1-2. Tuir 1 Pedro 4:7, 8, saida mak sei ajuda ita atu tahan susar sira?

AGORA ita sai besik daudaun ba “loron ikus” sira-nia rohan, tan neʼe karik ita sei hasoru susar neʼebé boot liu. (2 Tim 3:1) Porezemplu, iha nasaun ida iha Áfrika parte oeste akontese violénsia barak depois kampaña eleisaun nian. Durante fulan neen liu, ita-nia irmaun-irmán sira neʼebé hela iha fatin konflitu labele laʼo ho livre. Saida mak ajuda sira atu tahan susar sira-neʼe? Sira balu hela iha irmaun-irmán sira-nia uma iha fatin neʼebé seguru. Irmaun ida dehan: “Iha situasaun hanesan neʼe, haʼu kontente tanba haʼu hamutuk ho belun diʼak sira. Ami bele anima malu.”

² Bainhira “terus boot” komesa, ita sei sente kontente se ita iha belun neʼebé hadomi ita. (Apok 7:14) Tan neʼe, agora mak urjente tebes atu haburas relasaun diʼak nuʼudar belun. (Lee 1 Pedro 4:7, 8.) Ita bele aprende buat barak husi Jeremias. Ninia belun sira ajuda nia tahan susar sira neʼebé akontese antes ema harahun Jeruzalein. * Oinsá mak ita bele banati-tuir Jeremias?

3. (a) Saida mak bele book Jeremias atu hadook an husi ema seluk? (b) Jeremias fó sai saida ba Baruc, no neʼe lori rezultadu saida?

³ Maizumenus durante tinan 40 liu, Jeremias hela iha povu neʼebé la laran-metin nia leet, neʼe inklui ninia viziñu no mós karik ninia família sira husi Anatot. (Jer 11:21; 12:6) Maibé, nia la hadook an husi ema seluk. Tuir loloos, nia fó sai ninia sentimentu ba ninia sekretáriu Baruc neʼebé laran-metin no ita mós bele hatene ninia sentimentu  tanba hakerek ona iha Bíblia laran. (Jer 8:21; 9:1; 20:14-18; 45:1) Bainhira Baruc hakerek buat neʼebé akontese ba Jeremias, ita bele fiar katak Baruc no Jeremias haburas respeitu no domin ba malu.—Jer 20:1, 2; 26:7-11.

4. Jeová husu Jeremias atu halo saida? Oinsá mak knaar neʼe hametin Jeremias no Baruc nia relasaun nuʼudar belun?

⁴ Durante tinan barak, Jeremias ho aten-brani fó avizu ba ema Izraél kona-ba buat neʼebé atu akontese ba Jeruzalein. (Jer 25:3) Bainhira Jeová koko tan atu ajuda povu neʼe atu arrepende an, Jeová husu Jeremias atu hakerek Ninia avizu iha surat-tahan lulun ida. (Jer 36:1-4) Karik Jeremias no Baruc serbisu hamutuk ba fulan barak atu kumpre knaar neʼebé Maromak fó ba sira, no ita bele fiar katak sira koʼalia ba malu kona-ba buat neʼebé hametin sira-nia fiar.

5. Oinsá ita hatene katak Baruc mak Jeremias nia belun neʼebé diʼak?

⁵ Depois hakerek tiha mensajen iha surat-tahan lulun, Jeremias tenke tau fiar ba ninia belun Baruc atu fó sai mensajen neʼe. (Jer 36:5, 6) Baruc ho aten-brani kumpre knaar perigozu neʼe. Ita bele fiar katak Jeremias kontente tebes bainhira Baruc bá templu no lee surat-tahan lulun ba povu neʼe. (Jer 36:8-10) Ulun-naʼin sira husi Judá rona buat neʼebé Baruc halo, no sira haruka nia atu lee surat-tahan lulun neʼe ba sira. (Jer 36:14, 15) Ulun-naʼin sira-neʼe deside atu fó-hatene ba Liurai Jeoquim kona-ba Jeremias nia liafuan. Tanba ulun-naʼin sira-neʼe hanoin Baruc, sira hatete: “Bá no subar, ó no mós Jeremias, no keta halo ema ida hatene fatin neʼebé imi subar.” (Jer 36:16-19) Neʼe mak konsellu neʼebé diʼak!

