Bíblia dehan: “Iha imi-nia moris, keta hadomi osan, maibé kontente ho buat neʼebé imi iha ona.”​—Ebreu 13:5.

Mundu ohin loron oferese buat barak neʼebé dada ita-nia atensaun. Maski nuneʼe, Bíblia dehan katak ita bele ‘kontente ho buat neʼebé ita iha ona’. Oinsá?

Keta “hadomi osan”. Ema sei halo buat hotu tanba “hadomi osan”, maski neʼe estraga sira-nia saúde, família, ransu, morál, no dignidade. (1 Timóteo 6:10) Neʼe aat tebes! Ema neʼebé hadomi rikusoin, ikusmai “sei nunka sai kontente”.​—Eclesiastes 5:10.

Ema mak importante liu fali sasán. Sasán ka rikusoin bele ajuda ita atu halo buat balu. Maibé sasán labele hadomi no hafolin ita; só ema deʼit mak bele. Iha “belun neʼebé loos” bele halo ita-nia moris kontente.​—Provérbios 17:17.

Bíblia dehan: “Laran neʼebé kontente mak ai-moruk neʼebé diʼak.”​—Provérbios 17:22.

Hanesan “ai-moruk neʼebé diʼak”, laran neʼebé kontente bele ajuda ita tahan bainhira kona moras ruma. Maibé oinsá mak ita bele sente kontente kuandu ita moras?

Hatudu agradese. Se ita hanoin liu kona-ba problema neʼebé ita hasoru, “loron hotu” sei mosu deʼit buat neʼebé aat. (Provérbios 15:15) Duké halo nuneʼe, Bíblia anima ita atu “hatudu agradese”. (Koloso 3:15) Koko atu hatudu agradese ba buat diʼak sira neʼebé iha ita-nia moris, maski neʼe mak kiʼik. Loro-matan monu, anin neʼebé fresku, oin-midar husi ema neʼebé ita hadomi, buat sira-neʼe bele halo ita kontente.

Halo buat ruma atu ajuda ema seluk. Maski ita iha saúde neʼebé ladún diʼak, maibé ita sei “kontente liu atu fó duké simu”. (Apóstolu 20:35) Bainhira ema hafolin ita-nia hakaʼas an sira, ita sei sente kontente no neʼe sei ajuda ita atu la hanoin demais kona-ba ita-nia problema rasik. Ita bele halo ita-nia moris kontente hodi ajuda ema seluk halo sira-nia moris kontente.

Bíblia dehan: “Buka-hatene loloos buat sira neʼebé importante liu.”​—Filipe 1:10.

Feen-laʼen neʼebé ladún gasta tempu hamutuk bele lori perigu ba sira-nia relasaun. Feen ka laʼen tenke haree sira-nia pár mak nuʼudar buat neʼebé importante tebes iha sira-nia moris.

Halaʼo atividade hamutuk. Duké halo buat balu mesak, diʼak atu halo planu hodi halo hamutuk. Bíblia dehan katak, “ema naʼin-rua diʼak liu fali naʼin-ida”. (Eclesiastes 4:9) Ita bele prepara han-kalan hamutuk, ezersísiu, kompras, tuur halimar, no halo hamutuk buat neʼebé ita gosta.

Hatudu domin ba Ita-nia pár. Bíblia anima feen no laʼen atu hatudu domin no respeitu ba malu. (Éfeso 5:28, 33) Oin-midar, hakoʼak, ka fó prezente kiʼik ba malu bele hametin liután ita-nia moris kaben nian. No mós, ita tenke laran-metin hodi hatudu hahalok romántiku no hakarak seksuál ba Ita-nia pár deʼit.​—Ebreu 13:4.