Maromak kria ita-nia isin ho abilidade atu sai diʼak fali. Bainhira ita hetan kanek, “ita-nia isin komesa halo prosesu komplikadu ida hodi nuneʼe ita-nia kanek bele sai diʼak”. (Johns Hopkins Medicine) Ita-nia isin sei hapara raan neʼebé sai no kura kanek.

HANOIN TOʼOK: Se ita-nia Kriadór kria ita-nia isin ho abilidade atu kura rasik kanek sira, ita bele fiar katak nia mós bele kura ita-nia laran-kanek, loos ka lae? Ema ida neʼebé hakerek salmo hatete: “Nia kura ema neʼebé laran-kanek; nia falun sira-nia kanek.” (Salmo 147:3) Maibé se Ita trauma ka laran-kanek daudaun, saida mak bele ajuda Ita fiar katak Jeová sei kura Ita-nia kanek agora no iha futuru?

Maromak promete: “Keta taʼuk, tanba haʼu hamutuk ho ó. Keta laran-taridu, tanba haʼu mak ó-nia Maromak. Haʼu sei hametin ó, sin, haʼu sei ajuda ó.” (Isaias 41:10) Ema neʼebé hatene katak Jeová hanoin nia sei sente dame iha laran no hetan forsa atu tahan hasoru susar oioin. Apóstolu Paulo bolu ida-neʼe nuʼudar “Maromak nia dame neʼebé aas liu ema nia hanoin hotu”. Paulo hatutan: “Tanba iha situasaun hotu haʼu hetan forsa liuhusi nia neʼebé fó kbiit mai haʼu.”—Filipe 4:4-7, 9, 13.

Eskritura sira bele ajuda hametin ita-nia fiar ba Jeová nia promesa kona-ba futuru. Porezemplu, Apokalipse 21:4, 5 (hakerek iha pájina tuirmai) esplika kona-ba saida mak Maromak sei halo no tanbasá ita bele tau fiar ba ninia promesa:

• ‘Nia sei hamaran matan-been hotu’ husi ema nia matan. Jeová sei halakon ita-nia terus no susar hotu maski neʼe mak kiʼik deʼit tuir ema seluk nia haree.

• Ita-nia Kriadór “tuur iha kadunan” iha lalehan. Nia mak Liurai neʼebé Kbiit Boot Liu Hotu no nia sei uza ninia forsa no kbiit atu halakon terus no ajuda ita.

• Jeová garantia katak ninia promesa sira mak “loos no ema bele tau fiar”. Nia sei la hafoʼer ninia naran no reputasaun nuʼudar Maromak neʼebé loos. Tan neʼe, ita bele tau fiar katak nia sei kumpre ninia promesa sira.

“‘Nia sei hamaran sira-nia matan-been hotu husi sira-nia matan, mate sei la iha tan, no ema sei la triste tan ka tanis ka sente moras. Buat sira neʼebé uluk nian lakon tiha ona.’ Tuirmai Ida neʼebé tuur iha kadunan dehan: ‘Haree bá! Haʼu halo buat hotu sai foun.’ Nia mós dehan: ‘Hakerek liafuan sira-neʼe bá, tanba liafuan sira-neʼe mak loos no ema bele tau fiar.’”—Apokalipse 21:4, 5.

Universu no Bíblia hatudu sai ho klaru ita-nia Aman iha lalehan nia hahalok sira. Kriasaun sira book ita atu buka-hatene liután kona-ba Maromak no sai ninia belun, no Bíblia konvida ita hodi hatete: “Hakbesik ba Maromak, no nia sei hakbesik ba imi.” (Tiago 4:8) Apóstolu 17:27 mós hatete: “Nia la dook husi ita ida-idak.”

Bainhira Ita uza tempu atu koñese didiʼak Maromak, Ita sei fiar liután katak ‘nia hanoin Ita’. (1 Pedro 5:7) Benefísiu saida mak Ita bele hetan se Ita tau fiar ba Jeová?

Hanoin toʼok kona-ba mane naran Toru husi rai-Japaun. Ninia inan mak ema Kristaun, maibé Toru envolve an ho grupu ida neʼebé halo violénsia makaʼas. Nia hatete: “Haʼu fiar katak Maromak odi haʼu, no bainhira ema neʼebé haʼu hadomi mate, haʼu sente neʼe mak kastigu neʼebé Maromak fó mai haʼu.” Toru rekoñese katak situasaun no ransu neʼebé la diʼak halo nia “la hanoin ema seluk”. Nia hatete: “Uluk haʼu nia mehi mak atu oho ema famozu no tuirmai mate joven, hodi ema bele hanoin-hetan haʼu nuʼudar ema neʼebé naran-boot.”

Maibé bainhira Toru no ninia feen Hannah komesa estuda Bíblia, Toru halo mudansa boot iha ninia moris. Hannah hatete: “Haʼu bele haree ho klaru katak haʼu-nia laʼen la hanesan uluk ona.” Agora, Toru ho fiar metin hatete: “Maromak hanoin duni ita ida-idak. Nia lakohi ema ida mate, no nia prontu atu fó perdua ba ema neʼebé arrepende an ho laran. Nia mós rona buat neʼebé ita labele  fó sai ba ema ida no nia komprende ita maski ema seluk labele. Lakleur tan, Jeová sei halakon problema, terus no susar hotu. Agora mós nia ajuda ita iha dalan neʼebé ita la imajina. Nia hanoin ita no hakarak atu ajuda ita bainhira ita fraku.”—Salmo 136:23.

Toru nia esperiénsia hanorin lisaun importante mai ita. Hodi hatene katak lakleur tan Maromak sei halakon terus hotu no hamaran ita hotu nia matan-been, neʼe ajuda ita atu iha esperansa neʼebé kapás no mós moris ho kontente ohin loron. Ita bele hetan benefísiu hodi hatene katak Maromak hanoin ita maski mundu neʼe nakonu ho susar.