Maromak dehan ba Adão: “Iha loron neʼebé ó han ai-fuan neʼe, ó sei mate duni.” (Génesis 2:17) Se Maromak mak kria Adão atu sai katuas no mate, la iha razaun atu fó ukun-fuan neʼe. Adão mós hatene katak se nia la han ai-fuan husi ai-hun neʼe, nia sei la mate.

Adão no Eva la presiza han ai-fuan neʼe atu sustenta sira-nia moris, tanba jardín neʼe nakonu ona ho ai-fuan husi ai-hun barak. (Génesis 2:9) Sira bele hatudu sira-nia laran-metin ba Ida neʼebé fó moris ba sira hodi la han ai-fuan neʼe. No neʼe mós hatudu katak sira rekoñese Maromak deʼit mak iha direitu atu dirije sira-nia moris.

Atu komprende kona-ba neʼe, ita presiza buka-hatene didiʼak saida mak akontese iha jardín Eden neʼebé ikusmai kona ita hotu. Satanás uza samea atu koʼalia lia-bosok. Bíblia dehan katak: “Samea mak animál ida neʼebé matan-moris liu animál fuik hotu iha rai-luan neʼebé Maromak Jeová kria ona. Samea dehan ba feto neʼe: ‘Maromak dehan duni katak imi labele han ai-fuan husi ai-hun hotu iha jardín neʼe ka?ʼ”—Génesis 3:1.

Tuirmai Eva hatán: “Ami bele han ai-fuan husi ai-hun sira iha jardín neʼe. Maibé kona-ba ai-fuan husi ai-hun neʼebé iha jardín nia klaran, Maromak dehan ona: ‘Imi labele han ai-fuan husi ai-hun neʼe, imi labele kaer ai-hun neʼe. Se lae, imi sei mate.’” Rona tiha neʼe, samea dehan ba feto neʼe: “Tuir loloos, imi sei la mate. Tanba Maromak hatene katak iha loron neʼebé imi han ai-fuan neʼe, imi-nia matan sei nakloke no imi sei sai hanesan Maromak hodi hatene buat diʼak no aat.” Ho ida-neʼe, Satanás duun katak Jeová bosok no lakohi Adão no Eva atu hetan moris neʼebé kontente.—Génesis 3:2-5.

Eva fiar buat neʼebé nia rona. Nia hateke ba ai-hun neʼe, no nia haree katak ai-fuan neʼe diʼak no gostu! Nia kuʼu ai-fuan neʼe no han. Bíblia hatete: “Tuirmai, nia fó ai-fuan ba ninia laʼen bainhira hamutuk ho nia, no ninia laʼen mós han.”—Génesis 3:6.

Maromak sente triste tebes bainhira haree ninia oan sira neʼebé nia hadomi la halo tuir tan nia! Saida mak Maromak halo? Jeová hatete ba Adão: “Ó sei . . . fila fali ba rai, tanba ó mai husi rai. Ó mak rai-rahun no ó sei fila fali ba rai-rahun.” (Génesis 3:17-19) Tan neʼe mak, “Adão moris toʼo tinan 930, no nia mate.” (Génesis 5:5) Depois Adão mate, nia la bá moris iha fatin seluk hanesan lalehan. Nia seidauk iha antes Maromak kria nia husi  rai-rahun. Tan neʼe bainhira nia mate, nia lakon ninia moris no fila fali ba rai-rahun. Nia la iha tan. Triste tebes!

Tanba Adão no Eva la laran-metin, sira sai ema neʼebé la perfeitu no lakon oportunidade atu moris ba nafatin. Sira sai ferik-katuas no sala-naʼin. Maibé rezultadu husi sira-nia hahalok neʼe laʼós kona deʼit sira. Sira habelar kondisaun nuʼudar ema sala-naʼin mai ita hotu. Roma 5:12 hatete: “Sala tama iha mundu liuhusi ema ida, no mate tanba sala. Nuneʼe ema hotu mate tanba ema hotu halo ona sala.”

Bíblia temi sala no mate nuʼudar “hena neʼebé falun povu hotu no hena neʼebé taka metin nasaun sira hotu”. (Isaias 25:7) Hena neʼe taka ema hotu hanesan abuabu metan neʼebé ema ida labele halai sai. Loos duni, “ema hotu mate tanba Adão”. (1 Korinto 15:22) Neʼe hamosu pergunta ida, hanesan buat neʼebé apóstolu Paulo husu: “Sé mak sei salva haʼu husi isin neʼebé lori haʼu ba mate neʼe?” Sé mak bele?—Roma 7:24.