IMAJINA toʼok Ita haree filme neʼebé konta istória kona-ba artista ida neʼebé Ita gosta. Filme neʼe hahú konta husi tempu bainhira nia sei kiʼik, no aprende atu toka instrumentu ruma. No tuirmai ita haree nia halo konsertu, viajen ba rai barak, no sai artista internasionál. No lakleur depois neʼe, nia sai ema neʼebé famozu tebes. Maibé ikus husi filme neʼe mak, nia mate.

Filme hanesan neʼe laʼós inventa deʼit maibé neʼe hatudu realidade kona-ba ema nia moris neʼebé ikusmai mate. Maski filme konta kona-ba artista, atleta ka ema famozu naran deʼit, maibé istória nia rohan mak hanesan deʼit. Karik ema neʼe halo buat diʼak barak, maibé hanoin toʼok buat diʼak saida tan mak nia bele halo se nia la sai ferik-katuas no mate?

Karik ita sente triste kona-ba neʼe, maibé neʼe mak buat neʼebé ita tenke hasoru. (Eclesiastes 9:5) Maski ita koko makaʼas halo buat barak, ita labele halai sees husi kondisaun ferik-katuas no mate. Laʼós neʼe deʼit, derrepente ita bele mate tanba asidente ka moras ruma. Bíblia hatete, ita hanesan deʼit ho abuabu neʼebé “mosu ba tempu uitoan no depois lakon fali”.—Tiago 4:14.

Ema balu sente moris la iha folin, tan neʼe sira dehan, “mai ita han no hemu, tanba aban ita sei mate”. (1 Korinto 15:32) Ema barak moris iha dalan hanesan neʼe tanba sira hatene katak tempu naran deʼit sira bele mate no sira la hatene esperansa kona-ba futuru. Dala ruma se mosu situasaun neʼebé susar iha ita-nia moris, karik Ita sei husu, ‘Ita-nia moris hanesan neʼe deʼit ka lae?’ Iha neʼebé mak Ita bele hetan ninia resposta?

Ema barak espera katak sientista sira bele fó ninia resposta. Ohin loron matenek-naʼin no doutór sira konsege halo ema nia moris naruk ba tempu uitoan. No sientista balu halo buat barak atu ita-nia moris bele naruk. Maski sientista sira-neʼe susesu ka lae, pergunta mak: Tanbasá ita sai ferik-katuas no mate? Iha esperansa atu bele halakon mate ka lae? Informasaun tuirmai sei esplika kona-ba tópiku neʼe no resposta ba pergunta: Ita-nia moris hanesan neʼe deʼit ka lae?