1. Saida mak bele ajuda ita sente kmaan bainhira ita sente mesak ka hasoru problema? (Salmo 118:5-7)

DALA RUMA Ita sente mesamesak no la iha ema ruma neʼebé ajuda Ita tahan problema sira ka lae? Ema barak sente hanesan neʼe, inklui Jeová nia atan neʼebé laran-metin. (1 Reis 19:14) Se Ita mós sente hanesan neʼe, hanoin-hetan Jeová nia promesa tuirmai: “Haʼu sei nunka husik ó, no haʼu sei nunka fila kotuk ba ó.” Entaun ita bele koʼalia ho konfiansa katak: “Jeová mak haʼu-nia ajuda-naʼin; haʼu sei nunka taʼuk.” (Ebr 13:5, 6) Apóstolu Paulo hakerek liafuan sira-neʼe ba maluk fiar-naʼin sira iha Judeia maizumenus iha tinan 61 EC. Ninia liafuan sira-neʼe fó-hanoin ita kona-ba liafuan iha Salmo 118:5-7.—Lee.

2. Iha lisaun neʼe, ita sei aprende kona-ba saida? Tanbasá?

² Hanesan ema neʼebé hakerek Salmo neʼe, Paulo rasik mós sente ona katak Jeová mak ninia Ajuda-Naʼin. Porezemplu, tinan rua antes nia hakerek karta ba ema Kristaun Ebreu, nia halo viajen neʼebé perigozu iha tasi neʼebé siʼak. (Após 27:4, 15, 20) Antes no durante viajen neʼe, Jeová hatudu iha dalan oioin katak nia mak Paulo nia Ajuda-Naʼin. Ita sei koʼalia kona-ba dalan tolu. Jeová fó ajuda liuhusi Jesus no anju sira, liuhusi autoridade sira, no mós liuhusi maluk fiar-naʼin. Hodi aprende kona-ba akontesimentu sira iha Paulo nia moris, neʼe sei hametin ita-nia fiar ba Maromak nia promesa katak nia mós bele ajuda ita bainhira ita husu.

3. Karik Paulo hanoin kona-ba saida, no tanbasá?

³ Paulo presiza ajuda. Maizumenus iha tinan 56 EC, ema-lubun dada sai Paulo ba templu nia liʼur iha Jeruzalein no koko atu oho nia. Loron tuirmai, bainhira ema lori Paulo ba Sinédriu nia oin, inimigu sira besik atu oho nia. (Após 21:30-32; 22:30; 23:6-10) Iha momentu neʼe, karik Paulo hanoin: ‘Haʼu bele kontinua tahan ida-neʼe toʼo bainhira?’

4. Oinsá mak Jeová ajuda Paulo liuhusi Jesus?

⁴ Ajuda saida mak Paulo simu? Iha kalan depois ema kaer Paulo, “Naʼi” Jesus mosu ba nia no dehan: “Aten-brani bá! Tanba hanesan ó fó sasin ho didiʼak kona-ba haʼu iha Jeruzalein, ó mós tenke fó sasin kona-ba haʼu iha Roma.” (Após 23:11) Liafuan sira-neʼe anima duni Paulo, no Jesus gaba Paulo kona-ba ninia haklaken iha Jeruzalein. No Jesus fó garantia katak Paulo sei toʼo Roma ho seguru hodi bele kontinua haklaken. Depois simu tiha anima, Paulo sente seguru hanesan oan neʼebé ninia aman hakoʼak hela.

5. Oinsá mak Jeová ajuda Paulo liuhusi anju ida? (Haree dezeñu iha livru oin.)

⁵ Paulo hasoru susar saida tan? Tinan rua depois akontesimentu iha Jeruzalein, Paulo saʼe ró ba Itália. Durante ninia viajen mosu anin boot, tan neʼe ema neʼebé serbisu iha ró no mós pasajeiru sira sente katak sira sei mate. Maibé, Paulo la taʼuk. Tanbasá? Nia hatete: “Horikalan, anju ida husi Maromak neʼebé haʼu adora no halo serbisu sagradu, nia hamriik besik haʼu no dehan: ‘Keta taʼuk Paulo. Ó tenke hamriik iha César nia oin, no tanba ó mak Maromak sei hatudu laran-diʼak hodi salva ema hotu neʼebé saʼe ró hamutuk ho ó.’” Jeová uza anju ida atu fó sai fali liafuan neʼebé uluk nia fó sai ona liuhusi Jesus. Ikusmai Paulo toʼo duni Roma.—Após 27:20-25; 28:16.