6. Saida mak Baruc no Jeremias halo bainhira ema kontra sira?

 ⁶ Liurai Jeoquim sai hirus tebes bainhira rona liafuan neʼebé Jeremias hakerek iha surat-tahan lulun, tan neʼe nia sunu ida-neʼe no haruka ema atu kaer Jeremias no Baruc. Maibé, Jeremias la taʼuk. Nia foti surat-tahan lulun ida tan no fó neʼe ba Baruc. Tuirmai Jeremias fó sai Jeová nia mensajen, no Baruc hakerek fali “liafuan hotu neʼebé hakerek ona iha surat-tahan lulun ida uluk neʼebé Liurai Jeoquim husi Judá sunu tiha”.—Jer 36:26-28, 32.

7. Saida mak akontese bainhira Jeremias no Baruc serbisu hamutuk?

⁷ Dala barak ema sira neʼebé tahan susar hamutuk sei sai belun neʼebé diʼak. Tan neʼe, ita bele fiar katak bainhira Jeremias no Baruc serbisu hamutuk atu hakerek fali mensajen husi surat-tahan lulun neʼebé Liurai Jeoquim sunu ona, sira koñese malu liután no sai belun neʼebé diʼak. Oinsá mak mane laran-metin sira-neʼe nia ezemplu bele ajuda ita?

8. Saida deʼit mak bele hanetik ita atu halo belun? Tanbasá ita labele rende an?

⁸ Karik susar ba ita atu fó sai ita-nia sentimentu ba ema seluk tanba uluk ema ruma hakanek ita-nia laran. (Prov 18:19, 24) Ka karik ita sente katak ita la iha tempu no forsa atu haburas relasaun diʼak nuʼudar belun. Maibé, ita labele rende an. Se ita hakarak irmaun-irmán sira-nia apoiu durante tempu susar, ita tenke hakaʼas an hametin ita-nia relasaun nuʼudar belun. Dalan importante ida atu halo nuneʼe mak hodi fó sai ita-nia hanoin no sentimentu ba sira.—1 Ped 1:22.

9. (a) Oinsá mak Jesus hatudu katak nia tau fiar ba ninia belun sira? (b) Tanbasá koʼalia nakloke ba malu bele hametin relasaun nuʼudar belun? Fó toʼok ezemplu ida.

⁹ Jesus hatudu katak nia tau fiar ba ninia belun sira liuhusi koʼalia nakloke ba sira. (João 15:15) Ita bele banati-tuir nia hodi fó sai ita-nia ksolok, neon-susar, no estrese ba ita-nia belun sira. Rona didiʼak bainhira ema ida koʼalia ba Ita, no karik Ita bele haree katak Ita-nia hanoin, sentimentu no planu hanesan ho sira-nia nian. Hanoin toʼok ezemplu husi irmán Cindy neʼebé idade 29. Nia sai belun ho pioneiru ida naran Marie-Louise neʼebé idade 67. Cindy no Marie-Louise haklaken hamutuk beibeik iha loron-kinta dadeer, no koʼalia nakloke ba malu kona-ba tópiku oioin. Cindy hatete: “Haʼu gosta koʼalia kona-ba tópiku importante sira ho haʼu-nia belun sira tanba neʼe ajuda haʼu  hatene no komprende sira diʼak liután.” Hanesan Cindy, bainhira Ita koʼalia kona-ba Ita-nia hanoin no sentimentu ho Ita-nia belun no rona bainhira sira koʼalia, Ita sei hametin Ita-nia relasaun nuʼudar belun.—Prov 27:9.

10. Tuir Provérbios 27:17, bainhira ita haklaken hamutuk ho maluk fiar-naʼin, neʼe lori rezultadu saida?

¹⁰ Hanesan buat neʼebé akontese ba Jeremias no Baruc, bainhira ita haklaken hamutuk ho maluk fiar-naʼin no haree rasik sira-nia hahalok furak, ita bele aprende husi sira no hakbesik liután ba sira. (Lee Provérbios 27:17.) Porezemplu, Ita sente oinsá bainhira Ita haklaken no rona irmaun-irmán sira ho aten-brani defende sira-nia fiar ka ho laran sira fó sai sira-nia fiar kona-ba Jeová no ninia hakarak? Klaru katak Ita sei sai besik liután ba sira.

