Iha tinan 1949, haʼu-nia apá muda mai iha Austrália husi rai-Alemaña atu buka serbisu iha fatin eletrisidade no mós iha fatin keʼe rai atu buka fatuk-metan, no ikusmai nia hela iha área foho Vitória nian. Iha neʼebá, nia kaben ho haʼu-nia amá no haʼu moris iha tinan 1953.

Tinan balu liutiha, haʼu-nia amá komesa estuda Bíblia ho Testemuña ba Jeová, no haʼu sei hanoin-hetan buat neʼebé haʼu aprende husi Bíblia iha tempu neʼebá. Maibé haʼu-nia apá la gosta relijiaun. Nia komesa halo violénsia oioin, no ida-neʼe halo amá taʼuk. Maibé, amá kontinua estuda Bíblia subasubar no bainhira apá sai ba fatin ruma, nia hanorin haʼu ho haʼu-nia alin-feto kona-ba buat neʼebé nia aprende. Nia koʼalia kona-ba mundu foun no oinsá mak Bíblia nia matadalan bele ajuda ema atu moris kontente.—Salmo (Mazmur) 37:10, 29; Isaías (Yesaya) 48:17.

Bainhira haʼu tinan 18, haʼu sai husi uma tanba apá gosta halo violénsia. Maski haʼu fiar ba Bíblia nia hanorin, maibé haʼu la hafolin no la halo tuir. Haʼu komesa serbisu nuʼudar badain eletrisidade iha fatin oioin neʼebé ema keʼe anar-fatuk. Haʼu kaben bainhira tinan 20. Tinan tolu liutiha, ami-nia oan-feto primeiru moris, neʼe halo haʼu hanoin didiʼak kona-ba saida mak importante liu iha haʼu-nia moris. Haʼu hatene katak Bíblia bele ajuda haʼu-nia família, tan neʼe, haʼu hahú estuda Bíblia ho Testemuña ba Jeová. Maibé haʼu-nia feen la gosta Testemuña sira. Loron ida, bainhira haʼu fila husi reuniaun, haʼu-nia feen haruka haʼu hili, para estuda Bíblia ho Testemuña sira, ka husik família. Haʼu la hatene atu halo saida, tan neʼe haʼu deside atu para estuda Bíblia. Haʼu arrepende an tebes tanba haʼu-nia desizaun neʼe.

Loron ida, kolega sira iha serbisu-fatin hatudu pornografia mai haʼu. Dezeñu neʼe halo haʼu kontente no mós sente hakribi iha tempu hanesan, no ikusmai haʼu fó-sala ba haʼu-nia an. Haʼu hanoin-hetan kona-ba hahalok sira neʼebé kontra hasoru Bíblia, no haʼu sente katak Maromak sei fó kastigu haʼu. Maibé tanba haree beibeik, neineik-neineik haʼu sai toman, no ikusmai sai atan ba pornografia.

 Durante tinan 20 nia laran, haʼu-nia moris sai dook liután husi matadalan sira neʼebé haʼu-nia amá hanorin. Tanba haʼu-nia neon nakonu ho buat neʼebé la moos, haʼu-nia hahalok mós sai aat. Haʼu uza liafuan foʼer no gosta koʼalia halimar kona-ba buat seksuál. Maski haʼu hela hamutuk ho haʼu-nia feen, maibé haʼu mós iha feto seluk. Buat sira-neʼe halo haʼu sente hakribi tebes haʼu-nia an.

Ikusmai, haʼu soe malu ho haʼu-nia feen, no haʼu-nia moris sai runguranga. Haʼu halo orasaun ba Jeová ho laran tomak. Haʼu hahú fali estuda Bíblia maski tinan 20 liu ona. Iha tempu neʼebá, haʼu-nia apá mate tiha ona, no haʼu-nia amá hetan ona batizmu nuʼudar Testemuña ba Jeová.