6. Jesus nia promesa saida mak bele hametin ita, no tanbasá?

⁶ Ajuda saida mak ita simu? Jesus sei apoia ita, hanesan nia mós apoia Paulo. Porezemplu, Jesus promete ba ninia dixípulu hotu: “Haʼu sei hamutuk nafatin ho imi toʼo mundu neʼe nia rohan.” (Mt 28:20) Jesus nia liafuan bele hametin duni ita. Tanbasá? Tanba dala ruma susar ba ita atu tahan situasaun ruma. Porezemplu, bainhira ema neʼebé ita hadomi mate, karik ita triste ba tinan barak. Ka ema balu karik tahan susar oioin tanba idade ona. Ka ema balu tan karik tenke tahan susar tanba depresaun. Maski nuneʼe, ita hetan forsa atu tahan  tanba ita hatene katak Jesus nafatin hamutuk ho ita iha tempu hotu, inklui iha tempu neʼebé susar.—Mt 11:28-30.

7. Tuir Apokalipse 14:6, oinsá mak Jeová ajuda ita ohin loron?

⁷ Bíblia fó konfiansa mai ita katak Jeová fó ajuda mai ita liuhusi anju sira. (Ebr 1:7, 14) Porezemplu, anju sira apoia no dirije ita bainhira ita haklaken liafuan diʼak kona-ba Maromak nia Ukun ba ema husi “nasaun, suku, língua no povu hotu”.—Mt 24:13, 14; lee Apokalipse 14:6.

8. Oinsá mak Jeová ajuda Paulo liuhusi komandante tropa ida?

⁸ Ajuda saida mak Paulo simu? Iha tinan 56 EC, Jesus fó konfiansa ba Paulo katak nia sei toʼo Roma ho seguru. Maibé, ema Judeu balu planu atu ataka nia subasubar hodi oho nia. Bainhira komandante tropa Roma naran Cláudio Lísias hatene kona-ba planu neʼe, nia ajuda Paulo. Cláudio haruka kedas Paulo ba Sezareia no soldadu barak mak proteje Paulo. Sezareia mak dook kilómetru 105 husi Jeruzalein. Iha Sezareia, Governadór Félix haruka “guarda sira atu tau matan ba Paulo iha Herodes nia palásiu”. No iha neʼebá, ema Judeu neʼebé hakarak oho Paulo labele halo aat tan ba nia.​—Após 23:12-35.

9. Oinsá mak Governadór Festo ajuda Paulo?

⁹ Tinan rua liutiha, Paulo nafatin iha komarka iha Sezareia. No Festo mak sai governadór hodi troka Félix. Ema Judeu husu Festo atu haruka Paulo bá Jeruzalein hodi hetan tesi-lia, maibé Festo lakohi. Karik governadór neʼe hatene katak ema Judeu “halo planu atu ema hein [Paulo] iha dalan hodi oho nia”.​—Após 24:27–25:5.

10. Oinsá mak Governadór Festo hatán ba Paulo nia hakarak atu hetan tesi-lia husi César?

¹⁰ Ikusmai, Paulo nia julgamentu halaʼo iha Sezareia. Tanba Festo hakarak “ema Judeu sira gosta nia”, nia husu se Paulo hakarak saʼe ba Jeruzalein atu hetan tesi-lia. Paulo hatene katak karik ema sei oho nia iha Jeruzalein, no nia mós hatene buat neʼebé nia presiza halo atu salva ninia moris, hodi bele toʼo Roma, no kontinua haklaken. Entaun nia dehan: “Haʼu husu atu lori kazu neʼe ba César!” Depois koʼalia tiha ho konsellu-naʼin sira, Festo hatete ba Paulo: “Tanba ó husu atu lori kazu neʼe ba César, neʼe duni ó sei bá César.” Festo nia desizaun neʼe salva Paulo husi ninia inimigu. Liutiha tempu balu, Paulo toʼo Roma, no neʼe dook husi ema Judeu sira neʼebé buka atu oho nia.—Após 25:6-12.

