Profeta Moisés hatete katak se ita halo tuir Maromak nia ukun-fuan, ita sei simu bensaun. (Deuteronómio 10:13; 11:27) Ita halo tuir Maromak laʼós tanba taʼuk hetan kastigu. Maromak nia hahalok furak sira book ita atu halo tuir nia tanba ita hadomi nia no hakarak sees husi buat neʼebé halo Maromak triste. “Tanba domin ba Maromak signifika katak ita halo tuir ninia ukun-fuan sira.”—1 João 5:3.

Maibé oinsá mak hodi halo tuir Maromak ita bele simu ninia bensaun? Haree toʼok dalan rua tuirmai.

“Haʼu, Jeová, mak imi-nia Maromak, haʼu hanorin imi kona-ba buat neʼebé diʼak liu ba imi, no dirije imi iha dalan neʼebé imi tenke laʼo bá.”​—ISAIAS 48:17.

Maromak Jeová, ita-nia Kriadór, komprende ita no fó matadalan neʼebé ita presiza. Atu ninia hanorin sira bele ajuda ita halo desizaun neʼebé matenek, ita presiza aprende husi Eskritura Sagrada kona-ba saida mak nia hakarak ita atu halo, no aplika buat neʼebé ita aprende ona.

“Ksolok ba sira neʼebé rona Maromak nia liafuan no halo tuir!”​—LUCAS 11:28.

Ohin loron, ema millaun ba millaun neʼebé halo tuir Maromak nia Liafuan hetan kontente neʼebé loos. Porezemplu, mane ida husi España, uluk nervozu aat no trata aat ema seluk inklui ninia feen. Loron ida nia lee buat neʼebé profeta Moisés hakerek kona-ba Jacob nia oan-mane José nia hahalok laran-maus. Ema faʼan José nuʼudar atan no hatama nia ba komarka la ho razaun neʼebé loos, maski nuneʼe, nia nafatin laran-maus, dame, no fó perdua. (Génesis, kapítulu 37-45) Mane neʼe dehan: “Hanoin kona-ba José nia ezemplu motiva haʼu atu haburas hahalok laran-maus, laran-diʼak, no kontrola an. Agora haʼu sente kontente iha haʼu-nia moris.”

Eskritura Sagrada fó matadalan barak kona-ba oinsá atu trata ema seluk. Ita bele haree liután kona-ba neʼe iha informasaun tuirmai.