REBEKA haree ba foho-oan sira no ai-hun sira ho lalatak neʼebé naruk tanba loro-matan besik atu monu. Nia komesa sai toman atu saʼe kuda-kamelu tanba nia laʼo rai ba semana balu ona, no dook kilómetru atus ba atus husi ninia rai-Haran. Karik Rebeka sei la hasoru tan ninia família. Nuʼudar nia besik ona atu toʼo ba ninia fatin foun, nia hanoin: ‘Moris hanesan saida mak haʼu sei halaʼo?’

Tuir loloos, Rebeka laʼo rai hamutuk ho ema no kuda-kamelu barak. Sira laʼo ba loron barak iha rai-Kanaán no hakat liu ba área Negebe. (Gênesis [Kejadian] 24:62) Karik Rebeka haree bibi barak, tanba área neʼe susar atu halo toʼos, maibé diʼak atu hakiak bibi tanba iha duʼut barak. Katuas neʼebé tau matan ba viajen neʼe sente kontente bele fila fali ba ninia rai, no nia hakarak tebes atu lori notísias diʼak ba ninia naʼi! Maibé iha Rebeka nia neon, mosu pergunta oioin, hanesan: ‘Haʼu-nia moris sei sai oinsá? Isaac neʼebé atu sai haʼu-nia la’en mak ema hanesan saida? Nia sei simu haʼu ho diʼak ka lae? Haʼu sei kontente ho nia ka lae?’ Sin, Rebeka seidauk koñese ninia noivu!

Ohin loron, ema barak la toman ho ideia atu kaben ho ema neʼebé sira seidauk koñese. Maibé iha rai balu, kaben iha dalan hanesan neʼe mak baibain deʼit. Maski ita ida-idak nia toman la hanesan, maibé ita hotu bele konkorda katak Rebeka nia moris iha mudansa boot tebes. Nia ema neʼebé brani no fiar metin. Ita mós presiza hahalok rua neʼe atu bele hasoru situasaun foun iha ita-nia moris. Maibé Rebeka mós hatudu hahalok furak seluk tan. Mai ita haree hamutuk.

Semana balu antes neʼe, Rebeka halaʼo ninia moris hanesan baibain deʼit. Nia boot iha área besik sidade Haran iha rai-Mesopotámia. Ninia inan-aman la hanesan ho ema seluk, tanba la adora maromak fulan nian, naran Sin, maibé adora Maromak Jeová.—Gênesis (Kejadian) 24:50.

Rebeka mak joven neʼebé bonita tebes, maibé ninia bonita laʼós deʼit kona-ba ninia oin. Nia ema neʼebé kontente no iha morál neʼebé diʼak. Ninia inan-aman laʼós ema kiak, tanba sira iha atan, maibé Rebeka la moris hanesan prinseza. Inan-aman hanorin nia atu serbisu ho badinas. Tan neʼe, Rebeka mós iha knaar balu neʼebé todan, inklui kuru bee ba família atu uza. Hanesan feto-klosan sira seluk, lokraik-lokraik, nia mós tula buli boot iha ninia kabaas, no laʼo toʼo bee-matan.—Gênesis (Kejadian) 24:11, 15, 16.

Lokraik ida, bainhira Rebeka foin kuru bee, katuas ida halai mai hasoru nia no husu: “Favór ida fó bee uitoan mai haʼu husi ó-nia buli atu haʼu bele hemu.” Katuas neʼe husu ho respeitu! Rebeka bele haree katak katuas neʼe laʼo husi fatin dook. Tan neʼe, Rebeka hatún ninia buli no fó ba katuas neʼe bee neʼebé nia foin kuru. Rebeka mós haree katuas neʼe nia kuda-kamelu hamutuk sanulu, no animál nia hemu-fatin neʼebé iha bee-matan nia sorin sei mamuk. Haree tiha ba katuas nia oin neʼebé hatudu sai ninia laran-diʼak, Rebeka hanoin oinsá atu bele ajuda katuas laʼo-rai neʼe. Ikusmai nia hatete: “Haʼu mós sei kuru bee ba Ita-nia kuda-kamelu  sira toʼo sira hemu hotu.”—Gênesis (Kejadian) 24:17-19.

