Bíblia hatudu katak, dala ruma anju sira proteje fiar-naʼin sira hodi halo tuir Maromak nia hakarak. (Salmo [Mazmur] 34:7) Porezemplu:

• Bainhira Jeová deside atu halakon sidade aat Sodoma no Gomorra, anju sira ajuda ema diʼak naran Lot no ninia família atu halai sai husi sidade neʼe.​—Gênesis (Kejadian) 19:1, 15-26.

• Bainhira liurai Babilónia hatama joven ebreu naʼin-tolu ba fornu neʼebé lakan atu fó kastigu-mate, “Maromak haruka ninia anju” atu salva sira.​—Daniel 3:19-28.

• Bainhira ema soe Daniel ba leaun nia kuak ba kalan ida tomak, “Maromak haruka ninia anju atu taka leaun sira-nia ibun”.​—Daniel 6:16, 22.

Dala ruma, Maromak nia anju sira mós ajuda Jesus nia apóstolu no ema kristaun balu bainhira sira presiza ajuda atu halaʼo Jeová nia hakarak. Porezemplu:

• Anju ida loke odamatan komarka nian hodi ajuda apóstolu sira atu sai livre, no haruka sira atu kontinua haklaken iha templu.​—Apóstolu 5:17-21.

• Anju ida haruka Filipe atu laʼo tuir dalan neʼebé tun husi Jeruzalein atu bá Gaza, no atu haklaken ba ema Etiópia ida neʼebé foin tuir adorasaun iha sidade Jeruzalein.​—Apóstolu 8:26-33.

• Bainhira Maromak fó oportunidade ba ema jentiu atu sai ema kristaun, anju ida mosu ba kapitaun tropa Roma nian ida, naran Cornélio, no haruka nia atu konvida apóstolu Pedro ba ninia uma.​—Apóstolu 10:3-5.

• Bainhira ema hatama apóstolu Pedro ba komarka, anju ida mosu no lori nia sai husi komarka.​—Apóstolu 12:1-11.

Ohin loron, la iha evidénsia neʼebé hatudu katak Maromak uza anju sira atu ajuda ema liuhusi milagre oioin, hanesan uluk nia halo iha Bíblia nia tempu. Maski nuneʼe, Jesus hatete ona kona-ba ita-nia tempu: “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, no depois neʼe mundu nia rohan sei mai.” (Mateus 24:14) Ohin loron, Jesus nia dixípulu sira halaʼo serbisu haklaken neʼe ho anju sira-nia ajuda.Oinsá mak ita bele hatete hanesan neʼe?

Livru Apokalipse hatudu katak anju sira sei serbisu ho badinas hodi ajuda ema iha mundu tomak atu aprende kona-ba Maromak Jeová no ninia hakarak. Apóstolu João hakerek: “Haʼu haree anju ida seluk semo iha lalehan, no nia iha liafuan diʼak atu fó sai ba sira neʼebé hela iha rai, ba nasaun hotu, suku hotu, lian hotu no povu hotu, hodi koʼalia ho lian makaʼas dehan: ‘Hamtaʼuk Maromak no fó glória ba nia, tanba tempu ba ninia tesi-lia toʼo mai ona; tan neʼe adora bá Ida neʼebé halo lalehan no rai, tasi no bee-matan.’” (Apokalipse 14:6, 7) Ohin loron, iha esperiénsia barak neʼebé hatudu katak anju sira mak apoia serbisu haklaken iha mundu tomak. Tuir loloos, bainhira ema ida arrepende an no fila fali ba Jeová, “Maromak nia anju sira sei haksolok”.​—Lucas 15:10.

Entaun, saida mak sei akontese bainhira serbisu haklaken ramata? Anju sira husi “tropa lalehan nian” sei apoia Liurai Jesus Kristu, hodi halo funu Armajedón iha ‘Maromak nia loron boot’. (Apokalipse 16:14-16; 19:14-16) Durante tempu neʼe, Naʼi Jesus sei “selu aat ba sira neʼebé . . . la halo tuir liafuan diʼak”, no anju kbiit-naʼin sira mak sei fó kastigu ba ema aat sira-neʼe.​—2 Tesalónika 1:7, 8.

Ita bele fiar katak anju sira interese ba ita ida-idak. Sira hanoin tebes ema neʼebé hakarak serbí Maromak, no Jeová uza beibeik anju sira atu hametin no proteje ninia atan sira neʼebé laran-metin ba nia.​—Ebreu 1:14.

Ita ida-idak presiza foti desizaun importante. Ita sei rona no halo tuir liafuan diʼak neʼebé habelar daudauk iha mundu tomak ka lae? Testemuña ba Jeová sei kontente atu ajuda Ita hatene oinsá mak ita bele hetan benefísiu husi Maromak nia anju sira.