11. Isaias nia liafuan saida mak hametin Paulo?

¹¹ Nuʼudar Paulo hein hela ró atu bá Itália, karik nia hanoin fali avizu neʼebé Jeová fó sai liuhusi profeta Isaias ba ema sira neʼebé kontra Jeová. Jeová dehan: “Halo planu bá, maibé ida-neʼe sei sai runguranga! Fó sai buat neʼebé imi hakarak, maibé ida-neʼe sei la hetan susesu, tanba Maromak hamutuk ho ami!” (Isa 8:10) Paulo hatene katak Maromak sei ajuda nia, no neʼe karik hametin nia bainhira nia hasoru susar.

12. Saida mak Júlio halo ba Paulo? Neʼe ajuda Paulo atu komprende saida?

¹² Iha tinan 58 EC, Paulo komesa ninia viajen ba Itália. Xefe tropa ida naran Júlio mak tau matan ba Paulo nuʼudar prizioneiru. Hahú husi tempu neʼe, Júlio iha podér atu trata aat Paulo ka hatudu  laran-diʼak ba Paulo. Oinsá mak xefe neʼe uza ninia podér? Loron tuirmai bainhira sira toʼo ponte-kais primeiru, “Júlio hatudu laran-diʼak ba Paulo no fó lisensa ba nia atu bá hasoru ninia belun sira”. Júlio mós salva Paulo nia moris. Oinsá? Soldadu sira hakarak atu oho prizioneiru hotu iha ró laran, maibé Júlio hapara soldadu sira-neʼe. Tanbasá? Tanba nia “hakarak atu lori Paulo ho seguru”. Neʼe karik halo Paulo komprende katak Jeová mak uza xefe laran-diʼak neʼe atu proteje no ajuda Paulo.—Após 27:1-3, 42-44.

13. Oinsá mak Jeová bele uza autoridade sira?

¹³ Ajuda saida mak ita simu? Se neʼe tuir Jeová nia hakarak, karik Jeová sei uza ninia espíritu santu neʼebé forsa boot atu book autoridade sira atu halo ninia hakarak. Liurai Salomão hakerek: “Liurai ida nia laran mak hanesan bee iha Jeová nia liman. Nia halo ida-neʼe suli ba fatin neʼebé Nia hakarak.” (Prov 21:1) Liafuan sira-neʼe katak sá? Ema keʼe bee dalan atu bee husi mota bele suli fali ba diresaun seluk tuir sira-nia planu. Nuneʼe mós, Jeová bele uza ninia espíritu santu atu book ukun-naʼin sira-nia hanoin hodi bele tuir ninia hakarak. Bainhira neʼe akontese, autoridade sira sei halo desizaun neʼebé lori benefísiu ba Maromak nia povu.—Kompara ho Ezras 7:21, 25, 26.

14. Tuir Apóstolu 12:5, ita bele halo orasaun kona-ba sé?

¹⁴ Saida mak ita bele halo? Ita bele halo orasaun “kona-ba liurai sira no mós sira hotu neʼebé iha autoridade”. Neʼe importante bainhira ema sira-neʼe presiza halo desizaun neʼebé afeta ita-nia moris no mós ita-nia haklaken. (1 Tim 2:1, 2, nota; Neem 1:11) Hanesan ema Kristaun iha apóstolu sira-nia tempu, ita mós tenke harohan ba Maromak kona-ba irmaun-irmán sira neʼebé iha komarka. (Lee Apóstolu 12:5; Ebr 13:3) Liután neʼe, ita bele halo orasaun kona-ba guarda prizaun neʼebé tau matan ba irmaun-irmán sira-neʼe. Ita bele harohan ba Jeová atu book ema sira-neʼe nia hanoin atu nuneʼe sira bele hatudu hahalok diʼak hanesan Júlio no respeitu ita-nia maluk fiar-naʼin sira.—Após 27:3.

15-16. Oinsá mak Jeová ajuda Paulo liuhusi Aristarco no Lucas?

¹⁵ Ajuda saida mak Paulo simu? Durante viajen ba Roma, dala barak Paulo  simu Jeová nia ajuda liuhusi maluk fiar-naʼin. Mai ita haree ezemplu balu.

