Haʼu boot iha sidade Puerto Limón iha rai-Kostarrika. Ami maun-alin naʼin ualu, no haʼu mak oan númeru hitu. Bainhira haʼu tinan ualu, haʼu-nia aman mate. Depois neʼe, haʼu-nia inan mak haboot ami.

Husi kiʼik kedas, haʼu gosta tebes baseball. Bainhira joven, haʼu tama ekipa baseball. Bainhira haʼu maizumenus tinan 20, haʼu hetan konvite atu tama ekipa profisionál iha rai-Nikarágua. Maibé tanba haʼu-nia inan moras no haʼu presiza tau matan nia, haʼu lakohi hela iha Nikarágua, tan neʼe haʼu la simu konvite neʼe. Liutiha tempu balu, haʼu tama ekipa baseball nasionál iha rai-Kostarrika. Husi tinan 1949 toʼo 1952, haʼu hola parte iha ekipa neʼe, no halimar baseball iha rai-Kuba, Méxiku no Nikarágua. Haʼu joga ho diʼak, no haʼu kontente tebes bainhira ema-lubun hakilar haʼu-nia naran atu apoia haʼu!

Haʼu halaʼo moris neʼebé la iha morál. Maski haʼu iha namorada ida deʼit, maibé haʼu sempre iha feto seluk. Haʼu mós toman atu hemu tua demais. Loron ida, haʼu lanu todan no bainhira haʼu hadeer iha loron tuirmai, haʼu la hanoin-hetan oinsá mak haʼu bele toʼo iha uma! Haʼu mós toman joga lotaria no domino.

Iha tempu neʼebé hanesan, haʼu-nia inan sai ona Testemuña ba Jeová. Nia koko atu esplika ninia fiar mai haʼu, maibé haʼu la interese tanba haʼu fokus deʼit ba desportu. Kuandu haʼu treinu hela, maski toʼo ona tempu han mós haʼu la sente hamlaha! Haʼu hadomi baseball liu fali buat seluk!

Maibé bainhira haʼu-nia tinan 29, haʼu hetan asidente durante jogu baseball. Ikusmai, haʼu husik haʼu-nia moris nuʼudar jogadór profisionál. Maski nuneʼe, haʼu sai treinadór iha ekipa baseball ida neʼebé besik haʼu-nia uma.

Iha tinan 1957, haʼu simu konvite atu asiste reuniaun boot husi Testemuña ba Jeová. Reuniaun neʼe halaʼo iha  estádiu neʼebé uluk haʼu-nia ekipa uza atu joga baseball. Bainhira haʼu tuur iha neʼebá, haʼu bele haree katak Testemuña sira hatudu respeitu ba malu, la hanesan duni ho ema sira neʼebé mai atu haree baseball. Buat neʼebé haʼu haree book duni haʼu atu komesa estuda Bíblia ho Testemuña no tuir sira-nia reuniaun.

Haʼu kontente ho buat neʼebé haʼu aprende husi Bíblia. Porezemplu, Jesus fó-hatene nanis katak iha loron ikus sira, ninia dixípulu sira sei haklaken liafuan diʼak kona-ba Maromak nia Ukun iha mundu tomak. (Mateus 24:14) Haʼu mós aprende katak ema kristaun neʼebé loos halaʼo serbisu haklaken laʼós atu buka osan. Jesus hatete ona: “Imi simu la selu, fó mós hodi la hein atu ema selu imi.”—Mateus 10:8.

Haʼu mós kompara buat neʼebé Bíblia hatete ho Testemuña sira-nia hahalok. Haʼu admira tebes sira-nia hakaʼas-an atu haklaken Maromak nia Ukun iha mundu tomak. Haʼu haree katak sira mak ema neʼebé prontu atu hatudu laran-luak hodi halo tuir Jesus nia mandamentu. Tan neʼe, bainhira haʼu lee Jesus nia liafuan “mai tuir haʼu” iha Marcos 10:21, haʼu hakarak atu sai Testemuña ida.

Maibé haʼu presiza tempu atu troka haʼu-nia moris. Porezemplu, ba tinan barak, haʼu uza haʼu-nia númeru favoritu atu buka sorte bainhira haʼu hola lotaria semana-semana. Maibé haʼu aprende husi Bíblia katak Maromak la simu ema neʼebé buka “maromak Sorte nian” no mós ema neʼebé kaan-teen. (Isaías [Yesaya] 65:11; Koloso 3:5) Tan neʼe, haʼu deside atu la joga tan. Maibé iha loron-domingu primeiru neʼebé haʼu la hola lotaria, haʼu-nia númeru favoritu mak manán! Ema barak goza haʼu tanba haʼu la joga iha semana neʼe, no sira mós obriga haʼu atu joga fali, maibé haʼu nunka taru tan.

Iha loron neʼebé haʼu hetan batizmu iha reuniaun boot husi Testemuña ba Jeová, haʼu hasoru tentasaun ida tan neʼebé koko haʼu-nia “hahalok foun”. (Éfeso 4:24) Bainhira haʼu fila fali ba otél neʼebé haʼu hela bá, feto neʼebé uluk namora ho haʼu hein iha haʼu-nia kuartu nia oin. Nia hatete: “Sammy, mai ita goza tempu diʼak hamutuk!” Maibé haʼu hatán kedas, “Lae!” Haʼu hatete ba nia katak haʼu troka ona haʼu-nia moris hodi tuir Bíblia. (1 Korinto 6:18) Derrepente deʼit, nia komesa goza haʼu, hatete aat Bíblia nia matadalan kona-ba morál, no koko haʼu atu namora fali ho nia. Maibé, haʼu tama deʼit ba haʼu-nia kuartu no xave metin odamatan. Haʼu kontente tanba husi tinan 1958 bainhira haʼu sai Testemuña, haʼu sempre moris tuir Maromak nia matadalan.

Se haʼu hanoin kona-ba buat diʼak hotu neʼebé haʼu hetan ona hodi halo tuir Bíblia nia matadalan, karik haʼu bele hakerek livru ida! Benefísiu balu neʼebé haʼu hetan mak belun barak neʼebé diʼak, moris neʼebé iha objetivu, no haksolok neʼebé loos.

Haʼu nafatin gosta baseball, maibé gosta natoon deʼit. Liuhusi baseball, haʼu hetan osan barak no naran-boot, maibé buat sira-neʼe la dura ba nafatin. Buat neʼebé dura ba nafatin mak haʼu-nia relasaun diʼak ho Maromak no maluk kristaun sira. Bíblia hatete: “Mundu neʼe no ninia hakarak liu daudaun, maibé ema neʼebé halo Maromak nia hakarak sei hela ba nafatin.” (1 João 2:17) Agora haʼu hadomi Maromak Jeová no ninia povu liu fali buat seluk!