Ema millaun ba millaun iha mundu tomak fiar katak Natál mak selebrasaun ba Jesus Kristu nia loron-moris. Entaun, Jesus nia dixípulu no apóstolu sira mós selebra Natál ka lae? Saida mak Bíblia nia hanorin kona-ba selebra loron-moris nian? Se ita buka-hatene resposta ba pergunta sira-neʼe, ita sei hatene Natál nia hun.

Primeiru, Bíblia la temi katak Jesus ka ema fiar-naʼin seluk selebra sira-nia loron-moris. Iha Bíblia laran só ema naʼin-rua deʼit mak selebra sira-nia loron-moris. Sira naʼin-rua la adora Maromak Jeová, no durante selebrasaun neʼe, sira halo buat neʼebé aat. (Gênesis [Kejadian] 40:20; Marcos 6:21) Livru ida (Encyclopædia Britannica) hatete katak ema kristaun iha apóstolu nia tempu la simu “ema jentiu nia kostume atu selebra loron-moris”.

Bíblia mós la hatete bainhira loos mak Jesus moris. Livru ida (McClintock and Strong’s Cyclopedia) hatete: “Testamentu Foun la fó sai ho loloos Jesus nia loron-moris.” Ita bele fiar katak se Jesus rasik hakarak atu ninia dixípulu sira selebra ninia loron-moris, nia sei fó sai ninia data moris.

Segundu, la iha eskritura ida iha Bíblia laran neʼebé hatudu katak Jesus ka ninia dixípulu sira selebra Natál. New Catholic Encyclopedia hatete katak selebrasaun Natál temi ba dala primeiru iha ema Roma nia livru ida (Chronograph of Philocalus), maizumenus iha tinan 336 molok Kristu. Neʼe hatudu ho klaru katak selebrasaun neʼe mosu depois Bíblia hakerek kompletu ona no tinan atus ba atus depois Jesus mate. Liután neʼe, livru ida (McClintock and Strong’s Cyclopedia) hatete katak “selebrasaun Natál la mai husi Maromak no la hakerek iha Testamentu Foun”. *

Nuʼudar Mestre Boot, Jesus fó sai ninia hakarak ho klaru ba ninia dixípulu sira no neʼe hotu hakerek iha Bíblia laran. Jesus mós nunka haruka ninia dixípulu atu selebra Natál. Hanesan mestre ida lakohi ninia alunu sira atu halo liu fali buat neʼebé nia haruka, nuneʼe mós ho Jesus. Nia lakohi ninia dixípulu sira “halo liu fali buat neʼebé hakerek tiha ona” iha Bíblia laran.—1 Korinto 4:6.

Maibé iha apóstolu sira-nia tempu, iha selebrasaun ida neʼebé mak ema kristaun sira halo, neʼe mak komemorasaun ba Jesus nia mate. Jesus rasik haruka ninia dixípulu sira atu komemora ida-neʼe no hatudu ba sira oinsá atu halo ida-neʼe. Informasaun kona-ba loron no matadalan atu komemora Jesus nia loron mate hakerek iha Bíblia.—Lucas 22:7, 19; 1 Korinto 11:25.

Klaru katak Natál mak selebrasaun ba loron-moris, no ema kristaun iha apóstolu sira-nia tempu la selebra ida-neʼe tanba neʼe mak ema jentiu nia kostume. Liután neʼe, Bíblia mós la fó sai katak Jesus ka ninia dixípulu sira seluk selebra Natál. Tan neʼe mak ema kristaun barak iha mundu tomak fiar katak Natál la mai husi Bíblia.