Haʼu-nia moris dook tebetebes husi Bíblia nia matadalan neʼebé moos no loos. Maibé haʼu hakarak tebes atu sente dame neʼebé Bíblia promete. Haʼu hakaʼas an atu hadiʼa haʼu-nia liafuan no hahalok aat sira, hanesan hirus lalais, moris la morál, joga, hemu tua demais no naʼok patraun nia sasán.

Haʼu-nia kolega serbisu sira la komprende tansá mak haʼu hakarak halo mudansa boot hanesan neʼe. Durante tinan tolu, sira koko beibeik atu halo haʼu fila fali ba toman aat sira-neʼe. No bainhira haʼu monu, hanesan sai hirus derrepente ka hasai liafuan aat, sira haksolok hodi dehan: “Ahá! Neʼe mak Josef neʼebé ami koñese.” Liafuan neʼe halo haʼu triste tebes! Dala barak haʼu sente katak haʼu hakaʼas an mós sei la hetan susesu.

Haʼu-nia serbisu-fatin nakonu ho pornografia. Haʼu-nia kolega sira sempre haruka dezeñu aat liuhusi komputadór, hanesan uluk haʼu halo beibeik. Haʼu koko atu husik toman neʼe, maibé sira buka dalan oioin atu halo haʼu monu fali. Nuneʼe, haʼu husu ajuda ba irmaun ida neʼebé estuda Bíblia ho haʼu. Nia rona didiʼak ho pasiénsia. Depois, nia loke Bíblia hodi hatudu oinsá atu luta hasoru haʼu-nia fraku neʼe, no nia mós anima haʼu atu husu beibeik Jeová nia ajuda liuhusi orasaun.—Salmo (Mazmur) 119:37.

Loron ida, haʼu halibur haʼu-nia maluk serbisu-naʼin sira. Depois, haʼu haruka sira atu fó serveja ba mane naʼin-rua neʼebé hakaʼas an atu husik tua. Sira hotu protesta hodi dehan: “Keta hanesan neʼe! Sira naʼin-rua hakaʼas an atu husik toman aat!” Haʼu dehan: “Loos, hanesan neʼe mós ho haʼu.” Husi tempu neʼebá, sira komprende katak haʼu luta makaʼas atu husik pornografia, no sira la koko tan haʼu.

Lakleur, ho Jeová nia ajuda, haʼu konsege husik pornografia. No iha tinan 1999, haʼu hetan batizmu nuʼudar Testemuña ba Jeová ida. Haʼu agradese tebes tanba agora haʼu bele halaʼo moris neʼebé moos no kontente.

Agora, haʼu komprende tansá mak Jeová odi hahalok oioin neʼebé uluk haʼu toman atu halo. Nia mak Aman domin nian neʼebé hakarak proteje haʼu husi pornografia neʼebé bele estraga ema nia moris. Liafuan iha Provérbios (Amsal) 3:5, 6 mak loos! Eskritura neʼe dehan: “Tau fiar ba Jeová ho ó-nia laran tomak, no labele sadere ba ó-nia matenek rasik. Hanoin didiʼak kona-ba nia iha ó-nia dalan hotu, no nia sei halo loos ó-nia dalan sira.” Bíblia nia matadalan bele proteje ita no ajuda ita atu hetan moris neʼebé kontente.—Salmo (Mazmur) 1:1-3.

Uluk, haʼu hakribi haʼu-nia an, maibé agora haʼu respeitu haʼu-nia an rasik no sente dame iha laran. Haʼu halaʼo moris neʼebé moos, no sente katak Jeová fó perdua ona haʼu no ajuda haʼu. Iha tinan 2000, haʼu kaben fali ho irmán bonita ida naran Karolin, neʼebé mós hadomi tebes Jeová. Ami-nia umakain nakonu ho dame. Ami sente kontente tanba ami sai parte husi família kristaun ida iha mundu tomak neʼebé hadomi malu no hatudu hahalok moos.