Hela tempu uitoan tan, ema aat sei la iha ona; ó sei hateke ba sira-nia fatin, maibé sira la iha neʼebá. Maibé ema laran-maus sei simu rai nuʼudar sira-nian, no sira sei hetan ksolok boot ho dame neʼebé barak.”—SALMO 37:10, 11.

NEʼE KATAK SÁ: Rai-Nabeen iha Noé nia tempu la halakon ema aat dala ida ba nafatin. Depois Rai-Nabeen liutiha, ema aat komesa iha fali no lori susar ba ema hotu toʼo agora. Maibé lakleur tan Maromak sei halakon buat aat hotu ba nafatin. Ema neʼebé hakerek Salmo dehan: “Ema aat sei la iha ona.” Maromak sei halakon tiha ema aat liuhusi ninia Ukun, neʼe mak governu ida iha lalehan neʼebé sei ukun ema laran-loos sira.

HANOIN TOʼOK: Ukun-naʼin sira ohin loron kontente atu simu Maromak nia Ukun ka lae? Bíblia dehan katak sira lakohi simu. (Salmo 2:2) Rezultadu mak saida? Maromak nia Ukun sei troka ema nia governu hotu, no “ukun neʼe mesak mak sei hamriik ba nafatin”. (Daniel 2:44) Maibé tanbasá mak presiza halakon tiha ema nia governu?

Bíblia hatete: “Ema neʼebé laʼo mós la iha kbiit atu hili ninia hakat.”—JEREMIAS 10:23.

NEʼE KATAK SÁ: Maromak kria ita ema laʼós atu ukun an rasik. Ema la iha kbiit atu ukun ema seluk no rezolve problema sira.

HANOIN TOʼOK: Referénsia ida husi Britannica Academic hatete katak governu ida-idak haree hanesan “labele rezolve problema kona-ba kiak, hamlaha, moras, dezastre naturais, funu no violénsia”. Referénsia neʼe hatutan: “Ema balu . . . fiar katak se iha governu ida deʼit mak ukun mundu tomak, neʼe sei ajuda atu rezolve problema oioin iha mundu neʼe.” Maibé, maski ema nia governu hotu iha unidade, sira labele rezolve problema sira neʼebé temi ona tanba ema hotu la perfeitu. Só Maromak nia Ukun deʼit mak governu ida neʼebé iha kbiit atu rezolve problema hotu ba nafatin.

Entaun tuir Bíblia, mundu nia rohan katak sistema aat sira ohin loron nia rohan, tan neʼe ema diʼak la presiza taʼuk. Tuir loloos, ita bele hein ba mundu neʼe nia rohan tanba mundu tuan neʼe sei troka fali ho mundu foun neʼebé Maromak prepara mai ita.

Bainhira mak ida-neʼe sei akontese? Informasaun tuirmai sei esplika kona-ba Bíblia nia resposta.