IRMAUN-IRMÁN barak neʼebé uluk muda ba rai seluk atu buka osan, agora fila fali ona ba sira-nia rai rasik. Sira-nia domin ba Jeová no ba sira-nia maluk Kristaun book sira atu muda ba fatin seluk neʼebé presiza liután haklaken-naʼin. (Mt 22:37-39) Sira halo sakrifísiu saida deʼit no bensaun saida mak Jeová haraik ba sira? Atu buka-hatene, mai ita tau fokus ba rai-Kamaroins iha Áfrika.

Iha tinan 1998, irmaun Onésime muda husi rai-Kamaroins ba rai seluk. No durante tinan 14, nia hela iha nasaun seluk. Loron ida, iha reuniaun, nia rona ai-knanoik kona-ba haklaken. Oradór hatete: “Se belun naʼin-rua kail ikan iha fatin neʼebé la hanesan no sira ida hetan ikan barak liu, ida seluk neʼebé hetan ikan uitoan sei muda ba fatin neʼebé ninia belun kaer ikan barak, loos ka lae?”

Ai-knanoik neʼe book irmaun Onésime atu hanoin kona-ba fila fali ba rai-Kamaroins hodi bele ajuda ema barak neʼebé hakarak atu estuda Bíblia. Maibé nia mós hanoin barak. Ba tinan barak nia hela iha rai liʼur, entaun nia bele sai toman fali atu hela iha rai-Kamaroins ka lae? Atu buka-hatene kona-ba neʼe, irmaun Onésime bá vizita rai-Kamaroins durante fulan neen. Tuirmai iha tinan 2012 mak nia muda ba rai-Kamaroins.

Irmaun Onésime konta: “Haʼu presiza hatoman an ho klima neʼebé manas no kondisaun iha haʼu-nia hela-fatin. Iha Reuniaun-Fatin, haʼu presiza hatoman an atu tuur iha kadeira neʼebé la hanesan ho Reuniaun-Fatin uluk nian. Maibé bainhira haʼu tau fokus ba reuniaun, neineik-neineik haʼu haluha kona-ba tuur-fatin.”

Iha tinan 2013, irmaun Onésime kaben ho irmán ida naran Géraldine. Uluk irmán Géraldine hela iha rai-Fransa durante tinan sia no tuirmai muda fali ba rai-Kamaroins. Bensaun saida mak sira hetan tanba tau uluk Jeová nia hakarak? Irmaun Onésime dehan: “Ami tuir Eskola ba Haklaken-Naʼin Tempu-Tomak no serbí iha Betel. Tinan kotuk, estudante Bíblia naʼin-20 iha ami-nia kongregasaun mak hetan batizmu. Haʼu sente katak agora haʼu ‘kail’ iha fatin neʼebé loos.” (Mc 1:17, 18) Irmán Géraldine hatete: “Haʼu simu bensaun barak liu fali buat neʼebé haʼu imajina.”

Irmán Judith muda ba Estadus Unidus, maibé nia hakarak atu aumenta liután ninia serbisu haklaken. Nia konta: “Kuandu haʼu vizita tiha haʼu-nia família iha rai-Kamaroins, no atu fila fali ba Estadus Unidus, haʼu tanis tanba presiza husik hela haʼu-nia estudante Bíblia.” Maski nuneʼe, irmán Judith dada an atu muda ba rai-Kamaroins. Nia iha serbisu ho saláriu boot neʼebé bele ajuda nia atu selu ninia apá nia  konsulta iha rai-Kamaroins. Maibé, irmán Judith tau fiar ba Jeová, no nia muda ba rai-Kamaroins. Nia hatete katak dala ruma nia hanoin kona-ba buat diʼak oioin neʼebé uluk nia iha. Nia halo orasaun ba Jeová atu ajuda nia atu sai toman ho situasaun foun. No nia hetan duni laran-manas husi katuas área no ninia feen.

Bainhira irmán Judith hanoin fali kona-ba ninia desizaun, nia hatete: “Iha tinan tolu nia laran, haʼu ajuda ona ema naʼin-haat atu hetan batizmu.” Irmán Judith serbí nuʼudar pioneiru espesiál. No ohin loron, nia akompaña ninia laʼen Sam-Castel atu serbí nuʼudar katuas área. Maibé oinsá ho irmán Judith nia apá? Irmán Judith no ninia família hetan ospitál iha rai seluk neʼebé bele halo operasaun ba ninia apá ho gratuitu. Sira kontente tebes tanba operasaun laʼo ho diʼak.

Irmaun ida naran Victor muda ba rai-Kanadá. Bainhira nia lee informasaun kona-ba edukasaun boot husi Livru Haklaken, nia hanoin kona-ba ninia edukasaun. Nia para husi universidade no komesa tuir kursu ruma. Nia hatete: “Ida-neʼe ajuda haʼu atu hetan lalais serbisu no atu kumpre haʼu-nia planu atu serbí nuʼudar pioneiru.” Tinan balu liutiha, irmaun Victor kaben ho irmán Caroline, no sira bá vizita rai-Kamaroins. Iha tempu neʼebá, bainhira sira bá vizita sukursál, irmaun balu anima sira atu serbí iha rai-Kamaroins. Irmaun Victor hatete: “Ami la iha razaun atu la simu konvite neʼe, no tanba ami halaʼo moris neʼebé simples, entaun ami bele simu konvite neʼe.” Maski irmán Caroline iha problema saúde, maibé sira deside atu muda ba rai-Kamaroins.