11-12. Konta toʼok ezemplu ida kona-ba oinsá haklaken hamutuk bele ajuda ita hametin ita-nia relasaun nuʼudar belun.

¹¹ Hanoin toʼok esperiénsia rua neʼebé hatudu oinsá haklaken hamutuk bele ajuda ema sai belun diʼak. Irmán Adeline neʼebé idade 23 husu ninia belun Candice atu hamaluk nia bá haklaken iha fatin neʼebé kongregasaun la haklaken beibeik. Adeline dehan: “Ami hakarak sai laran-manas no haksolok ho ami-nia serbisu haklaken. Ami naʼin-rua presiza hetan anima atu nuneʼe ami bele kontinua serbí Jeová ho laran tomak.” Benefísiu saida mak sira hetan hodi haklaken hamutuk? Adeline dehan: “Iha loron ida-idak nia rohan, ami koʼalia kona-ba oinsá ami sente, buat neʼebé anima ami bainhira haklaken, no oinsá Jeová ajuda ami iha serbisu haklaken. Ami naʼin-rua kontente tebes atu koʼalia ba malu no bele koñese malu diʼak liután.”

¹² Irmán klosan husi rai-Fransa naran Laïla no Marianne haklaken hamutuk durante semana lima iha Bangui, sidade kapitál iha Repúblika Sentru-Afrikana. Laïla dehan: “Marianne no haʼu hasoru susar oioin, maibé tanba ami koʼalia  ba malu no hatudu domin neʼebé loos, ami-nia relasaun nuʼudar belun sai metin liután. Bainhira haʼu haree Marianne sai toman ho situasaun foun, hatudu domin ba ema lokál, no laran-manas atu haklaken, haʼu respeitu liután nia.” Ita la presiza muda ba rai seluk atu bele hetan benefísiu sira-neʼe. Bainhira Ita haklaken hamutuk ho irmaun-irmán sira iha Ita-nia haklaken-fatin, Ita iha oportunidade atu koñese sira diʼak liután no hametin Ita-nia relasaun nuʼudar belun.

13. Saida mak ita sei nota bainhira ita haklaken beibeik hamutuk ho irmaun-irmán sira?

¹³ Kuandu ita haklaken beibeik hamutuk ho irmaun-irmán sira, dala ruma ita nota sira-nia kbiit no mós sira-nia fraku. Saida mak bele ajuda ita? Hanoin kona-ba Jeremias nia ezemplu. Saida mak ajuda nia atu fokus deʼit ba ema nia hahalok diʼak no perdua sira-nia sala?

14. Jeremias aprende saida kona-ba Jeová? Oinsá ida-neʼe ajuda nia?

¹⁴ Jeremias mak hakerek livru Jeremias, no karik nia mós hakerek livru Primeiru no Segundu Reis. Knaar neʼe karik ajuda nia atu haree oinsá Jeová hatudu laran-sadiʼa ba ema neʼebé la perfeitu. Porezemplu, Jeremias hatene katak bainhira Liurai Acab arrepende an husi ninia hahalok aat, Jeová la husik Acab haree ninia família tomak mate durante ninia moris tomak. (1 Reis 21:27-29) Jeremias mós hatene katak Manasés hakanek Jeová nia laran hodi halo buat neʼebé aat liu fali Acab halo, maibé Jeová perdua Manasés tanba nia arrepende an. (2 Reis 21:16, 17; 2 Krón 33:10-13) Istória sira-neʼe karik ajuda Jeremias atu banati-tuir Jeová hodi hatudu pasiénsia no laran-sadiʼa ba ninia belun sira.—Sal 103:8, 9.