Fó-hemu ba kuda-kamelu sanulu laʼós serbisu neʼebé fasil, tanba nia tenke kuru bee barak tebes. Tuir loloos, kuda-kamelu ida neʼebé hamrook bele hemu bee toʼo litru 95! Entaun, se kuda-kamelu sanulu mak hamrook tebes, Rebeka tenke kuru bee ba oras barak. Maibé karik kuda-kamelu sira-neʼe ladún hamrook. * Maski nuneʼe, Rebeka hatene nanis kuda-kamelu sira-neʼe ladún hamrook ka lae? Lae, nia prontu deʼit atu halo serbisu boot hodi bele hatudu laran-luak ba katuas oin-foun neʼe. Katuas neʼe simu Rebeka nia laran-diʼak. No nia haree feto joven neʼe halai bá-mai kuru bee no tau iha animál nia hemu fatin.—Gênesis (Kejadian) 24:20, 21.

Rebeka nia ezemplu neʼe ajuda tebes ita ohin loron. Ita moris iha tempu neʼebé ema barak buka sira rasik nia diʼak deʼit. Bíblia fó-hatene nanis ona katak ema sei “hadomi deʼit sira-nia an” no lakohi ajuda ema seluk. (2 Timóteo 3:1-5) Ita ema kristaun neʼebé hakarak luta hasoru mundu nia hahalok aat, presiza duni atu hanoin didiʼak kona-ba Rebeka nia ezemplu neʼebé halai bá-mai atu fó bee ba ema seluk nia animál sira.

Katuas neʼe hateke hela Rebeka, laʼós tanba nia matan feto, maibé tanba nia hakfodak no kontente. Bainhira kuda-kamelu sira hemu hotu tiha, katuas neʼe fó brinkus no kelu osan-mean ba Rebeka. Tuirmai, nia husu: “Favór ida fó-hatene haʼu, ó-nia aman mak sé? Iha ó-nia aman nia uma iha fatin mamuk ruma hodi ami bele toba ba kalan neʼe ka?” Bainhira Rebeka esplika kona-ba ninia aman, katuas neʼe hakfodak no haksolok liután. Rebeka hatutan tan: “Ami iha duʼut-maran no animál nia hahán seluk tan no mós iha fatin mamuk atu toba.” Rebeka hatudu laran-luak duni tanba katuas neʼe la mesak maibé iha atan balu neʼebé hamutuk ho nia. Depois, Rebeka halai uluk ba uma atu fó-hatene ba ninia inan.—Gênesis (Kejadian) 24:22-28, 32.

Rebeka hatene oinsá atu hatudu laran-luak ba  ema. Neʼe mak hahalok ida tan neʼebé ita ladún haree ohin loron, tan neʼe ita presiza duni atu banati-tuir Rebeka nia fiar. Tuir loloos, fiar ba Maromak mak book ema atu sai laran-luak. Jeová mak Maromak neʼebé laran-luak, no nia hakarak ninia atan sira mós banati-tuir nia. Kuandu ita hatudu laran-luak hodi la hein ba ema atu selu fali, ita halo ita-nia Aman Jeová sente kontente.—Mateus 5:44-46; 1 Pedro 4:9.

Entaun, katuas neʼe sé? Nia mak Abraão nia atan, no Abraão mak Rebeka nia avó-mane nia alin rasik. Tan neʼe, Rebeka nia aman, Betuel, simu katuas neʼe ho diʼak. Karik katuas neʼe nia naran mak Eliezer. * Bainhira Rebeka nia família konvida Eliezer atu han, Eliezer hatete katak nia tenke konta ninia istória uluklai. (Gênesis [Kejadian] 24:31-33) Ita fiar katak Eliezer koʼalia ho laran-manas, tanba nia foin haree oinsá mak Maromak Jeová fó bensaun ba knaar importante neʼebé nia halaʼo. Neʼe mak saida?