Irmaun Victor no irmán Caroline komesa serbí nuʼudar pioneiru regulár hodi bele ajuda ema neʼebé hakarak atu aprende Bíblia. Sira rai osan natoon, tan neʼe foufoun sira la presiza buka serbisu iha rai-Kamaroins. Maibé tuirmai sira halo serbisu durante fulan balu iha rai-Kanadá, no fila fali ba rai-Kamaroins atu kontinua pioneiru. Bensaun saida deʼit mak sira hetan? Sira tuir Eskola ba Haklaken-Naʼin Tempu-Tomak, serbí nuʼudar pioneiru espesiál, no agora serbí nuʼudar serbisu-naʼin ba konstrusaun. Irmaun Victor hatete: “Tanba ami husik tiha ami-nia moris neʼebé diʼak, ami rasik bele haree oinsá Jeová tau matan mai ami.”

Iha tinan 2002, irmaun Alain, eskola iha universidade iha rai-Alemaña, no nia lee panfletu Joven sira—Saida mak Imi sei Halo ho Imi-nia Moris? Informasaun neʼe book nia atu halo planu foun. Iha tinan 2006, nia tuir Eskola Treinu Atan Kristaun no hetan knaar atu serbí iha rai-Kamaroins, ninia moris-fatin.

Iha rai-Kamaroins, irmaun Alain hetan serbisu part-time. Lakleur nia hetan serbisu seluk ho saláriu boot, maibé nia hanoin barak se ida-neʼe sei hamenus ninia tempu atu haklaken no hanorin ema. Bainhira nia hetan konvite atu serbí nuʼudar pioneiru espesiál, nia simu kedas. Ninia patraun oferese saláriu boot, maibé irmaun Alain kaer metin ba ninia desizaun. Tinan balu liutiha, irmaun Alain kaben ho irmán Stéphanie neʼebé uluk hela durante tinan barak iha rai-Fransa. Susar saida mak irmán Stéphanie hasoru bainhira muda fali ba rai-Kamaroins?

 Irmán Stéphanie hatete: “Haʼu iha problema saúde no alerjia, maibé haʼu halo tratamentu balu atu bele sente kmaan.” Feen-laʼen neʼe hetan bensaun tanba kontinua tahan. Irmaun Alain hatete: “Bainhira ami haklaken iha knua ida neʼebé dook naran Katé, ami hasoru ema balu neʼebé hakarak atu estuda Bíblia. Lakleur, ami estuda ho sira balu liuhusi telefone. Estudante naʼin-rua mak hetan batizmu, no agora iha grupu iha knua neʼe.” Irmán Stéphanie hatutan: “Ita hetan ksolok boot tebes bainhira ajuda ema kumpre kritéria atu dedika sira-nia an ba Jeová. Hodi serbí iha neʼe, ami sente duni ksolok neʼe dala barak.” Ohin loron, irmaun Alain serbí nuʼudar katuas área hamutuk ho ninia feen.

Irmán Gisèle hetan batizmu bainhira nia eskola médiku iha rai-Itália. Nia aprende Bíblia ho feen-laʼen pioneiru ida. No nia gosta tebes feen-laʼen neʼe nia ezemplu kona-ba moris simples, no nia hakarak atu aumenta ninia serbisu haklaken. Entaun Gisèle komesa serbí nuʼudar pioneiru regulár no iha tempu hanesan nia remata ninia estudu.

Irmán Gisèle hakarak atu fila fali ba rai-Kamaroins hodi bele serbí Jeová liután. Maibé nia hanoin barak. Nia hatete: “Neʼe katak haʼu sei lakon haʼu-nia direitu legál atu hela iha rai-Itália no haʼu mós presiza hela dook husi haʼu-nia família no belun sira neʼebé hela iha rai-Itália.” Maski nuneʼe, iha fulan-Maiu 2016, irmán Gisèle fila fali ba rai-Kamaroins. Tempu balu liutiha, nia kaben ho irmaun naran Léonce. No sukursál iha rai-Kamaroins rekomenda sira atu muda ba sidade Ayos neʼebé presiza tebes haklaken-naʼin.

Moris iha sidade Ayos mak hanesan saida? Irmán Gisèle konta: “Dala ruma, eletrisidade mate ba semana balu, no ami labele karrega ami-nia telemovel. Dala barak ami labele uza ami-nia telemovel. Haʼu aprende atu teʼin hodi uza ai-sunu, no ami lori karrosa no lampra atu bele kuru bee iha kalan bainhira ema la iha.” Saida mak ajuda sira tahan? Irmán Gisèle hatete: “Jeová nia espíritu santu ajuda ami atu tahan. Ami mós apoia malu. Ami-nia família no belun sira mós anima ami no dala ruma sira haruka osan.”

Irmán Gisèle sente kontente tanba fila ba ninia rai ka lae? Nia hatán: “Sin! Haʼu kontente duni. Foufoun ami hasoru duni susar no ami sente laran-kraik, maibé kuandu ami tahan buat sira-neʼe, ami sente katak ami halo duni buat neʼebé ami hakarak atu halo. Ami tau fiar ba Jeová no ami sai besik liután ba nia.” Irmaun Léonce no irmán Gisèle tuir Eskola ba Haklaken-Naʼin Tempu-Tomak, no agora sira serbí temporáriu nuʼudar pioneiru tempu-tomak.

Hanesan peskadór neʼebé hatudu aten-brani atu kail ikan barak maski hasoru susar oioin, sira neʼebé fila fali ba sira-nia rai halo sakrifísiu atu ajuda ema laran-loos neʼebé hakarak atu simu lia-loos. Klaru katak Jeová sei hanoin-hetan sira-nia serbisu no domin neʼebé sira hatudu ba Ninia naran. (Neem 5:19; Ebr 6:10) Se Ita hela iha rai liʼur no Ita-nia rai rasik presiza liután haklaken-naʼin, Ita prontu atu fila fali ka lae? Se sin, Jeová sei haraik bensaun barak ba Ita.​—Prov 10:22.