¹⁶ Paulo nia belun naʼin-rua neʼebé laran-metin, Aristarco no Lucas, deside atu akompaña Paulo ba Roma. * Sira prontu atu tau sira-nia moris iha perigu laran atu akompaña Paulo, maski karik Jesus la fó-hatene sira katak sira sei toʼo Roma ho seguru. Karik durante sira-nia viajen mak sira foin hatene katak sira sei la mate. Entaun, bainhira Aristarco no Lucas saʼe ró iha Sezareia, karik Paulo harohan ba Jeová, no fó agradese ba Jeová tanba fó ajuda ba nia liuhusi maluk fiar-naʼin sira neʼebé aten-brani.—Após 27:1, 2, 20-25.

17. Oinsá mak Jeová ajuda Paulo liuhusi maluk fiar-naʼin sira?

¹⁷ Durante Paulo nia viajen, maluk fiar-naʼin ajuda nia dala barak. Porezemplu, iha ponte-kais iha sidade Sidon, Júlio fó lisensa ba Paulo atu “bá hasoru ninia belun sira no sira tau matan ba nia”. No tuirmai iha sidade Putéoli, Paulo no ninia maluk sira ‘hetan maun-alin sira iha fatin neʼe no sira husu Paulo no ninia maluk sira atu hela ho sira ba loron hitu’. Ema Kristaun iha fatin sira-neʼe tau matan ba Paulo no ninia maluk sira-nia presiza. Karik Paulo mós fahe esperiénsia neʼebé bele anima no lori ksolok ba sira. (Kompara ho Apóstolu 15:2, 3.) Depois hetan tiha kmaan, Paulo no ninia maluk sira kontinua sira-nia viajen.—Após 27:3; 28:13, 14.

18. Saida mak book Paulo atu fó agradese ba Maromak no sai aten-brani?

¹⁸ Bainhira Paulo laʼo iha dalan atu bá Roma, karik nia hanoin-hetan liafuan neʼebé nia hakerek tinan tolu antes neʼe ba kongregasaun iha Roma: “Ba tinan barak ona haʼu hakarak tebes atu bá vizita imi.” (Rom 15:23) Maibé, karik nia nunka imajina katak nia sei vizita Roma nuʼudar prizioneiru. Klaru katak nia hetan duni aten-brani bainhira nia haree irmaun-irmán  sira husi Roma hein nia iha dalan. “Bainhira haree tiha sira, Paulo fó agradese ba Maromak no sai aten-brani.” (Após 28:15) Eskritura dehan katak Paulo fó agradese ba Maromak kona-ba irmaun-irmán sira-neʼe. Tanbasá? Dala ida tan Paulo bele haree katak Jeová ajuda nia liuhusi maluk fiar-naʼin sira.

19. Tuir 1 Pedro 4:10, oinsá mak Jeová bele uza ita atu ajuda ema?

¹⁹ Saida mak ita bele halo? Ita hatene irmaun ka irmán balu iha kongregasaun neʼebé hasoru daudaun susar tanba moras ka hasoru problema seluk ka lae? Karik ema neʼebé sira hadomi mate. Se ita hatene ema ruma neʼebé presiza ajuda, ita bele husu Jeová atu ajuda ita halo ka hatete buat diʼak ruma ba ema neʼe. Karik buat neʼebé ita halo ka hatete ajuda duni sira. (Lee 1 Pedro 4:10.) * Bainhira ita ajuda ema, karik neʼe bele halo sira tau konfiansa liután ba Jeová nia promesa: “Haʼu sei nunka husik ó, no haʼu sei nunka fila kotuk ba ó.” Neʼe sei halo ita haksolok duni.

20. Tanbasá mak ita bele fiar katak Jeová mak ita-nia Ajuda-Naʼin?

²⁰ Hanesan Paulo no ninia maluk sira, ita mós hasoru problema barak. Maibé, ita hatene katak ita bele sai aten-brani tanba Jeová hamutuk ho ita. Nia fó ajuda mai ita liuhusi Jesus no anju sira. No mós se neʼe tuir ninia hakarak, nia mós ajuda ita liuhusi autoridade sira. No hanesan karik ita rasik sente ona, Jeová uza ninia espíritu santu atu book ninia atan sira-nia laran atu ajuda ita. Tan neʼe, hanesan Paulo, ita iha razaun diʼak atu bele koʼalia ho konfiansa katak: “Jeová mak haʼu-nia ajuda-naʼin; haʼu sei nunka taʼuk. Saida mak ema bele halo ba haʼu?”—Ebr 13:6.