Imajina toʼok, bainhira Eliezer koʼalia hela, Rebeka nia aman, Betuel, no ninia maun, Labão, see tilun ho didiʼak. Eliezer hatete katak Jeová fó bensaun barak ba Abraão iha rai-Kanaán no nia ho ninia feen Sara iha ona oan-mane ida, naran Isaac, neʼebé sei simu Abraão nia rikusoin tomak nuʼudar liman-rohan. No Abraão fó knaar ba Eliezer atu buka feen ida ba Isaac husi ninia família rasik iha rai-Haran.—Gênesis (Kejadian) 24:34-38.

Abraão haruka Eliezer atu jura katak nia sei la hili feto husi rai-Kanaán atu sai Isaac nia feen. Tanbasá? Neʼe tanba ema Kanaán la adora Maromak Jeová. Abraão hatene katak loron ida Jeová sei fó kastigu ba ema Kanaán tanba sira-nia hahalok aat. Tan neʼe, Abraão lakohi ninia oan Isaac atu ransu ho sira no halo tuir sira-nia hahalok neʼebé la tuir morál. Abraão mós hatene katak Isaac sei hola parte atu kumpre Maromak nia promesa.—Gênesis (Kejadian) 15:16; 17:19; 24:2-4.

Eliezer hatutan tan katak bainhira nia toʼo iha bee-matan besik Haran, nia halo orasaun hodi husu Maromak Jeová atu hili feto ida neʼebé sei sai Isaac nia feen. Oinsá? Eliezer husu ba Maromak katak Isaac nia noiva tenke mai toʼo bee-matan. No kuandu Eliezer husu bee atu hemu, feto neʼe sei fó bee ba nia no mós ba ninia kuda-kamelu hotu. (Gênesis [Kejadian] 24:12-14) Ikusmai, sé mak halo hanesan neʼe? Rebeka! Hanoin toʼok, Rebeka sente oinsá bainhira nia rona ida-neʼe!

Eliezer nia istória book tebes Betuel no Labão nia laran. Sira dehan: “Ida-neʼe mai husi Jeová.” Depois, hodi tuir sira-nia toman, sira entrega Rebeka ba Eliezer atu sai Isaac nia feen. (Gênesis [Kejadian] 24:50-54) Neʼe katak Rebeka la iha direitu atu kontra arranju neʼe ka lae?

Kona-ba ida-neʼe, Eliezer husu tiha ona ba Abraão: “Oinsá se feto neʼe lakohi atu mai hamutuk ho haʼu?” Abraão hatán: “Ó sei sai livre husi ó-nia juramentu.” (Gênesis [Kejadian] 24:39, 41) Rebeka nia família mós respeitu ninia hanoin. Iha dadeer-saan tuirmai, Eliezer neʼebé kontente tebes, hakarak lori kedas Rebeka atu fila fali ba ninia naʼi Abraão iha rai-Kanaán. Maibé Rebeka nia família husu fali Eliezer atu hein ba loron sanulu tan. Tuirmai, sira dehan: “Mai ita bolu feto joven neʼe no husu nia.”—Gênesis (Kejadian) 24:57.

Neʼe mak tempu neʼebé sei lori mudansa boot ba Rebeka nia moris tomak. Nia hatán oinsá? Nia sei buka dalan oioin atu la bá fatin neʼebé nia seidauk hatene? Ka nia rekoñese katak ida-neʼe mak Jeová nia hakarak no kontente atu halo tuir? Maski neʼe akontese derrepente deʼit, maibé Rebeka hatán: “Haʼu prontu atu bá.”—Gênesis (Kejadian) 24:58.

