Imajina toʼok moris iha mundu neʼebé la iha naroman husi loro-matan. Loro-matan fó enerjia ba ai-hun sira atu sira-nia tahan, funan no fuan sira bele moris. Loro-matan mós ajuda ai-hun sira atu xupa bee ho sira-nia abut no bee sira-neʼe halai ba sanak sira, tahan sira, no ikusmai bele prodús fali oksijéniu.

Udan mak prezente husi Maromak atu bele prodús ai-han atu bele han. Maromak fó udan no ai-han barak mai ita no neʼe halo ita-nia laran nakonu ho ksolok.

Aman barak mak hanoin demais kona-ba oinsá mak sira bele tau matan ba sira-nia família nia presiza, hanesan ai-han no roupa. Haree toʼok saida mak Eskritura sira hatete: “Haree didiʼak ba manu sira iha lalehan. Sira la kari fini, la koʼa, no la halibur ai-han ba armazén, maibé imi-nia Aman iha lalehan fó ai-han ba sira. Imi mak folin-boot liu fali sira, loos ka lae?”​—Mateus 6:25, 26.

“Aprende husi ai-funan líriu iha rai-luan, no haree oinsá sira moris. . . . Maibé haʼu hatete ba imi katak, maski [Liurai] Salomão iha buat furak oioin, nia la hatais hanesan ai-funan sira-neʼe ida. Entaun, se Maromak fó-hatais ai-horis iha rai-luan . . . , nia sei hakarak duni atu fó-hatais imi . . . , loos ka lae?”​—Mateus 6:28-30.

Se Maromak bele tau matan ita-nia ai-han no hatais, ita bele fiar katak nia mós bele ajuda ita ho buat seluk tan neʼebé ita presiza iha ita-nia moris. Se ita halo tuir Maromak nia hakarak, nia bele haraik bensaun ba ita-nia hakaʼas an atu ita-nia toos bele fó fuan, ka bele ajuda ita atu hetan serbisu hodi nuneʼe ita bele sosa buat neʼebé ita presiza.​—Mateus 6:32, 33.

Ita iha razaun barak atu haburas domin ba Maromak bainhira ita haree ba loro-matan, udan, manu sira, no ai-funan sira. Informasaun tuirmai sei koʼalia kona-ba oinsá mak ita-nia Kriadór komunika ho ita.