Tanbasá mak ema hakarak moris ba nafatin? Bíblia hatete katak Maromak tau tempu neʼebé la iha rohan iha ita-nia laran. (Eclesiastes 3:11) Bíblia mós hatete katak “Maromak mak domin.” (1 João 4:8) Se Maromak neʼebé domin tau hakarak neʼe iha ita-nia laran, maibé la kria ita atu bele moris ba nafatin, neʼe la lójiku.

Klaru, mate laʼós ita-nia belun. Tuir loloos, Bíblia temi mate nuʼudar “inimigu” neʼebé aat. (1 Korinto 15:26) Ema ida bele mate maski idade kiʼik; ema seluk toʼo ferik-katuas mak foin mate. Maibé ikusmai, ema hotu sei mate. Ema balu sente taʼuk bainhira sira hanoin katak loron ida sira sei mate. Maibé mate sei iha rohan ka lae?

Karik Ita sei hakfodak atu hatene katak laʼós Maromak nia hakarak ba ita ema atu mate. Livru Génesis fó evidénsia katak Maromak hakarak ita atu moris ba nafatin iha rai. Maromak Jeová kria mundu neʼebé nakonu ho buat neʼebé ema presiza atu bele moris ho kontente. Tuirmai nia kria mane primeiru, Adão, no tau nia iha paraízu ida, iha jardín Eden. Depois neʼe, “Maromak haree buat hotu neʼebé nia halo ona, no ida-neʼe diʼak tebes”.—Génesis 1:26, 31.

Maromak kria Adão nuʼudar ema perfeitu. (Deuteronómio 32:4) Maromak mós kria Adão  nia feen Eva ho isin no neon neʼebé perfeitu. Maromak Jeová hatete ba sira: “Iha oan no sai barak bá, halo nakonu no domina rai neʼe, domina ikan sira iha tasi, animál neʼebé semo no kriatura hotu neʼebé book an iha rai.”—Génesis 1:28.

Presiza tempu atu Adão no Eva iha oan no bei-oan hodi halo mundu sai nakonu hanesan Jeová nia hakarak ba sira. (Isaias 45:18) Se Maromak Jeová hakarak Adão no Eva atu halo nakonu mundu, maibé nia kria sira atu mate antes ida-neʼe akontese, neʼe la lójiku, loos ka lae? Tanba tuir loloos sira presiza tempu neʼebé naruk atu kumpre ida-neʼe.

Hanoin mós kona-ba mandamentu atu domina animál sira. Adão presiza fó naran ba animál sira hotu, no neʼe presiza tempu. (Génesis 2:19) Maibé atu domina sira, neʼe katak Adão presiza aprende kona-ba animál sira-neʼe no oinsá atu tau matan ba sira. Neʼe presiza tempu neʼebé naruk liután.

Entaun, Maromak nia hakarak ba Adão no Eva atu halo nakonu mundu no domina animál sira hatudu katak Maromak kria sira atu moris ba tempu neʼebé naruk. No tuir loloos, Adão moris ba tempu neʼebé naruk duni.

Bíblia temi kona-ba ema sira neʼebé moris ba tempu neʼebé naruk liu fali ita-nia moris ohin loron. Bíblia dehan: “Adão moris toʼo tinan 930.” No Bíblia mós temi kona-ba ema naʼin-neen neʼebé moris liu tinan 900! Neʼe mak Set, Enoc, Kenan, Jared, Metusalém, no Noé. Ema sira-neʼe moris antes Rai-Nabeen iha Noé nia tempu, no Noé moris ona ba tinan 600 antes Rai-Nabeen akontese. (Génesis 5:5-27; 7:6; 9:29) Oinsá mak sira bele moris naruk hanesan neʼe?

Mane sira-neʼe moris besik ho tempu neʼebé Adão no Eva sei perfeitu. Karik neʼe mak razaun tanbasá sira bele moris naruk hanesan neʼe. Maibé oinsá mak moris neʼebé perfeitu liga ho moris neʼebé naruk? No oinsá mak mate sei la iha tan? Atu hatene ninia resposta, primeiru ita tenke komprende uluk tanbasá ita sai ferik-katuas no mate.