15. Oinsá mak Jeremias banati-tuir Jeová nia pasiénsia bainhira Baruc la fokus ba ninia knaar?

¹⁵ Hanoin kona-ba oinsá Jeremias ajuda Baruc bainhira Baruc la fokus ba ninia knaar ba tempu balu. Duké husik kedas ninia belun, Jeremias ajuda Baruc hodi fó sai Maromak nia mensajen neʼebé nakloke no hatudu sai Maromak nia laran-diʼak. (Jer 45:1-5) Ita bele aprende saida husi istória neʼe?

16. Tuir Provérbios 17:9, saida mak ita presiza halo atu hametin nafatin ita-nia relasaun nuʼudar belun?

¹⁶ Tuir loloos, ita labele hein katak ita-nia irmaun-irmán sira sei hatudu hahalok perfeitu. Tan neʼe, bainhira ita iha ona relasaun diʼak nuʼudar belun, ita presiza hakaʼas an atu hametin nafatin relasaun neʼe. Se ita-nia belun halo sala, karik ho laran-diʼak ita presiza fó konsellu neʼebé nakloke ba nia tuir Maromak nia Liafuan. (Sal 141:5) No se sira hakanek ita-nia laran, ita presiza perdua sira. Bainhira ita perdua ona sira, ita labele koʼalia fali kona-ba neʼe. (Lee Provérbios 17:9.) Durante loron ikus sira-neʼe, importante tebes atu fokus ba irmaun-irmán sira-nia hahalok diʼak duké fokus ba sira-nia fraku! Neʼe sei hametin ita-nia relasaun nuʼudar belun. Ita presiza belun diʼak durante terus boot.

17. Oinsá mak Jeremias hatudu katak nia mak belun neʼebé loos iha tempu susar?

¹⁷ Profeta Jeremias nia hahalok hatudu katak nia mak belun neʼebé loos iha tempu susar. Porezemplu, bainhira ema-boot iha liurai nia palásiu naran Ebed-Melec salva  Jeremias husi tanke laran, Ebed-Melec taʼuk katak ulun-naʼin sira sei halo buat aat ba nia. Bainhira Jeremias hatene kona-ba neʼe, nia la nonook deʼit hodi hanoin katak ninia belun bele tahan situasaun neʼe mesak. Maski Jeremias iha komarka laran, nia halo buat neʼebé nia bele halo hodi fahe Jeová nia promesa ba ninia belun Ebed-Melec.—Jer 38:7-13; 39:15-18.

18. Tuir Provérbios 17:17, saida mak ita bele halo bainhira ita-nia irmaun-irmán sira hasoru susar?

¹⁸ Ohin loron, ita-nia irmaun-irmán sira hasoru susar oioin. Porezemplu, sira barak hasoru susar tanba dezastre naturais ka funu. Bainhira neʼe akontese, ita balu karik bele simu sira iha ita-nia uma. Ema seluk karik bele fó ajuda osan. Maibé ita hotu bele halo orasaun hodi husu Jeová atu ajuda sira. Bainhira ita hatene katak ita-nia irmaun ka irmán ida laran-kraik, karik ita la hatene atu dehan saida ka halo saida. Maibé ita hotu bele ajuda. Porezemplu, ita bele gasta tempu hamutuk ho irmaun ka irmán neʼe, rona didiʼak bainhira nia koʼalia, no mós fahe eskritura neʼebé ita gosta neʼebé bele fó kmaan ba nia. (Isa 50:4) Buat neʼebé importante liu mak Ita prontu atu ajuda Ita-nia irmaun-irmán bainhira sira presiza.—Lee Provérbios 17:17.

19. Oinsá mak haburas relasaun diʼak nuʼudar belun agora bele ajuda ita iha futuru?

¹⁹ Ita tenke hakaʼas an atu haburas relasaun diʼak nuʼudar belun ho ita-nia irmaun-irmán sira no hametin relasaun neʼe agora. Tanbasá? Tanba ita-nia inimigu koko atu haketak ita liuhusi lia-bosok no informasaun falsu. Sira sei koko atu halo ita kontra malu. Maibé sira-nia hakaʼas an sei la hetan susesu. Sira sei nunka hakotu ita-nia domin ba malu. Buat naran deʼit neʼebé sira halo sei nunka estraga ita-nia relasaun nuʼudar belun. Tuir loloos, ita-nia relasaun nuʼudar belun sei dura ohin loron no mós ba nafatin!