“Oh Jeová, toʼo bainhira mak haʼu tenke halerik atu husu ajuda, maibé Ita la rona? Toʼo bainhira mak haʼu tenke husu ajuda tanba violénsia, maibé Ita la salva ami?” (Habakuk 1:2, 3) Neʼe mak profeta Habakuk nia liafuan, Maromak nia atan ida neʼebé diʼak. Se nuneʼe, tanbasá nia koʼalia hanesan neʼe? Nia lakon fiar ba Maromak ka? Lae. Maromak hametin Habakuk hodi hatete katak nia sei halakon terus tuir tempu neʼebé nia deside ona.—Habakuk 2:2, 3.

Bainhira Ita ka ema neʼebé Ita hadomi terus, fasil atu hanoin katak Maromak demora atu halakon terus hotu, no tanbasá nia seidauk halakon ida-neʼe. Maibé Bíblia hatete: “Jeová la demora atu kumpre ninia promesa, hanesan ema balu hanoin katak nia demora, maibé nia hatudu pasiénsia ba imi tanba nia lakohi ema ida lakon maibé nia hakarak ema hotu atu arrepende sala.”—2 Pedro 3:9.

Besik loos ona! Jesus esplika katak iha jerasaun ida mak sei sai sasin ba akontesimentu oioin iha loron ikus sira husi “mundu neʼe”. (Mateus 24:3-42) Jesus nia liafuan neʼe sai loos iha ita-nia tempu no neʼe hatudu katak lakleur tan Maromak sei halakon terus hotu. *

Maibé oinsá mak Maromak sei halakon terus hotu? Bainhira Jesus iha rai, nia hatudu sai Maromak nia forsa hodi halakon ema nia terus. Haree toʼok ezemplu balu.

Dezastre Naturais: Bainhira Jesus no ninia apóstolu sira iha ró laran iha Tasi Galileia, anin-fuik huu makaʼas toʼo ró besik atu mout. Iha tempu neʼebá Jesus hatudu katak nia no ninia Aman bele kontrola natureza. (Koloso 1:15, 16) Jesus hatete deʼit: “Hakmatek bá!” Rezultadu mak saida? “Anin para, no buat hotu sai hakmatek.”—Marcos 4:35-39.

Moras: Jesus iha kbiit atu kura ema matan-delek, ain-kudeik, ema neʼebé moras bibi-maten, moras-lepra no moras seluk tan. “Nia kura sira hotu neʼebé moras.”—Mateus 4:23, 24; 8:16; 11:2-5.

Rai-hamlaha: Jesus uza forsa neʼebé ninia Aman fó hodi halo hahán neʼebé uitoan sai barak. Bíblia konta dala rua katak Jesus fó-han ema rihun ba rihun.—Mateus 14:14-21; 15:32-38.

Mate: Jeová iha kbiit atu halakon mate. Ita hatene ida-neʼe tanba dala tolu, Jesus fó moris-hiʼas ba ema. Husi ema naʼin-tolu neʼebé nia fó moris-hiʼas, ema ida mak mate ona ba loron haat.—Marcos 5:35-42; Lucas 7:11-16; João 11:3-44.