Haʼu moris iha sidade Ciudad Mante, fatin kapás iha Tamaulipas. Baibain ema iha sidade neʼe mak laran-luak no laran-diʼak, maibé iha mós perigu barak tanba grupu gang sira neʼebé halo krime oioin.

Haʼu-nia inan-aman iha oan-mane naʼin-haat, no haʼu mak oan segundu. Haʼu sarani iha Igreja Katólika, no bainhira haʼu sei labarik, haʼu hola parte iha koru igreja nian. Haʼu hakarak halo Maromak kontente tanba haʼu taʼuk tebes atu hetan kastigu iha infernu.

Bainhira haʼu tinan lima, haʼu-nia aman husik hela ami. Neʼe halo haʼu triste tebes. Haʼu la komprende tansá mak nia husik ami maski ami hadomi tebes nia. Haʼu-nia inan tenke serbisu ba oras barak atubele sustenta ami.

Tanba haʼu-nia amá sibuk loos, haʼu komesa falta eskola atubele ransu ho labarik sira neʼebé boot liu haʼu. Sira hanorin haʼu atu tolok, fuma, naʼok no baku malu. Tanba haʼu gosta domina ema seluk, haʼu aprende tinju, arte marsiais, no mós oinsá atu uza kilat sira. Haʼu sai joven neʼebé gosta violénsia. Tanba envolve an beibeik iha tiru malu, dala ruma, haʼu hetan kanek no raan suli makaʼas no latan hela iha dalan. Imajina toʼok haʼu-nia inan nia sentimentu bainhira nia hetan haʼu hanesan neʼe no presiza lori haʼu lalais ba ospitál!

Bainhira haʼu tinan 16, haʼu-nia kolega ida naran Jorge mai vizita ami-nia uma. Nia hatete katak nia mak Testemuña ba Jeová ida no hakarak fahe mensajen neʼebé importante. Nia hahú esplika kona-ba ninia fiar hodi uza Bíblia. Haʼu nunka lee Bíblia, tan neʼe haʼu sente kontente atu hatene Maromak nia naran no Ninia hakarak. Jorge konvida ami atu estuda Bíblia hamutuk, no ami simu.

Bainhira haʼu hatene katak Bíblia la hanorin kona-ba infernu, neʼe halo haʼu sente kmaan tebes. (Salmo [Mazmur] 146:4; Eclesiastes [Pengkhotbah] 9:5) Haʼu la sente taʼuk tan ba Maromak, tanba tuir loloos Maromak mak hanesan Aman ida neʼebé nakonu ho domin no hakarak ninia oan sira atu moris ho kontente.

 Nuʼudar haʼu estuda Bíblia, haʼu komprende katak haʼu presiza troka haʼu-nia hahalok. Haʼu tenke sai ema neʼebé haraik-an no la halo violénsia. Konsellu iha 1 Korinto 15:33 ajuda duni haʼu. Ida-neʼe dehan: “Ransu hamutuk ho ema aat sei estraga toman diʼak.” Atubele troka haʼu-nia hahalok, haʼu labele ransu tan ho ema neʼebé bele book haʼu atu halo hahalok aat oioin. Tan neʼe, haʼu para atu ransu ho haʼu-nia kolega uluk nian neʼebé halo beibeik violénsia, maibé komesa ransu ho ema kristaun neʼebé halo tuir Bíblia nia matadalan.

Eskritura ida tan neʼebé kona loos haʼu-nia laran mak Roma 12:17-19, neʼebé dehan: “Keta selu aat ho aat ba ema. . . . Se bele karik, imi bele moris iha dame ho ema hotu. . . . Keta selu aat ba ema, . . . basá hakerek nanis ona: ‘Jeová dehan, haʼu mak iha direitu atu selu aat; haʼu sei selu fali sira-nia hahalok aat.’” Eskritura neʼe halo haʼu fiar katak Maromak Jeová mak sei hadiʼa situasaun neʼebé la iha justisa tuir ninia hakarak. Neineik-neineik, haʼu konsege troka haʼu-nia hahalok.

Haʼu la bele haluha kona-ba buat neʼebé akontese iha kalan ida bainhira haʼu fila daudauk ba uma. Grupu joven ida neʼebé uluk haʼu-nia inimigu ataka haʼu, no sira-nia lider baku haʼu-nia kotuk, no dehan: “Defende toʼok ó-nia an!” Iha momentu neʼebá, haʼu halo orasaun ba Jeová hodi husu ajuda atu tahan ataka neʼe. Maski haʼu hakarak tebes atu baku fali nia, maibé haʼu la halo hanesan neʼe no konsege hasees an. Loron tuirmai, haʼu hasoru fali lider neʼe. Haʼu sente laran-nakali, maibé haʼu husu ba Jeová dala ida tan atu haʼu bele kontrola an. Lider neʼe dehan mai haʼu: “Deskulpa kona-ba buat neʼebé akontese horikalan. Tuir loloos, haʼu hakarak sai hanesan ó. Haʼu hakarak estuda Bíblia.” Liafuan neʼe halo haʼu hakfodak, no haʼu sente kontente tebes tanba haʼu tahan haʼu-nia hirus! Ikusmai, nia mós estuda Bíblia.

Buat neʼebé triste mak haʼu-nia família la kontinua estuda Bíblia. Maibé haʼu deside metin ona katak haʼu sei kontinua estuda no la husik buat ida atu hanetik haʼu. Haʼu hatene katak hodi ransu beibeik ho Maromak nia povu bele kura haʼu-nia laran-kanek, no sira mak bele sai hanesan haʼu-nia família. Ikusmai iha tinan 1991, haʼu hetan batizmu nuʼudar Testemuña ba Jeová ida.

Uluk haʼu rai hirus iha laran, hakarak domina ema seluk, no gosta halo violénsia. Maibé Maromak nia Liafuan troka haʼu-nia moris. Agora haʼu fahe Bíblia nia liafuan diʼak ba ema naran deʼit neʼebé hakarak atu rona. Durante tinan 23 nia laran, haʼu haksolok hodi uza haʼu-nia tempu tomak atu serbí Maromak.

Ba tempu balu, haʼu serbí iha sukursál Méxiku husi Testemuña ba Jeová. Iha neʼebá, haʼu hasoru feto ida neʼebé ativu tebes, naran Claudia, no ami kaben iha tinan 1999. Haʼu agradese tebes ba Jeová tanba haʼu iha feen neʼebé diʼak no laran-metin!

Ami serbí iha kongregasaun ida neʼebé uza língua liman nian hodi ajuda ema tilun-diuk sira atu aprende kona-ba Jeová. Ikusmai, ami hetan konvite atu hanorin Bíblia iha rai-Belize. Maski ami halo simples ami-nia moris, maibé ami la kuran buat ida no moris ho kontente. Ami sente ami-nia moris kompletu ona.

Ikusmai, haʼu-nia inan estuda fali Bíblia no hetan batizmu. Haʼu-nia maun, kuñada, no sira-nia oan naʼin-tolu mós sai ona Testemuña ba Jeová. Haʼu-nia kolega balu neʼebé uluk haʼu fó sasin mós agora serbí Maromak Jeová.

Triste mak haʼu-nia família balu mate tanba sira la troka sira-nia hahalok nervozu aat. Se haʼu la troka haʼu-nia hahalok, karik haʼu mós mate ona. Haʼu agradese ba Jeová tanba nia dada ona haʼu atu hakbesik ba nia no ba ninia atan sira, neʼebé ho pasiénsia no laran-diʼak hanorin haʼu atu moris tuir Bíblia nia matadalan.