Nia laran-prontu tebes! Maski ohin loron ita-nia toman kona-ba kaben la hanesan duni, ita bele aprende buat barak husi Rebeka nia ezemplu. Nia la buka nia rasik nia diʼak, maibé tau uluk Maromak Jeová nia hakarak. Ita fiar katak Maromak nia Liafuan mak fó matadalan neʼebé diʼak liu ba ita-nia moris, inklui mós kona-ba hili pár, kaben,  no mós oinsá atu sai feen ka laʼen neʼebé diʼak. (2 Korinto 6:14, 15; Éfeso 5:28-33) Entaun, mai ita banati-tuir Rebeka neʼebé prontu atu halo tuir Maromak nia hakarak.

Depois simu tiha bensaun husi nia família, Rebeka no ninia atan-feto Debora, no mós atan-feto seluk tan hahú halo viajen hamutuk ho Eliezer no ninia atan-mane sira. (Gênesis [Kejadian] 24:59-61; 35:8) Atu toʼo ba rai-Kanaán, sira tenke laʼo dook maizumenus kilómetru 800, karik presiza semana tolu. Viajen neʼe la fasil. Husi kiʼik kedas, Rebeka haree beibeik kuda-kamelu, maibé karik nia la toman saʼe kuda-kamelu no laʼo dook. Tuir Bíblia, Rebeka nia família mak bibi-atan, laʼós kontratu-naʼin neʼebé laʼo rai ho kuda-kamelu. (Gênesis [Kejadian] 29:10) Ema barak hatete katak saʼe kuda-kamelu ba tempu uitoan deʼit mós halo sira-nia isin moras!

Iha dalan, karik Rebeka husu pergunta oioin ba Eliezer kona-ba Isaac no ninia família. Imajina toʼok, iha kalan ida bainhira sira haneruk ahi, katuas Eliezer konta ba Rebeka kona-ba Jeová nia promesa, katak liuhusi Abraão nia bei-oan mak Nia sei fó bensaun ba ema hotu iha mundu neʼe. Istória neʼe book duni Rebeka nia laran tanba Jeová nia promesa neʼe sei sai loos liuhusi ninia noivu Isaac, neʼe katak Rebeka mós sei hola parte iha promesa neʼe!—Gênesis (Kejadian) 22:15-18.

Ikusmai, sira toʼo ona besik Isaac nia hela-fatin iha área Negebe. Rai-nakaras ona, Rebeka haree mane ida laʼo iha rai-luan. Mane neʼe haree hanesan hanoin kleʼan kona-ba buat ruma. Kona-ba momentu neʼe, Bíblia konta: “Rebeka tun lalais husi kuda-kamelu.” Karik nia haksoit tun deʼit hodi la hein ba kuda-kamelu atu tuur. Depois, nia husu ba atan ida: “Sé mak mane neʼe neʼebé laʼo mai husi rai-luan atu hasoru ita?” Atan hatán katak neʼe mak Isaac, tuirmai Rebeka taka lalais ninia ulun ho hena. (Gênesis [Kejadian] 24:62-65) Tanbasá? Tanba neʼe mak sinál ida atu hatudu katak nia sei respeitu no hakruʼuk an ba Isaac nuʼudar ninia laʼen. Karik ema ohin loron hanoin katak neʼe mak toman antigu nian, maibé ita hotu bele banati-tuir Rebeka nia hahalok haraik-an neʼe, loos ka lae?

Isaac maizumenus tinan 40 ona. Nia triste hela tanba ninia inan, Sara, mate maizumenus tinan tolu liubá. Ita bele imajina katak Isaac mak ema neʼebé laran-diʼak no laran-maus. Isaac simu bensaun boot tanba nia iha ona feen ida neʼebé badinas, laran-luak no haraik-an! Isaac ho Rebeka sente kontente ba malu ka lae? Bíblia dehan katak Isaac nia “laran monu ba Rebeka”.—Gênesis (Kejadian) 24:67; 26:8.

Maski liu ona maizumenus tinan 3.900 husi tempu neʼebá, Rebeka nia hahalok diʼak kona loos ita-nia laran. Rebeka mak ema neʼebé brani, badinas, laran-luak no haraik-an. Ita hotu, maski kiʼik ka boot, feto ka mane, kaben ona ka seidauk, mai ita banati-tuir Rebeka nia fiar!